Genesis 46
46
Jakop, onig laa Israel, nug Isip ukkom
1Jakop anam awowa, nug aha, keeke oh babaitta, nug baekkudppa oh omalatta, keeke oh nuhignu dayom ele awa ukka, Berseba appa doɗ manatta, nug mameg Aisaknu Kayak mettom. 2Aria, tuqan tuleglegppa Kayak Nug Jakop amegppa, “Jakop, Jakop,” awa aum. Nug anam a, Jakop nug aum. “Da ina; aɗitai, appe dookkul,” awa aum. 3Jakop anam a amu, Kayak Nug aum. “Da Kayak, na mamennu Kayak. Na Isip gokkutnu aib oot baɗom. Aɗinu? Na appa daappe, da heppi, na buɗunad ag appatna, huu okkainab, ɠagattag ele daaglag. 4Da na omaidppi, Isip wanppa gona daappe, dimppa da na buɗunad omaladppi, ag eɗun ippa uɗiglag. Amge tatam na gona, Josep anidppe, mauhak haen nahip uɗieb, Josep nug na ehanidkku,” awa aum. 5Kayak Nug anam aum amunu, Jakop nug Bersebanu ahom. Nug bekkod ag ahan, ag mamelag Jakop, ag waalkad, amu ag ahilkad nid naunau ele Isip dilag uɗatnu karisppa, Paro nug maatte goppig, amuppa maadna, 6ag doɗ ahilkad, amu enulag laa ele, ag Kanan wanppanu aoppig amu, ag amu ele diin, aakku Jakop, nug buɗub oh ele ag Isip goppig. 7Jakop buɗub amu, ag am nug bekkod, nug aɗekkud, amu nug alakkud danab ah ele. Nug buɗub amu oh, ag aakku nug ele oh Isip wanppa goppig.
Isip goppig amu, ag onilag
8Israel buɗub, amuam Jakop bekkod, Isip goppig ele, ag onilkad am inam.
Ruben nug nid naanaeg; nug nid danab. 9Amu Ruben bekkod onilag am Hanok, Palu, Hesron, Karmi ele. 10Simeon bekkod onilag am Jemuel, Jamin, Ohat, Jakin, Sohar, Saul ele. Saul anig amu, nug Kanan ah. 11Lewi bekkod onilag am Gerson, Kohat, Merari ele. 12Juda bekkod onilag am Er, Onan, Sela, Peres, Sera ele. Juda bekoɗ Er, Onan ele, aa Kanan wanppa mauhpiɗ. Peres bekoɗ onilah am Hesron, Hamul ele. 13Isakar bekkod onilag am Tola, Pua, Iob, Simron ele. 14Seblon bekkod onilag am Seret, Elon, Jahlil ele. 15Nid danab amu oh, aria aɗelah Daina ele, ag am Jakop, Lea ele, aa buɗulti, aa Padan Aram appa menuadpiɗ; ag oh, ahilag ebqak am 33.
16Aria, Gad bekkod onilag am Sipion, Hagi, Suni, Esbon, Eri, Arodi, Areli ele. 17Aser bekkod onilag am Imna, Iswa, Iswi, Beria ele. Nug aɗeg onig am Serah. Beria bekoɗ onilah am Heber, Malkiel ele. 18Amuam Leanu maɗi ah Silpa, Jakop ele buɗulti; ahilag ebqak am 16. Lea mameg Laban nug Silpa, nug aɗeg Lea mettom.
19Aria, Jakop nug wau Rahel ele aa Josep, Benyamin ele menuatpiɗ. 20Josep nug Isip wanppa dayaya, nug aab onig On, ahilag mana mettak danab onig Potipera aɗeg Asenat awe oiyya, aa nid danab aɗit Manase, Epraim ele menuatpiɗ. 21Benyamin bekkod onilag am Bela, Beker, Asbel, Gera, Naman, Ehi, Ros, Mupim, Hupim, Art ele. 22Amuam Jakop, Rahel ele, aa buɗulti, amu ahilag ebqak am 14.
23Aria, Dan bekka onig am Husim. 24Naptali bekkod onilag am Jasil, Guni, Jeser, Silem ele. 25Amu oh am Rahelnu maɗi ah Bilha, Jakop ele buɗulti; ahilag ebqak am eblaih aɗit ele. Rahel mameg Laban nug Bilha, nug aɗeg Rahel mettom.
26Jakop buɗub tiignab ag Isip goppig amu, ahilag ebqak am 66. Nug bekkod waalkad amu, ag ebqak amu ooppa ii daatteb. 27Jakop bekka Josep nug Isip ah awom amu, appa nid danab aɗit meunatpiɗ. Nid aɗit amu, aa mamelah, aa alalah, laa oh ele Isip wanppa daappig amu, ahilag ebqak oh amu 70.
28Aria, ag Isip wanppa gonana, Jakop nug Juda, ag wan atu onig Gosen appa attem gokkulagnu dookkunu me, anuqa Josep toppa ukkom. Ukka eɗua uɗia omale, haen ag wan atu onig Gosen appa teeg, 29Josep nug he, nuhikkud maɗi nid ag oiyaknu karis nuhig babaitteg, nug awa, wan atu onig Gosen appa, nug mameg Israel uɗa tekkunu ukkom. Ukka, nug mameg gumitta wana, nug oɗakkia, haen elab gayom. 30Gaye amu, Israel nug Josep amegppa aum. “Da gemu na anidttem; na bau daattem amunu, da mauhkkul am nai iitta,” awa aum.
31-32Nug anam a amu, Josep nug awakkud, amag ele, aria mameg baekkudppan laa oh ele amelagppa aum. “Da ukken, Paro amegppa inam akkul. ‘Da awalad, da amal, aria da mamel baekkudppan laa oh ele ag Kanannu ahan, dahilppa uɗippig. Danab amu ag am doɗ gumattak uɗat hetteb amunu, ag ahilkad doɗ, amu ag enulag oh ele diin uɗippig.’ 33Da anam appi, haen Paro nug ag onilagppa eeb doppeg, ahilag uɗat am aɗi, awa oɗ madakku amu, 34ag inam appeg dookku. ‘O naɗi, ig, nahipad maɗi nid amu, ig nid nakokppanu doɗ gumattak uɗat, amuib heut uɗie, gemu ele hettem. Ig mamenkad aɗi ag ele uɗat amuib heppig.’ Ag anam aig!” awa aum. Josep nug anam anana amu, nug nai baula tuɗitta aum. “Isip wanppa, aben laa ohppa Isip danab ag doɗ gumattak danab dilagnu oolagppa uuaknab dootteb amunu, da ami amu, ag nai anamib appeg, Paro nug ab, ag wan atu onig Gosen ippa daaglag,” awa aum.
المحددات الحالية:
Genesis 46: NB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Wycliffe Bible Translators, Inc. All rights reserved.
