Luke 16
16
1ထို့နောက် ကိုယ်တော်သည် တပည့်တော်တို့အား ဆက်လက်၍ မိန့်တော်မူသည်မှာ “တစ်ခါက သူဌေးတစ်ဦးသည် သူ၏လုပ်ငန်းတို့ကို စီမံခန့်ခွဲဖို့ရန် ဘဏ္ဍာစိုးတစ်ယောက်ကို ခန့်အပ်ထားလေ၏။ ထိုဘဏ္ဍာစိုးသည် သူဌေး၏ဥစ္စာပစ္စည်းများကို အလွဲသုံးစားပြုနေကြောင်း သူဌေးသည် ကြားသိရသဖြင့် 2ဘဏ္ဍာစိုးကို ခေါ်လိုက်ပြီး ‘သင့်အကြောင်း ငါကြားရသည်မှာ မည်သို့နည်း။ သင့်ကို ဘဏ္ဍာစိုးနေရာ၌ ဆက်၍ မထားနိုင်တော့သောကြောင့် သင်၏စာရင်းဇယားများအားလုံးကို တင်ပြလော့’ ဟုဆိုလေ၏။ 3ထိုအခါ ဘဏ္ဍာစိုးက ‘ငါမည်သို့ပြုရမည်နည်း။ သူဌေးသည် ငါ့ကို ဘဏ္ဍာစိုးအလုပ်မှ ဖယ်ရှားလေပြီ။ ငါသည် မြေတူးသမားအဖြစ် အလုပ်ကြမ်းလုပ်ရန်လည်း အားအင်မရှိ။ တောင်းစားရန်လည်း ရှက်၏။ 4ဤအလုပ်မှထုတ်ပယ်ခံရပြီးလျှင် လူတို့သည် သူတို့၏အိမ်၌ ငါ့ကို လက်ခံကြစေရန် မည်သို့ပြုရမည်ကို ငါသိပြီ’ ဟုတွေးတောလေ၏။ 5ထို့ကြောင့် သူသည် သူဌေးထံ၌ အကြွေးတင်သူတို့ကို တစ်ဦးစီခေါ်၍ ပထမလူအား ‘သင်သည် ငါ၏သူဌေးထံ အကြွေးမည်မျှရှိသနည်း’ ဟုမေးလေ၏။ 6ထိုသူက ‘သံလွင်ဆီ စည်တစ်ရာပေးဖို့ရှိပါသည်’ ဟုဖြေသောအခါ
ဘဏ္ဍာစိုးက ‘သင်၏စာရင်းကိုယူ၍ ငါးဆယ်ဟုအမြန်ရေးလော့’ ဟုဆို၏။ 7တဖန် အခြားတစ်ဦးကိုလည်း ‘သင်သည်လည်း အကြွေးမည်မျှရှိသနည်း’ ဟုမေးလျှင်
ထိုသူက ‘စပါးအိတ်တစ်ရာရှိပါသည်’ ဟုဆိုသဖြင့်
ဘဏ္ဍာစိုးကလည်း ‘စာရင်းစာရွက်၌ အိတ်ရှစ်ဆယ်ဟုရေးလော့’ ဟုဆိုလေ၏။ 8ထိုအခါ သူဌေးသည် မရိုးဖြောင့်သောဘဏ္ဍာစိုး၏မိမိကိုယ်ကျိုးအတွက် ပါးနပ်သောလုပ်ဆောင်မှုအတွက် ချီးမွမ်းလေ၏။ ထိုနည်းတူပင် ဘုရားရှင်အား နာခံသောသူတို့ထက် ဘုရားရှင်ကို မနာခံသောလူတို့သည် သူတို့ကဲ့သို့သောအခြားသူများနှင့် ဆက်ဆံရာ၌ သာ၍ပါးပါးနပ်နပ်ရှိကြလေ၏” ဟုမိန့်တော်မူ၏။ 9တဖန် ကိုယ်တော်က တပည့်တော်များအား မိန့်ဆိုသည်မှာ “သင်တို့အား ငါဆိုသည်ကား မတရားမှုမကင်းသော လောကီစည်းစိမ်တို့ကို အသုံးပြု၍ မိမိတို့အတွက် မိတ်ဆွေများရအောင်ပြုကြလော့။ သို့ပြုလျှင် ထိုစည်းစိမ်များ ကုန်ခမ်း၍ သင်တို့သေဆုံးသောအခါ၌ ဘုရားရှင်နှင့်နတ်ဒေဝါတို့က သင်တို့ကို နိစ္စထာဝရအိမ်တော်တွင် ကြိုဆိုနေကြလိမ့်မည်။ 10သေးငယ်သောအမှုအရာ၌ သစ္စာရှိသူသည် ကြီးသောအမှုအရာ၌လည်း သစ္စာရှိ၏။ ထိုသို့ပင် သေးငယ်သောအမှုအရာ၌ မဖြောင့်မတ်သူသည် ကြီးသောအမှုအရာ၌လည်း မဖြောင့်မတ်ပေ။ 11သို့ဖြစ်၍ သင်တို့သည် မဖြောင့်မတ်သော ဤလောကီစည်းစိမ်တို့၌ပင် သစ္စာမရှိကြလျှင် မည်သူက စစ်မှန်သောစည်းစိမ်ကို သင်တို့ထံအပ်နှံမည်နည်း။ 12သင်တို့သည် သူတစ်ပါး၏ပစ္စည်းဥစ္စာတို့၌ သစ္စာမရှိလျှင် မည်သူက သင်တို့ပိုင်ဆိုင်ရန်ဥစ္စာကို ပေးမည်နည်း။ 13မည်သည့်အစေခံမျှ သခင်နှစ်ဦးကို တစ်ပြိုင်တည်းသစ္စာမခံနိုင်ပေ။ သူသည် တစ်ဦးကိုမုန်း၍ တစ်ဦးကို မေတ္တာထားလိမ့်မည်။ တစ်ဦးကို သစ္စာစောင့်သိလျှင် အခြားတစ်ဦးကို မထီမဲ့မြင်ပြုလိမ့်မည်။ ထိုနည်းတူ သင်တို့သည်လည်း ဘုရားရှင်နှင့် လောကီစည်းစိမ်တို့ကို တစ်ပြိုင်တည်း သစ္စာမခံနိုင်” ဟုမိန့်တော်မူ၏။ 14ထိုအခါ ငွေကိုတပ်မက်သော ဖာရိရှဲတို့သည် ကိုယ်တော်၏စကားတို့ကို ကြားသောအခါ ကိုယ်တော်အား လှောင်ပြောင်ရယ်မောကြ၏။ 15သို့သော် ကိုယ်တော်က သူတို့အား “သင်တို့သည် လူတို့ရှေ့၌ မိမိကိုယ်ကိုဖြောင့်မတ်သည့်သူများကဲ့သို့ ဟန်ဆောင်တတ်ကြ၏။ သို့သော် ဘုရားရှင်သည် သင်တို့၏စိတ်နှလုံးကို သိမြင်တော်မူ၏။ လူတို့အမြတ်တနိုးတန်ဖိုးထားနေကြသည့် လောကီစည်းစိမ်တို့သည် ဘုရားရှင်အတွက်မူ မနှစ်မြို့ဖွယ်ရာများပင်ဖြစ်၏။ 16မောရှေ၏ပညတ်ကျမ်းနှင့် အရိယာသူတော်စင်ကျမ်းများသည် ရေနှစ်မင်္ဂလာဆရာယောဟန်ပေါ်လာ၍ တရားတော်များမဟောပြောခင်အချိန်တိုင်အောင် သင်တို့အတွက် လိုက်နာရမည့်လမ်းစဉ်များအဖြစ် ရှိခဲ့ကြ၏။ သို့သော် ယခုယောဟန်ပေါ်လာပြီးသည့်နောက် ဘုရားရှင်၏သာသနာတော်နှင့်ဆိုင်သည့် မင်္ဂလာသတင်းကောင်းကို ဟောပြောသည့်အခါ လူအပေါင်းတို့သည်လည်း သာသနာတော်သို့ အတင်းတိုးဝင်ကြ၏။ 17သို့သော် ရေးသားဖော်ပြထားသော ဘုရားရှင်၏ပညတ်တော်တိုင်းသည် ဖြစ်ပျက်ရမည်ဖြစ်၏။ ပညတ်တော်ထဲမှ စကားလုံးတစ်လုံး မဖြစ်လာဖို့ထက် ကောင်းကင်နှင့်ကမ္ဘာလောက ပျက်စီးရန်က ပို၍လွယ်ကူသေး၏။ 18မိမိဇနီးမယားကို ကွာရှင်း၍ အခြားအမျိုးသမီးတစ်ဦးကို လက်ထပ်ထိမ်းမြားသောသူသည် အိမ်ထောင်ရေးဖောက်ပြန်မှုကို ကျူးလွန်၏။ ခင်ပွန်းက ကွာရှင်းထားသောအမျိုးသမီးနှင့် လက်ထပ်ထိမ်းမြားသောသူသည်လည်း အိမ်ထောင်ရေးဖောက်ပြန်မှုကို ကျူးလွန်ခြင်းပင်ဖြစ်၏” ဟုမိန့်တော်မူ၏။ 19ထို့နောက် ကိုယ်တော်က “တစ်ခါက တန်ဖိုးကြီးသောဝတ်ကောင်းစားလှများကို ဝတ်ဆင်၍ နေ့စဉ်နေ့တိုင်း စည်းစိမ်ခံစား၍ ပျော်မွေ့နေသည့် သူဌေးတစ်ဦးရှိလေ၏။ 20သူ၏အိမ်တံခါးဝ၌ကား တစ်ကိုယ်လုံးအနာများပေါက်နေသော လာဇရုဟုခေါ်သည့်ဆင်းရဲသားတစ်ဦးသည် 21သူဌေး၏စားကြွင်းစားကျန်များကို စားလိုသည့်စိတ်ဖြင့် တံခါးဝ၌ လဲလျောင်းနေတတ်၏။ ထို့အပြင် ခွေးတို့သည်လည်း လာကြ၍ သူ၏အနာများကို လျက်ကြ၏။ 22ထို့နောက် လာဇရုသည် သေဆုံး၍ နတ်ဒေဝါတို့သည် သူ့အား ဘိုးဘေးအာဗြဟံထံသို့ ခေါ်ဆောင်သွားကြလေ၏။ သူဌေးသည်လည်း သေဆုံးသောအခါ သင်္ဂြိုဟ်ခြင်းကိုခံရ၍ 23မရဏနိုင်ငံ၌ ဒုက္ခဝေဒနာခံစားရလျက်နေ၏။ သူဌေးသည် အပေါ်သို့ မျှော်ကြည့်သည့်အခါ၌ အာဗြဟံနှင့်အတူရှိသော လာဇရုကို မြင်လေ၏။ 24ထိုအခါ သူသည် အော်ဟစ်ငိုကြွေးလျက် ‘အဖအာဗြဟံ၊ အကျွန်ုပ်ကို သနားတော်မူပါ။ အကျွန်ုပ်သည် ဤမီးလျှံထဲတွင် ဝေဒနာပြင်းစွာခံစားနေရသည့်အတွက် လာဇရု၏လက်ညှိုးကို ရေဆွတ်၍ အကျွန်ုပ်၏လျှာကို အေးစေဖို့ရန် သူ့ကို စေလွှတ်ပေးတော်မူပါ’ ဟုဆိုလေ၏။ 25သို့သော် အာဗြဟံက ‘ငါ့သား၊ သင်သည် အသက်ရှင်စဉ်အခါက အကောင်းဆုံးသောအရာတို့ကို ရရှိခဲ့၍ လာဇရုသည်ကား မကောင်းသောအရာတို့ကိုသာ ရရှိခဲ့ကြောင်းကို သတိရလော့။ ယခုမူကား လာဇရုသည် ဤနေရာ၌ သက်တောင့်သက်သာနေရ၍ သင်သည်ကား ဒုက္ခဝေဒနာကို ခံစားရ၏။ 26ထိုမျှမက သင်နှင့် ငါတို့အကြားတွင် အလွန်နက်သောချောက်ကြီးတစ်ခုခြားထားသဖြင့် မည်သူမျှ ဖြတ်၍ကူးလာနိုင်မည်မဟုတ်’ ဟုဆိုလေ၏။ 27သူဌေးကလည်း ‘အဖအာဗြဟံ၊ ဤသို့ဆိုလျှင် လာဇရုကို အကျွန်ုပ်၏ဖခင်အိမ်သို့ စေလွှတ်၍ 28ဤကဲ့သို့ ဒုက္ခဝေဒနာခံစားရသည့်နေရာသို့ မရောက်ကြစေရန် အကျွန်ုပ်၏ညီအစ်ကိုငါးဦးကို သတိပေးစေလိုပါ၏’ ဟုလျှောက်တင်လေ၏။ 29သို့သော် အာဗြဟံက ‘သင်၏ညီအစ်ကိုတို့၌ မောရှေနှင့် အရိယာသူတော်စင်တို့ ပညတ်ကျမ်းများရှိကြ၏။ ထိုကျမ်းတို့ကို သူတို့လိုက်နာကြပါစေ’ ဟုဆိုသောအခါ 30သူဌေးက ‘အဖအာဗြဟံ၊ ဤမျှနှင့် မလုံလောက်ပါ။ သေသောသူတို့ထဲမှ တစ်စုံတစ်ဦးသည် သူတို့ထံသွား၍ ပြောပြမှသာ သူတို့သည် နောင်တသံဝေဂရကြပါလိမ့်မည်’ ဟုဆိုလေ၏။ 31ထိုအခါ အာဗြဟံက ‘သူတို့သည် မောရှေနှင့်အရိယာသူတော်စင်တို့ရေးသားထားသည့်ပညတ်ကျမ်းများကိုပင် မလိုက်နာကြလျှင် သေရာမှ ပြန်လာသူတစ်ဦး၏စကားကိုလည်း ယုံကြည်လက်ခံကြလိမ့်မည်မဟုတ်’ ဟုဆိုလေ၏” ဟူ၍မိန့်တော်မူ၏။
المحددات الحالية:
Luke 16: mtpv-rv
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
This translation of the Musselmani Burmese Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
