If you would like a copy of this version please contact info@davaraudiobibles.org

Gonja Bible

Kewushiachɛ ko Yesu nɛ mbe bebɛsopo na adurbi be kudɔ to a choŋ nɛ mbe bebɛsopo fara a buri adurbi na be ako a far a wɔtɔ bumo be enɔana to a we. Nɛ Efarisiana ko bishi bumo: “Manɛ e ba nɛ menyee wora kusɔ nɛ anyi be mbra na bee kishi kewushiachɛ?” Nɛ Yesu bishi bumo: “Men maŋ naŋ kraŋ kusɔ nɛ Ewura Deevid daŋ wora saŋɛ nɛ akoŋ daŋ pɛ mo nɛ basa nɛ b daa wɔ mo kutɔ na nna a? E daŋ yɔ Ebɔrɛ be lambu to nna n ya ta bodobodo nɛ b daŋ ta n lara sarga n sa Ebɔrɛ na nna nɛ mo nɛ basa na we, ŋkeshin nɛ anyi be mbra na bee kaŋɛ fanɛ bɔrɛmatapo na nawule e naaŋ tiŋ n we loŋ be bodobodo na.” Kamalga ere be kaman nɛ Yesu naŋ kaŋɛ bumo: “Ma, Nyiŋgbasa Pibinyɛn na e la kewushiachɛ na be Enyɛnpe.”


Kewushiachɛ ko malɛ Yesu yɔ nshɛrbu na to n ya ŋini basa abɔrɛsheŋ nɛ kanyɛn ko malɛ kɔ enɔjiso wuso a wɔ ndoŋ. Mbraŋinipoana ko nɛ Efarisiana ko malɛ daa wɔ ndoŋ a fin ekpa nɛ baaŋ bɔla so n wu Yesu kulubi, amoso, b daa tɛ mo nna a keni fanɛ e beeŋ chɛ esa kewushiachɛ nna a. Ama Yesu daa nyi bumo be nfɛra nseŋ kaŋɛ enɔwusowura na: “Koso m ba anishito nfe.” Nɛ kanyɛn na koso n yɔ ndoŋ. Nɛ Yesu bishi bumo: “Men kaŋɛ ma, manɛ nɛ an be mbra na bee kaŋɛ fanɛ an baa wora kewushiachɛ, kewora kelela ŋko kewora kulubi, kumɔlga esa be ŋkpa ŋko keshin nɛ e mur?” Kumo be kaman nɛ e keni bumo kikɛ ŋ kulti nseŋ kaŋɛ kanyɛn na: “Teŋi fo enɔ to.” E ka wora loŋ nɛ mbe enɔ na nya eleŋ. Ndoŋ nna nɛ basa na diewu n fara a bishi abar kusɔ nɛ baaŋ wora Yesu.


Saŋko Yesu dii kebeebi ko so n yɔ kabɔrɛkule to n ya kule Ebɔrɛ kumo be kamɔnchɛ be kanyɛso loŋ hale nɛ kare ya chɛ. Kare ka chɛ nɛ e tre mbe bebɛsopo n lara bumo to be basa kuduanyɔ n nase bumo ketre beshuŋipo. Bumo e daa la: Saimɔn, emo nɛ Yesu nase Pita na nɛ mo sipo Andru nɛ Jeems nɛ Jɔn nɛ Filip nɛ Baatɔlomiu nɛ Matiu nɛ Tɔmas nɛ Jeems, Alfias pibi nɛ Saimɔn, emo nɛ b daa tre Zɛlɔt na nɛ Judas, Jeems pibi nɛ Judas Iskareɔt, emo nɛ e daŋ ba ki edebɔrpo na.


Bumo nɛ Yesu ka gbelge n shi kebeebi na so a ba nɛ bumo kikɛ nɛ bebɛsopo damta ko ba yili kakpa peŋgeleŋ ko. Jimaŋ damta ko gba daa wɔ ndoŋ. B daŋ shi Judiya be efuli na so kikɛ nɛ Jerusalɛm nɛ Tayɛ nɛ Saidɔn be teku ase be nde to nna m ba nɛ b ba nu mbe kubɔya na nɛ e chɛ bumo be alɔ be yiri kikɛ. Bumo nɛ ayoyu lubiana daa tɔrɔ gba daŋ nya kechɛ. Basa na kikɛ daa kɔ a fin kebeta mo nna, ŋkpal manɛ so, eleŋ daa shi mo to nna a lar n ya kaa chɛ bumo kikɛ.


Nɛ Yesu keni mbe bebɛsopo nseŋ kaŋɛ:
“Kagbenefuli la menyi betirpo peya nna,
ŋkpal manɛ so, Ebɔrɛ be kuwura na to la menyeya nna.
Kagbenefuli la menyi nɛ akoŋ kɔ naniere peya nna,
ŋkpal manɛ so, menyeeŋ ba moɛ.
Kagbenefuli la menyi nɛ menyee shu naniere peya nna,
ŋkpal manɛ so, menyeeŋ ba mushe.
Nɛ basa kishi menyi a kini menyi nsaa tege menyi a tre menyi basa lubi ŋkpal ma, Nyiŋgbasa Pibinyɛn na so, kagbenefuli beeŋ ba kaa la menyeya. Saŋkama nɛ basa bee wora menyi loŋ, men shin nɛ men be ŋgbene e baa fuli menyi ga fanɛ men koso a cha, ŋkpal manɛ so, tɔnɔ nɛ k jo menyi ebɔrɛso na shi ga. Loŋ koŋwule na nɛ bumo nanaana gba daŋ tɔrɔ anebiana na.
Asheŋ maaŋ ba nyalɛ n sa menyi nɛ men wɔ kebaawɔtɔ belbelso to a kɔ asɔ naniere kikɛ,
ŋkpal manɛ so, men teŋ nya men be tɔnɔ.
Menyi nɛ menyee moɛ naniere, asheŋ maaŋ ba nyalɛ n sa menyi,
ŋkpal manɛ so, akoŋ e naaŋ ba kaa mɔ menyi.
Asheŋ maaŋ ba nyalɛ n sa menyi nɛ menyee mushe naniere,
ŋkpal manɛ so, men be ŋgbene beeŋ ba jija menyi ga
nɛ men shu anishichubi.
Menyi nɛ basa bee chɔrɔ na, asheŋ maaŋ ba nyalɛ n sa menyi, ŋkpal manɛ so, loŋ be kechɔrɔ gbagba chap nɛ bumo nanaana chɔrɔ anebi fɛpoana na.


Ma e kaŋɛ menyi nɛ menyee nu ma kamalga ere na fanɛ: Men baa sha men doŋana nsaa wora bumo nɛ b kishi menyi na kelela. Men baa nɛfa bumo nɛ baa melgi menyi na nsaa kule Ebɔrɛ a sa bumo nɛ baa keni menyi jiga na. Nɛ esa baŋ kpa fo etaŋ, fo naŋ kilgi ketaya nyɔsopo nɛ k ka na n sa mo, nɛ esa baŋ sɔ fo kale, fo shin nɛ e sɔ fo siŋgleti gba n ti so. Esa kama nɛ e kule fo kusɔ kama, fo sa mo, nɛ esa ta fo asɔ, sa maŋ kaŋɛ mo fanɛ e bɛta amo m ba. Kusɔ kama nɛ menyee sha fanɛ basa e baa wora a sa menyi, menyi alɛ gba e baa wora loŋ a sa bumo. Nɛ men baa wɔtɔ a sha basa nɛ baa sha menyi nawule, manɛ be kechɔrɔ nɛ menyeeŋ nya? Loŋ koŋwule na nɛ alubiworapoana gba bee wora. Nɛ menyee wora basa nɛ baa wora menyi kelela nawule kelela, manɛ be kechɔrɔ nɛ menyeeŋ nya? Loŋ koŋwule na nɛ alubiworapoana gba bee wora. Nɛ menyee shin nɛ basa nɛ menyee tama fanɛ baaŋ paŋ menyi nseŋ tiŋ n nya ŋ ka menyi na nawule bee paŋ menyi asɔ, manɛ be kechɔrɔ nɛ menyeeŋ nya? Loŋ nɛ alubiworapoana gba bee wora. Baa paŋ abar nna nsaa bɛta a sɔ asɔ nɛ baa ta a paŋ abar na gbagba chap. Ama kashenteŋto loŋ maŋ daga! Men baa sha men doŋana nsaa wora bumo kelela. Men sa maa ta men be asɔ a paŋ basa nsaa tama kebɛta n nya tɔnɔ kama ashi bumo kutɔ. Loŋ nɛ menyeeŋ nya tɔnɔgboŋ nseŋ ki Enyɛnpetale Ebɔrɛ na be mbia. Ebɔrɛ gba bee wora ebutuli nɛ dalubiwuraana kelela.
Amoso, men baa wu kuwɔr fanɛ kananɛ men Tuto bee wu kuwɔr na.


Men sa maa wu abar be alubi nɛ Ebɔrɛ e sa maŋ ji menyi alɛ gba sheria. Men sa maŋ kaŋɛ fanɛ eko wora n jija n daga kasogberge nɛ Ebɔrɛ e sa maŋ kaŋɛ fanɛ men wora n da so n daga kasogberge. Men baa ta men braana be alubi a paŋ bumo nɛ Ebɔrɛ e ta men be alubi m paŋ menyi. Men baa sa basa asɔ nɛ Ebɔrɛ malɛ e sa menyi. Loŋ na Ebɔrɛ beeŋ kɛ menyi asɔ m bɔlɔ men be enɔana a wurge fanɛ kananɛ ayufapoana bee karga ayu a bɔlɔ egarwa a wurge a fa na. Kanaŋkamaso nɛ menyee ber asɔ a sa men braana na gbagba chap nɛ Ebɔrɛ beeŋ ber amo n sa menyi alɛ gba.”
Amo be kaman nɛ Yesu bɔ keŋasa ere n sa bumo: “Tanpo maa keta mo barkasa tanpo kekpabi, ŋkpal manɛ so, nɛ e wora loŋ, bumo benyɔ na kikɛ beeŋ tɔr kemaŋ to. Ekoyapo kikɛ maŋ chɔ mbe eŋinipo. Ama ekoyapo na baŋ koya n ya loge, e beeŋ ki fanɛ mbe eŋinipo na. Manɛ e ba nɛ fee wu kaduubi nɛ k wɔ fo niopibi be kenishi to nsaa kplaŋ kedishaŋ nɛ k wɔ fo gbagba be kenishi to so? Nuso nɛ feeŋ wora n nya kagbene ŋ kaŋɛ fo niopibi: ‘N niopibi, shin nɛ n lara kaduubi nɛ k wɔ fo kenishi to ere n sa fo’, nsaa maa de kedishaŋ nɛ k wɔ fo gbagba be kenishi to so? Kebirkɔnshiwura ere! A daga fanɛ fo lara kedishaŋ nɛ k wɔ fo gbagba be kenishi to na pɔɛŋ nseŋ tiŋ n wu nɛnɛ n lara kaduubi nɛ k wɔ fo barkasa be kenishi to na.


Kedibi lempo maa sɔr asɔrso lubi, kedibi pɔso malɛ maa sɔr asɔrso lela. Kedibi kama be asɔrso nɛ baa ta a pin kumo. Mannɛ ewidibi so nɛ baa chuge apɔl, bumo alɛ maa chuge elemu ashi gbaŋgbanturbidibi so. Esa lela bee kaa shin nɛ asɔ lela damta nɛ a wɔ mo to na bee shi mo to a lar nna na nɛ esa lubi malɛ bee kaa shin nɛ asɔ lubi damta nɛ a wɔ mo to na bee shi mo to a lar. Men maŋ nyi fanɛ asɔ nɛ a bɔlɔ nyiŋgbasa be kagbene to e naa lar mbe kɔnɔ to a?


Manɛ e ba nɛ menyee tre ma Enyɛnpe, Enyɛnpe, nsaa maa wora kusɔ nɛ mee kaŋɛ menyi? Meeŋ ŋini menyi kananɛ esa nɛ e bee ba ma kutɔ m ba kaa nu ma mmalga nsaa bɛ amo so du. E du fanɛ esa ko ka ya pɔr mbe kowu nna. E ka bee shin nɛ e fara kapɔr na nɛ e kur kasawule n tɔl ebu na be kifi n yili kefalta so. Bɔrɛ ka baŋ to chuful kaplɛkama n ya ber ebu na, k maŋ gbuŋgbuŋ to ŋkpal e ka pɔr ebu na nɛnɛ so. Ama esa nɛ e bee nu ma mmalga a maa bɛ amo so du fanɛ esa nɛ e maŋ tɔl mbe ebu be kifi nseŋ pɔr kumo n yili nna. Nchu ka bɔlɔ kakpa m ba ber ebu na nɛ k tɔr epul to. Kumo be ketɔr na daŋ lubi ga.”

Listen to Luuk 6