Nuk 1
1
Ɛjɨmannab
1Abembem anɛ anɔghɔ nɛyɛnɛ atub nsɔn yi ɛwɛmɛ ka ɛbɨŋɔ ɛjɨrɛ, 2ɛsika agbɔghamba anɛ ayɛɛ ka ɛjɨmannab ka ba ɛrɨgha ntɔrɔ Ɛsɔwɔ asighi abɔ akɛ war. 3Erusi, ka ji mmi fan yɛɛ jam ka ɛjimanab, mmi tam ntimi si ntoŋo nyɛnɛ ji ɛru si nkɛa, Ntaa Teofinus, 4sɔŋ ɔma ɔgbɛrɛ ka ɛdidɨghɛ nsɔn yi amia kpɨne.
Ɛsika awɛnɛ Jɔn ji Nwura anab
5Ka nden yi Ɛrɔd ajɔnɔ ntona Judiya ɛjɔnɔ nnɛ ɛwii yɔ ara jɔɔm Ɛsɔwɔ yɔ anɛ si Sakariya, ajɔnɔ ka ɛbɨŋɔ ba ɛjɔ Ɛsɔwɔ ka mgbaŋa Abija; nkawɛ Ɛnisabɛt atɨmaru ka ɛbannab Ɛrɔn ji ɛrɛ jɔɔ Ɛsɔwɔ. 6Abɔɔ anɛ abaaba afɔfɔm ka amar Ɛsɔwɔ, ayimi ka ajighi kprɔb, afɨna nem jiku jiku ji Ntaa arɨgha. 7Ka abɔɔ arɛ fɛn mɔ, atubsi Ɛnisabɛt ajɔnɔ ngum, ɛfine jɔn si abɔɔ anɛ abaába akon asiŋ nɛ kpɛ bɛn mɔ.
8Ka nden yi ɛbɨŋɔ Sakariya ajɔnɔ ka nɛtom ni ɛjɔɔ Ɛsɔwɔ, ɛsika yɛ árajɔm ka ɛsiamar Ɛsɔwɔ, 9átub nɛfaŋa ni ɛmɛ saŋɛ si yɛ yɔ animɛ ka njo ama fi ɛyughanɛsan. 10Ka ndena ɛfigha ɛyughanɛsan asi, anɛ kpakpa ba ábaa ama kak Ɛsɔwɔ ajɔnɔ ka nina akɨgha njɔm.
11Ka nsɔna-ateb Ntaa abru ama yimɛ ka ɛsi ka mgbaŋa ɛbɔnom ka ɛkan ji ára awuru eyughanɛsan. 12Nden yi Sakariya ayiɛ, anig, mfom akubɛ. 13Ka nsɔna-ateb Ɛsɔwɔ atɔɛ: “Mfom ariakub, Sakariya; Ɛsɔwɔ amiyɔg njɔm ɛya. Ŋkaa ɛwa ji Ɛnisabɛt awɛnɛ mɔanom akɛa, ɔkɛɛ mbiŋ si Jɔn. 14Mɔ nyɔ akɛa ntakpa ɛyɛbɛ netem, ka abembem anɛ ayɛbɛ netem ka nɛwɛnɛ ni ɔwɛnɛ. 15Atubsi yɛ ajɔnɔ ntakpa nnɛ ka amɨra Ntaa. Awɔghɔm amɔm yaku si ɛjom jiku ji ɛneɛ abumu atubsi asono ka Nɛfɛb Ɛsɔwɔ jam ka nna nnyɛɛ. 16Áne abembem anɛ ba Isrɛn afɛ̀nɛ́ atɔŋɔ Ntaa Ɛsɔwɔ abɔɔ. 17Ka Jɔn agbɔghɔmba aba ka nɛfɛb ka nɛyɔ kanakan na ka Ɛnaija, ama kpeghe ba nsɛ ntem akɛɛ abɔɔ, si anem anɛba árɛ jɔn atama ka Ntaa kasɔŋ ájam nɛtere ka ɛtiŋi ɛsika átoŋo anɛ abri Ntaa.”
18Sakariya abɔmɔ nsɔna-ateb Ɛsɔwɔ si, “Nne naŋ mgbɛrɛ ɛdidɨghɛ ɛjom ji? Mmɛ mmi kon, ŋkaa ɛwɨŋa atɨma akon.”
19Ka nsɔna-ateb Ɛsɔwɔ akpɛɛ, “Mmɛ nde Gebrɛn yɔ ara yimi ka ɛsiamar Ɛsɔwɔ. Átom si mema ntɔa mfɨnɛ nkɛa nyɛbɛ ɛteb. 20Yɔŋo atɔŋ, jam ka nɛmaŋ ɔkpɨmɛma ɔrak ntɔrɔ tɛtɛ ɛjom ji ɛru, atubsi ɔrɛ tama ji ntɔa, ka ji ntɔa ɛruru ka nden yi Ɛsɔwɔ agara.”
21 Ŋga, anɛ ba ajɔnɔ ára bri Sakariya ára re ka nkater ji ɛsɛrɛ ka ami jɔn mba arab ka njoa njɔm. 22Nden yi aru, arɛ kpɛma arag ntɔrɔ ka abɔɔ. Fa yɔ agbɛrɛ si amiyɛ nɛbri amar ka njoa njɔm, atubsi ára rag ka abɔɔ ka abɔabɔɔ yi ami gbɔ ɛmum.
23Nden yi akɨnɛ ka nɛtom ɛnɛ ka njoa Ɛsɔwɔ, afɛnɛ akru ka ɛtighi ɛjɛ. 24Ka ma nden, ŋkawɛ ji Ɛnisabɛt ayibi, ka amɛɛ arɔn arɛru ka nina. 25Yɛ arag si, “Ntaa ami nem akɛm, ka afo nnya amimɛ maa afɨna ayighim nsɔn ka amar anɛ.”
Arag atub ɛsika awɛnɛ Jisɛs
26Ka ɛnumu amɛɛ asɨghasa ka ɛna Ɛnisabɛt, Ɛsɔwɔ atom nsɔn-ateb Gebrɛn amu ka Nasarɛt, ɛjibɛ ka Ganini, 27si amu ka mfoa ngɔŋanɛ yɔ akɨgha gbɛrɛ mannom ɛjɔnga si ami tama nɛbana Josɛf yɔ aru ɛbannab Defid. Ngɔŋanɛ nyɔ anɛ si Meri. 28Nsɔn ateb nyɔ amu ama kɔŋɛ, akaghɛ nnyɔ si “Yɛbɛ netem, wɔ yɔ nɛmaa ɛre ka na! Ntaa áre ka na.”
29Meri abɛnɛ ntakpa efegheayɔ ka ɛjom ji nsɔn ateb arɨgha ka ji nɛgana ɛkaghanyɔ ji ɛrú. 30Ka nsɔna-ateb Ɛsɔwɔ atɔɛ, “Mfom ariakub, Meri; Ɛsɔwɔ amia maa. 31Ɔyibi ɛna bi ɔwɛnɛ mmɔanom yɔ ɔkiɛ mbiŋ si Jisɛs. 32Ajɔnɔ ntakpa nnɛ yɔ abɨŋi si Mmɔa Agaga Nton. Ntaa Ɛsɔwɔ ákɛɛ ɛtono nsɛ, ji Defid, 33ka afɨne ɛbannab Jɛkɔb ka nkannkan; ɛton ɛbɛ nkanisi ɛbɛnɛm.”
34Meri abɔmɔ nsɔna-ateb Ɛsɔwɔ, “Ɛjɔnɔ naŋ atubsi ɛjɔnga si amɛɛ tub ɛjam akɛ nnɛ, nkɨgha kaa ka mannom?”
35Ka nsɔna-ateb Ɛsɔwɔ akpɛɛ si, “Ɛfɔfɔm Nɛfɛb Ɛsɔwɔ ɛbɨgha ɛtɔba, ka nɛyɔ Agaga Nton ɛbona. Ka mmɔ yɔ awɛnɛ anɛ abiŋɛ si Afɔfɔm Mmɔa Ɛsɔwɔ. 36Ɛnisabɛt ji nnɛ ɛbannab ɛja atɨma wɛn mmɔa nnom ka akon, yɛ yɔ akɨnokpo si áre ngum ami kɨbɛ anɔŋ ka amɛɛ asaghasa. 37Ka ntɔrɔ Ɛsɔwɔ yiku arem ya árɛjɔnɔ awɛmɛ.”
38Ka Meri arag si “Mmɛ nde mmɔa njoa Ntaa, nɔngɔ ɛjɔn ɛkɛm esika ɔragha.” Ka nsɔna-ateb Ɛsɔwɔ atam asighɛ.
Meri areb Ɛnisabɛt
39Ka ma nden Meri átoŋo bɛji atam frifri amu ka ɛjibɛ bɛgon ka ɛja Judiya, 40ama anam ka njoa Sakariya akak Ɛnisabɛt nnyɔ. 41Ɛsika Ɛnisabɛt ayɔghɔ nnyɔ Meri, mmɔ atam Ɛnisabet ka nna, ka Nɛfɛb Ɛsɔwɔ ɛsonɛ. 42Ɛnisabet abeŋe gbogbo: “Ɛsɔwɔ amia nara ka ɛbɔngɔ abakaa, afɨnɛ tɔŋɔ mmɔ wa yɔ ɔwɛnɛ nɛnɔbɔ! 43Erunang ka ɛfa nji ɛtɔŋɔm, yi nnyɛ Nton ɛwɨŋa abɨgha ama arɨbem? 44Ɛsika nyɔghɔ ɛkɨgha nnyɔ ba, mmɔ atɨmɛm ka nna ka ɛyɛbɛ netem. 45Nɛmaa ɛjɔn ɛkia yi ɔtama si ji Ntaa atɔa ɛwɛmɛ wɛmɛ.”
Ɛsɛɛ Meri
46Ka Meri arag si:
“Netem ɛnɨŋa eger Ntaa,
47netem ɛrɛyɛbɛm ka Ɛsɔwɔ yɔ áre nninagha ɛwɨŋa,
48yɔ agbɔm mmɛ mɔanjo ɛwɛ yɔ arɛsi jiku nter.
Jam ka nɛmaŋ sɔng ɛsi nɛnɛɛ ka ɛying kprɔb ka ba abɨgha ka ɛsi abiŋim si nde ka nɛnɔbɔ,
49atubsi Agaga Nton ami nem atakpa nsɔn ákɛm,
nɛfɔ ya áre mbiŋ ɛyɛ.
50Ɛkpɔghɔsi ɛjɛ ɛjɔnɔ ɛkɛɛ anɛ ba ára bɨghɛ, ka ɛyiŋ kpakpa ka ji ɛbɨghaba.
51Ami nem atakpa nsɔn ka nɛyɔ ɛnɛ;
akama anɛ ba ataba bɛji ka netem abɔɔ.
52Ami taba aton nɛyɔ áfina ayighi abɔɔ ka ɛton ára tab
anɛ ba asɛnɛ bɛji akɨno ka bɛsɔ.
53Amikɛ anɛ ba njan atɨŋa nsɔn
ka atom anɛ ba akpekpe amu abɔabɔ.
54Ami nagha mɔanjo ɛwɛ Isrɛn,
agbɔɔ ntera ɛkpɔghɔsi
55ji akɛ Ebragham ka abɔɔ́ ɛbɛ ka nɛwɛmɛ nɛwɛmɛ,
ɛsika atere atɔɔ ba nsɔjɨrɛ.”
56Meri ajɔnɔ ka Ɛnisabɛt nna wusi amɛɛ asaa ka akru ka ɛjibɛ ɛjɛ.
Ɛsika awɛnɛ Jɔn ji Nwura anab
57Nden ama si yi Ɛnisabɛt awɛnɛ mmɔ ɛwɛ, yɛ awɛn mɔa nnom. 58Anɛ ba nkɨnɛtik ɛbɛ ka abɔannyɛ ayɔg ka Nton amiɛ bri ɛkpɔghɔsi ketiŋi tiŋi, abɔɔ átɔɔŋɛ ayɛbɛ netem.
59Ka ɛnumu afo anaghanɛ aba si ama kɨbɛ mɔ ndor, atɨma agorɛ mbiŋa nsɛ ji Sakariya, 60ka nnyɛɛ atɔ abɔɔ si, “Na saŋ! Ba biŋɛ si Jɔn.”
61Ka anɛ afaŋɛ si, “Nnɛ yɔku arem ka ɛbɔŋɔ abɔannaja yɔ akpe mbiŋ yi fa.”
62Ka ára gara ka abɔ atɨŋɔ nsɛ mɔɔ si akɛɛ mbiŋ yi akɔrɛ si akɛɛ mɔ. 63Yɛ agara ka abɔ atɔ abɔɔ si akiɛ ɛkpaghante ji áyɛnɛ nsɔn kasɔŋ yɛ ayɛnɛ mbiŋa mɔɔ. Akpɛ yɛyɛ ami yɛnɛ si “Mbiŋ ɛyɛ anɛ si Jɔn.” Bɛji ɛkpɔ anɛ kpakpa. 64Fifa fifa, nnyɔ ɛbɛ ɛjibi, nɛnibi ɛnɛ ɛnagha, ajam ntɔrɔ nɛrɨgha ka akar Ɛsɔwɔ. 65Mfom akub anɛ ba Nkɨnɛtik kprɔb ka anɛba áre ka bɛgono Judiya asa ka nɛrɨgha atub nsɔn yi ɛwɛmɛ. 66Nnɛ yɔku yɔ ayɔghɔ ajɛna nsɔn nyi atere ka abɔmɔ “Nɛgana nnɛɛ yɔ mmɔ nnyɔ abɨgha ama jɔn?” Atubsi nɛyɔ Ntaa ɛre ka nɛ.
Ɛsɛɛ Sakariya
67Nsɛ ji Sakariya asono ka Nɛfɛb Ɛsɔwɔ ajam nɛrɨgha ji Ɛsɔwɔ ajibi atɔɛ:
68“Nɛkigha ɛjɔn ɛkɛ Ntaa, Ɛsɔwɔ Isrɛn,
atubsi amiba ama anagha anɛ ɛbɛ.
69Ámitom mkpakora Ninagha ka njoa Defid ji mɔanjo ɛwɛ yɔ anagha war
70ɛsika atɔɔ afɔfɔm asɔgba Ɛsɔwɔ ka nden nnyi si atɔ war
71Árɨgha si yɛ anagha war ka ɛbɔɔ anɛ ba ɛjing
ka anɛ ba ɛsagha abɔɔ.
72Atɔɔŋɔ ɛsika agbɔghamba ba nsɔjɨrɛ ba atɨŋɔ war ɛkpɔghɔsi ji afɔfɔm asɔgba Ɛsɔwɔ arɨgha si atɨŋɔ war.
Yɛ atɨma agbɔntera nsɔn yi atama si ane.
73Kasɔŋ agbɔghɔ nter anem ka nɛtama ɛnɛ ka nsɔjɨrɛ ji Ebragham:
74si anagha war ɛrɛ jɔn ka nɛyɔ anɛ ba ɛjiŋ ɛbrɛ,
kasɔŋ ɛma ɛnem nɛtom ɛnɛ ɛrɛ bɛ ɛkub
75ká nɛfɔ, nɛnɔŋɔ ajighi Ɛsɔwɔ ka nekpen ɛnɨrɛ.
76Ka wɔ, mmɔ ɛwuŋa, abiŋa si Ɛsɔgba Ɛsɔwɔ ji Agaga Nton,
atubsi wɔ ɔgbɔghɔmba ɔmu ɔmotoŋo ntem anɛ ka Ntaa aba,
77Ɔnem anɛ agbɛrɛ nɛnagha Ɛsɔwɔ
ni ɛtɨmɛ asig anɛ ka abibi afɛm,
78atubsi Ɛsɔwɔ ɛbrɛ akpe ntakpa ɛkpɔghɔsi,
yi ane nɛnagha ɛnɨrɛ ɛru ka bɛsɔ ya ɛtɨŋɔ anɛ
79ba áre ka nɛwɛmɛ ɛjiŋi
ka ba are ka nɛyɔ nɛku,
kasɔŋ abaaba war ka ɛta nɛjɛn ɛnɨrɛ ɛsika ɛjɔnɔ ka nɛnaa.”
80Jɔn arɨmɛ ka ɛkoro bɛji tɛtɛ abeŋe ka nefɛb Ɛsɔwɔ; ajɔn ka ɛmɛɛ mbaa arab ka aru ama jam nɛrɨgha ntɔrɔ Ɛsɔwɔ atɔ anɛ ba Isrɛn.
المحددات الحالية:
Nuk 1: NDD-011
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©️2024 Luke Initiative for Scripture Translation
