مَرْقُسْ 8
8
الْفَصْلْ التَّامْنْ
يَسُوعْ كَيْوَكّْلْ رَبْعَالَافْ وَاحْدْ
1وْفْدِيكْ لِيَّامْ عَاوْدْ تّْجَمْعَاتْ جْمَاعَة كْبِيرَة دْ النَّاسْ، وْمَا كَانْ عَنْدْهُمْ مَا يْتّْكَالْ. وْعَيّْطْ يَسُوعْ عْلَى التّْلَامْدْ دْيَالُه وْݣَالْ لِيهُمْ: 2«بْقَاوْ فِيَّ هَادْ النَّاسْ، عْلَاحْقَّاشْ تْلْتْ يَّامْ هَادِي وْهُمَ مْعَايَ، وْمَا عَنْدْهُمْ مَا يْتّْكَالْ. 3وْإِلَا صِيفْطْتْهُمْ لْدْيُورْهُمْ بْالجُّوعْ غَادِي يْسَخْفُو فْالطّْرِيقْ، وْشِي وْحْدِينْ مْنّْهُمْ جَاوْ مْنْ بْعِيدْ». 4وْجَاوْبُوهْ التّْلَامْدْ دْيَالُه: «مْنِينْ غَادِي يْقْدَرْ يْجِيبْ شِي وَاحْدْ فْهَادْ الْخْلَا الْخُبْزْ اللِّي يْشَبّْعْ هَادْ النَّاسْ؟». 5وْسْوّْلْهُمْ يَسُوعْ: «شْحَالْ مْنْ خُبْزَة عَنْدْكُمْ؟»، وْجَاوْبُوهْ: «سْبْعَة». 6وْآمْرْ يَسُوعْ الجّْمَاعَة دْ النَّاسْ بَاشْ يْݣَلْسُو لْلْأَرْضْ، وْهْزّْ السّْبْعَة دْ الْخُبْزَاتْ وْشْكَرْ اللَّهْ، وْقَطّْعْهُمْ وْعْطَاهُمْ لْلتّْلَامْدْ دْيَالُه بَاشْ يْفَرّْقُوهُمْ عْلَى الجّْمَاعَة دْ النَّاسْ، وْهُمَ يْفَرّْقُوهُمْ. 7وْكَانُو عَنْدْهُمْ شِي حُوتَاتْ صْغَارْ. وْبَعْدْمَا شْكَرْ يَسُوعْ اللَّهْ عْلِيهُمْ، ݣَالْ لْلتّْلَامْدْ دْيَالُه يْفَرّْقُوهُمْ حْتَّى هُمَ. 8وْكْلَاوْ النَّاسْ حْتَّى شْبْعُو، وْمْنْ بَعْدْ جْمْعُو التّْلَامْدْ دْيَالُه سْبْعَة دْ الْݣُفَّاتْ عَامْرِينْ بْالطّْرُوفَ دْ الْخُبْزْ. 9وْكَانُو تْقْرِيبًا شِي رَبْعَالَافْ وَاحْدْ. وْمْنْ بَعْدْ صِيفْطْهُمْ يَسُوعْ بْحَالْهُمْ. 10وْدِيكْ السَّاعَة رْكَبْ فْالْفْلُوكَة مْعَ التّْلَامْدْ دْيَالُه وْوْصَلْ لْجْوَايْهْ دَلْمَانُوتَة.
الْفْرِّيسِيِّينْ كَيْطْلْبُو عَلَامَة
11وْجَاوْ شِي وْحْدِينْ مْنْ الْفْرِّيسِيِّينْ عَنْدْ يَسُوعْ وْبْدَاوْ كَيْتّْنَاقْشُو مْعَاهْ. وْبَاشْ يْجَرّْبُوهْ، طْلْبُو مْنُّه عَلَامَة مْنْ السّْمَا،#متى 12:38؛ لوقا 11:16 12وْهُوَ يْتّْنَهّْدْ مْنْ قَلْبُه وْݣَالْ: «عْلَاشْ هَادْ الْجِيلْ كَيْطْلَبْ عَلَامَة؟ نْݣُولْ لِيكُمْ الْحَقّْ: حْتَّى عَلَامَة مَا غَتّْعْطَى لْهَادْ الْجِيلْ!».#متى 12:39؛ لوقا 11:29 13وْخْلَّاهُمْ تْمَّ وْطْلَعْ لْلْفْلُوكَة وْمْشَى لْلجِّهَة لْخْرَى دْ الْبْحَرْ.
خْمِيرَةْ الْفْرِّيسِيِّينْ وْهِيرُودُسْ
14وْنْسَاوْ التّْلَامْدْ دْيَالُه يْدِّيوْ مْعَاهُمْ الْخُبْزْ، مْنْ غِيرْ خُبْزَة وَحْدَة اللِّي كَانْتْ عَنْدْهُمْ فْالْفْلُوكَة. 15وْوْصَّاهُمْ يَسُوعْ وْݣَالْ: «رْدُّو الْبَالْ، حْضِيوْ رَاسْكُمْ مْنْ خْمِيرَةْ الْفْرِّيسِيِّينْ وْخْمِيرَةْ هِيرُودُسْ!».#لوقا 12:1 16وْبْدَاوْ كَيْتّْنَاقْشُو بِينَاتْهُمْ وْݣَالُو: «كَيْݣُولْ هَادْشِّي حِيتْ مَا عَنْدْنَاشْ الْخُبْزْ!». 17وْعْرَفْ يَسُوعْ، وْݣَالْ لِيهُمْ: «عْلَاشْ كَتّْنَاقْشُو وْكَتْݣُولُو: مَا عَنْدْنَاشْ الْخُبْزْ؟ وَاشْ مَازَالْ مَا كَتْعَرْفُوشْ وْمَا كَتْفَهْمُوشْ؟ مَالْ قَلْبْكُمْ قَاسْحْ؟ 18عَنْدْكُمْ الْعِينِينْ وْمَا كَتْشُوفُوشْ؟ وْعَنْدْكُمْ الْوَدْنِينْ وْمَا كَتْسَمْعُوشْ؟ وَاشْ مَا كَتْعَقْلُوشْ#مرقس 4:12 19مْلِّي قَطّْعْتْ خَمْسَة دْ الْخُبْزَاتْ وْفَرّْقْتْهُمْ عْلَى خَمْسَالَافْ وَاحْدْ، شْحَالْ مْنْ ݣُفَّة جْمَعْتُو مْنْ الطّْرُوفَ دْ الْخُبْزْ؟»، وْجَاوْبُوهْ: «طْنَاشْ!». 20وْݣَالْ لِيهُمْ: «وْمْلِّي قَطّْعْتْ سْبْعَة دْ الْخُبْزَاتْ وْفَرّْقْتْهُمْ عْلَى رَبْعَالَافْ وَاحْدْ، شْحَالْ مْنْ ݣُفَّة جْمَعْتُو مْنْ الطّْرُوفَ دْ الْخُبْزْ؟»، وْجَاوْبُوهْ: «سْبْعَة!». 21وْهُوَ يْݣُولْ لِيهُمْ: «إِيوَا! هَادْشِّي كَامْلْ وْمَازَالْ مَا فْهَمْتُوشْ؟».
يَسُوعْ كَيْشَافِي وَاحْدْ الرَّاجْلْ عْمَى
22وْمْلِّي وْصَلْ يَسُوعْ وْالتّْلَامْدْ دْيَالُه لْبَيْتْ صَيْدَا، جَابُو لِيهْ شِي نَاسْ وَاحْدْ الرَّاجْلْ عْمَى وْرَغْبُوهْ بَاشْ يْمَسُّه. 23وْشْدّْ يَسُوعْ فْيْدّْ الْعْمَى وْخَرّْجُه عْلَى بْرَّا دْ الدُّوَّارْ، وْبَخّْ فْعِينِيهْ وْحَطّْ يْدِّيهْ عْلِيهْ وْسْوّْلُه: «وَاشْ كَتْشُوفْ شِي حَاجَة؟».
24وْهْزّْ الْعْمَى عِينِيهْ وْݣَالْ: «كَنْشُوفْ نَاسْ بْحَالْ الشّْجَرْ كَيْتّْمْشَّاوْ». 25وْحَطّْ يَسُوعْ يْدِّيهْ مَرَّة خْرَى عْلَى عِينِيهْ، وْهُوَ يْتّْشَافَى وْوْلَّى كَيْشُوفْ كُلّْشِي وَاضْحْ. 26وْصِيفْطُه يَسُوعْ لْدَارُه وْݣَالْ لِيهْ: «مَا تْرْجَعْشْ لْلدُّوَّارْ».
بُطْرُسْ كَيْشْهَدْ بْلِّي يَسُوعْ هُوَ الْمَسِيحْ
27وْمْشَى يَسُوعْ وْالتّْلَامْدْ دْيَالُه لْلدّْوَاوْرْ اللِّي فْجْوَايْهْ قَيْصَرِيَّةْ فِيلُبُّسْ، وْفْالطّْرِيقْ سْوّْلْ يَسُوعْ التّْلَامْدْ دْيَالُه: «شْكُونْ أَنَا فْنَضَرْ النَّاسْ؟». 28وْجَاوْبُوهْ: «يُوحَنَّا الْمَعْمَدَانْ، وْعَنْدْ شِي وْحْدِينْ: النّْبِي إِيلِيَّا، وْعَنْدْ وْحْدِينْ خْرِينْ: وَاحْدْ مْنْ الْأَنْبِيَا».#مرقس 6:14،15؛ لوقا 9:7،8 29وْسْوّْلْهُمْ: «وْنْتُمَ شْكُونْ أَنَا فْنَضَرْكُمْ؟». وْجَاوْبْ بُطْرُسْ: «نْتَ هُوَ الْمَسِيحْ!».#يوحنا 6:68،69 30وْوْصَّاهُمْ بَاشْ مَا يْتّْكَلّْمُو مْعَ حْتَّى شِي وَاحْدْ عْلِيهْ.
يَسُوعْ كَيْتّْنَبّْأْ بْالْمُوتْ وْالْبَعْتْ دْيَالُه
31وْبْدَا كَيْعَلّْمْ تْلَامْدُه بْلِّي وَلْدْ الْإِنْسَانْ لَابْدَّ مَا يْتّْعَدّْبْ بْزَّافْ، وْبْلِّي الشّْيُوخْ وْالرُّؤَسَا دْ رْجَالْ الدِّينْ وْالْعُلَمَا دْ الشّْرَعْ مَا غَيْقْبْلُوهْشْ، وْغَيْتّْقْتَلْ، وْمْنْ بَعْدْ تْلْتْ يَّامْ غَيْتّْبْعَتْ مْنْ الْمُوتْ. 32وْݣَالْ هَادْ الْكْلَامْ قُدَّامْ كُلّْشِي. وْجَرُّه بُطْرُسْ لْلجّْنْبْ وْبْدَا كَيْخَاصْمْ عْلِيهْ! 33وْضَارْ يَسُوعْ وْشَافْ فْتْلَامْدُه وْخَاصْمْ عْلَى بُطْرُسْ وْݣَالْ لِيهْ: «بَعّْدْ مْنِّي آ هَادْ الشِّيطَانْ، نْتَ مَا كَيْهَمّْكْشْ مُرَادْ اللَّهْ وَلَكِنْ غِيرْ أَشْنُو بْغَاوْ النَّاسْ».
34وْعَيّْطْ يَسُوعْ عْلَى الجّْمَاعَة دْ النَّاسْ وْالتّْلَامْدْ دْيَالُه، وْݣَالْ لِيهُمْ: «اللِّي بْغَا يْتْبَعْنِي، خَاصُّه يْسْمَحْ فْرَاسُه وْيْهَزّْ صْلِيبُه وْيْتْبَعْنِي.#متى 10:38؛ لوقا 14:27 35حِيتْ اللِّي بْغَا يْنَجِّي حْيَاتُه غَيْضَيّْعْهَا، وَلَكِنْ اللِّي غَيْضَيّْعْ حْيَاتُه عْلَى وْدِّي وْعْلَى وْدّْ الْبْشَارَة، غَيْنَجِّيهَا.#متى 10:39؛ لوقا 17:33؛ يوحنا 12:25 36آشْ مْنْ نْفَعْ عَنْدْ بْنَادْمْ إِلَا رْبَحْ الدّْنْيَا كُلّْهَا وْضَيّْعْ حْيَاتُه؟ 37وْآشْ يْمْكَنْ يْعْطِي بْنَادْمْ فْعُوضْ حْيَاتُه؟ 38عْلَاحْقَّاشْ اللِّي حْشَمْ يْݣُولْ بْلِّي كَيْعْرَفْنِي وْكَيْعْرَفْ كْلَامِي فْهَادْ الْجِيلْ الْفَاسْدْ وْالْمُدْنِبْ، رَاهْ وَلْدْ الْإِنْسَانْ غَيْكُونْ حْشْمَانْ بِيهْ مْلِّي غَيْرْجَعْ فْالْعَزّْ دْيَالْ بَّاهْ مْعَ الْمَلَايْكَة الْمْقَدّْسِينْ».
المحددات الحالية:
مَرْقُسْ 8: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
