लूका 9
9
ईसु के दुआरा बारैह चेलौ को भेजो जानो
(मत्ती 10:5–15; मरकुस 6:7–13)
1फिर ईसु नै बारैह चेलौ कै बुलाकै उनकै सब दुसट आत्माऔ कै लिकारनै और बेमारिऔ कै ठीक कन्नै की सकति और अधकार दओ। 2और बे परमेसर के राज की अच्छी खबर सुनानै और बेमारौं कै ठीक कन्नै के ताँई भेजे। 3और बानै उनसै कैई, “रस्ता के ताँई कुछ बी ना ले जाऔ ना लठिया, ना झोला, ना रोटी, ना रुपिया और ना दो-दो कुरता। 4और जिस किसी के घर मै तुम रुकौ, बहीं रैहऔ, और बहीं सै बिदा होओ।” 5#चेलौ 13:51#लूका 10:4–11अगर लोग तुमरो सुआगत ना करैं, तौ बा सैहर सै लिकरते भए अपने पाँऐऔं की धूदर झार डारौ, कै उनके खिलाप गभाई हो।
6बे बहाँ सै लिकरकै गामौ-गामौ अच्छी खबर सुनाते, और हर कहीं लोगौ कै ठीक करते भए फिरते रैहए।
हेरोदेस राजपाल को घबरानो
(मत्ती 14:1–12; मरकुस 6:14–29)
7 #
मत्ती 16:14; मरकु 8:28; लूका 9:19 एक चौथाई देस को राजपाल हेरोदेस, जौ सब सुनकै घबरा गओ, कैसेकै कुछ लोग कैबै हे कै “यहून्ना मरे भएऔं मै सै जी उठो है।” 8और दूसरे कैरए हे, “एलिया परकट भओ है।” कुछ और कैरए हे, पुराने नबिऔ मै सै कोई जी उठो है। 9पर हेरोदेस नै कैई, “यहून्ना की तौ मैंनै गरदन कटबा दई। फिर जौ कौन है, जिसके बारे मै ऐंसी बात सुन रओ हौं?” इसताँई बौ ईसु सै मिलनै की कोसिस करल लगो।
पाँच हजार लोगौ के रोटी खवाई
(मत्ती 14:13–21; मरकुस 6:30–44; यहून्ना 6:1–14)
10फिर भेजे भए चेलौ नै लौहटकै जो कुछ उनौनै करो हो, ईसु कै सब बता दओ, और बौ उनकै अगल करकै चुपचाप बैतसैदा नाम एक सैहर मै ले गओ। 11पर भीड़ कै इसको पतो चल गओ और बौ बी उसके पीछे हो लई, ईसु नै उनको सुआगत करो और परमेसर के राज के बारे मै उनकै सिक्छा दई। और जिनकै ठीक होनै की जरूरत ही, बे ठीक करे। 12जब दिन छिपल लगो, तौ भेजे भए बारौंह चेलौ नै आकै उस्सै कैई, “भीड़ कै बिदा कर, जिस्सै बे आस पास के गामौ और बस्तिऔं मै जाकै रैहनै और खानै को इन्तजाम कर सकैं, कैसेकै हिंया तौ हम लोग सुनसान जघै मै हैं।”
13ईसु नै उनकै जबाब दओ, “तुमई उनकै खानै कै दो,”
उनौनै कैई, “हमरे धौंरे तौ पाँच रोटी और दो मच्छी के अलाबा कुछ बी ना है, पर हाँ, अगर हम जाकै इन सब लोगौ के ताँई रोटी मोल लैं, तौ हो सकै है।” 14बहाँ करिबन पाँच हजार तौ सिरप आदमी हे।
ईसु नै अपने चेलौ सै कैई, “उनकै पचास-पचास के समू मै बिठा दो।”
15उनौनै ऐंसोई करो, और सब बिठा दए। 16तब ईसु नै बे पाँच रोटी और दो मच्छी लंई, और सुरग की ओर देखते भए उनके ताँई परमेसर को धन्नबाद करो, और तोड़-तोड़कै चेलौ कै देतो गओ, कै लोगौं कै परसैं। 17तब सब लोग खाकै रज गए और बचे भए टुकड़ौ सै बारैह पल्ला भरकै उठाए।
पतरस को ईसु कै मसी माननो
(मत्ती 16:13–19; मरकुस 8:27–29)
18जब बौ इकले मै पिराथना कर रओ हो, तब चेला बाके धौंरे आए, तौ बानै उनसै पूँछी, “कै लोग मैंकै का कैबै हैं?” 19#मत्ती 14:1,2; मरकु 6:14,15; लूका 9:7,8उनौनै जबाब दओ, “कुछ लोग कैबै हैं जल संस्कार दैनै बारो यहून्ना, कुछ एलिया, पर कुछ दूसरे लोग कैबै हैं, पुराने नबिऔ मै सै कोई फिर जिन्दो हो गओ है।”
20 #
यहून 6:68,69 ईसु नै उनसै पूँछी, “पर तुम मैंकै का कैबौ हौ?”
(मत्ती 16:20–28; मरकुस 8:30—9:1)
पतरस नै जबाब दओ, “तू परमेसर को चुनो भओ मसी है।” 21तब बानै चेलौ कै कड़ी चितौनी देकै कैई, “जौ बात किसी कै ना कैईयो।”
ईसु दुआरा अपनी मौत की भबिसबानी
22और बानै अपने चेलौ सै कैई, “आदमी के लौंड़ा के ताँई जरूरी है, कै ‘मैं’ भौत दुख उठाऔं, और ‘मैं’ बुजरग यहूदी मुखियौं, मुक्ख पुजारिऔं और सास्तरिऔं दुआरा ठुकराओ जाकै, मार डारो जांऔ, और ‘मैं’ तीसरे दिन जी उठौं।”
23 #
मत्ती 10:38; लूका 14:27 इसके बाद ईसु नै सबसै कैई, “जो कोई मेरे पीछे आनो चाँहै, तौ अपने आप को इनकार करै और रोज अपने दुख और मुसीबत उठाय चाँए मौत बी आ जाय। बौई मेरे पीछे चल सकै है। 24#मत्ती 10:39; लूका 17:33; यहून 12:25अगर जो कोई अपनी जान बचानी चाँहैगो बौ बाकै खोगो, पर जो कोई मेरे ताँई अपनी जान खोगो, बौई उसकै बचागो। 25अगर आदमी सैरी दुनिया कै पाले, पर अपनी जिन्दगी खो दे, या अपनो सरबनास कल्ले, तौ बाकै इस्सै का फाएदा होगो? 26जो कोई मैंकै और मेरी बातौं कै लोगौ के बीच मै माननै सै सरमागो तौ ‘मैं’ आदमी को लौंड़ा बी, जब अपनी और अपने अब्बा की, और पबित्तर सुरगदूतौं की महिमा के संग आंगो, तौ मैं बी उसकै ना मानंगो। 27मैं तुम लोगौं सै सच कैरओ हौं, कै जो हिंया खड़े हैं, उनमै सै कुछ ऐंसे हैं, कै जब तक परमेसर को राज ना देख लैं, तब तक ना मरंगे।”
ईसु को रूप बदलनो
(मत्ती 17:1–8; मरकुस 9:2–8)
28इन बातौं के करिबन आठ दिनौ बाद बौ पतरस और यहून्ना और याकूब कै संग लेकै पिराथना कन्नै के ताँई पहाड़ मै गओ। 29जब बौ पिराथना करई रओ हो, तौ बाके मौह को रूप बदल गओ और बाके लत्ता सपेद होकै जगमगाल लगे। 30तब जे दो आदमी मूसा और एलिया परकट होकै उसके संग बात कर रए हे। 31जो अपनी महिमा के संग दिखाई दए, और बाके मरनै की चरचा कर रए हे, जो ऐरूसलेम मै पूरी होनै बारी ही। 32पतरस और बाके साती गैहरी नींद मै हे, जब बे जगे तौ उनौनै ईसु की महिमा देखी और उनौनै बे दो आदमी बी देखे जो उसके संग खड़े हे। 33जब बे बाके धौंरे सै जाल लगे, तौ पतरस नै ईसु सै कैई, “हे मालिक, हमरो हिंया रैहनो कितनो अच्छो है, हम तीन तम्बू बनाऐ, एक तेरे ताँई, एक मूसा के ताँई और एक एलिया के ताँई।” उसकै पतो ना हो कै बौ का कैरओ है। 34बौ जौ कैई रओ हो, कै एक बादर नै आकै बे छाँ लए, और जब बे उस बादर सै घिरललगे, तौ डर गए। 35#मत्ती 3:17; 12:18; मरकु 1:11; लूका 3:22#2 पतर 1:17,18और उस बादर मै सै जौ अबाज आई, “जौ मेरो चुनो भओ लौंड़ा है, इसकी सुनौ।” 36अबाज खतम होतेई ईसु इकलो रैह गओ, और चेला चुप रैहए, और उनौनै जो कुछ देखो हो, बाकी कोई बात उन दिनौ मै किसी सै ना कैई।
एक लौंड़ा कै दुसट आत्मा सै छुटकारो
(मत्ती 17:14–18; मरकुस 9:14–27)
37और अगले दिन जब बे पहाड़ सै उतरे तौ एक बड़ी भीड़ ईसु सै आ मिली। 38तब भीड़ मै सै एक आदमी नै चिल्लाकै कैई, “हे गुरू, मैं तेसै बिनती कर रओ हौं, मेरे लौंड़ा के ऊपर रैहम कर, कैसेकै बौ मेरो इकलौतो लौंड़ा है। 39एक दुसट आत्मा बाकै पकड़ै है, और बौ अचानक चिल्ला पड़ै है, और बौ बाकै ऐंसो मरोड़ै है कै बाके मौह मै झाग लिकरल लगै है, और बाको सरीर ऐंठल लगै है, और बाकी नस नस तोड़कै बड़ी मुसकल सै छोड़ै है। 40और मैंनै तेरे चेलौ सै बिनती करी, कै बे बाकै लिकारै, पर बे ना लिकार सके।” 41तब ईसु नै जबाब दओ, “हे अबिसवासी और भरस्ट पीड़ी के लोगौं मैं कब तक तुमरे संग रैहंगो, और कब तक तुमकै सैहंगो? अपने लौंड़ा कै हिंया ले आ।” 42अबी बौ लौंड़ा धौंरे आई रओ हो कै दुसट आत्मा नै बौ जमीन मै पटक कै मरोड़ दओ, पर ईसु नै दुसट आत्मा कै डाँट लगाई और लौंड़ा कै अच्छो करकै बाके अब्बा कै सौंप दओ। 43तब सब आदमी परमेसर की महासकति देक्कै हैरान भए।
अपनी मौत के बारे मै ईसु कै दुबारा कैनो
(मत्ती 17:22,23; मरकुस 9:30–32)
ईसु जो कुछ कर रओ हो उस काम कै देक्कै सब आदमी हैरान हो रए हे तबई ईसु नै अपने चेलौ सै कैई,
44 “अब जो मैं तुमसै कैरओ हौं, उन बातौं मै धियान दो। आदमी को लौंड़ा, लोगौ के हातौ मै सौंप दओ जागो।” 45पर बे इस बात कै समज ना सके। इसको अरथ उनसै छिपो रैह गओ और बे उसकै जान ना सके और बे बा बात के बारे मै बासै पूँछनै सै डरै बी हे।
सबसै बड़ो कौन?
(मत्ती 18:1–5; मरकुस 9:33–37)
46 #
लूका 22:24
एक दफै चेलौ मै जौ बैहैस छिड़ गई, कै हम्मै सबसै बड़ो कौन है? 47पर ईसु नै उनके मन को बिचार जानकै एक बालक लओ और बाकै अपने धौंरे खड़ो करो और 48#मत्ती 10:40; लूका 10:16; यहून 13:20उनसै कैई, “जो मेरे नाम मै इस बालक को सुआगत करै है, बौ मेरो सुआगत करै है और बौ बाको बी सुआगत करै है, जिसनै मैं भेजो हौं। तुम्मै सै जो सबसै छोटो है, बौई सबसै बड़ो है।”
(मरकुस 9:38–40)
49तब यहून्ना नै कैई, “हे मालिक, हमनै एक आदमी कै तेरे नाम सै दुसट आत्मा कै लिकारते देखो, और हमनै बाकै मनैह करी, कैसेकै बौ हमरे जैसे तेरो चेला ना है।”
50ईसु नै उनसै कैई, “बाकै मनैह मत करौ, जो तुमरे खिलाप ना है, बौ तुमरे संग है।”
एक सामरी सैहर
51फिर ऐंसो भओ कै जब ईसु को सुरग जानै को टैम धौंरे आल लगो तौ बानै ऐरूसलेम जानै को पक्को फैसला करो। 52और बानै सन्देस दैनै बारे दूत अपने अग्गे भेजे, बे सामरी लोगौ के एक गाम मै गए, कै ईसु के ताँई रैहनै को इन्तजाम करैं। 53लोगौं नै ईसु को सुआगत कन्नै सै इनकार कर दओ, कैसेकै बौ ऐरूसलेम जा रओ हो। 54बाके चेला याकूब और यहून्ना जौ सुनकै बोल पड़े, “परभु, तू चाँहै तौ, हम जौ कैह दैं कै सुरग सै आग गिरै और उनकै भसम कर दे।” 55पर ईसु नै उनकी ओर मुड़कै बे डाँटे, 56फिर बे दूसरे गाम चले गए।
चेला बन्नै की सरत
(मत्ती 8:19–22)
57ईसु अपने चेलौ के संग रस्ता के किनारे चलो जा रओ हो तौ किसी नै बासै कैई, “तू जहाँ कहीं बी जाय, मैं तेरे पीछे चलंगो।” 58ईसु नै बासै कैई, “लौमड़िऔं के भिट्टे और आसमान के पंछिऔ के बसेरा होवै हैं, पर आदमी के लौंड़ा के ताँई खोपड़ी छुपानै की बी जघै ना है।” 59बानै किसी दूसरे सै कैई, “मेरे पीछे चलो आ।” पर बानै जबाब दओ, “हे परभु, पैले मैंकै अपने अब्बा कै दफनानै के ताँई जान दे।” 60तब ईसु नै बासै कैई, “मुरदौं कै अपने मुरदे दफनान दो, तू जा और परमेसर के राज को परचार कर।” 61फिर एक और नै बी कैई, “हे परभु, मैं तेरे पीछे चलंगो पर पैले मैंकै अपने घर बारौं सै बिदा लैन दे।” 62ईसु नै बासै कैई, “हर की मुठिया पकड़नै के बाद जो मुड़कै पीछे देखै है, बौ परमेसर के राज के लायक ना है।”
المحددات الحالية:
लूका 9: TKB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
New Life Compute Institute [NLCI] - CC BY-NC-ND 4.0
