Mateus 13
13
Nén fy kãmẽ
(Mc 4.1-9; Lc 8.4-8)
1Kurã ẽn kã Jesus tóg, ĩn tá kãkutẽ mũ, kỹ tóg goj nig mág ra tĩ mũ. Tá tóg nĩ nĩ sir. 2Kỹ ũ tỹ hẽn ri ke ag vỹ tá vẽnh mãn mũ sir, ti rã hã, kỹ tóg canoa kã ra rã kỹ kã kã nĩ mũ sir, jo ũn e ẽn ag tóg nig fyr tá nỹtĩ. 3Kỹ tóg ag kanhrãn mũ sir. Ag mỹ tóg: “ũ tỹ Topẽ vĩ tó tĩ ag vỹ ge nỹtĩnh mũ, ha mẽ,” he mũ. “Kejẽn ũ tóg nén fy krãn jé tĩ mũ. 4Ti tỹ krãn kỹ ti fy ũ tóg, ẽpry kri kutẽ mũ, kỹ sẽsĩ tóg ko mũ sir. 5Ti fy ũ tóg, pãró kri krãn kỹ nĩ, ga e tũ ki. Ge ra tóg kãnhmar mur mũ vẽ, ga sĩ ẽn ki. 6Hã ra tóg rã tỹ ẽg nĩno kã sa kỹ ti pũn mũ. Ti jãre han tũ nĩn kỹ tóg, tóg mũ. 7Ti fy ũ tóg, sónh kã ki krãn kỹ nĩ gé, kỹ sónh tóg ti mré mur mũ, kỹ tóg ti kri rũm ke mũ. Kỹ tóg tũ' he mũ sir. 8Ti fy ũ tóg vãhã, ga há ki krãn kỹ nĩ, kỹ tóg mur há han mũ, mog há han tóg mũ gé, kanẽn há han tóg mũ gé sir. Ũ tóg kanẽ tỹ 100 han mũ, jo ũ vỹ kanẽ tỹ 60 han mũ gé, jo ũ vỹ tóg kanẽ tỹ 30 han mũ. 9Ha to jykrén há han,” he tóg, Jesus ti.
Ẽg tỹ Topẽ jykre to vẽnh kanhrãn ke
(Mc 4.10-12; Lc 8.9-10)
10Kỹ ti mré mũ tĩ ag tóg ti to kãmũ mũ, kỹ ag tóg ti mỹ: “ã tỹ ne tó nẽ?“ he mũ.
11Kỹ tóg ag mỹ: “ãjag hã ne, ũ tỹ kanhkã tá nĩ ẽn tỹ tỹ ẽg pã'i nĩ ẽn ki kanhró nỹtĩnh mũ',” he mũ. “Jãvo ũn e ẽn ag vỹ, ki kanhrãn kãn ke tũ nĩ. 12Hã kỹ tóg ge nĩ. Ũ tỹ nén ũ to jykrén há han kỹ tóg ũ to jykrén mãn', ũ to jykrén mãn' he tĩ. Komẽr hã tóg to jykrén kãn ke mũ. Ũ tỹ nén ũ to jykrén tũ nĩn kỹ tóg ti mỹ tũ tĩ, ti tỹ to jykrén sĩ han mũ ra. 13Hã kỹ sóg ũn e ẽn ag mỹ nén kãme hã tó mũ, ag tỹ mẽg mũ ra han sór tũ nỹtĩn kỹ. Kỹ ag tóg ón kỹ mẽ ja nĩ sir, hã kỹ ag ki kagtĩg nỹtĩ, to jykrén tũ ag nỹtĩ sir. 14Hã ra Isaías tóg tag rán ja nĩ gé, ha mẽ. “Mẽ jé ãjag tóg ke mũ, ón kỹ, hã ra tóg ãjag tỹ to jykrén tũ tĩnh mũ, hã kỹ ãjag tóg ki kagtĩg nỹtĩnh mũ. 15Povo tag ag vỹ, krĩ tũ nỹtĩ. Nĩgrẽg kutu ag nỹtĩ. Kanẽ kyvó ag nỹtĩ gé, ag tỹ inh ki ge sór tũ nỹtĩn kỹ. Hã kỹ sóg ag tỹ há' henh ke tũ nĩ gé,” he tóg, Topẽ ti, he ja tóg nĩ, Isaías ti, povo tag to,” he tóg.
16“Ag jãvo ãjag hã vỹ, nĩgrẽg há nỹtĩ, hã kỹ ãjag tóg, jẽmẽ há han mũ. 17Ha mẽ, vãsỹ ke tỹ hẽn ri ke ag vỹ, inh ve sór e ja nĩgtĩ, ãjag tỹ ũri vég mũ tag ti. Hã ra ag tóg inh kãtĩg ke jo kãgter kãn. Topẽ vĩ tó tĩ ag vẽ. Jykre kuryj ja ag nỹtĩ. Ge ra ag tóg inh ve ja tũ nĩgtĩ. Ãjag hã ne inh vĩ mẽg mũ', inhhã',” he tóg, Jesus ti, ti mré mũ tĩ ag mỹ.
Jesus tỹ nén fy kãmén
(Mc 4.13-20; Lc 8.11-15)
18“Kỹ sóg ãjag mỹ ẽg tỹ nén fy krãn kãmén há han mũ, ha mẽ. 19Ũ tóg kejẽn, ón kỹ Topẽ vĩ mẽg mũ. Hã ra tóg to jykrén tũ nĩ. Kỹ Nén-Kórég vỹ, ti mỹ tỹ tũ' he mũ sir, ti tỹ mẽ ja ti tỹ. Kã jatu tóg nĩ sir. Nén fy tỹ ẽmĩn kri kutẽ mũ ẽn hã vẽ. 20Kỹ ti fy ũ tóg, pãró kri krãn kỹ nĩ. Ũ vẽ gé. Topẽ vĩ mẽg tóg mũ gé. Kỹ tóg kãnhmar: he, he mũ sir. Ti mỹ tóg sér tĩ. 21Hã ra tóg tỹ nén ũ kré jãre tũ ẽn ri ke nĩ mỹr. Hã kỹ tóg tĩg sĩ han mũ, Topẽ mré. Nén ũ jagy kutẽ kỹ tóg, Topẽ tovãnh mũ sir, ũ tỹ Topẽ vĩ tugrĩn ti kato tẽ kỹ. 22Ti fy ũ tóg sónh kã ki krãn kỹ nĩ. Ũ vẽ gé. Topẽ vĩ mẽg tóg mũ gé. Hã ra tóg ti rãnhrãj hã mĩ ẽkrég mũ sir. Nén kar to én tóg mũ sir. Ón kỹ tóg riko nĩ sór mũ. Hã kỹ tóg Topẽ vĩ kã jatu' he mũ sir. Kỹ tóg kanẽn há han tũ nĩ sir. 23Ti fy ũ tóg ga há ki krãn kỹ nĩ. Ũ vẽ gé. Topẽ vĩ mẽg tóg mũ gé. Mẽ kỹ tóg to jykrén mũ sir. Kỹ tóg kanẽn há han mũ sir. Kỹ ũ vỹ tóg kanẽ tỹ 100 han, jo ũ vỹ tóg kanẽ tỹ 60 han mũ, jo ũ vỹ tóg kanẽ tỹ 30 han mũ gé,” he tóg.
Vãnh kãme
24Kỹ tóg vãnh to kãmén kỹ: “Nén-Kórég tỹ inh rãnhrãj kókén sór mũ vỹ ge nỹnh mũ, ha mẽ,” he mũ. ”Kejẽn ũ tóg ti japỹ tá nén ũ fy krãn mũ. 25Kỹ tóg nũr tĩ mũ, ti camarada ag ke gé. Kỹ ti kato tẽ ẽn tóg kutyg kỹ ti japỹ ra tĩ mũ, kỹ tóg tá jun kỹ vãnh fy krãn mũ, ti jakré ẽn kãmĩ. Kỹ tóg tĩ mũ sir. 26Kỹ ti jakré tóg mur mũ, mog tóg mũ, kanẽn tóg mũ gé sir. Hã ra vãnh tóg ti mré mur mũ gé. 27Kỹ ti camarada ag tóg ti mỹ: “nén ũ fy krãn ẽg tóg mũ vẽ, hã ra vãnh tóg ti mré mur mũ. Ne nẽ hỹn?“ he mũ.
28Kỹ tóg ag mỹ: “ẽg kato tẽ ẽn rãnhrãj hã vẽ,” he mũ. “Ẽn hã vỹ isũ kókég mũ'. “Kỹ ag tóg ti mỹ: “kỹ ẽg mỹ vãnh ẽn kunũnh ke tũ nĩ'?“ he mũ.
29Kỹ tóg ag mỹ: “hỹ,” he mũ. “Ãjag tỹ vãnh ẽn kunũnh kỹ tóg inh mỹ ãjag tỹ ti pẽn ũ kunũnh ha mẽ tĩ, vãnh mré. Kỹ kunũnh tũg nĩ. 30Vãnh hỹn tóg inh jakré mré mog mũ gé. Kỹ sóg ẽg tỹ krenh ken kỹ ũ tỹ krég mũ ag mỹ: “vãnh kre vén nĩ,” henh ke mũ. “Kỹ tugfĩn nĩ, ẽg tỹ pũn jé. Kar kỹ ãjag tóg inh jakré krenh ke mũ, sỹ pãjó krẽm vin han jé,” he tóg, ag patrão ti,” he tóg, Jesus ti. Ti tỹ ũ tỹ ón kỹ Topẽ ki ge kỹ nỹtĩ ẽn ag tón hã vẽ.
Topẽ vĩ tỹ vẽnh kar kri rũm ke
(Mc 4.30-32; Lc 13.18-21)
31Kỹ tóg ag mỹ: “ũ tỹ kanhkã tá nĩ ẽn tỹ tỹ ẽg pã'i nĩ vỹ ge nĩnh mũ, ha mẽ,” he mũ gé. “Ka tỹ krén ri ke tóg nĩ. Ti krãn ẽg tóg tĩ. 32Ti mog kỹ tóg vãhã vãnh kãfór kar nĩ. Hã kỹ sẽsĩ ag vỹ ti féj kã ki ti jagfe han kỹ kã ki krẽg tĩ,” he tóg.
33Kỹ tóg fag mỹ: “Topẽ tỹ tỹ ẽg pã'i nĩ vỹ ũn tỹtá fag tỹ ẽmĩ han ri ke nĩ,” he mũ gé. “Ẽmĩ han jé fag tóg, ẽmĩ jãgja jafã tỹ fermento ẽn tỹ farĩnh mré jãgjãg tĩ. Kỹ tóg tỹ són ke kãn tĩ,” he tóg.
Jesus tỹ nén ũ tỹ ẽg kanhrãn
(Mc 4.33-34)
34Nén tỹ hẽn ri ke kãmén tóg tĩ, Jesus ti, vẽnh kar mỹ. “Topẽ tỹ tỹ ẽg pã'i nĩnh ke vỹ tag ri ke nĩ,” he tãvĩ han tóg tĩ ag mỹ. 35Hã ra tóg rán kỹ nĩ gé. Vãsỹ Topẽ vĩ tó tĩ ũ tóg Jesus to tag rán ja nĩ, ha me: “nén tỹ hẽn ri ke kãmén jé sóg ke mũ. Inh jo tó ja tũ ẽn tó jé sóg ke mũ. Ũ vỹ tag mẽ ja tũ nĩ ver, sỹ tónh ke mũ tag,” he ja tóg nĩ, Topẽ vĩ tó tĩ ẽn, Jesus to.
Jesus tỹ vãnh kãmén
36Ag mỹ kãmén kãn kar kỹ tóg, vẽnh e ẽn ré kỹ ĩn kã ra rã mũ, Jesus ti. Kỹ ti mré mũ tĩ ag tóg, ti to kãmũ mũ, ti ki jẽmẽ jé. “Ẽg mỹ ã tỹ ag mỹ kãmén ja ẽn ti tó mãn nĩ, ã tỹ ag mỹ ẽkré mré vãnh tó ja ẽn ti. Ẽg tỹ ver to jykrén tũ tóg tĩ,” he ag tóg mũ.
37Kỹ tóg ag mỹ: “ẽprã ke fi kósin vỹ nén ũ fy krãn mũ. Inh hã vẽ,” he mũ. 38“Ga hã to sóg: ẽpỹ, he mũ. Kỹ inh jakré vỹ tỹ, Topẽ krẽ ag ri ke nỹtĩ, kỹ vãnh vỹ tỹ, Nén-Kórég krẽ ag ri ke nỹtĩ gé. 39Ũ tỹ ag han mũ vỹ tỹ, Japo ti nĩ, Nén-Kórég ẽn krẽ ag. Ti krenh ke kurã hã vỹ: kurã tỹ ẽgno, he mũ. Ũ tỹ inh jakré krenh ke mũ ag vỹ tỹ, Topẽ tỹ jẽgnẽ jafã ag nỹtĩ. 40Kurã tỹ ẽgno kã ag tóg, ẽg tỹ vãnh pũn ẽn ri ke han ke mũ, Japo tũ ag tỹ. 41Ẽprã ke fi kósin ẽn, inh hã vỹ, isỹ jẽgnẽ jafã ẽn ag jẽgnẽnh ke mũ sir, kỹ ag tóg, ũ tỹ vẽjykre pãno han mũ kar ag génh kãn ke mũ, ũ tỹ ũ ag mỹ: “ha jatun mỹ Topẽ vĩ mranh,” he mũ kar ag ke gé. 42Ag génh kỹ ag tóg, pĩ gru mág ẽn ki ag vãm ke mũ sir. Tá ag tóg vẽsỹrénh tãvĩ han ke mũ. Ag jã tỹ ag tóg gyngyn kenh ke mũ, jũ kỹ, vẽsỹrénh kỹ ke gé. 43Ag jãvo ũn jykre kuryj ag vỹ, hapẽ nỹtĩnh mũ, sĩnvĩ, kókov, rã gru ri ke, ag tỹ ag jóg tá nỹtĩn kỹ sir, ag tỹ ũ tỹ kanhkã tá nĩ ẽn tỹ tỹ ẽg pã'i nĩ ven kỹ. Ha mẽ há han,” he tóg, Jesus ti.
Ẽpỹ ki jãnkamy kãme
44“Kỹ ẽg tỹ kanhkã tá nĩ ẽn tỹ tỹ ẽg pã'i nĩ venh ke vỹ, tag ri ke nĩ gé, ha mẽ. Ũ tỹ ti patrão japỹ tá jãnkamy ne kunũnh kỹ péju mãn kỹ nĩm ẽn ri ke tóg nĩ. Ti péju mãn kar kỹ tóg, ti tỹ nén kar fón kãn mũ sir, ti kaja to ẽpỹ ẽn vyn jé sir. Ti tỹ ẽpỹ ẽn vyn kar kỹ jãnkamy ẽn vỹ tỹ, ti tũ nĩ sir,” he tóg. Ti tỹ ẽg tỹ ti ki rã há han ke kãmén hã vẽ.
Pérola kãme
45“Ẽg tỹ ũ tỹ kanhkã tá nĩ ẽn tỹ tỹ ẽg pã'i nĩ venh ke vỹ tag ri ke nĩ gé, ha mẽ,” he tóg mũ gé. “Negociante ũ tóg jãnka han jafã tỹ negociar he tĩ, pérola tỹ. Hã kỹ tóg ũn há kuprẽg tĩgtĩ. 46Kejẽn tóg ũn hapẽ ũ vég mũ sir, ũn kaja e. Kỹ tóg ti tũ vãm kãn mũ sir, ti tỹ ũn sĩnvĩ pẽ ẽn kũpra he jé,” he tóg, Jesus ti. Ti tỹ ẽg mỹ ẽg tỹ ti ki rã há han ke kãmén mãn hã vẽ gé.
Rede kãme
47“Ẽg tỹ Topẽ tỹ tỹ ẽg pã'i nĩ venh ke kãme ũ vẽ gé, ha mẽ,” he tóg mũ gé. “Rede ri ke tóg nĩ, ẽg tỹ tỹ pirã kugmĩ jafã ẽn. Ti fón ẽg tóg tĩ, goj kã ki, ẽg tỹ pirã kugmĩ jé, kãkufár ke gé. 48Goj ki fón kar kỹ ẽg tóg nỹgnỹn tĩ sir, kỹ ẽg tóg, pirã mré kãkufár gég tĩ. Génh kỹ ẽg tóg, ũn mág hã kuprẽg tĩ, ma mũ jé. Ũn kãsir ẽn tugvãnh ẽg tóg tĩ. 49Ge ti nĩnh mũ, kurã tỹ ẽgno kã. Topẽ tỹ jẽgnẽ jafã ag tóg, ũn jykre kuryj ag kuprẽg ke mũ, Topẽ mỹ. 50Ũn jykre pãno ag vãvãm jé ag tóg ke mũ, pĩ gru mág ẽn ki. Tá ag vẽsỹrénh ke vẽ sir. Ag jã tỹ ag tóg gyngyn kenh ke mũ, tỹ ag gangan kenh ke mũ, jũ kỹ, vẽsỹrénh kỹ,” he tóg, Jesus ti.
Ẽg panh kãme
51Kỹ tóg ti mré mũ tĩ ag mỹ: “ãjag mỹ tag to jykrén kãn mũ ha?“ he mũ. Kỹ ag tóg ti mỹ: “hỹ,” he mũ sir.
52Kỹ tóg ag mỹ: “kỹ tóg há tĩ,” he mũ. “Ũ tỹ Topẽ vĩ to ẽg kanhrãn tĩ ẽn, ti tỹ kanhkã tá nĩ ẽn jykre han kỹ tóg ge nĩ, ha mẽ. Ẽg panh ri ke ti nĩ. Kejẽn tóg ẽg mỹ ti tỹ nén sĩnvĩ ven tĩ, ti tỹ ũri mãg mũ ti, ti tỹ vãsỹ mãn ja ẽn ke gé,” he tóg. Ti tỹ ẽg tỹ Topẽ vĩ to vẽnh kanhrãn mág han tón hã vẽ.
Jesus tỹ Nazaré ra vỹn ke
(Mc 6.1-6; Lc 4.16-30)
53Ag mỹ kãmén kãn kar kỹ tóg, tá kãkutẽ mũ sir. 54Kỹ tóg ti jamã ra tĩ mũ sir. Tá jun kỹ tóg, vẽnh kanhrãn jafã krẽm ag kanhrãn mũ. Kỹ tóg ag mỹ e tĩ, ti vĩ ti. Kỹ ag tóg ti to vĩ kónãn mũ. “Hẽn tán hỹn ki kanhrãn, vẽjykre tag ki? Ũ nỹ hỹn ti kanhrãn, ti tỹ nén han vãnh tag hynhan jé? 55Ðn han tĩ ẽn kósin vẽ mỹr. Ti mỹnh fi vỹ tỹ Maria fi nĩ, kỹ ti jãvy ag vỹ ki nỹtĩ, Tiago, José, Simão, Judas. 56Kỹ ti ve fag vỹ, tag ki nỹtĩ gé, ẽg mré. Ti tỹ ne jé ẽg kãfór nĩ sór nẽ hỹn?“ he ag tóg mũ sir, Jesus to.
57Kỹ tóg ag mỹ tỹ ũ nỹ. Kỹ Jesus tóg ag mỹ: “ẽmã ũ tá ag tóg Topẽ vĩ tó tĩ to é he tũ nĩgtĩ. Jãvo ti jamã tá ke ag tóg ti to é he tĩ, ti mré ke ag, ti kanhkã ag,” he mũ.
58Kỹ tóg tá milagre e hynhan tũ nĩ, ag tỹ ti ki ge jãvãnh nỹtĩn kỹ.
المحددات الحالية:
Mateus 13: kgp
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
