مَتَّى 11
11
الْفَصْلْ حْضَاشْ
يُوحَنَّا الْمَعْمَدَانْ كَيْصِيفْطْ تْلَامْدُه لْيَسُوعْ
1وْمْلِّي كَمّْلْ يَسُوعْ الْوْصِيَّاتْ اللِّي عْطَى لْتْلَامْدُه الطّْنَاشْ، مْشَى مْنْ تْمَّ بَاشْ يْعَلّْمْ وْيْخَبّْرْ بْالْبْشَارَة فْالْمْدُونْ دْيَالْ لِيهُودْ.
2وْمْلِّي سْمَعْ يُوحَنَّا وْهُوَ فْالْحَبْسْ عْلَى دَاكْشِّي اللِّي كَيْدِيرْ الْمَسِيحْ، صِيفْطْ لِيهْ تْلَامْدُه بَاشْ يْسْوّْلُه. 3وْݣَالْ لِيهْ: «وَاشْ نْتَ هُوَ اللِّي جَايْ، وْلَا نْتّْسْنَّاوْ وَاحْدْ آخُرْ؟». 4وْجَاوْبْهُمْ يَسُوعْ وْݣَالْ لِيهُمْ: «سِيرُو رْجْعُو خَبّْرُو يُوحَنَّا بْكُلّْ مَا كَتْسَمْعُو وْكَتْشُوفُو: 5الْعَمْيِينْ وْلَّاوْ كَيْشُوفُو، وْالْعَرْجِينْ كَيْمْشِيوْ، وْالْمْجْدَامِينْ وْلَّاوْ طَاهْرِينْ، وْالصَّمْكِينْ وْلَّاوْ كَيْسَمْعُو، وْالْمُوتَى حْيَاوْ، وْالْمَسَاكِينْ كَيْسَمْعُو الْبْشَارَة. 6وْسْعْدَاتْ هَادَاكْ اللِّي مَا غَيْشَكّْشْ فِيَّ».
7وْمْلِّي مْشَاوْ تْلَامْدْ يُوحَنَّا بْحَالْهُمْ، بْدَا يَسُوعْ كَيْتّْكَلّْمْ مْعَ الجّْمَاعَاتْ دْ النَّاسْ عْلَى يُوحَنَّا وْݣَالْ: «آشْ خْرَجْتُو تْشُوفُو فْالصَّحْرَا؟ وَاشْ شِي قْصْبَة كَتْدِّيهَا الرِّيحْ وْكَتْجِيبْهَا؟ 8وْلَا آشْ خْرَجْتُو تْشُوفُو؟ وَاشْ شِي رَاجْلْ لَابْسْ لْبَاسْ رْفِيعْ؟ حِيتْ اللِّي كَيْلَبْسُو اللّْبَاسْ الرّْفِيعْ، هَادُوكْ رَاهُمْ سَاكْنِينْ فْقْصُورْ الْمُلُوكْ! 9ݣُولُو لِيَّ آشْ خْرَجْتُو تْشُوفُو؟ وَاشْ شِي نْبِي؟ نْݣُولْ لِيكُمْ إِيِّهْ، رَاهْ نْبِي وْكْتَرْ مْنْ نْبِي. 10وْرَاهْ هَادَا هُوَ اللِّي ݣَالْ عْلِيهْ اللَّهْ فْكْتَابُه: هَانِي غَنْصِيفْطْ الرَّسُولْ دْيَالِي قُدَّامْكْ، اللِّي غَيْوَجّْدْ لِيكْ الطّْرِيقْ. 11وْنْݣُولْ لِيكُمْ الْحَقّْ: مَا بَانْشْ مْنْ بِينْ اللِّي تّْزَادُو مْنْ الْعْيَالَاتْ شِي وَاحْدْ حْسَنْ مْنْ يُوحَنَّا الْمَعْمَدَانْ، وَلَكِنْ الصّْغِيرْ ݣَاعْ فْمَمْلَكَةْ السَّمَاوَاتْ رَاهْ خْيَرْ مْنُّه. 12وْمْنْ يَّامْ يُوحَنَّا الْمَعْمَدَانْ حْتَّى لْلْيُومْ وْمَمْلَكَةْ السَّمَاوَاتْ كَتْكْبَرْ بْالْقُوَّة، وْالْقْوِيِّينْ كَيْدِيرُو جَهْدْهُمْ بَاشْ يْخَطْفُوهَا.#لوقا 16:16 13وْݣَاعْ الْأَنْبِيَا وْشْرَعْ مُوسَى تّْنَبّْأُو حْتَّى لْلْوَقْتْ اللِّي جَا فِيهْ يُوحَنَّا الْمَعْمَدَانْ. 14إِلَا كْنْتُو كَتِّيقُو، رَاهْ يُوحَنَّا الْمَعْمَدَانْ هُوَ إِيلِيَّا اللِّي خَاصُّه يْجِي.#متى 17:10-13؛ مرقس 9:11-13 15إِيوَا اللِّي عَنْدُه شِي وْدْنِينْ، يْسْمَعْ! 16وَلَكِنْ بْآشْ غَنْشَبّْهْ هَادْ الْجِيلْ؟ رَاهْ بْحَالْ شِي وْلَادْ ݣَالْسِينْ فْالسّْوَاقْ كَيْعَيْطُو لْبَعْضِيَّاتْهُمْ وْكَيْݣُولُو:
17نْفَخْنَا لِيكُمْ فْاللِّيرَة وْمَا شْطَحْتُو،
وْنْدَبْنَا لِيكُمْ وْمَا بْكِيتُو!،
18رَاهْ جَا يُوحَنَّا، وْكَانْ مَا كَيَاكُلْ وْمَا كَيْشْرَبْ، وْݣَالُو: هَادَا رَاهْ سَاكْنُه جْنّْ. 19وْجَا وَلْدْ الْإِنْسَانْ كَيَاكُلْ وْكَيْشْرَبْ، وْهُمَ يْݣُولُو: هَادَا وْكَّالْ وْسْكَايْرِي وْمْصَاحْبْ غِيرْ مْعَ مَّالِينْ الضَّرِيبَة وْالْمُدْنِبِينْ!، وَلَكِنْ حْكْمَةْ اللَّهْ كَتْبَانْ صَالْحَة مْنْ الْغْلَّة دْيَالْهَا».
يَا وِيلْ الْمْدُونْ اللِّي مَا تَابُوشْ
20وْدِيكْ السَّاعَة، بْدَا يَسُوعْ كَيْلُومْ الْمْدُونْ اللِّي دَارْ فِيهُمْ الْمُعْجِزَاتْ كْتَرْ مْنْ الْمْدُونْ لْخْرِينْ، حِيتْ النَّاسْ دْيَالْهُمْ مَا تَابُوشْ. 21«يَا وِيلْكْ آ كُورَزِينْ! وْيَا وِيلْكْ آ بَيْتْ صَيْدَا! كُونْ الْمُعْجِزَاتْ اللِّي تْدَارُو فِيكُمْ تْدَارُو فْصُورْ وْفْصَيْدَا، كُونْ شْحَالْ هَادِي تَابُو مَّالِيهُمْ، وْكُونْ لْبْسُو الْخِيشْ وْݣَلْسُو عْلَى الرّْمَادْ#11:21 لْبْسُو الْخِيشْ وْݣَلْسُو عْلَى الرّْمَادْ: بَاشْ يْبَيّْنُو التُّوبَة دْيَالْهُمْ. 22وَلَكِنْ نْݣُولْ لِيكُمْ: عَاقِبْةْ مْدُونْ صُورْ وْصَيْدَا فْيُومْ الْحِسَابْ غَادِي تْكُونْ خَفّْ مْنْ عَاقِبْتْكُمْ. 23وْنْتِ آ كَفْرْنَاحُومْ! وَاشْ غَتْهَزِّي حْتَّى لْلسّْمَا؟، رَاكِ غَادِي تّْخَبْطِي حْتَّى لْلْهَاوِيَة. حِيتْ كُونْ تْدَارُو فْسَدُومْ الْمُعْجِزَاتْ اللِّي تْدَارُو فِيكْ، كُونْ رَاهْ ݣَاعْ مَا فْنَاتْ وْكُونْ بْقَاتْ حْتَّى لْلْيُومْ. 24وْعْلَى هَادْشِّي نْݣُولْ لِيكُمْ: عَاقِبْةْ سَدُومْ فْيُومْ الْحِسَابْ غَادِي تْكُونْ خَفّْ مْنْ عَاقِبْتْكُمْ».#متى 10:15؛ لوقا 10:12
أَجِيوْ لْعَنْدِي وْرْتَاحُو
25وْفْدِيكْ السَّاعَة تّْكَلّْمْ يَسُوعْ وْݣَالْ: «كَنْحَمْدَكْ آ الْآبْ، يَا رَبّْ السّْمَا وْالْأَرْضْ، حِيتْ بَيّْنْتِي لْلدّْرَارِي الصّْغَارْ دَاكْشِّي اللِّي خْبِّيتِيهْ عْلَى الْحُكَمَا وْالْفُهَمَا. 26إِيِّهْ آ الْآبْ، هَكَّا كَانْ مُرَادْكْ.
27الْآبْ عْطَانِي كُلّْشِي، وْحْتَّى حَدّْ مَا كَيْعْرَفْ شْكُونْ هُوَ وَلْدْ الْآبْ غِيرْ الْآبْ، وْلَا شْكُونْ هُوَ الْآبْ غِيرْ وَلْدْ الْآبْ وْغِيرْ هَادَاكْ اللِّي وَلْدْ الْآبْ بْغَا يْوَرِّيهْ لِيهْ.#يوحنا 3:35؛ يوحنا 1:18؛ 10:15
28أَجِيوْ لْعَنْدِي آ اللِّي عْيِيتُو كُلّْكُمْ وْاللِّي هَازِّينْ الْحْمَلْ التّْقِيلْ وْأَنَا غَنْعْطِيكُمْ الرَّاحَة. 29هْزُّو النِّيرْ دْيَالِي عْلِيكُمْ وْتْعَلّْمُو مْنِّي، حِيتْ أَنَا ضْرِيّْفْ وْمْتْوَاضْعْ، وْرَاهْ غَادِي تْلْقَاوْ الرَّاحَة لْنْفُوسْكُمْ. 30حِيتْ النِّيرْ دْيَالِي سَاهْلْ وْالْحْمَلْ دْيَالِي خْفِيفْ».
المحددات الحالية:
مَتَّى 11: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
