Genesis 48
48
Jakop, onig laa Israel, nug Josep bekoɗ itatom
1Aria, dimppa Josep nug mameg oɗe niieye nai doyom. Doya amu, nug aha, bekoɗ aɗit Manase, Epraim ele diiate goppig. 2Ag gona, Jakop toppa teegeg, danab laa nug Jakop amegppa, “Josep uɗitte,” aum. Nug anam a doya, nug wagai ma, niiak abenppanu aha, betppa heɗep na dayom. 3Dayeye, Josep nug gumitta wa, Jakop nug aum. “Kayak Nukka Ɠagattag Oh Ele Nug Kanan wanppa aab laa onig Lus, appa gumiɗa na itiɗa, 4nug nai inam da amelppa aum. ‘Da heppi, na buɗunad kuɗumnab bena, huu okkai anen anen oh laippu daaglag. Wan imu amu, da na buɗunad madappi, ahilag wan hanhan daakku.’ Nug anam awa, da amelppa aum. 5Nug anam da amelppa a amu, da Kanan wanppa daaiyi, ah nahip nid danab aɗit, Epraim, Manase ele ippa Isip wanppa menuatom. Ippa menuatom, amge gemu da diiaten, dahil nidnab, Ruben, Simeon ele bia daaglahnu hettem. 6Aria, na nid baula menuppe amu, ag nahipad daappeg, butti aɗi dimppa ag gona, wan awa otiak haenppa amu nid nahipad amu, ag awalti oolagppa wan aoglah. 7Da Mesopatemianu Kanan uɗiyi, na anin Rahel nug Eprat, onig laa Betlehem, aab amu guguittak appa ibppa mauhe, da nuhignu oo doyak naɗi ele ib giginppa boummi,” awa aum.
8Aria, Israel nug nai amu mattia mala, nug neekke ukke, Josep bekoɗ anatom. Haen nug anata amu, nug Josep oɗ mettom. “Nid aɗit amuam aun bekoɗ,” awa oɗ mettom. 9Nug anam oɗ mette amu, Josep nug aum. “Nid aɗit imuam, da bekkalaɗ. Da ippa Isip wanppa daaiyi, Kayak da meɗom,” awa aum. Anam a amu, Israel nug aum. “Na omalatppe, da gumiɗya dopeɗ, da aa itittak ena matakkul,” awa aum. 10Amu Israel nug kainonab ma malom amunu, nug ameg am ena iitta, nug neekkeb ukkeb, keeke pehettak anidkkunu elele iitta. Nug anam dayom amunu, nug anam a, Josep nid aɗit omalate, aa Josep mameg Israel gumidya waeh, Jakop nug oɗakkiata ootuqatom. 11Ootuqatowa amu, nug Josep amegppa aum. “Anukka dahil dabmakppa da na iitta doomi, amge Kayak Nug he, gemu da naib ii anidttem. Iitta! Da na, amu na begapaɗ ele anadttem,” awa aum.
12Nug anam a amu, Josep nug nid aɗit nug mameg baegppanu diiata, piɗe maata, nug mameg noobppa gateg qaun o, gomela, iɗu wanppa meum. 13-14Nug anam hewowa amu, Josep nug eppeg nanehppa Manase aɗowa, eppeg naɗiap-ppa Epraim aɗa, nug aa Israel toppa omalate wapiɗ. Waya amu, Manase nug naanaeg amunu, nug Israel eppeg naɗiap-ppa dayeye, Epraim am Israel eppeg nanehppa dayom. Anam daaeheh, Jakop nug eppeg baolia, nug eppeg naɗiap Epraim igippa ma, nug eppeg naneh amu Manase igippa meum. Manase nug am naanaeg, amu Epraim nug Manase dimugppanu, amge Jakop nug eppeg baolia, anam heum. 15Nug anam hewowa amu, nug ⌊nid aɗit itittak ena inam mata, amuppa nug ele⌋ Josep itittak ena mettom. Nug itittatta aum.
“Kayak, da mamel Aisak, da alal Abraham ele Nug noobppa oittapiɗ;
Kayak, Nug da bau dayak dahil oh gumiɗaɗa ehaniɗom, gemu ele ehaniɗtte;
16Kayak, Nug uug ohnu qagaiettakppanu uhuqiɗom amu;
Kayak amunu amu, da Nug nid aɗit imu itittak ena matakkunu ool daatte.
Ahilahnu amu, aa da alal Abraham, da mamel Aisak amu da ele, aa ig buɗunig ooppa daaglahnu ool daatte,
amu aa appatpeɗ, buɗultippa danab kuɗum bekkulagnu ele ool daatte,” awa aum.
17⌊Amge Jakop nug nai ii mattiaya, eppeg baolia, eppeg naɗiap Epraim igippa meum haenppa⌋ Josep nug mameg nug eppeg naɗiap amu Epraim igippa meeme antta amu, nug ena ii doya, nug mameg eppeg Epraim igippanu eɗua, Manase igippa mekkunu aɗom. 18Josep nug Jakop eppeg aɗaɗa amu, nug aum. “Mama, na eppen pehettak ii meme. Aɗinu? Manase nug am naanaeg. Na eppen naɗiap nug igippa me!” awa aum. 19Josep anam aum, amge Jakop nug nai nuhignu dab-ii-metta, nug aum. “O bekkal, nug nid danab naanaeg amu, da doottem. Geha nug buɗub ele elab bekku, amge nug dimugppa amu, nug buɗub ag laanu buɗub eɗadna, appatna elabnab bekkulag,” awa aum. 20Nug anam awowa amu, nug inam ele itatom. “Dimppa Israel danab laa nug layag inam itidkku. ‘Kayak Nug heeb, na Epraim, Manase ele, aa daapiɗ, amubia na daakkutnu ool daatte,’ awa akku,” awa aum.
Aria, Jakop anam heum amunu, nug Manase, Epraim waappa meum.
21Israel nug itittak ena nai mattia malowa, nug Josep amegppa aum. “Mauhak dahil am miag, amu da mauhppi, dimppa dimppa Kayak Nug ag buɗulkad aɗi omalatteb, na mamenad dilag wan Kanan, ag appa gokkulag 22amunu, da Kanan wan ooppa wan maha laa onig Sekem na medattem. Na, na awanad, amap ele oolagppa okkai daattem amunu, da na medattem. Wan amunu amu, da dahil lat, qep elab eleppa Amo danabnu wan amu aomi,” awa aum.
المحددات الحالية:
Genesis 48: NB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Wycliffe Bible Translators, Inc. All rights reserved.
