MATIUS 8
8
Isa appakagassing se're tau kattakang
8:1-4
(Mark. 1:40-45; Luk. 5:12-16)
1Sungka'na Isa naung battu ri baho buttu, lohe tau a'rurung-rurung minahang ri Ia. 2Rie' se're tau kattakang mange ri Ia, ampai joppa' nyomba ri Ia na lakua, ”Karaeng, ampa a'ra'Ki, Ditte akkulle appakatangkasa ri nakke.” 3Jari Isa lapatanjo limanNa, laseru tau injo na appaui, ”Nakke a'ra', a'jarimoko tangkasa.” Rihattu injo jua tangkasamu tau injo rikattakanna. 4#Im. 14:2; Mark. 1:44Jari appaui Isa mange ri Ia, ”U'rangilalo, ako pappiissekang passala injo manna mange jua ri inai, mingka a'lampako, pappijanjangang kalemmu mange ri imang na assareko passidakka assituru' nulaparenta injo Musa, assimpole tanra mange ri iyai.”
Isa appakagassing ata rise're tau parawira ri Kapernaum
8:5-13
(Luk. 7:1-10; Yah. 4:46-53)
5Hattu antama'na Isa ri Kapernaum, rie'mo se're tau parawira mange ri Ia na ngerai mange ri Ia: 6”Karaeng, atangku tinro ri sapo saba' garring kelui na sanna' sissana.” 7Appaui Isa mange ri ia, ”Nakke lamange Kupakagassingi.” 8Mingka appihali parawira injo mange ri Ia, ”Karaeng, nakke gele siratang lanarima Karaeng ri sapongku, mingka pau mamo manna sipali' jua, jari mole garrinna atangku. 9Saba' nakke inni se're jua turiatoro, na rahangangku rie' todo' parajuri'. Ampa nakke appau mange risala se'renna parajuri' injo: A'lampako! Jari ia a'lampai, na mange rise'reang pole: Maeko! jari ia rie'i battu, iyareka mange ri atangku: Jamai injo! jari ia lajama toje'i.” 10Lalangngere'na passala injo, lannasai Isa na appaui mange ri iyai tuminahang injo ri Ia, ”Sitoje'na Nakke appau mange ri kaui, Katappakang assimbakka' inni Nakke gelepa minang anrumpa' manna rise're tau ritangngana tau Israele.” 11#Luk. 13:29Nakke appau mange ri kaui, ”Lohe tau larie' battu ri timoro na laukang na attolongi nganre assurang-surang Abraham, Ishak na Yakub lalang ri Pakkaraengang Suruga, 12#Mat. 22:13, 25:30; Luk. 13:28na ana'-ana' Pakkaraengang injo laripabuangi antama' rikalammang nukaminang akkapu', ri injomo larie' parau na gigi a'rekuki.” 13Jari appaui Isa mange ri parawira injo, ”Mulimmoko na a'jarimu ri kau assimpole numukatappaki injo.” Rihattu injo jua molemu garrinna atanna.
Isa lapakagassing matoang bahinena Petrus na lohe tau maraeng
8:14-17
(Mark. 1:29-34; Luk. 4:38-41)
14Riambattuna ri saponna Petrus, Isa lajanjangi matoang bahinena Petrus tinro saba' rammungi. 15RilatetenNa limanna bahine injo, tassoho'mu rammunna. Jari ambaummu na a'daha-dahai ri Ia. 16Sungka'i labangngi rierammu mange ri Isa lohe tau garring lapantamai setang surangang sipali' jua pau Isa laga'gara ngase' setang injo na lapakagassing ngase'i tau garring injo. 17#Yes. 53:4Passala injo a'jari solanna ripa'rupa pau nulapabattu injo Nabbi Yesaya: ”Iamo lanyompo kalammaanta na latanggong garrinta.”
Passala minahang ri Isa
8:18-22
(Luk. 9:57-62)
18Rihattunna Isa anjanjang lohe tau risiappuNa, Ia assuro a'limbang antaleang. 19Jari rie'mo se're tau guru Tora' na akkuta'nangi mange ri Ia, ”Guru, nakke laminahang ri Ditte, antee jua mae lampaTa.” 20Appaui Isa mange ri ia, ”Balaho rie' balona na jangang-jangang rie' poona, mingka Ana' Rupatau gele rie' tampa' panaroang ulunNa.”
21Se're tau maraeng, iamo intu sala se're ri ana' gurunNa, appau mange ri Ia, ”Karaeng, pa'bianga riolo kuloangang ammangku.” 22Mingka appihali Isa mange ri ia, ”Minahangko ri Nakke na lappasammu tau mate intu laloangang tau matena.”
Anging ka'bu lapakaluba'
8:23-27
(Mark. 4:35-41; Luk. 8:22-25)
23Jari Isa nai'i ri lopi na ana'-ana' gurunNa minahang todo'i. 24Sikalinna ngiri'mu anging ka'bu ri tamparang la'ba injo, sa'genna lopi injo so'di'pa lapakatallangi, mingka Isa tinro juai. 25Jari riekimu ana'-ana' gurunNa mange anronrong ri Ia, lakua, ”Karaeng, tulunglalo, lamateki.” 26Ia appau mange ri iyai, ”Ngura malla'ko, oe kau tau kurang tappa' intu?” Jari ambaungi Isa nalaga'gara anging surang tamparang la'ba injo, sa'genna tamparang la'ba injo a'jari sanna' luba'na. 27Lannasamu tau lohe injo na lakua, ”Tau assimpole apa Ia inni, sa'genna manna anging na tamparang la'ba tunru' mange ri Ia?”
Rua tau latamai setang ripakagassing
8:28-34
(Mark. 5:1-20; Luk. 8:26-39)
28Sungka'i ambattu Isa anta'leang, iamo intu ri tana tau Gadara, rie'mo battu ri pakkuburang rua tau ladongkoki setang mange ri Ia. Iyai injo sanna' daana, sa'genna gelemo rie' manna se're tau barani a'molong ri lalang injo. 29Appau bakkakimu, ”Apa passilolongamMu surangang kambe, oe Ana' Allataala? Apa Kau rie' mae konni lanyissa ri kambe rigelenapa larapi' hattunna?” 30Gele dere battu ri iyai injo sanna' lohe bahi attangnga a'boja kanre. 31Jari setang injo laerai mange ri Ia, ”Ampa kau angga'gara ri kambe, surolalokang a'lette' mange ribakkalang bahi injo.” 32Appaui Isa mange ri iyai, ”A'lampako!” Jari ansulu' ngase'mu ri iyai na antama'i ri bahi lohe injo. Iangase'na bakkalang bahi injo a'lumpa'i ri ta'bing anralang naung ri tamparang la'ba na mate ngase'i raha ri ere. 33Jari a'lampa pakalahaki bahi injo na riambattuinna ri kota, iyai lalagara ngase'i sikonjo numaeng kajariang, antama' todo' passala'na tau lataba injo setang. 34Iangase'na tau assinna kota injo ansulu'i lapiuppai Isa na rihattu assiuppana Isa, assuro terasimu, solanna Ia labokoi tampa'na.
المحددات الحالية:
MATIUS 8: LAI_SLY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
@LAI 2012 Indonesian Bible Society (Lembaga Alkitab Indonesia)
