लूका 7
7
बिसवास मै सकति
(मत्ती 8:5–13)
1जब ईसु लोगौ कै अपनी सैरी बात सुना चुको तौ, कफरनहूम सैहर मै आओ। 2बहाँ एक सैनापति हो, बाको एक नौकर इत्तो बेमार हो कै मरनै बारो हो, बौ नौकर सैनापति को भौत पियारो हो। 3सैनापति नै जब ईसु के बारे मै सुनो तौ, उसनै कुछ बुजरग यहूदी मुखियौं कै जौ बिनती के संग ईसु के धौंरे भेजो, कै बौ आकै उसके नौकर की जान बचा ले। 4जब बे ईसु के धौंरे पौंचे तौ बे सच्चे मन सै बिनती करकै कैललगे, “कै बौ इस लायक है कै तू उसके ताँई ऐंसो करै। 5कैसेकै बौ हमरे लोगौं सै पियार करै है, और उसई नै हमरो पिराथना घर बनबाओ है।” 6ईसु उनके संग चल दओ, पर जब ईसु सैनापति के घर सै जादा दूर ना हो, तौ सैनापति नै बाके धौंरे अपने दोस्तौ कै जौ कैनै के ताँई भेजो, “हे परभु, अपने आपकै कसट मत दे, कैसेकै मैं इस लायक ना हौं कै तू मेरे घर मै आय। 7इसताँई मैंनै तेरे धौंरे आनै तक की बी ना सोची। पर तू बस बहाँ सै हुकम दे दे और मेरो नौकर ठीक हो जागो। 8मैं खुद किसी अधकारी के नीचे काम कन्नै बारो आदमी हौं और मेरे नीचे बी कुछ सिपाई हैं। जब मैं किसी सै कैबौ हौं ‘जा’ तौ बौ चलो जावै है और जब दूसरे सै ‘आ’ तौ बौ आ जावै है। और जब मैं अपने नौकर सै कैबौ हौं, ‘जौ कर’ तौ बौ उसई कै करै है।” 9ईसु नै जब जौ सुनो तौ उसकै बड़ो अचम्बो भओ, और बानै पीछे मुड़कै उस भीड़ सै जो उसके पीछे आ रई ही बोलो, “मैं तुमकै बता रओ हौं ऐंसो बिसवास मैंनै ईसराइल मै बी कहीं ना देखो।” 10फिर भेजे भए बे लोग जब बापस घर पौंचे तौ उनौनै बौ नौकर ठीक देखो।
राँड़ के लौंड़ा कै जिन्दगी दान
11दूसरे दिन ईसु नाईन नाम के एक सैहर मै गओ; बाके चेला और एक बड़ी भीड़ बाके संग ही। 12और जैसेई बौ सैहर के फाटक के धौंरे पौंचो तौ लोग एक मुरदे कै बाहार लेकै जा रए हे, जो अपनी राँड़ अईया को इकलौतो लौंड़ा हो, और सैहर के भौत से लोग उसके संग हे। 13बाकी अईया कै देखकै परभु कै बड़ो तरस आओ, और उसनै कैई, “मत रो।” 14तब ईसु नै धौंरे आकै, अरथी छुँई, और कंधा दैनै बारे रुक गए, तब ईसु नै कैई, “ऐ जमान, मैं तेसै कैरओ हौं, उठ।” 15तब बौ मुरदो उठ बैठो, और बोलल लगो और ईसु नै बौ उसकी अईया कै सौंप दओ। 16इसके बाद बे सबई डर गए, और बे परमेसर की बड़ाई करकै कैललगे कै हमरे बीच मै एक बड़ो भबिसबानी कन्नै बारो उठो है, “और परमेसर के लोगौं की सायता कन्नै के ताँई आ गओ है” 17ईसु की जौ खबर यहूदिया और आस पास के सैरे गामौ मै फैल गई।
यहून्ना जल संस्कार दैनै बारे को सबाल
(मत्ती 11:2–19)
18और यहून्ना कै उसके चेलौ नै इन सब बातौं की खबर सुनाई। 19तब यहून्ना नै अपने चेलौ मै सै दो कै बुलाकै परभु के धौंरे जौ पूँछनै के ताँई भेजो, कै “का आनै बारो मसी तूई है, या हम किसी और दूसरे को पैंड़ो देखैं?” 20उनौनै उसके धौंरे आकै कैई, “यहून्ना जल संस्कार दैनै बारे नै हम तेरे धौंरे जौ पूँछनै भेजे हैं, कै जो आनै बारो हो, बौ तूई है, या हम किसी और दूसरे को पैंड़ो देखैं?” 21उसई टैम बानै भौत से रोगी ठीक करे, और उनकै कसटौ और दुसट आत्माऔ सै छुटकारो दिब्बाओ। और भौस्से अन्धौ कै देखनै के ताँई आँख दंई 22और ईसु नै उनसै कैई, “जो कुछ तुमनै देखो और सुनो है, यहून्ना सै जाकै कै दो, कै अन्धे देख रए हैं, लंगड़े चल फिर रए हैं, कोढ़ी ठीक करे जा रए हैं, बैहरे सुन रए हैं, मरे भए जियाए जा रए हैं और कंगालौ कै अच्छी खबर सुनाई जा रई है। 23और धन्न है बौ, जो मेरे बजै सै ठोकर ना खाय।”
24जब यहून्ना को सन्देसो लानै बारे दूत चले गए, तौ ईसु यहून्ना के बारे मै लोगौ कै बताल लगो, “तुम बियाबान मै का देखनै गए हे? का हवा सै झूलती भई ढरसल कै? 25फिर तुम का देखनै गए हे? का किसी मखमली लत्ता पैहरे भए आदमी कै? देखौ, जो चमकीलो लत्ता पैहरै हैं, और सुक विलास सै रैहबैं हैं, बे तौ महलौ मै रैहबैं हैं 26तौ फिर का देखनै गए हे? का किसी भबिसबानी कन्नै बारे कै? हाँ, मैं तुमकै बता रओ हौं जो तुमनै देखो है बौ भबिसबानी कन्नै बारे सै बी बड़ो है। 27जौ बौई है जिसके बारे मै लिखो गओ है ‘देख मैं तेसै पैलेई अपनो दूत भेज रओ हौं, और बौ तेसै पैलेई रस्ता तईयार करैगो।’ 28मैं तुमसै कैरओ हौं, कै जो बईयरौं सै जलमे हैं, उनमै यहून्ना सै बड़ो कोई ना है फिर बी परमेसर के राज को छोटो सै छोटो आदमी बी उस्सै बड़ो है।”
29 #
मत्ती 21:32; लूका 3:12 तब हर किसी नै, हिंया तक की सब तरै की लगान लैनै बारौं नै बी यहून्ना को जल संस्कार लेकै जौ मान लओ कै परमेसर को रस्ता सच्चो है। 30पर फरीसिऔं और मूसा के नियमौ के जानकारौ नै उसको जल संस्कार ना लेकै अपने बारे मै परमेसर की मरजी टाल दई।
31फिर ईसु बोलो “तौ फिर मैं इस पीड़ी के लोगौ की तुलना किस्सै करौं, कै बे किसके जैसे हैं? 32बे उन बालकौ के जैसे हैं, जो बजार मै बैठे भए एक दूसरे कै बुलाकै कैबै हैं, ‘हमनै तुमरे ताँई बांसरी बजाई, पर तुम ना नाचे, हमनै तुमरे ताँई दुखी गीत गाओ, पर तुम ना रोए।’
33 कैसेकै यहून्ना जल संस्कार दैनै बारो ना तौ रोटी खातो आओ, ना अंगूरौं को रस पीतो आओ, और तुम कैबौ हौ, बामै दुसट आत्मा है। 34आदमी को लौंड़ा, सुरग सै आओ और खावै-पीवै है; और तुम कैबौ हौ, देखौ, पेटू और पियक्कड़ आदमी, सब तरै की लगान लैनै बारौं और पापिऔं को दोस्त है। 35पर परमेसर के अकल के अनुसार चलनै बारे लोग परमेसर कै सच्चो बताबै हैं।”
पापी बईयर कै माफी मिलनी
36एक फरीसी नै ईसु कै अपने संग रोटी खानै को नौहतो दओ। फिर बौ उस फरीसी के घर मै जाकै रोटी खानै बैठो।
37 #
मत्ती 26:7; मरकु 14:3; यहून 12:3 और देखौ, उस सैहर की एक पापन बईयर जौ जानकै कै बौ फरीसी के घर मै रोटी खानै बैठो है, संगमरमर की सीसी मै ईत्तर लाई। 38और बाके पाँऐऔं के धौंरे, पीछे खड़ी होकै, रोती भई, और बाके पाँऐऔं कै असुआ सै भिजैल लगी और अपने खोपड़ी के बारौं सै पछौनल लगी, और बाके पाँऐ बेरमबेर चूमकै उनमै ईत्तर लगाल लगी।
39जौ देक्कै, “बौ फरीसी जिसनै ईसु बुलाओ हो, अपने मन मै सोचल लगो, अगर जौ भबिसबानी कन्नै बारो होतो तौ जान लेतो, कै जो उसकै छूँ रई है, बौ कौन और कैसी बईयर है? कैसेकै बौ तौ पापन है।” 40जौ सुनकै ईसु नै उसकै जबाब दओ, “समौन, मैंकै तेसै कुछ कैनो है।” बौ बोलो, “हे गुरू कैह।” 41ईसु नै कैई, “किसी साहूकार के दो करजदार हे। एक मै उसके पाँच सौ चाँदी के सिक्का लिकर रए हे और दूसरे मै पचास। 42कैसेकै बे करजा ना लौहटा सकै हे, इसताँई उसनै दया करकै दौनौ के करज माफ कर दए। अब बता दौनौ मै सै उस्सै जादा पियार कौन करैगो?” 43समौन नै जबाब दओ, “मेरे हिसाब सै, बौई जिसको बानै जादा करजा माफ कर दओ।”
ईसु नै कैई, “तैनै ठीक जबाब दओ।” 44फिर उस बईयर की ओर मुड़कै बौ समौन सै बोलो, “तू जा बईयर कै देख रओ है? मैं तेरे घर मै आओ, तैनै मेरे पाँऐ धोनै के ताँई पानी बी ना दओ पर इसनै मेरे पाँऐ अपने असुआ सै तर कर दए, और फिर अपने बारौं सै पछौने। 45तैनै मैं चूमो तक ना, पर जब सै मैं भीतर आऔ हौं तब सै इसनै मेरे पाँऐ चूमने ना छोड़े। 46तैनै मेरे मूड़ मै तेल ना मिसलो; पर इसनै मेरे पाँऐऔं मै ईत्तर लगाओ है। 47इसताँई मैं तेकै कैरओ हौं कै इसको जादा पियार बता रओ है कै इसके भौस्से पाप माफ कर दए गए हैं। पर बौ जिसकै थोड़े पापौं की माफी मिली है, बौ थोड़ो पियार करैगो।”
48तब ईसु नै बा बईयर सै कैई, “तेरे पाप माफ कर दए गए हैं।”
49तब जो आदमी उसके संग रोटी खानै बैठे हे, बे अपने अपने मन मै सोचल लगे, “जौ कौन है जो पापौं कै बी माफ करै है?”
50तब ईसु नै बा बईयर सै कैई, “तेरे बिसवास नै तू बचा लई है, कुसल सै चली जा।”
المحددات الحالية:
लूका 7: TKB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
New Life Compute Institute [NLCI] - CC BY-NC-ND 4.0
