℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

該時，施洗 約翰 來到 猶太 个曠野傳道。 佢講：「你等愛棄絕罪惡，因為天國會實現了！」 約翰 就係先知 以賽亞 所講个人；佢講：
在曠野有人喊講：
「愛準備好勢主个道路，
修直佢所愛行个細路！」
約翰 著等駱駝毛做个衫，腰圈䌈等皮帶；食草蜢㧯野蜂糖過日仔。 眾人對 耶路撒冷 、 猶太 全地，㧯 約旦 河一帶地方來到佢面前。 佢等承認自家个罪； 約翰 就在 約旦 河為佢等行洗禮。
約翰 看到盡多法利賽人㧯撒都該人也來要求領洗禮，就對佢等講：「你這兜毒蛇啊！上帝个審判會到了，你等恅到閃得開嗎？ 愛用行為來證明你等已經棄絕罪惡。 毋好恅到 亞伯拉罕 係你等个祖先就做得免受審判。𠊎㧯你等講，上帝能對這兜石頭為 亞伯拉罕 造出子孫來！ 斧頭已經放在樹根頂囉，凡無結好果子个樹仔全部愛斬掉，㧒落火底背。 𠊎用水為你等行洗禮，表示你等已經悔改；總係，該比𠊎較慢來个，愛用聖靈㧯火為你等行洗禮。佢比𠊎偉大盡多，𠊎就係代佢擐鞋也係無資格。 佢个手拿等簸箕，愛將打麥場拚淨，將麥仔收入倉庫，將冇仔用永遠不滅个火燒掉！」


該時，耶穌對 加利利 去 約旦 河見 約翰 ，愛對佢領洗禮。 約翰 想愛改變佢个主意，就講：「𠊎應當接受你个洗禮，你樣般反轉來就𠊎！」
總係耶穌應講：「這下愛恁樣行，因為𠊎等恁樣做係實行上帝个旨意。」所以， 約翰 就順佢个意思。
耶穌領洗禮以後，即時對水中上來，天就為佢開；佢看到上帝个靈像月鴿仔恁樣降下來，落在佢个身上。 同時，對天頂有聲音講：「這係𠊎所惜个孻仔，𠊎所歡喜个。」

Listen to 馬太 3