Matyu 8

Anona aman awasinai alop nambo'anai Jisas nanda'ana bo'ona

(Mk 1:40-44; Lu 5:12-14)

1Ea' Jisas nakwaha halaf anama nilianai, amam nematawa hiesi sailana safe'. 2Ea' anona aman awasinai alop nambo'anai nafi'i felefele'ma Jisas nindiwa nembawa notawa felefele' ma anan na'ipana mehip na'i, “Dembinai, i'i ine' ni'i a'e, nenda' ae' etaga bo'owe.”

3Ea' Jisas naso' lagelana nahapila anan na'ipana na'i, “Ae' a'i a'e ma ine' netaga bo'wena.”

Ea' dei' etef awes anama aonai nakwahona ea' nataga bo'ona.

4Ea' Jisas na'ipana na'i, “Ina nefe' ni'ipa enin epen ni'i ae' anda'ena bo'wena, owa'. Ine' fo'o nihi'ambana alop ine'inai aman anama pris. Ea' nese'ana amamaga amama anan nendolalima God ea' ine' ninifelana ma nataga bo'wena si'i mi'uli ananinai fowa' Moses na'ipasanai na'i. Ama esis hiesi sitilina sogawa ambo'wena.”

Jisas nanda' anona aman nanda' maola soldia dembinai bo'ona

(Lu 7:1-10)

5Jisas nafe' wambel Kaperneam ea' anona soldia dembinai nape. Anan kepten numafi soldia hiami 100-peleim. Ea' nafi'i nahali' Jisas nindinip na'i, 6“Dembinai, aman anama nanda'me maoli awes nanda'ana na'oh ipat ananitai. Bo'wagahi lagof saga' sailana. Alop ananinai ekep mahana kwapete'.”

7Ea' Jisas na'ipana na'i. “Ae' atuwasi efo'o enda'ana bo'ona.”

8-9Ea' dembinai soldia anama na'ipana na'i, “Ae' ina aman bu'uwei ma ine' neafo'o niwis ipat ae'anai, owa'. Ine' ni'i basef atom, atuwasi anan bo'ona. Dei' main, ae' ape owina anom soldia dambami mumafi mase'e maol. Ea' ape ilifa anom soldia ae'ami imafiam. I'ipa anona i'i, ‘Ine' fo'o’, name'e nafe'. Ea' i'ipa anona i'i, ‘Ine' fi'i’, name'e nafi'i. Ea' i'ipa anama agel a'anai nanda'me maoli i'i, ‘Ine' da'a maol anama’, anan name'e nanda'ana. Ine' dembinai. Ea' awes anama atuwasi neme' basef ine'imi ea' nefe'. Dei' ine' ni'i etin, ea' anan ambo'ona wapoti'.”

10Ea' Jisas name' basef ananimi okom natanea na'ipa amam nematawa hiesi saila anan safi'i na'i, “Endilisi etis ae' a'ipipa! Soldia dembinai anama anan ina ipe' Israelinai. Ea' dei' anan nembale'efa ae'. Ina anona aman Israelinai nombale'efa ae' na'ama, owa'etin. Anan nikila' ipe' Israela nembale'efa ae' la'ifina. 11Endilisi ae' a'ipa ipe' Juda hipei, ipe' ina ukup mi'i ipe' etipa pefe' piowis kingdom heveni, owa'. Amam nematawa hiesi lamasi sifi'i gani aon natefima nowala ma naso'ma, isima sefe' siowis anama. Ea' sefe' siowis soloma dambami bafapepa ipe'imi Juda, Abraham noloma Aisak Jekop, sefe' sope etifigin sea' gwa'aimi solomam. 12Ea' ipe' Juda hipai owa'etin. God nandondomba kingdom heveni ma ipe' piowis, owa'etin. Anona nemaf anan negalo'ma ipe' ni'ipipa ni'i pefe' wambel aonai owamb atona napoma. Ea' pefa' nimanimi lu'wami pelef mehip pena' nalelef ipe' tilili talala' kwapete' pepe.”

13Ea' Jisas na'ipa soldia anama dembinai na'i, “Ine' fo'o. Ine' na'i ae' la'ifiwei ma iegiambama aman anama nanda'mena maol ine' neataga bo'ona. Ae' anda'ana bo'ona si'i ine' nambale'efa ae'.”

Ea' dei' etef aman anama ambo'ona wapoti'.

Jisas nanda' Pita nandagi'mokwi bo'okw

(Mk 1:29-31; Lu 4:38-39)

14-15Ea' Jisas nafe' nawis nomon ipat Pitai nati Pita nandagi'mokwi awasi'w kwa'oh, alop akwa'unai nifina kwapete'. Ea' natolo'w nahapila lagel akwa'unai awes anama nafe' nakwaha akwa'w. Ea' kohafel kwape kwanda'mana gwa'aimi anan.

Amam nematawa hiesi awesisi Jisas nanda'as bo'wes

(Mk 1:32-34; Lu 4:40-41)

16Wambomota felefele' ma owamb esis sofa'ai amam nematawa hiesi ambagof awami mapeisi sofa'as safi'mai Jisas. Ea' na'ipa ambagof awami basef bandami atom natofam mafa' mafe'. Anan nanda' esis hiesi awesisi sataga bo'wes hi'alas. 17Anan nanda'am na'ama si'i fowa' gani anona profet Aisaia na'i basef na'i,

“Anan atona nofa' awes ape'inai nigiambamapa ma meape bo'wepa.”

Enis epes sa'i sieila Jisas

(Lu 9:57-60)

18Ea' Jisas nati epes hiesi saitu sindiwapana, ea' na'ipa alupumi ananimi mofa' bot mefe' anama walemb batupa'manai gani fisana. 19Ea' anona aman dembinai nawalipasa mi'uli Godi nafi'i na'ipana na'i, “Dembinai tisa, ae' a'i efe' elomena. Ea' ofe' etin anama hiagoma ine' na'i neafe'ma.”

20Ea' Jisas nagwamana na'ipana na'i, “Nombagw aolopumi ma'oh mala etap wambel amamunai. Amiguf wapoti' mufia' mafe' ilif mala' alegah mapeih gani ilif, ea' ae' owa'etin. Ae' ataga epen endilisiwei, wambel a'e ma a'oh alo balaga ae'anai.”

21Ea' anona aman alupunai Jisasi nafi'i na'ipana na'i, “Ae' a'i ata' epe imafi ahalome, ata' igiambamana ma noga' ewana ma nope, ifi'i ilina.”

22Ea' Jisas na'ipana na'i, “Hapainai, esis saga'i sondawago esis etis isima saga'i. Ine' owa'. Ine' fi'i nila ae'.”

Jisas na'ipa uf lu'unai owa'etin ea' fase'mana.

(Mk 4:36-41; Lu 8:22-25)

23Ea' Jisas nalata bot anama naloma alupumi ananimi mafe' malomanamai mombo fisana mafe' anona walemb batupa'manai lu'unai. 24Ea' mehip etin uf lu'unai naluwi, embel mohafel mawis bot nomon felefele'ma bot na'i nowala embel. Ea' Jisas na'oh nolola bot. 25Ea' alupumi ananimi mafe' minimbalana ma'ipana ma'i, “Dembinai! Ine' hafel nigiambamafa. Afa' wa'i higililafa owala embel!”

26Ea' na'ipam na'i, “Ipe' ina pembale'efa pa'i ae' la'ifiwei, owa'etin. Dei' maina ipe' umbamahepa?”

Ea' nehafel na'ipa uf naloma embel na'i, “Ipe' tol motah.”

Ea' uf faso'mana, embel ina ata' manda' fepo, owa'. Tol motah.

27Ea' amam alupumi ananimi gegelalasom umbamaham kwapete'am ma'i, “Anan emi egafuna? Na'ipa uf naloma embel mame'ana mowala.”

Jisas natofa ambagof awami mape amam biami bo'om

(Mk 5:1-17; Lu 8:26-37)

28Jisas nafe' nataga anagon wa'ol walemb batupa'manai anama anona etap esis Gadara sapoma. Ea' anom amam biam ambagof awami mapeimi mafi'mai anan. Amam mape la'ela'ef hi'agilif sawa saga'ima mafi'i. Amam amama epes awami mahasi. Ea' esis amam nematawa hiesi umbamahasa seafe' eaf anama amam mapoma. 29Ea' mofala Jisas mehip ma'i, “Ine' God Nogalamana. Ine' na'i nenda' maina afa'? Ine' na'i nehafa ofa' nimanimi lu'wami? Nemaf anama na'i niahafanai ina dei' nataga, ata' owa'.”

30Ea' anom bogof hiami maitu ma' gwa'aimi felefele'. 31Ea' ambagof awami mahali' Jisas ma'i, “I'i ine' netofafa, nesapa'afa ofe' uwisa bogof mamuma.”

32Ea' na'ipa ambagof amama na'i, “Ipe' fo'o!” Ea' makwaha amam amama biam mawisi mafe' mawisa bogof. Ea' bogof mamuma hiami masagih mafa' mafe' mehip mowala awagoma tata mowala mala embel walemb batupa'manai afum hi'alam.

33Ea' amam mumafi bogofi masagih mafe' wambel lu'wagoma ma'ipasa basef amama amam nematawa hiesi ma'ipasa amamaga amama matagama amam amama biam ea' ma'ipasa bogof wapoti' afum hi'alam. 34Ea' epes hiesi wambel anama safi'i sati Jisas sahali'ana sa'ipana mehip sa'i anan nekwaha etap anama asasima nefe' anagon.

المحددات الحالية:

Matyu 8: aojF

تمييز النص

نسخ