Genesis 27
27
Jakop Aisak hambubuitta, itittak ena awom
1Dimppa Aisak nug kaino me, ameg gaɗue dayeye, neekka keeke pehettak anidkkunu elele iitta, nug Esau onigppa e uɗie, nug amegppa, “O nan,” awa aum. Anam a amu, Esau nug aum. “Da ina, aɗitai, appe dookkul,” awa aum. 2Esau anam a amu, Aisak nug aum. “Da kaino memi. Haen ganeb da mauhkkul amu, da ii doottem. 3Amunu na nahip lat, lat doɗo ele aon, doɗ dakkuɗ laa da lakkulnu dad okkaippa mattin anidna qena, 4aon uɗin badikkut. Na da lakkulnu ool huana hette ele haen oh battie lattem, amubia battin, aon doppe lakkul. Da ee amu lawoya, da na itidppi, aria dahil mauhak haen dob amu, da mauhkkul,” awa aum.
5Aisak nai anam mattieye, Rebeka ele doyom. Aria, haen Esau nug dad okkaippa ukka, doɗ dakkuɗ laa mattia antta qa, awa uɗikkunu aha ugekke, 6Rebeka nug Jakop amegppa aum. “Na mamen nug na awan Esau amegppa inam a doomi. 7‘Na gona, doɗ laa qena, da ool hette bia battin meɗappe lakkul. Da amu lawoya, da na Yawe noobppa itittoya, dimppa dahil mauhak haen dob amu, da mauhkkul,’ awa aum. 8Nug anam aum amunu, na nai dahil tutukku doona dim lamitte! 9Na doɗ dilag aɗppa gona, meeme nakuɗ enanag aɗit diiatna uɗippe, da ee ena laa na mamen nug oo niitte bianab hekkul. 10Heppi amu, na aon gona, na mamen medappe lakku. Lawowa, nug na itittak ena mettowa, dimppa nug nuhig mauhak haen dob amu, nug mauhkku,” awa aum.
11Rebeka anam a amu, Jakop nug oɗeppa awa aum. “Amge da awal Esau nug beɗu uɗig alala ele, da am beɗul uɗig iitta. 12Amu mam nug da beɗul aɗa doya, nug da nuhignu hippeg qakkak kobol hettem dookku. Anam maidkku amunu, da nuhigppa itittak ena ii aopa. Nug eheɗ laa awaknu anak waappa daakkulnu akku,” awa aum. 13Jakop anam a, nug anig Rebeka nug aum. “O mam, eheɗ laa awaknu anak waappa dayaknu nai nuhig am, da beɗulppa niikkunu ool daatte. Na dahil nai aakkuib dim lamitte! Na gona, meeme aɗit diiatna uɗie!” awa aum.
14Aa nai anam mattioya, Jakop nug ukka, meeme aɗit diiata, anig toppa ukke, nug Aisak oo niitte bianab ee ena heum. 15Rebeka nug ee ha amu, nug bekka naanaeg Esau, nuhig lamen ena, anig laugppa dayom ele amu, nug lamen amu awa, Jakop mette, nug meum. 16Nug me, Rebeka nug meeme gaɗa awa, Jakop eppegppa, baagppa uɗig iitta eleppa ita, 17nug ee ena, bret ele nug heum amu, nug amu awa, Jakop mettom. 18Ee mette, Jakop nug awa, mameg toppa ukka, “O mame,” aum. A amu, nug mameg aum. “O mam, na aun?” awa aum. 19Aisak anam a amu, Jakop nug aum. “Da am na bekkat matunu, Esau. Keeke oh na ame bia amu, da hemi amunu, itittak ena meɗakkut na ahan, doɗ qein ee hemi imu lakkutnu ool daatte,” awa aum. 20Nug anam a amu, Aisak nug oɗeppa awa aum. “Nan! Attemun na doɗ imu pahanab anidme?” awa oɗ mettom. A amu, Jakop nug oɗeppa awa aum. “Yawe, nahip Kayak, Nug da ehaniɗom amunu, da paha anidmi,” awa aum. 21Jakop anam a amu, Aisak nug aum. “Gukkuiɗna doppe, da na aɗaitte ool maidkku; na Esau, o iitta,” awa aum. 22A amu, Jakop nug mameg Aisak gumitta wa, mameg nug Jakop aɗa doya, nug aum. “Na baat am Jakop baag, amge na eppen am Esau eppeg,” awa aum. 23Jakop eppeg amu doɗ gaɗa ele Esau uɗig bia amunu, Aisak nug Jakop ii doyom amunu, nug Jakop itittidkkkunu babaittom. 24Amge nug Jakop baula oɗ mettom. “Na genab Esaute?” Oɗ me amu Jakop, “Yo,” aum. 25Jakop, “Yo,” aum dimppa Aisak nug aum. “Aria nan, na ee ena heme ele amu, aon doppe lawoya, da na itittak ena medakkul,” awa aum. Nug anam a, Jakop ee mette la, nug wain ele mette laum. 26Aisak nug ee lawowa, nug Jakop amegppa aum. “Dona otuqiɗe!” awa aum. 27Aisak anam aum amunu, Jakop nug gumitta wa otuqitte, mameg nug lamennu hiuɗi doya, nug itittak ena inam mettom. “Da bekkalnu muttuɗig am Yawe wan itittomnu muttuɗig, amubia.
28Kayak Nug na gu, wan ittag ele medakkunu ool daatte.
Ao, Kayak Nug heeb, na ee kuɗum, iɗu iɗu ele daakkutnu ool hette.
29Wanppan wan laalappanu danab ag na waatppa daaglagnu ool daatte.
Ao, na amap, amu nug buɗuppud ele ag na waatppa daaglagnu ool hette.
Danab laa nug na eheɗ laa anak waappa daakkutnu akku amu, nug eheɗ laa awaknu anak waappa daakkunu ool daatte.
Amge danab laa nug itittak ena medakku amu, nug itittak ena aokkunu ool hette.”
Aisak nug anam awa aum.
30Aria, Aisak nug Jakop itittak ena metta male, Jakop nug ugekke, haen amuppaib Esau nug doɗ dakkuɗnu oiyom, eɗua uɗia, Aisak toppa uɗiom. 31Nug ele ee ena ha awa uɗiom. Uɗia amu, nug aum. “O mame, itittak ena meɗakkutnu na ahan, ee da hemi imu lakkutnu ool daatte,” awa aum. 32Esau anam a, nug mameg Aisak nug aum. “Na aun?” A amu, Esau nug aum. “Da am na bekkat matunu, Esau,” awa aum. 33Anam a amu, Aisak nug ottaie, beɗu ele huana hahaɗom. Hahaɗe amu, nug aum. “Danab aun tatam doɗ qa awa uɗiom? Da geha iikku lawoya, nug itittak ena mettai ele na beme. Da nug itidmi amunu, itittak ena amu nug beɗuppa haen oh daakku,” awa aum. 34Aisak anam a amu, Esau nug ooppa kahipan aoɗak bia doya, huan gayaya, nug aum. “O mame, na da, ge da, na da ele itittak ena laa meɗakkutnu oɗ medattem!” awa aum. 35Anam aum, amge Aisak nug aum. “Na amap nug hambuppuiɗa, itittak ena nahip awom,” awa aum. 36Aisak anam a, Esau nug aum. “Jakop nug onig tutukku dim lamidtte. Haen aɗit nug da hambuppuiɗom. Tatam nug nid danab tatamnu dilag itittak ena anuqak dahil yab bia awom, amu gemu ele nug itittak ena dahil awom!” Nug anam ana amu, nug mameg baula oɗ mettom. “Na itittak ena laippu laa da meɗakkutnu elele iittate?” awa oɗ mettom. 37Esau anam oɗ mette amu, Aisak nug oɗeppa awa aum. “Da hemi amu, na nug waappa daattem. Na buɗunad ag ele nug waappa daaglag. Nug ee iɗu iɗu elelenab ele nuhigppa daakku amunu, da na itittak ena nai aɗi laa medakkul?” awa aum. 38Aisak anam aum, amge Esau nug aum. “O mame, na itittak ena laippu laa iittate? Na da ele itittak ena meɗakkutde!” awa aum. Anam anana amu, nug baula huanak gayom. 39Nug anam gaye, aria Aisak nug aum.
“Aben nahip am wan ittag ena ele iitta.
Ao, aben nahip am gu okkai ii aoma.
40Nahip ban hakppa na keeke aon oikkut.
Ao, na, na amap waappa daakkut.
Na anam daakkut, amge dimppa na bahi yaak dookkut.
Na anam doonna, na wagai mena, uug nug na medatte ele amu, na buɗippe gokku,”
Aisak nug anam awa aum.
41Jakop anam he amu, Esau nug mameg Jakop itittak ena mettomnu Jakopnu oo nauhom. Oo nauhe, nug aum. “Da mamel nug haen elab iitta, am mauhkku. Nug mauheb, nuhignu oo doyak hewota, dimppa da Jakop qeppi mauhkku,” awa aum.
42Nug anam a, laa mattie, Rebeka nug doya, nug bekka gehanu Jakop onigppa e uɗie, amegppa aum. “O nan, na awan Esau nug na nitteb mauhppe, nug oo ena daakkunu dabmak awom daatte 43amunu, na dahil nai imu oh dim lamitte! Na ahan, oolna Haran goppe, da awal Laban ele daaglah. 44Na laih uppa daappe, na awannu oppoɗi be ameg kokoɗ eppak iitta mekku. Iitta meeb, nuhigppa heme daug atieb, 45da nai meppi ukkeb doona, eɗun uɗikkut. Aɗinu aa oh deɗ laippuppa mauhkkulah?” awa aum.
46Rebeka nug Jakop amegppa awowa, nug ukka Aisak amegppa aum. “Da Hit ahnu ool bahi yaatte. Jakop nug ag oolagppanu ah laa aolo amu, da mauhlom am ena,” awa aum.
المحددات الحالية:
Genesis 27: NB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Wycliffe Bible Translators, Inc. All rights reserved.
