Mateus 9
9
Jesus tỹ ũn kãnhgrĩn kỹ nỹ tỹ há' he
(Mc 2.1-12; Lc 5.17-26)
1Kỹ Jesus tóg, canoa ki rã kỹ goj nig mág kafã ũ ra tĩg mãn mũ sir, ti mré mũ tĩ ag mré. Kỹ tóg ti jamã tá jun mũ. 2Ti tỹ ti jamã tá jun kỹ ag tóg vãhã, ti mỹ ũn kãnhgrĩ vyn kỹ junjun mũ. Kỹmỹ kri tóg nỹ nĩ. Kỹ Jesus tóg, ag tỹ ti ki ge kỹ nỹtĩ vég mũ sir. Hã kỹ tóg ũn kãnhgrĩ ẽn mỹ: “inh kósin',” he mũ. “Ã fe tỹ há' hé. Ã tỹ Topẽ vĩ mranh ja ẽn tỹ tũ' hen hã vẽ ha,” he tóg.
3Hã ra Topẽ vĩ to ẽg kanhrãn tĩ ag vỹ tá nỹtĩ gé. Ti vĩ mẽ kỹ ag tóg: “Topẽ to vĩ kónãn tóg mũ mỹr. Vẽsỹ tóg Topẽ han mũ mỹr,” he mũ. Kỹ ti jykre tóg ag mỹ tỹ ũ nỹ.
4Hã ra Jesus tóg, ag tỹ nén to jykrén mũ ki kanhró nĩ. Kỹ tóg ag mỹ: “ãjag ne tóg iso jykrén kónãn mũ',” he mũ. 5“Ũ tĩg vãnh tag mỹ sóg: ã tỹ Topẽ vĩ mranh ja tỹ tũ' hen vẽ ha,” he mũ. “Sỹ ti mỹ: nĩ ra, tĩg ra, henh ke vẽ gé. Hã ran mỹ ãjag mỹ vẽnh mỹ?” he tóg. 6“Isỹ ãjag mỹ inh jykre ven sór vẽ. Tỹ sóg ẽprã ke fi kósin nĩ. Tá sóg krỹg ke mũ, Topẽ vĩ mranh tỹ vẽnh pãte fón ke tá.
Hã kỹ sóg ũn kãnhgrĩ mỹ: nĩ ra, jẽg ra, ã kur gé tĩg, ã ĩn ra, he mũ,” he tóg. 7Kỹ tóg vym ke nĩ mũ. Jẽgnẽ kỹ tóg tĩ mũ sir, ti ĩn ra. 8Kỹ vẽnh kar ẽn ag tóg vég mũ. Kỹ tóg ag mỹ e tãvĩ tĩ. Topẽ mỹ ag tóg vĩ há han mũ, ti tỹ Jesus mỹ vẽjykre há nĩm kỹ, ti tỹ tỹ ẽprã ke nĩ ra.
Jesus tỹ Mateus jé prẽr
(Mc 2.13-17; Lc 5.27-32)
9Kỹ Jesus tóg ti jamã tá kã kutẽ kỹ tĩ mũ sir. Kỹ tóg Mateus vég mũ. Governo mỹ tóg jãnkamy mãg tĩ, imposto kaja ti, kỹ tóg ti rãnhrãj han nĩ nĩ. Kỹ tóg ti mỹ: “inh mré kãtĩg,” he mũ. Kỹ tóg jẽgnẽ kỹ ti mré tĩ mũ sir.
10Kỹ tóg kejẽn ti mré jẽg mũ. Kỹ ũ tỹ hẽn ri ke ag tóg tá vẽnh mãn mũ, ti ĩn krẽm, governo mỹ jãnkamy mãg tĩ ag, Topẽ vĩ mranh tĩ ag, Jesus mré mũ tĩ ag ke gé. 11Kỹ pã'i ag tóg vég mũ. Kỹ ag tóg ti mré mũ tĩ ag mỹ: “ãjag pã'i ne tóg ũn jykre pãno ag mré jẽg mũ',” he mũ.
12Hã ra Jesus tóg mẽg mũ. Kỹ tóg ag mỹ: “ũn kagyga tũ ag vỹ médico venh mũ tũ nĩgtĩ,” he mũ. “Hã ra ũn kagyga ag hã vỹ ti venh mũ tĩ,” he tóg. 13“Ha vé, Topẽ vĩ tag to jykrén, ha mẽ. “Ãjag tỹ jagnẽ jagãgtãn kỹ tóg, inh mỹ há tĩ inhhã. Ãjag tỹ inh mỹ nén ũ pũn kãfór tóg nĩ,” he tóg. Hã kỹ jagnẽ jagãgtãn nĩ, jagnẽ to vĩ tũg nĩ,” he tóg. “Inh pijé, ũ tỹ vẽjykre kuryj han mũ ag mỹ: ãjag jykre tovãnh nĩ, he sór tĩ'. Ũ tỹ Topẽ vĩ mranh tĩ ẽn ag hã mỹ sóg: ãjag jykre kórég tovãnh nĩ, he sór tĩ,” he tóg, Jesus ti.
Jesus tỹ ẽg vãkre kãmén
(Mc 2.18-22; Lc 5.33-39)
14Kỹ João Batista mré mũ tĩ ag tóg, Jesus tá junjun kỹ ti mỹ: “ẽg hã ne tóg vãkrég tĩ', Fariseu mré ke ag ke gé. Ẽg jãvo ã mré mũ tĩ ag tóg vãkrég tũ nĩgtĩ. Hẽ ri ken kỹ?“ he ag tóg.
15Kỹ tóg ag mỹ: “hỹ,” he mũ. “Vẽnh kyprũg venh kãmũ mũ ag pijé vãkrég tĩ',” he tóg. “Fénhta vẽ mỹr, kỹ ũn prũg mũ ẽn mré ke ag tóg ti venh kãmũ tĩ. Hã ra sóg, ũn prũg mũ ẽn ri ke nĩ, hã kỹ tóg inh mré mũ tĩ ag mỹ sér tĩ ver,” he tóg. “Vãhã tóg jun, inh kurã ti, ag tỹ inh pére mũnh ke ti. Ẽn kã hã ag tóg vãkrenh ke mũ,” he tóg.
16“Ẽg pijé kur tãg tỹ kur si jar kã nĩm tĩ'. Ke tũ nĩ mũ ra tóg jagnẽ ki par tũ nĩnh mũ. Kỹ tóg kórég nĩ sir,” he tóg. Ti tỹ ti jykre tãg tón hã vẽ.
17Kỹ tóg ag mỹ: “kỹ vinho vỹ ge nĩgtĩ gé,” he mũ gé. “Ẽg pijé uva me kajãg mũ tỹ nén ũ fár tỹ sako há si ki kujẽg tĩ'. Ke tũ nĩ mũ ra tóg, kunãnh kỹ jaran kenh mũ. Kỹ vinho ẽn tóg tũ' henh mũ, sako ke gé. Vinho kajãg mũ tỹ nén ũ fár tãg ki kujẽn ke vẽ mỹr',” he tóg. Ti tỹ ti jykre tãg tón hã vẽ gé.
Jesus tỹ ũn kagyga fag tỹ há' he
(Mc 5.21-43; Lc 8.40-56)
18Ti tỹ ver ag mré vẽmén nĩ ra pã'i ũ tóg, ti tá jun mũ, ha mẽ. Ti krẽm grĩnh ke kỹ tóg ti mỹ: “inh kósin fi vỹ krónh ke nỹ ha. Ã nĩgé tỹ fi mẽnh kãtĩg, kỹ fi fe tóg mrin kenh ke mũ, ha vem nĩ,” he mũ. 19Kỹ Jesus tóg ti mré tĩ mũ sir. 20Ag mũ ra ũ fi tóg, ti tá jun mũ, ũn kaga ũ fi. Kyvénh krỹg ja tũ han kỹ fi tóg nĩ, prỹg tỹ 12 (ke) ki. 21Ẽn fi vỹ: “sỹ ti kur mẽ kỹ inh hỹn hẽn ri ke mũn há' henh mũ,” he mũ, to jykrén kỹ. Kỹ fi tóg ti kur tóv mẽg mũ sir. 22Hã ra Jesus tóg vĩrĩn ke kỹ fi vég mũ. Kỹ tóg fi mỹ: “inh kósin',” he mũ. “Kamẽg tũg nĩ. Ã tỹ inh ki rã kỹ ã tóg há' henh ke mũ,” he tóg. Kỹ fi tóg há' he mũ sir vẽsỹmér, ha mẽ.
23Kỹ tóg tĩg mãn mũ. Kỹ ag tóg vãhã, pã'i ẽn ĩn tá junjun mũ sir. Hã ra tóg tá fór nĩ, ũn kygfỹ mũ fag, ũn vãkynkyn nỹtĩ ẽn ag ke gé, ti kósin fi ter kỹ. 24Kỹ Jesus tóg fag mỹ: “ha mũjẽg,” he mũ. “ter tũ fi nĩ. Nũr fi nỹ nĩ,” he tóg. Hã ra fag tóg ti nyg mũ. 25Hã ra tóg fag pan kãn mũ sir. Kỹ tóg fi nĩgé kãgmĩ kỹ fi nĩm mũ sir. 26Kỹ ti tỹ fi rĩn mãn tag kãme tóg vẽnh kar kri rũm mũ sir, ga kar mĩ hã.
Jesus tỹ ũn kyvó ag tỹ há' he
27Kỹ Jesus tóg ĩn ẽn tá kãkutẽ mũ sir. Hã ra ũn kyvó régre ag tóg, ti nón mũ mũ. Kỹ ag tóg ti jé prẽr kỹ ti mỹ: “!..Davi krẽ'krẽ'..! !..Ẽg jagãgtãn ra..!“ he mũ, prẽnprẽr kỹ.
28Kỹ Jesus tóg ĩn ũ kã ra rã mũ sir. Kỹ ũn kyvó ẽn ag tóg ti nón ge mũ gé sir. Kỹ tóg ag mỹ: “inh mỹ ãjag tỹ há' henh mũ'?“ he mũ. Kỹ ag tóg ti mỹ: “hỹ,” he mũ. 29Kỹ tóg ag kanẽ mẽgmẽg mũ sir, ti nĩgé tỹ. Kỹ tóg ag mỹ: “ãjag tỹ inh ki ge kỹ nỹtĩn kỹ ãjag tóg há' henh mũ,” he mũ. 30Kỹ ag kanẽ tóg há' he mũ sir. Ẽvãnh há' he ag tóg mũ sir. Kỹ tóg ag mỹ vĩ tar han kỹ: “ker ũ mỹ tó hẽ',” he mũ. 31Hã ra ag tóg mũ kỹ vẽnh kar mỹ tugtó mũ. Kỹ ti kãme ẽn tóg vẽnh kar kri rũm ke mũ sir.
Jesus tỹ ũn vĩ vãnh vĩn
32Kỹ ũn jagrẽ kórég tóg ti tá jun mũ gé. Ti jagrẽ tóg ti vĩ vãnh han. 33Kỹ Jesus tóg, ti jagrẽ kórég kutẽm mũ sir. Kỹ tóg vĩ há' he mũ sir. Kỹ tóg vẽnh kar mỹ e tĩ. “Ge ve ja tũ ẽg tóg nỹtĩ, ẽg povo kar kãmĩ,” he ag tóg mũ.
34Hã ra pã'i ag tóg mẽg mũ. Kỹ ag tóg ón kỹ Jesus to vĩ kónãn mũ. “Vẽjagrẽ kórég pan há tóg nĩgtĩ. Hã ra tóg vẽjagrẽ kórég ag pã'i jykre tỹ ag pan tĩ, ti tỹ tỹ Japo mré ke nĩn kỹ,” he ag tóg, ón kỹ.
Jesus mỹ ũn jagtar ag
35Kỹ Jesus tóg ẽmã kar mĩ tĩ mũ, ẽmã kãsir mĩ ke gé. Vẽnh kanhrãn jafã krẽm tóg ag kanhrãn tĩ. Ag mỹ tóg ũ tỹ kanhkã tá nĩ ẽn tỹ tỹ ẽg pã'i nĩ ẽn kãmén tĩ. Kỹ tóg ũn kagyga ag hynhan tĩ gé sir. 36Vẽnh e ẽn tóg ti mỹ jagtar nỹtĩ. Ũ tỹ ag ki rĩr há han ke tóg tũ tĩ, jo ag tóg vẽnh ki rĩr há han ki kagtĩg nỹtĩ gé. Kỹ tóg carneiro tỹ mẽg mĩ ẽkrég mũ sir. Ũ tỹ ki rĩr tũ nĩn kỹ ag tóg véké mũgtĩ. Tag ri ke ag tóg nỹtĩ, Jesus mỹ, ũn e ẽn ag. 37Kỹ tóg ti mré mũ tĩ ag mỹ: “sỹ ag ve kỹ sóg ẽg jakré mĩ ẽkrég tĩ,” he mũ. “Ti éhé nỹn kỹ ẽg tóg kejẽn kre kãn tũ nĩgtĩ, ẽg pir nỹtĩn kỹ. Ge ti nĩgtĩ. Ũn e ag tóg inh ki ge sór mũ, hã ra ũ tỹ ag mỹ tónh ke tóg tũ tĩ,” he tóg. 38“Hã kỹ Topẽ mré vĩ, ti tỹ ũ jẽgnẽ jé, ag tỹ ag mỹ ti vĩ tó jé,” he tóg, Jesus ti, ti mré mũ tĩ ag mỹ.
المحددات الحالية:
Mateus 9: kgp
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
