لُوقَا 10
10
الْفَصْلْ الْعَاشْرْ
يَسُوعْ كَيْصِيفْطْ تْنِينْ وْسْبْعِينْ تْلْمِيدْ
1وْمْنْ بَعْدْ هَادْشِّي، خْتَارْ الرَّبّْ يَسُوعْ تْنِينْ وْسْبْعِينْ خْرِينْ، وْصِيفْطْهُمْ جُوجْ جُوجْ بَاشْ يْسَبْقُوهْ لْلْمْدُونْ وْلْلْبْلَايْصْ اللِّي بْغَا يْمْشِي لِيهُمْ. 2وْݣَالْ لِيهُمْ: «الْحْصَادْ كْتِيرْ، وَلَكِنْ الْحْصَّادَا قْلَالْ. إِيوَا طْلْبُو مْنْ مُولْ الْحْصَادْ يْصِيفْطْ حْصَّادَا لْلْحْصَادْ دْيَالُه.#متى 9:37،38 3سِيرُو، هَانِي كَنْصِيفْطْكُمْ بْحَالْ الْخْرْفَانْ بِينْ الدّْيَابْ.#متى 10:16 4مَا تْهَزُّو مْعَاكُمْ لَا صْرَّة دْ الْفْلُوسْ، لَا رَزْمَة، لَا صْبَّاطْ، وْمَا تْسَلّْمُو عْلَى حَدّْ فْالطّْرِيقْ. 5وْالدَّارْ اللِّي دْخَلْتُو لِيهَا، ݣُولُو فْاللّْوّْلْ: السّْلَامْ عْلِيكُمْ آ مَّالِينْ هَادْ الدَّارْ. 6وْإِلَا كَانْ فِيهَا اللِّي كَيْبْغِي السّْلَامْ، غَادِي يْوَصْلُه سْلَامْكُمْ، وْإِلَا مَا كَانْشْ، سْلَامْكُمْ غَيْرْجَعْ لِيكُمْ. 7وْبْقَاوْ فْدِيكْ الدَّارْ وَاكْلِينْ شَارْبِينْ مْنْ دَاكْشِّي اللِّي عَنْدْ مَّالِيهَا، حِيتْ الْخْدَّامْ كَيْسْتَاهْلْ الْأُجْرَة دْيَالُه، وْمَا تْمْشِيوْشْ مْنْ دَارْ لْدَارْ.#1كورنتوس 9:14؛ 1تيموتاوس 5:18 8وْالْمْدِينَة اللِّي دْخَلْتُو لِيهَا وْقْبْلُوكُمْ مَّالِيهَا، كُولُو مْنْ دَاكْشِّي اللِّي كَيْعْطِيوْكُمْ. 9وْشَافِيوْ الْمَرْضَى دْيَالْهُمْ وْݣُولُو لِيهُمْ: رَاهْ مَمْلَكَةْ اللَّهْ قَرّْبَاتْ لِيكُمْ. 10وَلَكِنْ الْمْدِينَة اللِّي دْخَلْتُو لِيهَا وْمَا قْبْلُوكُمْشْ مَّالِيهَا، خَرْجُو لْزْنَاقِيهَا وْݣُولُو:#الاعمال 13:51 11حْتَّى الْغَبْرَة دْ مْدِينْتْكُمْ اللِّي لْصْقَاتْ فْرْجْلِينَا كَنْسُوسُوهَا لِيكُمْ، وَلَكِنْ خَاصّْكُمْ تْعَرْفُو بْلِّي مَمْلَكَةْ اللَّهْ قَرّْبَاتْ.#متى 10:7-14؛ مرقس 6:8-11؛ لوقا 9:3-5 12نْݣُولْ لِيكُمْ، رَاهْ عَاقِبْةْ سَدُومْ فْدَاكْ النّْهَارْ غَادِي تْكُونْ خَفّْ مْنْ عَاقِبْةْ دِيكْ الْمْدِينَة».#متى 11:24؛ متى 10:15
يَا وِيلْ الْمْدُونْ اللِّي مَا تَابُوشْ
13«يَا وِيلْكْ آ كُورَزِينْ! يَا وِيلْكْ آ بَيْتْ صَيْدَا! كُونْ الْمُعْجِزَاتْ اللِّي وْقْعُو فِيكُمْ وْقْعُو فْصُورْ وْصَيْدَا، كُونْ شْحَالْ هَادِي تَابُو مَّالِيهُمْ، وْكُونْ لْبْسُو الْخِيشْ وْݣَلْسُو عْلَى الرّْمَادْ#10.13 لْبْسُو الْخِيشْ وْݣَلْسُو عْلَى الرّْمَادْ: بَاشْ يْبَيّْنُو التُّوبَة دْيَالْهُمْ. 14وَلَكِنْ عَاقِبْةْ صُورْ وْصَيْدَا فْيُومْ الْحِسَابْ غَادِي تْكُونْ خَفّْ مْنْ عَاقِبْتْكُمْ. 15وْنْتِ آ كَفْرْنَاحُومْ! وَاشْ غَتْهَزِّي حْتَّى لْلسّْمَا؟ لَّا، رَاكِ غَادِي تّْخَبْطِي حْتَّى لْلْهَاوِيَة.
16اللِّي سْمَعْ لِيكُمْ سْمَعْ لِيَّ. وْاللِّي مَا قْبَلْكُمْشْ مَا قْبَلْنِيشْ، وْاللِّي مَا قْبَلْنِيشْ مَا قْبَلْشْ هَادَاكْ اللِّي صِيفْطْنِي».#متى 10:40؛ مرقس 9:37؛ لوقا 9:48؛ يوحنا 13:20
الرّْجُوعْ دْيَالْ تْنِينْ وْسْبْعِينْ تْلْمِيدْ
17وْرْجْعُو هَادُوكْ التّْنِينْ وْسْبْعِينْ وْهُمَ فْرْحَانِينْ، وْݣَالُو لْيَسُوعْ: «يَا رَبّْ، بْالْإِسْمْ دْيَالْكْ حْتَّى الجّْنُونْ وْلَّاوْ كَيْطِيعُونَا». 18وْهُوَ يْجَاوْبْهُمْ: «شْفْتْ الشِّيطَانْ طَايْحْ مْنْ السّْمَا بْحَالْ الْبَرْقْ. 19رَانِي عْطِيتْكُمْ السُّلْطَة بَاشْ تُوطَاوْ عْلَى اللّْفَاعِي وْالْعْݣَارْبْ وْعْلَى ݣَاعْ الْقُوَّة دْيَالْ الْعْدُو، وْحْتَّى حَاجَة مَا تْآدِيكُمْ. 20وْوَاخَّا دَاكْشِّي، مَا خَاصّْكُمْشْ تْفَرْحُو حِيتْ الجّْنُونْ كَيْطِيعُوكُمْ، وَلَكِنْ فْرْحُو حِيتْ سْمِيَّاتْكُمْ مْكْتُوبِينْ فْالسَّمَاوَاتْ عَنْدْ اللَّهْ».
يَسُوعْ فْرْحَانْ
21وْفْهَادِيكْ السَّاعَة فْرَحْ يَسُوعْ بْالرُّوحْ الْقُدُسْ وْݣَالْ: «كَنْحَمْدَكْ آ الْآبْ، يَا رَبّْ السّْمَا وْالْأَرْضْ، حِيتْ خْبِّيتِي هَادْ الْأُمُورْ عْلَى الْحُكَمَا وْالْفُهَمَا وْبَيِّنْتِيهُمْ لْلدّْرَارِي الصّْغَارْ، حِيتْ هَادْشِّي اللِّي كَيْفَرّْحْكْ. 22بَّا عْطَانِي كُلّْشِي، وْحْتَّى وَاحْدْ مَا كَيْعْرَفْ شْكُونْ هُوَ الْوَلْدْ غِيرْ الْبُو، وْلَا شْكُونْ هُوَ الْبُو غِيرْ الْوَلْدْ، وْغِيرْ هَادَاكْ اللِّي بْغَا الْوَلْدْ يْوَرِّيهْ لِيهْ».#يوحنا 3:35؛ يوحنا 10:15
23وْتْلَفّْتْ لْلتّْلَامْدْ وْݣَالْ لِيهُمْ بُوحْدْهُمْ: «سْعْدَاتْ اللِّي كَيْشُوفْ دَاكْشِّي اللِّي كَتْشُوفُو! 24فْالْحَقِيقَة، رَاهْ بْزَّافْ دْ الْأَنْبِيَا وْالْمُلُوكْ تْمْنَّاوْ يْشُوفُو دَاكْشِّي اللِّي كَتْشُوفُو وْمَا شَافُوهْشْ، وْيْسَمْعُو دَاكْشِّي اللِّي كَتْسَمْعُو وْمَا سْمْعُوهْشْ».
الْمْتَالْ دْيَالْ السَّامِرِي الْمْزْيَانْ
25وْنَاضْ وَاحْدْ الْعَالِمْ دْ الشّْرَعْ، وْسْوّْلْ يَسُوعْ بَاشْ يْحَصّْلُه وْݣَالْ لِيهْ: «آشْ خَاصّْنِي نْدِيرْ بَاشْ تْكُونْ عَنْدِي الْحَيَاةْ الدَّايْمَة؟»#متى 22:35-40؛ مرقس 12:28-34 26وْجَاوْبُه يَسُوعْ: «أَشْنُو مْكْتُوبْ فْشْرَعْ اللَّهْ؟ وْكِيفَاشْ كَتْقْرَاهْ؟» 27وْجَاوْبْ الْعَالِمْ وْݣَالْ: «خَاصّْكْ تْبْغِي الرَّبّْ إِلَاهْكْ مْنْ قَلْبَكْ كُلُّه، وْمْنْ نْفْسَكْ كُلّْهَا، وْمْنْ قُوّْتْكْ كُلّْهَا، وْمْنْ عَقْلَكْ كُلُّه، وْخَاصّْكْ تْبْغِي اللِّي قْرِيبْ لِيكْ كِيفْ كَتْبْغِي رَاسْكْ». 28وْهُوَ يْݣُولْ لِيهْ يَسُوعْ: «عَنْدْكْ الصَّحْ، دِيرْ هَادْشِّي وْغَتْحْيَا».
29وَلَكِنْ الْعَالِمْ دْ الشّْرَعْ بْغَا يْبَيّْنْ بْلِّي هُوَ كَيْطَبّْقْ الشّْرَعْ، وْسْوّْلْ يَسُوعْ: «وْشْكُونْ هُوَ اللِّي قْرِيبْ لِيَّ؟» 30وْجَاوْبُه يَسُوعْ وْݣَالْ: «هَادَا وَاحْدْ الرَّاجْلْ كَانْ نَازْلْ مْنْ أُورْشَلِيمْ لْأَرِيحَا، تْعَرّْضُو لِيهْ الشّْفَارَا، وْعْرَّاوْهْ وْضْرْبُوهْ، وْخْلَّاوْهْ بِينْ الْمُوتْ وْالْحَيَاةْ. 31وْبْالصُّدْفَة كَانْ وَاحْدْ مْنْ رْجَالْ الدِّينْ نَازْلْ مْنْ دِيكْ الطّْرِيقْ، وْمْلِّي شَافُه بَعّْدْ عْلِيهْ وْكَمّْلْ طْرِيقُه. 32وْدَازْ وَاحْدْ مْنْ اللَّاوِيِّينْ حْتَّى هُوَ مْنْ دِيكْ الْبْلَاصَة، وْمْلِّي شَافُه بَعّْدْ عْلِيهْ وْكَمّْلْ طْرِيقُه. 33وَلَكِنْ وَاحْدْ الرَّاجْلْ سَامِرِي كَانْ مْسَافْرْ دَازْ مْنْ حْدَاهْ، وْمْلِّي شَافُه حَنّْ عْلِيهْ. 34وْقَرّْبْ لِيهْ وْدَاوَا الجّْرْحْ دْيَالُه بْالزِّيتْ وْالْخْمَرْ، وْمْنْ بَعْدْ رَكّْبُه عْلَى الْبْهِيمَة دْيَالُه وْدَّاهْ لْوَاحْدْ الْفْنْدَقْ وْتّْهَلَّى فِيهْ. 35وْالْغَدّْ لِيهْ، عْطَى الرَّاجْلْ السَّامِرِي لْمُولْ الْفْنْدَقْ جُوجْ دِينَارَاتْ وْݣَالْ لِيهْ: تّْهَلَّى فِيهْ، وْاللِّي خْسَرْتِي فُوقْ مْنْ دَاكْشِّي اللِّي عْطِيتْكْ غَادِي نْرَدُّه لِيكْ مْلِّي نْرْجَعْ. 36إِيوَا شْكُونْ مْنْ هَادْ التّْلَاتَة اللِّي كَيْبَانْ لِيكْ قْرِيبْ لْلرَّاجْلْ اللِّي تْعَرّْضُو لِيهْ الشّْفَارَا؟» 37وْجَاوْبُه الْعَالِمْ دْ الشّْرَعْ: «هَادَاكْ اللِّي حَنّْ عْلِيهْ». وْهُوَ يْݣُولْ لِيهْ يَسُوعْ: «إِيوَا سِيرْ حْتَّى نْتَ وْدِيرْ بْحَالُه».
يَسُوعْ عَنْدْ مَرْيَمْ وْخْتْهَا مَرْتَا
38وْمْلِّي كَانُو غَادْيِينْ فْالطّْرِيقْ، دْخَلْ يَسُوعْ لْوَاحْدْ الدُّوَّارْ، وْرَحّْبَاتْ بِيهْ وَاحْدْ الْمْرَاة سْمِيتْهَا مَرْتَا فْدَارْهَا.#يوحنا 11:1 39وْكَانْتْ عَنْدْهَا خْتْهَا سْمِيتْهَا مَرْيَمْ، ݣْلْسَاتْ عَنْدْ رْجْلِينْ الرَّبّْ يَسُوعْ كَتْسْمَعْ لْكْلَامُه. 40وَلَكِنْ مَرْتَا كَانْتْ مْشْغُولَة فْالتّْوْجَادْ لْلْضّْيَافْ، وْجَاتْ وْݣَالْتْ لْيَسُوعْ: «يَا رَبّْ، وَاشْ مَا بْقِيتْشْ فِيكْ حِيتْ خْلَّاتْنِي خْتِي نْخْدَمْ غِيرْ بُوحْدِي؟ ݣُولْ لِيهَا تْنُوضْ تْعَاوْنِّي!» 41وْجَاوْبْهَا الرَّبّْ وْݣَالْ: «آ مَرْتَا، آ مَرْتَا، نْتِ هَازَّة الْهَمّْ وْمْشْغُولَة بْبْزَّافْ دْ الْأُمُورْ، 42وَلَكِنْ غِيرْ حَاجَة وَحْدَة لَاشْ مْحْتَاجِينْ، وْمَرْيَمْ خْتَارْتْ الْحَاجَة الْمْخَيّْرَة اللِّي مَا غَيْݣْلَعْهَا لِيهَا حَدّْ».
المحددات الحالية:
لُوقَا 10: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
