مَرْقُسْ 16
16
الْفَصْلْ سْطَّاشْ
يَسُوعْ تّْبْعَتْ مْنْ الْمُوتْ
1وْمْلِّي دَازْ نْهَارْ السّْبْتْ، شْرَاتْ مَرْيَمْ الْمَجْدَلِيَّة وْمَرْيَمْ أُمّْ يَعْقُوبْ وْسَالُومَة الْحْنُوطْ، بَاشْ يْمْشِيوْ يْدَهْنُو بِيهْ الدَّاتْ دْيَالْ يَسُوعْ. 2وْفْنْهَارْ الْحَدّْ بْكْرِي مْشَاوْ لْلْقْبَرْ فْوَقْتْ طْلُوعْ الشّْمْسْ. 3وْݣَالُو بِينَاتْهُمْ: «شْكُونْ اللِّي غَادِي يْكَرْكَبْ لِينَا الْحَجْرَة دْيَالْ بَابْ الْقْبَرْ؟». 4وْمْلِّي شَافُو الْقْبَرْ بَانْ لِيهُمْ بْلِّي الْحَجْرَة مْكَرْكْبَة، وَاخَّا هِيَ كْبِيرَة بْزَّافْ. 5وْمْلِّي دَخْلُو لْلْقْبَرْ شَافُو وَاحْدْ الشَّابْ ݣَالْسْ عْلَى لِيمْنْ لَابْسْ حْوَايْجْ بِيضِينْ، وْهُمَ يْتّْخَلْعُو. 6وْݣَالْ لِيهُمْ: «مَا تّْخَلْعُوشْ! نْتُمَ كَتْقَلّْبُو عْلَى يَسُوعْ اللِّي مْنْ النَّاصِرَة اللِّي صَلْبُوهْ. رَاهْ تّْبْعَتْ مْنْ الْمُوتْ! وْمَا كَايْنْشْ هْنَا. شُوفُو، هَا هُوَ الْمُوضْعْ فِينْ كَانُو حْطُّوهْ. 7وَلَكِنْ سِيرُو وْخَبّْرُو التّْلَامْدْ دْيَالُه وْبُطْرُسْ بْلِّي غَيْسْبَقْكُمْ لْلْجَلِيلْ، تْمَّ فِينْ غَتْشُوفُوهْ كِيفْ ݣَالْ لِيكُمْ».#متى 26:32؛ مرقس 14:28 8وْهُمَ يْخَرْجُو وْهَرْبُو مْنْ الْقْبَرْ كَيْتّْرَعّْدُو بْالْخُوفْ وْتَالْفِينْ. وْمَا خَبّْرُو حْتَّى وَاحْدْ حِيتْ كَانُو خَايْفِينْ.
يَسُوعْ كَيْبَانْ لْمَرْيَمْ الْمَجْدَلِيَّة وْلْتْلَامْدُه
[ 9وْمْلِّي تّْبْعَتْ يَسُوعْ مْنْ الْمُوتْ نْهَارْ الْحَدّْ فْالصّْبَاحْ بْكْرِي، بَانْ فْاللّْوّْلْ لْمَرْيَمْ الْمَجْدَلِيَّة اللِّي كَانْ خَرّْجْ مْنّْهَا سْبْعَة دْ الجّْنُونْ. 10وْمْشَاتْ خَبّْرَاتْ التّْلَامْدْ اللِّي كَانُو مْعَ يَسُوعْ، وْلْقَاتْهُمْ كَيْنْوّْحُو وْكَيْبْكِيوْ عْلِيهْ، 11وْمْلِّي سْمْعُو مْنّْهَا بْلِّي يَسُوعْ حَيّْ وْبْلِّي شَافْتُه، مَا تَاقُوشْ بِيهَا. 12وْمْنْ بَعْدْ هَادْشِّي بَانْ يَسُوعْ فْصِفَة خْرَى لْجُوجْ تْلَامْدْ اللِّي كَانُو خَارْجِينْ مْنْ الْمْدِينَة وْغَادْيِينْ لْلْفْدَادْنْ. 13وْهُمَ يْرْجْعُو وْخَبّْرُو لْخْرِينْ، وَلَكِنْ حْتَّى هُمَ مَا تَاقُوشْ بِيهُمْ. 14وْفْاللّْخْرْ بَانْ لْلتّْلَامْدْ الْحْضَاشْ مْلِّي كَانُو ݣَالْسِينْ كَيَاكْلُو، وْخَاصْمْ عْلِيهُمْ عْلَى قَلّْةْ إِيمَانْهُمْ وْعْلَى قْسُوحِيَّةْ قْلُوبْهُمْ حِيتْ مَا تَاقُوشْ بْهَادُوكْ اللِّي شَافُوهْ مْنْ بَعْدْمَا تّْبْعَتْ مْنْ الْمُوتْ. 15وْݣَالْ لِيهُمْ: «سِيرُو لْلدّْنْيَا كُلّْهَا، وْخَبّْرُو ݣَاعْ النَّاسْ بْالْبْشَارَة.#الاعمال 1:8 16اللِّي آمْنْ بِيَّ وْتّْعَمّْدْ غَيْنْجَا، وَلَكِنْ اللِّي مَا آمْنْشْ بِيَّ غَيْتّْحْكَمْ عْلِيهْ. 17وْهَادْ الْعَلَامَاتْ غَيْدِيرُوهُمْ النَّاسْ اللِّي كَيْآمْنُو بِيَّ: بْالْإِسْمْ دْيَالِي غَيْخَرّْجُو الجّْنُونْ، وْغَيْتّْكَلّْمُو بْلُغَاتْ جْدِيدَة، 18وْغَيْشَدُّو اللّْفَاعِي بْيْدِّيهُمْ، وْإِلَا شَرْبُو السّْمّْ مَا غَيْوْقَعْ لِيهُمْ وَالُو، وْغَيْحَطُّو يْدِّيهُمْ عْلَى النَّاسْ اللِّي مْرَاضْ وْغَيْتّْشَافَاوْ».
يَسُوعْ تّْرْفَعْ لْلسّْمَا
19وْمْنْ بَعْدْمَا تّْكَلّْمْ مْعَاهُمْ الرَّبّْ يَسُوعْ، تّْرْفَعْ لْلسّْمَا وْݣْلَسْ عْلَى لِيمْنْ دْيَالْ اللَّهْ.#الاعمال 1:9-11 20وْخَرْجُو التّْلَامْدْ دْيَالُه، وْخَبّْرُو النَّاسْ بْالْبْشَارَة فْكُلّْ مُوضْعْ، وْالرَّبّْ كَيْعَاوْنْهُمْ وْكَيْبَيّْنْ بْلِّي كْلَامْهُمْ حَقّْ بْالْعَلَامَاتْ اللِّي كَيْدِيرُو.]#16:20 الْآيَاتْ مْنْ 9 حْتَّى لْ 20 مَا كَايْنِينْشْ فْبْزَّافْ دْيَالْ الْمْخْطُوطَاتْ الْقْدَامْ.
المحددات الحالية:
مَرْقُسْ 16: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
