ɄLʉfingo ʉLʉpia mu njovele ja Kɨvwanji

ɄYesu akahʉma mʉ nyumba ɨnyɨmɨke ɨja kufunyila. Ye ilʉta, avavʉlanɨsɨvua vaake vakalʉta pa mwene, vakansoona ʉvʉjenge ʉvwa nyumba ɨnyɨmɨke ɨja kufunyila. Neke ʉYesu akavavʉʉla akati, “Se seene, mulola ʉvʉjenge vwoni ʉvʉ vʉle vʉjengilue! Kyangʼhaani nɨkʉvavʉʉla kuuti, nalɨlasighala nambe lɨvue lɨno lilighelama pa lɨvue ɨlɨngɨ, ghooni ghilihemʉlua.”


ɄYesu akalʉta pa kɨdunda ɨkya Miseituni, akikala. Avavʉlanɨsɨvua vaake vakalʉta pa mwene, vakijekela, vakamposia vakati, “Tusʉʉma ʉtʉvʉʉle, isio sino ʉtʉvʉlile silivombeka lɨɨghi? Kange, kɨvalɨlo kɨki ɨkya kʉtʉhʉfia kuuti ʉnsiki ʉghwa kwisa ʉve, nʉ vʉsililo vwa ɨɨsi, ghʉfikile?”
ɄYesu akavamʉla akati, “Mʉvisaghe maaso, ʉmuunhu naangavasyangaghe! Ʉlwakʉva vinga vilikwisa mʉ lɨtavua lyango, nʉjʉnge itisagha, ‘Neene Kɨlɨsite.’ Avaanhu avuo vilikʉvasyanga vinga. Mʉlaava mupʉlɨka ʉvʉlʉgʉ ni mhʉli isa vʉlʉgʉ, mʉlekaghe pikwoghopa. Ndalʉve ndaani isio silivoneka taasi, neke ʉnsiki ʉghwene ʉghwa vʉsililo ghuuva ghʉkyale.” Ifighono ifio ɨɨsi jɨlalwisagha nɨ ɨɨsi ɨjɨngɨ, kange ʉvʉtwa kulua nʉ vʉtwa ʉvʉnge. Imbale ni mbale kwejiliiva ɨnjala ni fisenyeena. Isio sooni vuuva vʉtengʉlɨlo, ndavʉle ʉvʉvafi ʉvwa mʉkɨjʉʉva, pano ʉnsiki ʉghwa kʉpaapa ʉmwana ghʉfikile.
“Ʉnsiki ʉghuo, mulikolua na kupumusivua na kubudua. Avaanhu imbale sooni vilikʉvakalalɨlagha, ʉlwakʉva mʉkʉmbɨngɨlɨla ʉne. Pepano avaanhu vinga vilivʉhɨɨla kʉkʉmbɨngɨlɨla ʉne. Vilikwohelanagha kʉ valʉgʉ na kukalalɨlanɨla. Kange, avavɨli vinga ava vʉdesi vilihʉmɨla na kʉkʉvasofia avaanhu vinga. Avaanhu vinga viliiva vahosi. Mʉ ʉluo avaanhu vinga vilivʉhɨɨla kʉkʉvaghana avange. Neke jʉno ikuguda kuhanga kufika kʉvʉsililo, ʉjuo ghwe alakuluka. ƗMhola ɨNofu ɨja Vʉtwa vwa Ngʉlʉve jilipʉlɨsɨvua mʉ ɨɨsi sooni, kuuti vʉʉve vwolesi kʉ vaanhu vooni, pepano ʉvʉsililo vwa ɨɨsi vukwisa.


“Ʉnsiki ʉghuo mʉlavona ‘Ɨkɨɨnu kɨno kipelela ʉvʉlamafu’ ɨnyumba ɨnyɨmɨke ɨja kufunyila, kyɨmile Pavwɨmɨke, ndavʉle alyajovile ʉmʼbɨli ʉDanieli. Jʉno ikwɨmba amasio agha alʉtangʼhaniaghe. Apuo pepano vano valɨ mʉ Yudea, vakɨmbɨlɨlaghe kʉ fidunda, jʉno alɨ pa kɨtʉvɨlɨ, naangikaghe kutoola fimonga mʉ nyumba. Nambe jʉno alɨ kʉ mʉghʉnda, naangagomokaghe kʉ kaaja kutoola ɨlɨkooti lyake. Ɨga avakɨjʉʉva vano viliiva vakunue na vano vilikwongʼhelesyagha ifighono ifio! Mʉsʉmaghe kwa Ngʉlʉve kuuti, ʉnsiki ʉghuo ʉghwa kʉkɨmbɨla, ghʉleke piiva nsiki ghwa fula nɨ mhepo nambe ɨkɨghono ɨkya Sabati. Ʉlwakʉva ifighono ifio, kwelʉliiva ʉlʉpumuko ʉlʉkome lʉno nalʉghelile kuvoneka kuhʉma ʉNgʉlʉve ipela ɨɨsi, kuhanga kufika ʉmʉsyʉghʉ. Kange, nalʉlavoneka lʉsiku. ɄNgʉlʉve ale aleke kukepʉsia ifighono ifio, nakwale ʉghwa kʉkuluka. Neke vwɨmɨla avasalʉlua vaake, ilikepʉsia ifighono ifio.
“Ʉnsiki ʉghuo, ʉmuunhu angati, ‘Lola, ʉKɨlɨsite alɨ apa,’ nambe, ‘Alɨ kʉla,’ namʉngɨtɨkaghe. Ʉlwakʉva valiisa avaanhu vano vikutambʉlagha nʉjʉnge iiti ghwe ‘Kɨlɨsite,’ avange viliiva vavɨli va vʉdesi. Avuo vihʉfyagha ifivalɨlo ifivaha ni fidegho kuuti vavasofie avaanhu, nambe avasalʉlua va Ngʉlʉve. Mʉvisaghe maaso, ʉlwakʉva nɨvavʉliile ngʼhaani pano sikyale pikwisa. Lɨno vangavavʉʉle kuuti, ‘Lola, ʉMesiya alɨ kʉ lʉnyika,’ namʉngalʉtaghe. Nambe vangati, ‘Lola, alɨ kʉkate,’ namʉngɨtɨkaghe. Ʉlwakʉva ndavʉle ʉlʉmuli lwa fula vʉle lumulika na kuvoneka imbale sooni, fye luliiva niliiva nikwisa ne Mwana ghwa Muunhu, kulivoneka imbale sooni. Kʉno kwelɨlɨ ɨlɨkanu ɨlɨfue kwe kʉno amatumbusi ghikongʼhaana.


“Ifighono ifio ifya lʉpumuko filiiva fisilile,
‘ɨngʼhiisi jɨlakupikila ɨlɨjʉva,
naghʉ mwesi naghʉlavala,
inhondue silasangʉka kuhʉma kʉkyanya,
ni fiinu fyoni ifya kʉkyanya filasukanɨka.’
“Pepano avaanhu vilikʉfyagha ifivalɨlo kʉkyanya, fino fihʉfia kuuti ne Mwana ghwa Muunhu nikwisa. Avaanhu ava fisina fyoni vilitengʉla kulɨla nʉ lʉdwesi. Valambona ne Mwana ghwa Muunhu nikwisa mʉ mafunde kuhʉma kʉkyanya. Nikwisa ni ngʉfu nyinga nʉ vʉvaha. Pe nilikʉvasuungʼha avanyamhola vango kʉmo lukuuta ʉlʉkelemo, kuuti vavakongʼhanie avasalʉlua vooni ava Ngʉlʉve kuhʉma imbale sooni isa ɨɨsi, kutengʉlɨla ʉlʉbale lʉmo ʉlwa vʉsililo vwa ɨɨsi, kufika ʉlʉbale ʉlʉnge ʉlwa vʉsililo vwa ɨɨsi.”


ɄYesu akafijovagha akatisagha, “Mʉmanyɨlaghe ɨkɨhwanɨkɨsio ɨkya mpiki ʉntini. Pano inhaafi saake silemba na kuuva na matʉndʉ, mʉkagʉlaghe kuuti amasiki gha fula ghalɨ piipi. Fye lʉlaava, muliiva mʉkʉsivona sooni isi sino nɨvoliike sivombeka, mʉkagʉlaghe kuuti nɨlɨ piipi kukwisa. Kyangʼhaani nɨkʉvavʉʉla niiti, ɨkɨsina ɨkɨ nakɨlakila kuhanga isi sooni sivombeke. Ʉvʉlanga nɨ ɨɨsi filakila, looli amasio ghango naghalakila nambe padebe.


“Neke ɨkɨghono nʉ nsiki ʉghwa kwisa ʉne ne Mwana ghwa Muunhu, nakwale jʉno akagwile nambe avanyamhola kʉkyanya, nambe jʉʉne ne Mwana, looli jʉ Nhaata mwene. Ʉlwakʉva niliiva nikwisa ne Mwana ghwa Muunhu luliiva ndavʉle lʉlyale ifighono ifya Nwaka. Ifighono ifio ye lʉkyale kukwisa ʉlʉtalamu ʉlwa ghalika, avaanhu valyale vilia na kunyua, vitoola na kutolua kuhanga ɨkɨghono kɨla pano ʉNwaka ikwingila mʉ safina. Avaanhu avuo navalyakagwile kɨmonga kuhanga pano ɨghalika jikwisa, vakafua vooni. Enendɨɨkɨ fye lʉlaava niliiva nikwisa ne Mwana ghwa Muunhu. Ifighono ifio avaanhu vavɨlɨ viliiva pa mʉghʉnda, ʉjʉnge nɨkʉntoola kuuva palɨkɨmo nuune, ʉjʉnge nɨkʉmʉleka. Avakɨjʉʉva vavɨlɨ viliiva pihavʉla, ʉjʉnge nɨkʉntoola kuuva palɨkɨmo nuune, ʉjʉnge nɨkʉmʉleka.
“Lɨno, mʉvisaghe maaso, ʉlwakʉva namʉkagwile ɨkɨghono kɨno ʉMʉtwa ghwinu ikwisa. Looli mʉkagʉlaghe kuuti, ʉnya nyumba ale akagʉle ʉnsiki ghʉno ʉmʉlyasi ikwisa, ale ikukala maaso, naale ileka ʉmʉlyasi amemʉle ɨnyumba jaake. Lɨno, na jʉmue mʉvisaghe mulɨngʼhanisie, ʉlwakʉva ne Mwana ghwa Muunhu nilikwisa ʉnsiki ghʉno namuhʉvɨɨla.”


ɄYesu akavaposia akati, “Ghwe veeni ʉmʼbombi ʉnnofu, ʉnya lʉhala? Ʉmʼbombi jʉno ʉntwa ghwake amʼbɨkile kuuva mwɨmɨlɨli ghwa vavombi avange mʉ nyumba jaake, kuuti avapelaghe ɨkyakʉlia ʉnsiki ghʉno ghʉnoghiile. Kʉba ʉmʼbombi ʉjuo jʉno ʉntwa ghwake iliiva igomoka, ɨkʉmwagha ivomba sino akamʉlaghiile. Kyangʼhaani nɨkʉvavʉʉla kuuti, ɨkʉmʼbɨɨka ʉmʼbombi jʉla, ɨmɨlɨlaghe ifiinu fyake fyoni. Neke ʉmʼbombi ʉmʼbiivi angasaaghe mʉ mwojo ghwake kuuti, ‘Ʉntwa ghwango idɨɨla kugomoka.’ Pe atengʉle kutova avavombi avajaake, alisaghe na kunyua palɨkɨmo na vaghaasi, ʉntwa ghwake angagomoke ɨkɨghono nʉ nsiki ghʉno ʉmʼbombi jʉla ijekiile alɨsingi, kyaɨkʉntemania na kʉkʉmʼbɨɨka kʉ lʉpumuko palɨkɨmo na vakedʉsi. Ʉkuo kwe vililɨlagha na kugwegwenʉla amiino vwɨmɨla ʉvʉvafi ʉvʉkome vʉno valɨ navwo.”

Listen to Mataayi 24