Gén 3
3
Toq ri Adán y ri Eva xemakun
1Y chikikojol k'a ri chikopi' ri e richin pa k'echelaj ri xeruben ri Dios, k'o k'a jun kumetz ri más nowineq y kan man jun chik k'a ri achi'el rija'. Y rija' xubij chire ri ixoq: ¿Kan qitzij chi ri Dios xubij chiwe chi man titej kiwech re che' re ek'o wawe' pa qejoj?, xcha'.
2Y ri ixoq xubij chire ri kumetz ri': Ri kiwech ronojel che' ri ek'o wawe' kan jachon-wi pa qaq'a' richin niqatej. 3Jak'a re ruwech re jun che' re k'o pa runik'ajal re qejoj, xubij kan ri Dios chiqe chi man tiqatej, ni man tiqachop, roma wi xtiqatej kan xqojken k'a, xcha'.
4K'ari' ri kumetz ri' xubij chire: Ni, man yixken ta. 5Roma ri Dios retaman chi ri q'ij toq xtitej, kan xtijaqatej k'a ri runaq'-iwech y kan xtiwetamaj k'a ri utz y ri itzel y kan xkixok k'a achi'el ri Dios, xcha' ri kumetz.
6Y ri ixoq xutz'et k'a chi ri ruwech ri che' ri' kan jebel-wi richin nitij y kan rayixel-wi y kan nuya-wi etamabel. Roma ri' xuk'en k'a ri ruwech ri che' ri' y xutej. Y xberuya' chuqa' chire ri rachijil. 7K'ari' xjaqatej kiwech chi e ka'i' y xketamaj chi e ch'anel, k'ari' xkitz'is ruxaq ri wíkix richin xkikuch ri kik'ix.
8Y chupan k'a ri tiqaq'ij ri' ri Dios nibiyajilan chupan ri qejoj. Y rije' xkak'axaj y junanin xebe chukojol ri che' ri ek'o chiri' y xbekewaj-ki' chuwech rija'. 9Jak'a ri Dios xroyoj ri Adán y xubij chire: ¿Akuchi atk'o-wi?, xcha'.
10Y rija' xubij: Xinwak'axaj chi atk'o wawe' pa qejoj, y xinxibij-wi' roma in ch'anel y roma ri' xinwewaj-wi', xcha'.
11Y ri Dios xubij chire: ¿Achike xbin chawe chi at ch'anel? ¡Xa xatej ruwech ri che' ri xinbij chawe chi man tatej!, xcha'.
12Y ri Adán xubij: Ri ixoq ri xaya' chuwe rat richin wachibil, xuya' chuwe ri ruwech ri che' y yin xintej, xcha'.
13Jari' ri Dios xubij chire ri ixoq: ¿Achike roma xaben kere'?, xcha'.
Y ri ixoq xubij: Ri kumetz xiruq'ol y roma ri' xintej ri ruwech ri che' ri', xcha'.
Ri rutojbalil ri mak
14Y ri Dios xubij chire ri kumetz ri': Roma kere' xaben, rat y konojel ri awijatzul ri xke'alex, kan xtiqaqa k'a itzel pan iwi' y re' kan xaxe k'a rix chikikojol konojel ri chikopi'; chikikojol ri aj-chuwa-jay y ri ek'o pa k'echelaj. Xtiqirirej k'a iwi' pan ulew y xtibeq' k'a poqolaj chijun ik'aslen. 15Xtinben chiwe chi ri ixoq y rat xtik'oje' k'ululanik chi'ikojol, y keri' kik'in ri awijatzul rat; y jun chike ri ral-riy rija' xtupach'ij ri ajolon rat, y rat xtajich'aj ri ruxtuxil rija', xcha'.
16Y ri Dios xubij chire ri ixoq: Yin xtinben chawe chi kan janila k'a xkaq'axon toq awoyoben richin nibe'alex awal y kan rik'in k'a rukiy xkatalan. Y man rik'in ri', rat kan k'a xtarayij na ruwech ri awachijil y kan xkak'oje' k'a chuxe' ri rutzij rija', xcha'.
17Y ri Dios xubij chuqa' chire ri Adán: Roma kan xanimaj rutzij ri awixjayil y xatej ruwech ri che' ri xinbij chawe chi man tatej; awoma k'a rat xtiqaqa k'a itzel pa ruwi' re ruwach'ulew richin jantape'; y rik'in janila ruk'ayewal xtasamajij ri ulew richin xkawa' chijun ri ak'aslen. 18Y jalajoj k'a ruwech taq q'ayis ri k'o kik'ixal xkebek'oje' chupan ri atiko'n y kan xtabetija' chuqa' ichaj. 19Xkatz'oqpin na k'a chubanik ri asamaj richin xtach'ek ri achike ri xtik'atzin chawe, k'a toq xkatok chik jun bey ulew ri achoq ik'in xatinben-wi; roma kan at ulew-wi, y kan keri' xkatok chik jun bey, xcha'.
20Y ri Adán, Eva*f3* k'a xubij chire ri rixjayil, roma ja rija' ri nabey te'ej ri xya'on k'aslen chiqe qonojel winaqi'. 21Y ri Dios xuben nima'q raqen rutziaq ri achin y ri ixoq, xuben rik'in sale'y kichin chikopi' richin xerukuch. 22Y ri Dios xubij: Wakami rije' kan achi'el chik roj, roma kan retaman chik ri utz y ri itzel. Wakami, tiqabana' k'a chi man tuchop ri ruwech ri che' ri niya'on k'aslen richin jantape', xcha'.
Ri Adán y ri Eva xe'elesex-pe chupan ri qejoj
23Roma ri' ri Dios xerelesaj k'a pe chiri' chupan ri qejoj, richin chi ri Adán tusamajij na ri ulew ri achoq ik'in chuqa' banon-wi rija'. 24Y toq xerelesaj-pe chupan ri qejoj ri', ri pa relebel-q'ij chire ri qejoj xeruya' querubín*f4* y jun espada rik'in q'aq' nisutin chuchi' ri qejoj, richin nuchajij ri bey, akuchi k'o-wi ri che' ri nuya' k'aslen.
المحددات الحالية:
Gén 3: KQC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Kaqchikel Bible © Bible Society in Guatemala, 2003.
