مَرْقُسْ 1
1
الْفَصْلْ اللّْوّْلْ
يُوحَنَّا الْمَعْمَدَانْ كَيْوَجّْدْ الطّْرِيقْ لْيَسُوعْ
1هَادَا هُوَ الْبْدُو دْيَالْ الْبْشَارَة بْيَسُوعْ الْمَسِيحْ وَلْدْ اللَّهْ، 2كِمَا مْكْتُوبْ فْكْتَابْ النّْبِي إِشْعِيَا:
«هَانِي غَنْصِيفْطْ الرَّسُولْ دْيَالِي قُدَّامْكْ
اللِّي غَادِي يْوَجّْدْ لِيكْ الطّْرِيقْ.
3صُوتْ كَيْبَرّْحْ فْالصَّحْرَا وْكَيْݣُولْ:
وَجّْدُو طْرِيقْ الرَّبّْ،
وْقَادُّو طْرْقَانُه».
4وْهَكَّا جَا يُوحَنَّا لْلصَّحْرَا كَيْعَمّْدْ النَّاسْ وْكَيْخَبّْرْهُمْ عْلَى مَعْمُودِيَّةْ التُّوبَة بَاشْ يْغْفَرْ لِيهُمْ اللَّهْ دْنُوبْهُمْ. 5وْخَرْجُو لْعَنْدُه النَّاسْ كُلّْهُمْ اللِّي مْنْ بْلَادْ الْيَهُودِيَّة وْأُورْشَلِيمْ، وْتّْعَمّْدُو عْلَى يْدِّيهْ فْوَادْ الْأُرْدُنْ وْهُمَ كَيْعْتَرْفُو بْدْنُوبْهُمْ. 6وْكَانْ يُوحَنَّا كَيْلْبَسْ حْوَايْجْ مْصَايْبِينْ مْنْ شْعَرْ الجّْمَلْ، وْكَيْتّْحَزّْمْ بْحْزَامْ دْيَالْ الجّْلْدْ، وْكَيَاكُلْ الجّْرَادْ وْالْعْسَلْ الْحُرّْ. 7وْكَانْ كَيْخَبّْرْ النَّاسْ وْكَيْݣُولْ: «غَادِي يْجِي مْنْ بَعْدْ مْنِّي وَاحْدْ اللِّي هُوَ قْوَى مْنِّي، وْمَا نْسْتَاهْلْشْ نْتّْحْنَى حْتَّى بَاشْ نْحَلّْ لِيهْ سْيُورْ صْبَّاطُه. 8أَنَا عَمّْدْتْكُمْ بْالْمَا، وَلَكِنْ هُوَ غَيْعَمّْدْكُمْ بْالرُّوحْ الْقُدُسْ».
يُوحَنَّا كَيْعَمّْدْ يَسُوعْ
9وْفْدِيكْ لِيَّامْ جَا يَسُوعْ مْنْ النَّاصِرَة اللِّي فْالْجَلِيلْ، وْتّْعَمّْدْ عْلَى يْدّْ يُوحَنَّا فْوَادْ الْأُرْدُنْ. 10وْفْدِيكْ السَّاعَة اللِّي طْلَعْ فِيهَا مْنْ الْمَا شَافْ السّْمَا تّْحَلَّاتْ وْرُوحْ اللَّهْ نَازْلْ عْلِيهْ بْحَالْ الْحْمَامَة. 11وْتّْسْمَعْ وَاحْدْ الصُّوتْ مْنْ السَّمَاوَاتْ كَيْݣُولْ: «نْتَ هُوَ وْلْدِي الْعْزِيزْ اللِّي بِيهْ فْرَحْتْ بْزَّافْ».#متى 3:17؛ 12:18؛ مرقس 9:7؛ لوقا 3:22
إِبْلِيسْ كَيْجَرّْبْ يَسُوعْ
12وْفْدَاكْ الْوَقْتْ خَرّْجْ رُوحْ اللَّهْ يَسُوعْ لْلصَّحْرَا، 13وْبْقَى تْمَّ رْبْعِينْ يُومْ وْالشِّيطَانْ كَيْجَرّْبْ فِيهْ. وْكَانْتْ الْوْحُوشْ ضَايْرَة بِيهْ وْالْمَلَايْكَة كَيْتّْسَخّْرُو عْلِيهْ.
يَسُوعْ كَيْبَشّْرْ فْالْجَلِيلْ
14وْمْنْ بَعْدْمَا تّْشَدّْ يُوحَنَّا فْالْحَبْسْ، جَا يَسُوعْ لْبْلَادْ الْجَلِيلْ كَيْخَبّْرْ بْالْبْشَارَة دْيَالْ اللَّهْ، 15وْݣَالْ: «هَا الْوَقْتْ كْمَلْ وْمَمْلَكَةْ اللَّهْ قَرّْبَاتْ، إِيوَا تُوبُو وْآمْنُو بْالْبْشَارَة».#متى 3:2
يَسُوعْ كَيْخْتَارْ تْلَامْدُه اللّْوّْلِينْ
16وْمْلِّي كَانْ يَسُوعْ كَيْتّْمَشَّى فْجَنْبْ الْبْحَرْ اللِّي سْمِيتُه بْحَرْ الْجَلِيلْ، شَافْ سِمْعَانْ وْخُوهْ أَنْدْرَاوُسْ كَيْرْمِيوْ الشّْبْكَة فْالْبْحَرْ، عْلَاحْقَّاشْ كَانُو صْيَّادَا دْ الْحُوتْ. 17وْهُوَ يْݣُولْ لِيهُمْ يَسُوعْ: «تْبْعُونِي، وْأَنَا نْرَدّْكُمْ صْيَّادَا دْيَالْ النَّاسْ». 18وْدِيكْ السَّاعَة خْلَّاوْ الشّْبَاكْ دْيَالْهُمْ وْتْبْعُوهْ. 19وْزَادْ شِي شْوِيَّة وْهُوَ يْشُوفْ يَعْقُوبْ وَلْدْ زَبَدِي، وْيُوحَنَّا خُوهْ فْالْفْلُوكَة كَيْصَلْحُو الشّْبَاكْ دْيَالْهُمْ. 20وْغِيرْ عَيّْطْ عْلِيهُمْ يَسُوعْ، وْهُمَ يْخَلِّيوْ بَّاهُمْ زَبَدِي مْعَ الْخْدَّامَا فْالْفْلُوكَة وْتْبْعُوهْ.
يَسُوعْ كَيْشَافِي رَاجْلْ سَاكْنُه جْنّْ
21وْمْشَاوْ لْكَفْرْنَاحُومْ. وْغِيرْ وْصَلْ السّْبْتْ، مْشَى يَسُوعْ لْدَارْ الصّْلَاة وْبْدَا كَيْعَلّْمْ. 22وْتّْعَجّْبُو النَّاسْ مْنْ التَّعْلِيمْ دْيَالُه، حِيتْ كَانْ كَيْعَلّْمْهُمْ بْحَالْ شِي وَاحْدْ عَنْدُه السُّلْطَة مَاشِي بْحَالْ الْعُلَمَا دْ الشّْرَعْ.#متى 7:28،29 23وْكَانْ فْدَارْ الصّْلَاة وَاحْدْ الرَّاجْلْ سَاكْنُه جْنّْ، بْدَا كَيْغَوّْتْ 24وْكَيْݣُولْ: «أَشْنُو بْغِيتِي عَنْدْنَا آ يَسُوعْ النَّاصِرِي؟ وَاشْ جِيتِي بَاشْ تْهْلَكْنَا؟ أَنَا كَنْعْرَفْ شْكُونْ نْتَ: نْتَ هُوَ الْمْقَدّْسْ دْيَالْ اللَّهْ!». 25وْنْهَضْ يَسُوعْ فْالجّْنّْ وْݣَالْ لِيهْ: «سْكُتْ وْخْرُجْ مْنْ الرَّاجْلْ!». 26وْطِيّْحْ الجّْنْ الرَّاجْلْ لْلْأَرْضْ وْبْدَا كَيْتّْمَرّْغْ، وْغَوّْتْ الجّْنْ بْالجّْهْدْ وْخْرَجْ مْنُّه. 27وْتّْعَجّْبُو النَّاسْ كُلّْهُمْ وْبْدَاوْ كَيْسْوّْلُو بْعْضِيَّاتْهُمْ: «آشْ هَادْشِّي؟ هَادَا تَعْلِيمْ جْدِيدْ كَيْعَلّْمُه بْالسُّلْطَة، حْتَّى الجّْنُونْ كَيْطِيعُوهْ مْلِّي كَيْآمْرْهُمْ!». 28وْدْغْيَا دَاعْتْ خْبَارْ يَسُوعْ فْكُلّْ جْوَايْهْ الْجَلِيلْ.
يَسُوعْ كَيْشَافِي نْسِيبْةْ بُطْرُسْ وْبْزَّافْ دْ النَّاسْ
29وْغِيرْ خْرَجْ يَسُوعْ مْعَ يَعْقُوبْ وْيُوحَنَّا مْنْ دَارْ الصّْلَاة وْهُمَ يْمْشِيوْ لْدَارْ سِمْعَانْ وْأَنْدْرَاوُسْ. 30وْكَانْتْ نْسِيبْةْ سِمْعَانْ طَايْحَة فْالْفْرَاشْ حِيتْ فِيهَا السّْخَانَة، وْهُمَ يْخَبّْرُو يَسُوعْ عْلِيهَا. 31وْقَرّْبْ لْعَنْدْهَا وْشْدّْهَا مْنْ يْدّْهَا وْنَاضْتْ. وْتّْحَيّْدَاتْ مْنّْهَا السّْخَانَة، وْضَايْفَاتْهُمْ. 32وْفْدِيكْ الْعْشِيَّة مْلِّي غْرْبَاتْ الشّْمْسْ، جَابُو النَّاسْ لْيَسُوعْ ݣَاعْ الْمَرْضَى وْاللِّي مْسْكُونِينْ بْالجّْنُونْ. 33وْݣَاعْ النَّاسْ دْ الْمْدِينَة كَانُو تّْجَمْعُو حْدَا الْبَابْ. 34وْشْفَى يَسُوعْ بْزَّافْ دْ الْمَرْضَى مْنْ بْزَّافْ دْ الْأَمْرَاضْ، وْخَرّْجْ بْزَّافْ دْ الجّْنُونْ مْنْ النَّاسْ، وْمَا خْلَّاشْ الجّْنُونْ يْهَضْرُو حِيتْ عَرْفُوهْ.
يَسُوعْ كَيْعَلّْمْ
35وْنَاضْ يَسُوعْ بْكْرِي قْبَلْ مَا يْصْبَحْ الْحَالْ وْخْرَجْ وْمْشَى لْوَاحْدْ الْمُوضْعْ خَالِي، وْتْمَّ بْدَا كَيْصَلِّي. 36وْبْدَا سِمْعَانْ وْاللِّي كَانُو مْعَاهْ كَيْقَلّْبُو عْلِيهْ، 37وْمْلِّي لْقَاوْهْ ݣَالُو لِيهْ: «رَاهْ ݣَاعْ النَّاسْ كَيْقَلّْبُو عْلِيكْ!». 38وْهُوَ يْݣُولْ لِيهُمْ يَسُوعْ: «أَجِيوْ نْمْشِيوْ لْلدّْوَاوْرْ اللِّي قْرَابْ بَاشْ نْخَبّْرْ حْتَّى تْمَّ بْالْبْشَارَة، حِيتْ عْلَى هَادْشِّي جِيتْ». 39وْمْشَى كَيْخَبّْرْ بْالْبْشَارَة فْدْيُورْ الصّْلَاة دْيَالْهُمْ، وْكَيْخَرّْجْ الجّْنُونْ فْالجّْوَايْهْ دْ الْجَلِيلْ كُلّْهَا.#متى 4:23؛ 9:35
يَسُوعْ كَيْشَافِي رَاجْلْ مْجْدَامْ
40وْجَا عَنْدْ يَسُوعْ وَاحْدْ الرَّاجْلْ مْجْدَامْ وْطَاحْ عْلَى رْكَابِيهْ وْرَغْبُه وْݣَالْ لِيهْ: «آ سِيدِي، إِلَا بْغِيتِي رَاكْ تْقْدَرْ تْرَدّْنِي طَاهْرْ». 41وْحَنّْ عْلِيهْ وْمْدّْ يْدُّه وْمْسُّه وْݣَالْ لِيهْ: «أَنَا بْغِيتْ، إِيوَا كُونْ طَاهْرْ!». 42وْدِيكْ السَّاعَة تْحَيّْدْ مْنُّه الجّْدَامْ وْوْلَّى طَاهْرْ. 43وْنْهَاهْ يَسُوعْ بْزَّافْ بَاشْ مَا يْخَبّْرْشْ النَّاسْ، وْصِيفْطُه بْحَالُه وْݣَالْ لِيهْ: 44«رَدّْ بَالْكْ بَاشْ مَا تْݣُولْ حْتَّى حَاجَة لْشِي حَدّْ! وَلَكِنْ سِيرْ وْرِّي دَاتْكْ لْرَاجْلْ الدِّينْ وْعْطِي عْلَى التَّطْهِيرْ دْيَالْكْ دَاكْشِّي اللِّي وْصَّى بِيهْ مُوسَى، بَاشْ يْكُونْ شْهَادَة لِيهُمْ». 45وَلَكِنْ هَادَاكْ الرَّاجْلْ خْرَجْ وْبْدَا كَيْخَبّْرْ النَّاسْ بْݣَاعْ دَاكْشِّي اللِّي جْرَا وْدَيّْعْ هَادْ الْخْبَارْ، حْتَّى وْلَّى يَسُوعْ مَا قَادْرْشْ يْدْخَلْ لْشِي مْدِينَة قُدَّامْ النَّاسْ، وْكَيْبْقَى عْلَى بْرَّا فْالْبْلَايْصْ الْخَالْيَة. وْالنَّاسْ كَيْجِيوْ لْعَنْدُه مْنْ كُلّْ جِهَة.
المحددات الحالية:
مَرْقُسْ 1: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
