Pe eya 14
14
Abram má Lot ne gan ma tok go
1Dam mbe ma pul zi ya, gan Amrafel ge suwal Chineyar ne, ne gan Ariyok ge suwal Ellasar ne, ne gan Kedorlawomer ge suwal Elam ne, ne gan Tidal ge suwal Goyim ne, 2a mbo det gan Bera ge suwal Sodom ne, ne gan Bircha ge suwal Gomor ne, ne gan Chineyab ge suwal Adma ne, ne gan Chemeber ge suwal Seboyim ne, ne gan ge suwal Bela ne, ndwara go Sowar ne pore mballa. 3Nama mbe ma no pet, a pose bama pala ya digi ge babur pul ge Sidim ne go, ndwara go maŋgaɗam ga̰l ge yuwam. 4Ago del wol para azi, a ka muluk ge Kedorlawomer ne pe se, amma del ge wol para ataa go, a ɗage kuri na wak no. 5Del ge wol para anda go, Kedorlawomer ma ne gan ge a ne ɓa̰ bama pe ne na ma, a abe pore ya no, a há Refayim ma ge suwal Achetarot-Karnayim go no, a há Zuzim ma ge suwal Ham go no, a há Emiya ma ge babur pul ge Kiryatayim ne go no me. 6A há Horiya ma, ge bama njal ma pal, suwal Seyir go no, a yá̰ nama pe no ɗiŋ mbo El-Paran ya, na ge ne babur pul ta ya gwa. 7Go̰r go, a gwa̰ ya Eyin-Michpat, ndwara go Kades go no, a burmi Amalek ma suwal ma no pet, poseya ne Amoriya ma ge a ne ka ne suwal Hasason-Tamar go no pet me. 8Swaga mbe go no, gan ge suwal Sodom ne, ne gan ge suwal Gomor ne, ne gan ge suwal Adma ne, ne gan ge Seboyim ne, ne gan ge suwal Bela ne, ndwara go Sowar, a zu pore ya zum ge baal pul ge Sidim ne go no ndwara mbal pore ne 9Kedorlawomer gan ge suwal Elam ne, ne Tidal gan ge suwal Goyim ne, ne Amrafel gan ge suwal Chineyar ne, ne Ariyok gan ge suwal Ellasar ne no. Ndwara go gan ma anuwa̰y ge gan anda pal. 10Ne jo̰ tuul ge njiyal-mboo ne ma ka gḛ ge baal pul ge Sidim ne go ɗe, gan ge Sodom ne ma ne ge Gomor ne, a syat bama pe so, a mbo det tuul mbe ma se, naa ge may ma só mbo njal ma pala digi ya me. 11Naa ge ne há pore ma a pál suwal Sodom ma ne Gomor kaŋ ma kakaɗak, poseya ne nama kaŋzam ma pet, a mbo ne nama. 12Ne jo̰ Lot ge Abram sá ka Sodom go ɗe, a pál na poseya ne na kaŋ ma pet, a mbo ne nama.
13Ndu a̰me yṵwa̰le ya, mbo ya jan Abram ndu ge Ibriniya. Ago Abram ká ge uwara Chen ge Mamre, ndu ge Amoriya ne zi. Mamre ka Echekol ma ne Aner ná vya, nama sḛ ma mwaɗak, a ne Abram ma vwa bama wak dagre. 14Swaga ge Abram ne za̰ go a pál na sá ya ya ɗe, nṵsi na dore ma, nama ge a ne tó tol na yadiŋ ma, naa sonmo ge ful ma, naa kikis ataa para wol para tiimal, a kare nama pe ɗiŋ mbo suwal Dan ya. 15Abram caɗe na naa ma se, det nama ɗaal zi. A hál nama, a yan nama pe ɗiŋ mbo suwal Hoba ya, na ge ne Damas le kuu ya. 16Maŋge kaŋ ma ge a ne pá nama pet, zur na sá Lot ma ne na kaŋ ma ya, zur naa zaab ma, ne naa ge a ne pá nama ge may ma ya pet me.
Melkisedek e wak busu Abram pal
17Swaga ge Abram ne ka gwan ne na swaga ge na ne há Kedorlawomer ma ne gan ge ne na pe go ma ya ɗe, gan ge Sodom ne ɗage ya na ndwara zi, mbo ya ɓol na ge baal pul ge Chave ne go, ndwara go baal pul ge gan ne#Ibr 7:1-10..
18Melkisedek gan ge Salem ne, mbo ne katugum ma ne oyo̰r jiya̰l ya hon Abram. Na sḛ a bage ke tuwaleya ge Dok ge digi digi ya ne ne. 19E wak busu Abram pal, jan go: «Dok ge ne digi zi ya, na ge ne dó digi ma ne suwar na é na wak busu Abram pal! 20Uwareya hon Dok ge ne digi zi ya, na ge ne ɓya̰ mo naa ge ho̰l ma mo tok go!»
Abram hon na kaŋ ge na ne pá ya ma pet ɗu ne wol zi.
21Gan ge Sodom ne jan Abram go: «Ho̰ mbi naa dasana ma, abe kaŋ ge may ma ne mo sḛ pe.» 22Abram jan gan ge Sodom ne go: «Mbi ne tyare mbi tok ne Bage ɗiŋnedin, Dok ge ne digi digi ya, Bage ne dó digi ma ne suwar pe digi no, 23mbi ame mo a̰me ɗu to bat, ko taal, ko tyarko taal koko puy, mbi ame na to. Na kaage mo jya̰ go: ‹Abram saŋge ndu ge ɓol kaŋ da ne mbi pe› to. 24Mbi ɓyare a̰me ne mo ta to, ɗeŋgo kaŋzam ma ge mbi dore ma ne za, amma ne naa ge a ne ɗame mbi ma ɗe, ndwara go Aner, Echekol, ne Mamre, nama sḛ ma a da ne pool abe bama kaŋ ma ndwara.»
المحددات الحالية:
Pe eya 14: FGN2013
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
La Bible en langue Kim © Alliance Biblique du Tchad, 2013.
