Matius 12
12
Pongajaran Yesus tintun Ondo Sabat#12:1 Ondo Sabtu, iyoh onon ondo husus sotorahat hintang sombayang indan dulun agama Yahudi.
12:1-14
(Luk. 6:1-11; Mrk. 2:23,3:6)
1Nyan kotika Ondo Sabat, Yesus hintang kawan murid-Eh nyolana nyihin umo. Kawan murid-Eh dou, jadi iroh mutoi gandum paluh kuman eh. 2Pira-pira pomimpin agama Yahudi ingkan kolompok Parisi kito iyoh. Maka iroh ngisok ma Yesus, “Noto! Alogawin kawan murid-Mu non sala! Awi, oko porintah Mohotara ponah Hukum agama Yahudi co ngosiit dulun bogawi nyan Ondo Sabat.”
3Yesus museh iroh, “mositi ikan piji mombaca Surat Borasih tintun kesah Laca Daud hintang kawan dulun co ngonulueh. Kotika iroh dou, 4Daud muntam hia ponah Lopo Mohotara, monu rute co ocop tomposembah indan Mohotara. Monurut Hukum agama baya kawan imam co boraoi kuman rute cioh. Tapi nyan kotika iyoh, Daud kuman eh. Are mihi hia kawan dulun co ngonulu are ika kuman eh ka.#12:4 Kesah tintun Laca Daud tuh oko nyan buku 1 Samuel 21:16. Poraturan tintun rute yoh oko nyan buku Imamat 24:5-9. 5Mositi ka ikan piji mombaca ponah Hukum agama tintun kawan imam. Nyan ondo Sabat, iroh botugas nyan ponah Lopo Mohotara. Jadi, iroh molangar poraturan ondo Sabat awi iroh ‘bogawi’ nyan ondo cioh. Tapi mositi iroh aroh sala, jah? 6Tapi porhatiboh! Makitu, nyan intoi oko co meleh bokuasa hangki Lopo Mohotara. 7Ikan aroh paham maksut antun Mohotara cotuh: ‘Hangki momposembah kurban komolum indang-Kuh, Akuh nyau ina ikan porahan komasi ma dongam.’#12:7 Ingkan buku Hosea 6:6. Soandaieh ikan paham maksut antun Mohotara yoh, mositi ikan aroh mohukum kawan dulun co aroko kosolaai 8awi Anak Kolunon iyohco Tuhan co bokuasa ma Ondo Sabat.”
9Yesus naat ika cioh paluh muntam hia ponah lopo ika sombayang kawan dulun Parisi yoh. 10Nyan intin oko dulun co matoi silan siluieh. Kawan dulun Parisi yoh nganyap kosolaan Yesus, ina boraoi nondah-Eh. Jadi, iroh ngisok ma Yesus, “Mainboh boraoi pai pomambuh dulun nyan ondo Sabat?”
11Tapi Yesus mantun ma iroh, “Misal eh, oko nyan halo ikan co empun ico kontuluh domba. Amun domba cioh tahak hia ponah luwang nyan Ondo Sabat, mositi ikan angar bogawi pokusit domba cioh ingkan ponah luwang cioh. 12Nah, mositi kolunon ocu meleh boleka hangki domba. Awi iyoh, ito boraoi nguan aang co pio nyan ondo Sabat.” 13Paluh, hie-Eh ma dulun cioh co siluieh matoi silai, “Nyoro silum!” Kotika dulun cioh nyoro siluieh, mambuhbat are. Siluieh co matoi silai jarin sehat isan siluieh silai. 14Tapi kawan dulun Parisi yoh pusit paluh umpi kewak ika ngompatoi Yesus.
Yesus iyohco Dulun Co Tomili Mohotara ika molayani Are
12:15-21
15Tapi Yesus monau kewak kawan dulun Parisi yoh. Jadi, Are tulak ingkan idi. Orong dulun ngonulu Are, hintang Are pomambuh kokon doh. 16Tapi Are ngosiit iroh mara tintun ome Are yoh.#12:16 Iroh co tongomambuh monau Yesus iyohco Kristus, iyohonon Laca Co Tomonjanji Mohotara. Tapi oko kawan dulun co aroh porocaya onon. Yesus arinai kolu portentangan tintun onon kahai awi Are incah oko gawi nyan dunia tuh. Portentangan cioh angar umpi dulun ngompatoi Are. Tapi waktu cioh co tonantu Mohotara ika Are matoi nyan sompolaki incah arinai okot. 17Poristiwa cioh tojadi ina antun Mohotara jarin nyata. Hiah jaman sinan nabi Yesaya nulih antun Mohotara cioh co tuh naieh:
18“Cotuhboh dulun co molayani Akuh. Are-boh co tomili-Kuh.
Are co tongasihi-Kuh. Are ngonyorih atoi-kuh.
Akuh angar mihi Roh-Kuh indai-Eh.
Paluh Are angar momborita indan kokon bangsa bahawa Akuh umpi kawan aang co sucing.
19Are aroko angar hojawap. Are aroko angar noriak.
Jadi kawan dulun aroko angar ngoneh suara-Eh nyan kawan calan.
20Are aroh molok towu bawui co botekop;
hintang aroko micop lampu co roo-roo.
Are angar horoholuh bojuang dapot koadilan manang. # 12:20 Oko pira-pira komungkinan indan arti ayat cotuh. 1) Yesus porahan komasi hejeng ma kawan dulun ina iroh jarin tohoku Mohotara iyohco sucing. ATAWA 2) Yesus bojuang ina kawan dulun lian tonyolamat ingkan hukuman dosan doh. ATAWA 3) Yesus bojuang dapot Korojaan Mohotara manang ma Korojaan Setan.
21 Kawan dulun ingkan kokon bangsa angar boharap bahawa Are nyolamat iroh.”#12:21 Ingkan buku Yesaya 42:1-4.
Yesus tonondah hapo kuasan Lacan Setan
12:22-37
(Mrk. 3:20-30; Luk. 11:14-23,6:43-45)
22Opaiyoh oko dulun co tonyarung roh jahat tomehen hia Yesus. Dulun cioh bobuto hintang uong. Yesus pomambuh are dapot lian noto hintang hopander bat. 23Maka, orong dulun nyan intin jarin hurong. Hien doh, “Mungkin Yesus tuh iyohco Laca ingkan koturunan Daud!”#12:23 Laca ingkan koturunan Daud iyohco tisi bokon indan Kristus, iyohonon ‘Laca Co Tomonjanji Mohotara’.
24Pira-pira pomimpin agama Yahudi ingkan kolompok Parisi ngoneh iyoh. Paluh iroh mantun, “Are musir kawan roh jahat hapo kuasan Lacan Setan!”
25Tapi Yesus monau pikiran doh. Jadi, Are mantun ma iroh, “Amun ico korojaan topisah-pisah ponah kawan golongan co hobomusuh, mositi korojaan cioh angar lumat. Amun kawan dulun ponah ico kota hobomusuh, mositi kota cioh aroh angar botahan. Amun kawan anggota koluarga hobomusuh, mositi koluarga cioh angar hancur. 26Sanioh ka nyan ponah Korojaan Setan. Amun Lacan Setan musir kawan roh jahat eh, borati korojaan eh tobagi-bagi. Are ngolawan arop eh tarop. Mositi korojaan eh aroh hegah botahan. 27Nohani, soandaieh Akuh musir roh jahat hapo kuasan Lacan Setan, borati kawan pongikut me musir roh jahat ma kuasan Lacan Setan ka. Kawan pongikut me leh co angar mantun onon sala! 28Tapi, co bujur iyohco Akuh musir roh jahat ma kuasan Mohotara. Maka, onon borati Korojaan Mohotara ocop dombut hia ikan.#12:28 Ma korombut Yesus, iroh boraoi noto kuasa korajaan Mohotara ocop molai ngalah kuasan korajaan setan. 29Potimbang gamaran cotuh: Amun ico dulun nyau muntam lopo dulun co kuat ina morampas harta bandaeh, mositi are sobulih mowot dulun co kuat yoh houn. Hanyar are lian morampuk lopo cioh.#12:29 Yesus bomaksud Are isan dulun co mowot dulun co kuat yoh. Are ngolawan Lacan Setan ina dulun lian jarin anggota koluarga Korojaan Mohotara hangki Korojaan Setan. 30Dulun co aroko momihak Akuh, kuantuueh are naleh Akuh. Dulun co aroko bogawi halo Akuh, are morusak gawing-Kuh.#12:30 Tindung cotuh boraoi borati dulun co aroh kerjasama ma Yesus, kuantuueh morusak gawi-Eh. ATAWA boraoi ka borati meleh toporinci, dulun co aroko kerjasama mehen kawan dulun meleh dokin ma Mohotara, kuantuueh mehen kawan dulun meleh ocu ingkan Mohotara. 31Jadi, porhatiyoh otuh: Sika dulun co bodosa atawa mohina dongai, boraoi tomampun. Tapi dulun co mohina Roh Mohotara, dulun cioh aroh angar tomampun. 32Sika dulun co mantun monentang Anak kolunon, dulun cioh boraoi tomampun. Tapi sika dulun co monentang Roh Mohotara, dulun cioh aroh piji angar tomampun nyan dunia tuh atawa nyan dunia co angar dombut.
33 Sika dulun tonyono ingkan alogawi somporengu sika batang kaju tonyono ingkan buah eh. Amun batang bua bolunyah, maka buah eh pio ka. Amun batang bua tongket, maka buah eh ceet ka. 34Ooi ikan dulun Parisi co jahat hintang licik isan nyipo mohari! Aroh bodai ikan polua antun kawan aang co pio awi ikan jahat. Awi, luang antun co bolua ingkan baun dulun, nyomput ingkan ponah atoi dulun cioh. 35Dulun co pio polua antun kawan aang co pio awi atoieh pio. Sobalik eh, dulun co jahat polua antun kawan aang co jahat awi atoieh jahat. 36Jadi, porhati yoh otuh: Nyan Ondo Mohotara momutus kokon dulun co bujur atawa co sala daai, sika dulun sobulih botanggung jawab ma antun co piji topolua eh hapaumai. 37Awi antun dolang tikoleh co angar tohapan ika momutus amun iko angar tomangap bujur nyan tohimo Mohotara atawa amun iko angar tomohukum Mohotara.”
Yesus nopoh dulun orong co nuntut Are ika nguan meleh orong aang co mosotahir kole
12:38-42
(Luk. 11:29-32)
38Opaiyoh pira-pira guru agama Yahudi hintang kawan dulun Parisi mantun ma Yesus, “Pa Guru, kaih jere noto Iko umpi aang co mosotahir co mombukti Mohotara nyoruhan Iko.”
39Tapi Yesus museh iroh, “Kawan dulun nyan jaman cotuh jahat hintang aroh sotia ma Mohotara. Iroh nuntut ico ciri. Tapi baya ico ciri co angar tomihi indan doh, iyohonon aang co mosotahir isan co tojadi ma Nabi Yunus hiah jaman sinan. 40Yunus oko nyan ponah olom ocin bahai kotahin tolu ondo tolu komomi.#12:40 Noto buku Yunus 1:17. Sanioh ka daai Anak Kolunon nyan ponah kolowong kotahin tolu ondo tolu komomi. 41Nyan ondo Mohotara momutus kokon dulun co bujur atawa co sala, kawan dulun Niniwe angar bolum hopuli ingkan pompatoi homboh kawan dulun jaman cotuh hintang nocaknona iroh. Awi kawan dulun Niniwe yoh umbot umpi kawan dosan doh, kotika Yunus porapot tungon Mohotara indan doh. Tapi nyan intoi makitu oko co meleh bahai hangki Yunus! 42Isanioh ka, nyan ondo Mohotara momutus kokon dulun co bujur atawa co sala ratu ingkan negri Syeba angar bolum hopuli homboh kawan dulun jaman cotuh hintang nocaknona iroh. Awi ika ngoneh pongajaran Salomo co boakar pikir, ratu cioh umpi solana co ocu lau ingkan solatan. Tapi nyan intoi makitu oko co meleh bahai hangki Salomo!”
Yesus momporingat ina botawat tohimo kuasan jahat
12:43-45
43 Paluh Yesus majar ma kesah cotuh: “Amun roh jahat pusit ingkan dulun, roh cioh koliling hia padang gurun ina nganyap ika sotorahat. Tapi are aroko habaeh. 44Maka, are mantun, ‘Akuh angar hopuli hia dulun co tonaat kuh!’ Waktu are dapot dulun cioh, are popak dulun cioh samah isan lopo co borasih hintang borimpoh, tapi buhang. 45Paluh are tulak, nyopopak pitu roh bokon co meleh jahat hangki are. Iroh uras dombut, muntam hia ponah dulun cioh, paluh nukui nyan intin. Kojekaieh, koadaan dulun cioh jarin meleh koduhui hangki kosulak. Ononleh ka co angar tojadi ma kawan dulun jahat jaman cotuh.”
Koluarga Yesus co kokuantuueh
12:46-50
(Mrk. 3:31-35; Luk. 8:19-21)
46Sopondehan Yesus incah hopander ma dulun orong yoh, dombutboh tinai hintang kawan konduang-Eh. Iroh tonjok nyan luar, nyau nyopopak Are tapi aroko boraoi. 47Jadi, oko dulun mara ma-Eh, “Tinam-Mu hintang kawan konduang-Mu oko nyan luar, nyau nyopopak-Iko.”
48Tapi Yesus mantun ma dulun cioh, “Omeboh tinang-Kuh? Omeboh kawan konduang-Kuh?” 49Yesus ninju hia kawan murid-Eh samir mantun, “Kawan dulun tatuhboh iyohco tinang-Kuh hintang kawan konduang-Kuh! 50Awi kokon dulun co nguan kojere Tamang-Kuh nyan sorga, Iroh iyohco tinang-Kuh hintang kawan konduang-Kuh bakah bawe.”
المحددات الحالية:
Matius 12: TBSS
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
