Matayo 5

Jeso Wakambauka Alupili

1Inzho Jeso naakaabona makamu makamu abantu wakaliza alupili amane wakala. Ba shiciiya bakeza nkwaakaakubele, 2ulimwi wakakanka kubayiisha.

Bantu Balonjezhe

(Luka 6:20-23)

3“Mulilonjelwe umwe numwizhi ati muli bapushi ku moza,

nkaambo bwami bwa kwizeulu mbwenu.

4 # Aiz 61:2 Mulilonjelwe umwe numulila,

nkaambo Leza ulakamusoozha.

5Mulilonjelwe nubabonhu myonzo nkaambo mulakeekona inshi.

6Mulilonjelwe umwe numufwa inzala iinyota ya bululami

nkaambo mulakekuta u kulamatwa.

7Mulilonjelwe numufwila bantu luse,

nkaambo mulakatambula luse.

8Mulilonjelwe numusalala mu myonzo,

nkaambo mulakamubona Leza.

9Mulilonjelwe umwe numuleta luumuno ku bantu,

nkaambo mulakatewa ati mbana ba Leza.

10Mulilonjelwe umwe numupezhewa ukaambo kabululami,

nkaambo bwami bwa kwizeulu mbwenu.

11 # 1 Pita 4:14 “Mulilonjelwe umwe ciindi bantu nibamutuka u kumupenzha ulimwi ukumutamicizha shibiyabi shoonse, ukaambo kezhina lyangu. 12#2 Maka 36:16; Inc 7:52Amutangale u kusekelela nkaambo bulumbu bwenu kwizeulu mbukando. Imbubo mbubona bantu mbubakabapenzha bashinshimi bakale kale.

Mwino u Mumuni

(Maako 9:50; Luka 14:34-35)

13“Umwe muli ukoya mwino wanshi, pele kuti mwino wasampuka no ulalunzhiwa buti? Ati wabula mulimo ulasweewa bulyo u kulyataukwa ku bantu. 14Muli ukoya mumuni wanshi. Munzhi muzake a lupili tookonzha kusesekwa. 15Kwiina uusonsa ilambe amana walihunikila intesho, pele lilabikwa awo ngulikonzha kumunicila bantu bali muŋanda boonse. 16Umbona bulyo amwe mumuni wenu noomunicile bantu, kwaamba beebone milimo mibotu njimucita, kwaamba ushenu uli kwizeulu atembaulwe.

Jeso Wakeza Kuzuzucizha Mulawo

17“Mutatelaici ati ndakeza kuyaya mulawo na bashinshimi. Ndiina kwiza kuuyaya pele ndezhila kuuzuzucizha. 18Cini cini ndamwaambila ati, izeulu iinshi shilakaloba, pele kwiina nikaba kabala komwi kashoonto ka mulawo kakaayayiwa cita shoonse shikazuzucizhiwe. 19Ubobo ndamwaambila ati kufwumbwa wezo usotoka kabala nikaba komwi ka milawo yezhi u kuyiisha bantu kwaamba bacite bobo, wezo ulakaba mushaalizhi mu bwami bwa kwizeulu. Pele wezo uyicilila u kuyiisha bamwi ulakaba mukando mu bwami bwa kwizeulu. 20Amwi ngakuti, kuti bululami bwenu kabutabaali ali bwa balembi uba Falisi, tamukanjili mu bwami bwa kwizeulu.

Makani Akulemana

(Luka 12:57-59)

21“Mwakateelela mbubakaambilwa ba shaakale ati, ‘Utayaya#Kul 20:13; Ciz 5:17 nkaambo muyazhi ulyeelele kubetekwa.’ 22Imbubo, pele ume ndamwaambila ati kufwumbwa ulemanina mweenzhiina ulyeelele kubetekwa. Uwezo usampula munina ulyeelele kubetekwa munkuta inkando. Pele wezo waambila munina ati, ‘Uwe umulimbushi!’ Ulyeelele mulilo utazhimi. 23Ubobo kuti watola cipo cako kucipaililo wamana wazhibaluka ati ulikwete makani u munyoko, 24cishiye cipo cako ku cipaililo uye kwakwe. Utaangune muteelezhanye u munyoko wamana uzhize upe cipo cako.

25“Mulyeelele kuteelezhanya u shinkondonoko munzhila nimuciya kunkuta. Nkaambo kuti wakutola kumubeteshi, aze mubeteshi wakutola kumulindilizhi, ulakasowelwa muntolongo. 26Cini cini wiina nukaamuhwa muntolongo cita ukoomane mulandu kuuliya.

Makani a Bumambe

27“Inta mwakateelela kwakaambwa ati, ‘Utaciti bumambe.’#Kul 20:14; Ciz 5:18 28Pele ume ndamwaambila ati, kufwumbwa ulanga mukaintu cakumulyeelezha, wezo ati wacita kale bumambe mu monzo wakwe. 29Inzho kuti linso lyako lya kucilyo ndilikupa kucita shibi, lilobole ulisowe, nkaambo ncibotu kusweekelwa comwi cashipanzha ca mubili wako kubaala ati woonse mubili wako wasowelwa u mulilo utazhimi. 30Kuti itashi lyako lya cilyo ndilikupa kucita shibi, likosole nkaambo ncibotu kusweekelwa cizo comwi ca mubili wako kubaala ati woonse mubili wako wawaalwa mu mulilo utazhimi.

Kuyiisha sha Kulekana

(Matayo 19:9; Maako 10:11-12; Luka 15:18)

31“Ulimwi kwakaambwa ati, ‘kufwumbwa waleka mwinakwe ulyeelele kumupa luŋwalu lwa kumuleka!’#Ciz 24:1-4 32Pele ume ndamwaambila ati, mulombwana teelele kuleka mwinakwe cita kuti wabukilwa, kufwumbwa wezo uuleka mwinakwe kukaambo kamwi koonse ulapa kwaamba mukaintu abukilwe, u wezo utwala mukaintu wakalekwa ati aze wabukilwa.

Makani a Kulumbila

33“Ulimwi mwakateelela kuli ba shaakale benu aakuti, ‘Utalumbila cakubeya. Ucite ku mwami Leza mbubona mbuwashomezha kwakwe.’#Ciz 23:22 34Pele ume ndamwaambila ati, ‘utalumbila naashoonto pe, nikuba kwizeulu nkaambo ncicuuna ca Leza, 35naaba anshi nkaambo ncicilyatilo ca Leza, nikuba ku Jelusalemu nkaambo ngu munzhi wa Mwami mukando.’ 36Ulimwi mutalumbila ati, ngu mutwi wangu mwini, nkaambo tamukonzha kusandula isusu kwaamba litube naa lishiye. 37Kwaamba kwenu akube bulyo kwakuti, ‘Ee,’ naa, ‘Pe pe,’ kwiitilizha kwaamba bobo kulahwa ku mubiyabi.

Makani a Nzholi

(Luka 6:29-30)

38“Ulimwi mwakateelela kwakaambwa ati, ‘linso ku linso, u lino ku lino’#Kul 21:24; Bale 24:20; Ciz 19:21 39Pele ume ndamwaambila ati, ‘Utazhola cibi ku cibi.’ Pele kuti muntu wakuuma kwitama lya kucilyo aakuume ukwitama lya kucimonsho. 40Ulimwi kuti umwi muntu wakutola kunkuta kwaamba akunanzhe cikobelo iichanshi lyako, naalitole iikoti lyako. 41Ulimwi kuti shikalumamba wakushinicizha kweenda mushinzo uulampa maile womwi, amweende aze umaile wabili. 42Mupe wezo ukumbila, ulimwi aze wezo uzanda ukweleta utamukasha pe.

Makani Akufwuna ba Shinkondonoko

(Luka 6:27-28, 32-36)

43“Inta mwakateelela kwakaambwa ati, ‘Ufwune mweenzhinoko, usule shinkondonoko?’#Bale 19:18 44Pele ume ndamwaambila ati, amubafwune ba shinkondonokwenu ulimwi mubakombele babo bamupenzha, 45kwaamba mukabe banakwe ushenu uli kwizeulu. Kayi walo ulapozha izuba ku babiyabi uku babotu. Ulimwi ulaunsha inhula ku ba shishibi u baluleme, 46nkaambo kuti kamufwini bulyo babo bamufwini no mulakayana bulumbuunzhi? Sa bashimutelo tabaciciti ceco? 47Ulimwi kuti kamwaanzha bulyo banyokwenu, no ncintuunzhi cibotu ncimwacita kubaala bamwi? Sa abo bakunze tabaciti bobo? 48Umwe mulyeelele kuba bantu baluleme ukoya ushenu uli kwizeulu.”

المحددات الحالية:

Matayo 5: ILL

تمييز النص

نسخ