Mateus 10
10
Jesus tỹ apóstolo ag kuprẽg
(Mc 3.13-16; Lc 6.12-16)
1Kỹ Jesus tóg ũn tỹ 12 ag jé prẽr mũ. Kỹ tóg ag mỹ vẽjykre nĩm mũ sir, ag tỹ vẽjagrẽ kórég pan jé, ag tỹ ũn kagyga ag hynhan jé ke gé. 2Jesus tỹ ũn vin mũ ag jijin hã vẽ, ha mẽ. Ũn ve vỹ tỹ Simão nĩ, kỹ ti jiji ũ hã vỹ: Pedro, he mũ. Kar kỹ ti jãvy vỹ nĩ gé, hã vỹ: André, he mũ, Tiago ke gé, Zebedeu kósin tag ti, ti jãvy tỹ João ke gé, 3Filipe ke gé, Bartolomeu ke gé, Tomé ke gé, Mateus ke gé, governo mỹ jãnkamy mãg tĩ ja ẽn ti, Tiago ũ ke gé, Alfeu kósin tag ti, Tadeu ke gé, 4Simão ke gé, ag tỹ ũ to: Zelote, he mũ tag ti, kar kỹ Judas Iscariotes ke gé, ũ tỹ vẽnh kar vatánh tá pã'i ag mỹ Jesus fẽg mũ tag ti.
Jesus tỹ apóstolo ag jẽgnẽ
(Mc 6.7-13; Lc 9.1-6)
5Ũ tỹ 12 ẽn ag jẽgnẽg tóg mũ sir, Jesus ti, ag tỹ vẽnh kar mỹ Topẽ vĩ kãmén jé. Kỹ tóg ag mỹ: “ver fóg ag mỹ inh kãmén mũ tũg nĩ, kanhgág ag mỹ kãmén tũg nĩ gé ver,” he mũ. “Kỹ Samaria tá ke ag jamã ki ge tũg nĩ gé,” he tóg. 6“Israel ag tãvĩ mỹ tóm nĩ ver. Topẽ mỹ ag tóg tỹ carneiro vãgfor mũ ri ke nỹtĩ, kỹ ag hã mỹ tóm nĩ ver,” he tóg. 7“Ũ tỹ kanhkã tá nĩ ẽn tỹ tỹ ẽg pã'i nĩnh ke vẽ, ũri,” hem nĩ, ag mỹ. 8Ũn kaga ag tỹ há' hem nĩ. Ũn kãgter mũ ag rĩnrĩn mãn nĩ gé. Ũn kaga kren vãnh ẽn kren han nĩ. Vẽjagrẽ kórég pan nĩ gé. Ãjag mỹ sóg ge ra inh jykre nĩm mũ, hã kỹ ag mỹ: “inh mỹ kajãm,” he tũg nĩ. 9Kỹ jãnkamy ma mũ tũg nĩ, ouro, prata ti ke gé. 10Kỹ sako ma mũ tũg nĩ gé, bolsa ẽn. Kur tỹ vẽnh kri rĩnh tũg nĩ, pẽn né ũ gé mũ tũg nĩ gé, pẽn to ró ẽn. Kỹ vãtó va mũ tũg nĩ gé, kãtó ti. Inh rãnhrãj han ãjag tóg mũ. Kỹ ag tóg to ãjag jẽn ke mũ, vẽnh kato, ha vem nĩ,” he tóg.
11“Kỹ ãjag tóg kejẽn, ẽmã ũ tá junjun ke mũ. Tá ũn jykre há jãvãnh nĩ. Kỹ ẽn ĩn ra gem nĩ. Ẽn ĩn krẽm ãjag tỹ kurã ki kã panh ke mũ ẽn tá krỹg nĩ. 12Kỹ ĩn ẽn krẽm nỹtĩ fag mỹ: “Topẽ jé ãjag ki rĩr há han, kỹ ãjag jé krĩ kuprã nỹtĩ nĩ,” hem nĩ. 13Fag tỹ ãjag mỹ vĩ há han kỹ fag tóg, krĩ kuprã nỹtĩnh mũ. Fag tỹ ãjag mỹ vĩ há han tũ nĩn kỹ fag tóg, krĩ kuprã nỹtĩnh ke tũ nĩ. Fag jãvo ãjag tóg, krĩ kuprã nỹtĩnh mũ. 14Kejẽn ũ tóg ãjag mỹ: “kãge jẽg ra” henh ke tũ nĩ, ẽmã ũ tá. Kỹ tá kãpam nĩ, ag tỹ ãjag vĩ mẽ jãvãnh nỹtĩn kỹ. Tá kãpa kỹ ãjag pẽn hã kykũnh nĩ. Kỹ ag tóg Topẽ tỹ ag to kórég nĩ ki kanhrãn mũ. 15Ha mẽ, ki hã sóg tó mũ. Kurã tỹ ẽgno kã, isỹ vẽnh kar jykre tugnỹm ke kurã ẽn kã ag tóg, jagtar nỹtĩnh mũ sir, ag tỹ ãjag vĩ mẽ jãvãnh nỹtĩn kỹ. Ẽmã tỹ Sodoma mré ẽmã tỹ Gomorra tá ke ag tóg jykre pãno nỹtĩ ja nĩgtĩ. Kỹ ag tóg jagtar nỹtĩnh ke mũ gé. Hã ra ũn tỹ ãjag vĩ jẽmẽ jãvãnh ẽn ag tóg ag jagtar kãfór han ke mũ mỹr, ha vem nĩ,” he tóg.
Ag tỹ Jesus tugrĩn ẽg to jũnh ke
(Mc 13.9-13; Lc 21.12-17; 12.11-12)
16“Carneiro vỹ, vẽnh jy nĩgãn ki kagtĩg nỹtĩ, mĩg tỹ ag mãn sór mũ ra. Ri ke ãjag nỹtĩ, hã ra sóg ãjag jẽgnẽnh mũ, ũ tỹ tỹ mĩg ri ke ag to, hã ra Topẽ hã vỹ ãjag jy nĩgãn ke mũ sir. Hã kỹ vẽnh ki rĩr há han nĩ. Pỹn jykre ri ke han nĩ. Vãjig tóg tĩ, kỹ ẽg tóg kãnhmar ti tỹ hẽ ri ke tũ nĩgtĩ. Kỹ sórãg jykre ri ke han nĩ gé. Jũ vãnh pẽ ti nĩ, nén ũ vẽnh mỹ han tũ ti nĩgtĩ. 17Ẽprã ke ag tóg, ãjag vóg kónãn ke mũ, isugrĩn. Ag pã'i ag mỹ ag tóg ãjag kãmén ke mũ, ag tỹ ãjag vóg kónãn jé. Ag vẽnh kanhrãn jafã krẽm ag tóg, ãjag mrãnmrãn ke mũ. 18Fóg tỹ pã'i mág mỹ ag tóg, ãjag ven ke mũ, pã'i mág ũ ag mỹ ke gé. Isugrĩn ãjag tóg, vẽnh jagtar tag venh ke mũ, ãjag tỹ ag mỹ inh vĩ ti tó jé, fóg ag kar mỹ, kanhgág ag kar mỹ ke gé. 19Pã'i ag tỹ ãjag jé ke kỹ to jykrén tũg nĩ, ãjag tỹ ag mỹ nén tónh ke mũ to. Topẽ kuprĩg hã ne, ãjag krĩn ke mũ', kỹ ãjag tóg ti tỹ ãjag mỹ nén tó mũ ẽn hã tónh ke mũ, óra ẽn kã. 20Hã kỹ ãjag tỹ tó tũ vẽ sir. Ẽg jóg kuprĩg tỹ ãjag mỹ tón hã vẽ,” he tóg.
21“Ũ ag tóg, ag mré pafa mũ fag kãmén ke mũ, pã'i ag mỹ, ag tỹ fag kãgtén jé. Kỹ ũ ag tóg ag krẽ kãmén ke mũ gé. Kỹ ũ ag tóg ag han mũ fag kãmén ke mũ gé, pã'i ag mỹ, ag tỹ fag kãgtén jé, mỹr, ha mẽ. 22Vẽnh kar vỹ ãjag to jũ kỹ ãjag vóg kónãn sór nỹtĩ, isugrĩn. Hã ra ũ tỹ isovãnh tũ ẽn ag hã vỹ, krenkren ke mũ, kurã tỹ ẽgno ẽn kã,” he tóg.
23“Ag tỹ ẽmã ũ tá ãjag vóg kónãn kỹ ẽmã ũ ra pétẽm nĩ. Ki hã sóg tó mũ, ha mẽ. Israel ag jamã fĩn rãm kãn ke tũ ãjag tóg nĩ, kurã ẽn kã. Sĩ ti nĩ, ag tỹ ãjag vóg kónãn ke kurã ẽn ti. Kãtĩg jé sóg ke mũ, ag tỹ gen kỹ ãjag vóg mũ ra. Tỹ sóg ẽprã ke fi kósin nĩ, mỹr, ha mẽ. 24Ũn vẽnh kanhrãn mũ pijé ũ tỹ ti kanhrãn mũ kãfór nĩ'. Ũn camarada pijé ti patrão kãfór nĩ'. 25Ũn vẽnh kanhrãn mũ tỹ ũ tỹ ti kanhrãn mũ ri ke nĩn kỹ tóg há tĩ. Ũn camarada tỹ ti patrão ri ke nĩn kỹ tóg há tĩ gé. Iso ag tóg: Belzebu, he ja nĩgtĩ, inh kato vãsãnsãn mũ ag, hã vỹ: Japo, he mũ. Tỹ sóg ũ tỹ ãjag kanhrãn mũ ri ke nĩ, ãjag patrão ri ke. Ag tỹ iso: Japo, hen kỹ ag tóg ãjag to vĩ kónãn mũ gé, ha vem nĩ, ãjag tỹ inh jykre hã han ti kỹ,” he tóg, Jesus ti.
Ẽg tỹ Topẽ hã kamẽg ke
(Lc 12.2-7)
26“Ge ra ag kamẽg tũg nĩ, pã'i ag. Ẽg tỹ vẽnh péju kỹ nén han mũ tóg vẽnh ven kãn ke mũ. Ẽg tỹ vẽnh kar vatánh tá nén to jykrén mũ tóg vẽnh ven kãn ke mũ gé. 27Isỹ vẽnh kar vatánh tá ãjag mỹ nén tó mũ tag tỹ vẽnh kar mỹ tó kãn nĩ. Isỹ komẽr hã ãjag mỹ nén tó mũ tag tỹ vẽnh kar mỹ jamã há ra tóm nĩ. 28Mũmẽg tũg nĩ, ag kamẽg tũg nĩ, pã'i ag. Ẽg tén há ag nỹtĩ, hã ra ag tóg nũgme ki ẽg fón ki kagtĩg nỹtĩ. Ũn pir hã kamẽg nĩ, hã vỹ: Topẽ, he mũ. Ti hã ne ẽg tén kar kỹ nũgme ki ẽg fón ki kanhró nĩ'. Kỹ ti hã kamẽg nĩ. 29Ha vé, sẽsĩ vẽne he ag tĩ, kỹ ag tóg ũn régre to jãnkamy pir mãg tĩ. Hã ra Topẽ tóg sẽsĩ ag ki rĩr nĩgtĩ. Ti tỹ: he, hen kỹ ẽg tóg ag pin tĩ, ke tũ nĩ kỹ ẽg tóg ag krenkren tĩ. 30Ẽg ki rĩr tóg tĩ gé. Hã kỹ tóg ẽg gãnh kar nĩgkrén ja nĩ gé, Topẽ ti. 31Hã kỹ pã'i ag kamẽg tũg nĩ. Sẽsĩ kãfór ãjag tóg nỹtĩ, Topẽ mỹ. Ãjag kã mĩ ũn pir tóg sẽsĩ e kãfór nĩ, ti mỹ,” he tóg, Jesus ti.
Ẽg tỹ Jesus kãmén ke
(Lc 12.8-9)
32“Hã kỹ inh kãmén nĩ, ẽprã ke ag mỹ. Ag kamẽg tũg nĩ. Kỹ sóg inh jóg tỹ kanhkã tá nĩ ẽn mỹ ãjag kãmén ke mũ gé, kurã ẽn kã. 33Ãjag tỹ hã ra inh kãmén tũ nĩn kỹ sóg inh jóg tỹ kanhkã tá nĩ ẽn mỹ ãjag kãmén ke tũ nĩ gé, kurã ẽn kã, ãjag tỹ iso: “ti ki kagtĩg sóg nĩ, hen kỹ,” he tóg, Jesus ti.
Ẽg tỹ ẽg jykre finh ke
(Lc 12.51-53; 14.26-27)
34“Ãjag hỹn iso: vẽnh kar tỹ jagnẽ to há han jé tóg ke mũ, he tĩ. Hã tũ vẽ. Ũ tỹ hẽn ri ke tỹ jagnẽ to jũ han jé sóg ke mũ, ha vem nĩ. 35Hã kỹ ũ tóg ti panh kato tẽnh mũ, kỹ ũ fi tóg fi mỹnh fi kato tẽnh mũ gé. Kỹ ũ fi tóg fi má fi kato tẽnh mũ gé, mỹr, ha mẽ. 36Ti mré ke ag vỹ ti kato vãsãnsãn ke mũ, kỹ fi mré ke fag tóg fi kato vãsãnsãn ke mũ gé, ha mẽ. 37Iso há kãfór nỹtĩm nĩ, ãjag han mũ fag kri, ke tũ nĩ mũ ra ãjag tóg inh mỹ há tũ nỹtĩ. Iso há kãfór nỹtĩm nĩ, ãjag krẽ kri, ke tũ nĩ mũ ra ãjag tóg inh mỹ há tũ nỹtĩ. 38Isỹ inh krunh va tĩg ẽn ri ke han nĩ gé, isỹ tá ter ke ẽn ti, hã vỹ: iser ẽn ri ke han sór mũ, he mũ. Ke tũ nĩ mũ ra ãjag tóg inh mỹ há tũ nỹtĩ. 39Ãjag tỹ iser ri ke han sór tũ nĩn kỹ ãjag tóg nũgme ki vár ke mũ, ãjag tỹ ãjag jykre tovãnh sór tũ nĩn kỹ. Ãjag tỹ isugrĩn kãgter sór kỹ ãjag tóg rĩr krỹg ja tũ ẽn venh ke mũ, ãjag tỹ ãjag jykre tovãnh kỹ,” he tóg, Jesus ti.
Topẽ tỹ ẽg mỹ nén ũ há tónh ke
(Mc 9.41)
40“Ũ tỹ ãjag mỹ: he, hen kỹ tóg inh mỹ: he, he mũ gé, kỹ tóg inh ki rã mũ sir. Ti tỹ inh ki rã kỹ tóg, ũ tỹ inh jẽnẽg mũ ẽn ki rã mũ gé sir, hã vỹ: Topẽ, he mũ. 41Ũ tóg Topẽ vĩ tó tĩ ag mỹ: “ha kãrã,” he tĩ, ag tỹ Topẽ vĩ tó tĩ tugrĩn. Ti tỹ ag mỹ vĩ há han kỹ tóg, Topẽ mỹ há tĩ sir. Kỹ tóg kejẽn ti mỹ nén ũ há tónh ke mũ, Topẽ ti. Ũ tóg ũn jykre kuryj ag mỹ: “ha kãrã,” he tĩ gé, ag jykre kuryj nỹtĩ tugrĩn. Ẽn mỹ tóg nén ũ há tónh ke mũ gé, Topẽ ti. 42Ũ tóg kejẽn ũn sĩ mỹ nén ũ nĩm tĩ, goj hẽn ri ke mũn. Ũn sĩ tỹ inh ki rã kỹ nĩ tugrĩn tóg, ti mỹ nén ũ nĩm tĩ. Ẽn mỹ tóg nén ũ há tónh ke mũ gé, Topẽ ti. Nén ũ há ve jé tóg ke mũ mỹr,” he tóg, Jesus ti.
المحددات الحالية:
Mateus 10: kgp
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
