℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

後來，耶穌被聖靈帶去曠野，受魔鬼个試探。 禁食四十日夜以後，耶穌就肚飢。 該試探人个進前來，對佢講：「你若係上帝个孻仔，命令這兜石頭變做麵包啊！」
耶穌應講：「聖經講：『人个生存毋係單淨靠食物，係靠上帝所講个逐句話。』」
魔鬼又帶耶穌去聖城，喊佢企在聖殿最高个所在， 對佢講：「你若係上帝个孻仔，跳下去；因為聖經有講：
上帝會為你吩咐佢个天使，
用佢等个手扶等你，
使你个腳毋會撞到石頭。」
耶穌應講：「總係聖經也講：『做毋得試探主 — 你个上帝。』」
最後，魔鬼帶耶穌上一座盡高个山，俾佢看世間萬國㧯它兜个榮華富貴。 魔鬼講：「你若係跪下來拜𠊎，𠊎就將這一切全部給你。」
耶穌講：「撒但，閃開！聖經講：『愛拜主 — 你个上帝，單單事奉佢。』」
恁樣，魔鬼就離開耶穌，有天使來服事佢。


耶穌聽到 約翰 被人關在監獄肚，就閃到 加利利 去。 佢毋住在 拿撒勒 ，反轉去住在 迦百農 。該城在 西布倫 㧯 拿弗他利 个地區，接近 加利利 湖。 這就應驗先知 以賽亞 个話：
西布倫 㧯 拿弗他利 个地方，
在沿海个大路上，
在 約旦 河對面該片，
外邦人个 加利利 ！
住在烏暗中个人
已經看到大光；
住在死蔭之地个人
有光照佢等。
對該時開始，耶穌傳道理講：「你等愛棄絕罪惡，因為天國會實現了！」


耶穌順 加利利 湖邊行，看到兩個打魚个兄弟， 西門 (偏名 彼得 ) 㧯厥老弟 安德烈 ，當在湖中委網打魚。 耶穌對佢等講：「來跈𠊎！𠊎愛使你等得到人像打到魚一樣。」 佢等即時放下網仔，跈耶穌去。
耶穌又向前行，看到另外兩個兄弟，就係 西庇太 个孻仔 雅各 㧯 約翰 ；佢等同阿爸共下在船頂整理魚網。耶穌呼召佢兩儕， 佢等即時離開船㧯阿爸，跈耶穌去。


耶穌行遍 加利利 全地，在各地方个會堂教訓人，宣傳天國个福音，醫好民間逐樣个病。 佢个名聲傳遍 敘利亞 ，所以該位个人民將各種个病人，經歷各樣痛苦个人，像被鬼附身个、豬乸瘵个、癱風个，全部帶來佢面前；佢攏總醫好佢等。 歸群个人對 加利利 、 十邑 、 耶路撒冷 、 猶太 㧯 約旦 河東片來跈佢。

Listen to 馬太 4