Génesis 5
5
Desendientenan di Adam
(1 Krónikanan 1:1-4)
1Aki ta sigui lista di e desendientenan di Adam. Dia Dios a krea hende, El a trah'é paresido na Dios. 2El a krea nan hòmber i muhé,#Mateo 19:4; Marko 10:6 i a bendishoná nan.#Génesis 1:27-28 Dia El a krea nan, El a yama nan ‘hende’.
3Adam tabatin 130 aña tempu su yu hòmber a nase. El a yam'é Sèt. Sèt tabata pars'é; e tabata imágen di su tata. 4Despues Adam a biba 800 aña mas i e tabatin mas yu, tantu hòmber komo muhé. 5Na edat di 930 aña el a muri.
6Sèt tabatin 105 aña tempu su yu hòmber Enosh a nase. 7Despues Sèt a biba 807 aña mas i e tabatin mas yu, hòmber i muhé. 8Na edat di 912 aña el a muri.
9Enosh tabatin 90 aña tempu su yu hòmber Kenan a nase. 10Despues Enosh a biba 815 aña mas i e tabatin mas yu, hòmber i muhé. 11Na edat di 905 aña el a muri.
12Kenan tabatin 70 aña tempu su yu hòmber Mahalalel a nase. 13Despues Kenan a biba 840 aña mas i e tabatin mas yu, hòmber i muhé. 14Na edat di 910 aña el a muri.
15Mahalalel tabatin 65 aña tempu su yu hòmber Yèrèd a nase. 16Despues Mahalalel a biba 830 aña mas i e tabatin mas yu, hòmber i muhé. 17Na edat di 895 aña el a muri.
18Yèrèd tabatin 162 aña tempu su yu Henok a nase. 19Despues Yèrèd a biba 800 aña mas i e tabatin mas yu, hòmber i muhé. 20Na edat di 962 aña el a muri.
21Henok tabatin 65 aña tempu su yu hòmber Metusalem a nase. 22Henok tabatin un laso íntimo ku Dios, despues ku Metusalem a nase. Henok a biba 300 aña mas i e tabatin mas yu, hòmber i muhé. 23Na tur Henok a biba 365 aña. 24Henok tabata biba den intimidat ku Dios, i un dia e no tabata ei mas, pasobra Dios a tum'é.#Sirag 44:16; Sabiduria 4:10-11; Hebreonan 11:5; Hudas 14
25Metusalem tabatin 187 aña tempu su yu hòmber Lamèk a nase. 26Despues Metusalem a biba 782 aña mas i e tabatin mas yu, hòmber i muhé. 27Na edat di 969 aña el a muri.
28Lamèk tabatin 182 aña tempu su yu hòmber a nase. 29El a yama e yu Noe,#5:29 Na hebreo e nòmber Noe ta zona paresido na e verbo ku ta nifiká konsolá i aliviá. pasobra el a bisa: ‘E yu akí lo konsolá nos i aliviá nos trabou duru riba e tera ku SEÑOR a maldishoná.’ 30Despues ku Noe a nase, Lamèk a biba 595 aña mas i e tabatin mas yu, hòmber i muhé. 31Na edat di 777 aña el a muri.
32Noe tabatin 500 aña tempu su yu hòmbernan Sèm, Ham i Yafèt a nase.
المحددات الحالية:
Génesis 5: PBDC13
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Papiamentu Bible with DC © Bible Society in Netherlands Antilles and Aruba, 2012, 2013
