KALATE METATAʼA 2
2
Môse zamgbwale wo teléban étyi
(Nk 20:8-11; Eza 58:13-14; Mk 2:27)
1Avale te e nde yôp a si a minsamba bitétéa miabe mise bi nga mane téban. 2E môse zamgbwale ésaé ése Zambe a nga bo é nga man, a a nga woʼon e môse zamgbwale ya ésaé ése a nga bo. 3Zambe a nga botane môse zamgbwale a telé wô étyi, amu môs ôte e ñwô Zambe a nga woʼon mfaʼa ésaé ya biôme a nga té.
Fam a minga Eden été
(Met 1:26-28; 1 Ko 15:45-49)
4Atataʼa yôp a si, éyoñe bi nga téban e nde di: Eyoñe Nti, nyô a ne Zambe, a nga bo yôp a si, teke 5mon élé éziñe ya fé a mbe a too si, nge éloʼo éziñe ya fé é mbe é faaneya: amu Nti, nyô a ne Zambe, a ngenan te bo na mveñ é noñe si, a teke môt éziñ a mbe na a bé bidi si. 6Ve ndutuu a mbe a vamek e si a ve si ése émumun.
7Nti, nyô a ne Zambe, a nga kôme môt a mbuluʼu ya si; a nga vuñulu nye mfep ényiñ e mimbile mi môé, a môt a nga bo ététéa é vee.
Atiñe Zambe
(Nli 22:1-2; 2:7)
8Wôna Nti, nyô a ne Zambe, a nga bé afup Eden, e mfaʼa jôp da tôô, a tooé môt a nga kôm été.
9Nti, nyô a ne Zambe, a nga bo na bilé mevale mese bi ne abeñe ya yen a mvaé ya di bi faa si, nalé fe élé ényiñ ézezañ afup, a élé ñyemane mvaé a abé .
10Ôsôé ô mbe ô soʼo Eden asu ya ve mendim afup, akôlô ya valé, ô nga kabane mefase menyin. 11Afas ôsu jôé na Pisôn; e nde da bômane sii Avila ése e nne ba koone or été 12e nyô a ne abeñ abui, nalé fe bedelium a akoʼo ôniks. 13Ôsôé baa ô ne jôé na: Giyôn; e ñwô wo bômane sii Kus ése. 14Jôé ôsôé lale é ne Hidékél; e ñwô wo lôt Asiri mfaʼa jôp da tôô. Osôé nyini ô ne Efrat.
15Nti, nyô a ne Zambe, a nga nyoñe môt a tooé nye afub Eden na a bé bidi été a baʼale fe de. 16Nti, nyô a ne Zambe, a nga ve môt abendé di na: Wo ye bo nguleya di jôm ése ja so bilé ya afup; 17ve wo ye bo te di jôme ja so élé ñyemane mvaé a abé , amu e môse wo ye di je, wo ye wu.
Nyôlane biôme môé a ntéane minga
(1 Ko 11:7-10; 1 Tim 2:11-13; Ef 5:22-33; Mt 19:3-9)
18Nti, Nyô a ne Zambe, a nga jô na: E nji bo mvaé na fam é tabe étam; ma ye bo nye e mvolô baa nye ba fombane mesu. 19E Nti, nyô a ne Zambe, a nga kôme betite bese ya mefan a anone ya yôp a tyia. A nga bo na bi zu be môt a yen aval a ye loone bie, nalé ate ététéa ése é vee ja ye beʼe e jôé môt a nga yiane yôlé nye. 20Môt a nga yôlé mon éyem ase jôé, nalé fe anone ya yôp a betite bese ya mefan; ve mfaʼa môt, a nji bi mvolô a mbe nyô baa nye ba fombane mesu. 21E nde ñhe Nti, nyô a ne Zambe, a nga bo na ôyo melom ô ku môte yôp, nye ve ke ôyo; a nga nyoñe jia ya bivese bi mvaé bié a dibe vôm ate a minsôn.
22Nti, nyô a ne Zambe, a nga kôme minga wua a évese mvaé a nga nyoñe fam a zuu nye be fam.
23A fam é nga jô na:
Eyoñe ji é ne ji évese ya bivese biam
e nsône ya minsône miam.
E nye ba ye loone minga.
Amu a nga nyoñebane be fam.
24Ajô te fam ja ye liʼi ésaa wé a e nyia wé, a a ye lat a e minga wé a ba ye bo e nsône wua.
Fam a minga ba tyam atiñe Zambe
(Mt 4:1-11; 2 Ko 11:3; 1 Tim 2:14)
25Fam baa minga wé be mbe soé bebaane, ve be nji wôʼô nalé ôson.
المحددات الحالية:
KALATE METATAʼA 2: BULU09
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© LʼAlliance Biblique du Cameroun, 2009
