Génesis 32
32
Jacobpa tsai Esaú wubadi
1Jacob ma kaidu Diospa awẽ ángelwu aki dukudiwu. 2Jacobpa nawu uĩ iskadi: “Da Diospa awẽ tapas rawe. Naskake dudu awẽ ade Mahanaim iki”, wadi.
3Jacobpa tsai yuibiswu atu nichidi awẽ uchi Esaú bai awẽ ade Seír Edom aduke. 4Naskata duduri atu yuidi yuitanuwu: “Ewẽ diaiwu Esaú. ‘Mewẽ uibati Jacobpa duku nichia nu bia yuiyua na Labánwe itiadi’, ea waxutakawe. 5‘Naskatari vacawuya asnowuyari ovejawuyari. Dukuwedewu awẽ yudubiswu awĩwuri. Ewẽ diaiwũ da tsai ẽ bia wubai ea mi sharawanu’ ”, Jacobpa atu wadi.
6Tsai yuibiswu dasukaxu Jacob yuidiwu: “Esaúki ma nu dukutadi. Ma biki duku yui. Cuatrocientos dukuwedewuya ui”, wadiwu.
7Naa dikai Jacob ratekuidi. Naskatari shinachakadi. Naskaxu nawe ikawu yurawu xuku rawe atu wadi. Naskatari idawuri paxkanawadi. 8Duduri shinadi Esaú dukuxu xuku wetsa atu reteaiwawe atiriwi ichutanuwu raixu. 9Naskaxu Jacobpa kiwĩdi: “Diaiwu Dios ewẽ xuta Abrahampa awẽ Dios mi ewẽ epa Isaacnari ea mia yuidi ewẽ kaiwuuwe ewẽ bai adu ẽ dasunupukunu: ‘Ẽ bia sharawanupukui’, mia wadi. 10Ẽ mewẽ uibati. Ẽ awaba. Naskaweke mia ea sharawaitu ẽ tapiaba. Ede Jordán pukewuwãdi ẽ awaya kawadiba. Ẽ chati wistiya kawadi. Datiã ẽ yura xuku raweya. 11Ea kexewe ewẽ uchi Esaúpa ea reteyabanu. Ẽ ratei duku retei weaiwawe. Awĩwu retekata wakewuri retei wekadi. 12Mia ea yuikuidi: ‘Ẽ bia sharawanupukui’, mia wadi. Naskatari ea mia yuidi: ‘Mewẽ kaiwuu uduax ichapanawã kaĩpakedakawu na enewane bishputii ipaxanu’, ea mia wadi tsuã tanatiruba”, Jacobpa Dios wadi.
13Naskata nadu uxadi. Naduxu yuina idawu katupakedi awẽ uchi Esaú inaxikĩ. 14Doscientas cabras awĩwu veinte cabra wedewu doscientas oveja awĩwu veinte oveja wedewu 15treinta camellas wakewuya cuarenta vaca awĩwu diez vaca wedewu veinte asno awĩwu diez asno wedewu. Nawu katudi.
16Naskata awẽ yudubiswu atu inadi adu wisti wuyabanuwu. Naskata atu yuidi: “Reke wukaxu adu wisti ma ichanakiki”, atu wadi.
17Na rewu nichiyai yuidi: “Ewẽ uchi Esaú biki dukuxu bia ñukayaitu: ‘Watu mewẽ diaiwume. Waki mi kaime. Da yuinawu tsuaname’, bia waitu duduri yuitawe: 18‘Nawu mewena mewẽ extu Jacobpa bia inai. Ẽ yuduxubis. Mewẽ uibati chipu ui’, watawe”.
19Xuku wisti yuikĩ taewadi. Chipu xuku raweri yuidi. Na yuina iyuwaiwu atu yuidi: “Esaúki dukukaxu na tsai wisti ma yuitiru: 20‘Mewẽ yudubis Jacob duku kachiuri ui’, watakawe”. “Na iki sidayai naa ẽ inauxũ iki raenu”, raixu Jacobpa shinadi. 21Naskata awẽ awarawu udiwetsa wubadi. Nadu uxashidi awẽ tapas adu.
Jacobwe ángel beenadiwu
22Naa yabeta widinakawata Jacobpa awẽ awĩ rawe, awẽ yudubis awĩwu raweri, awẽ wakewu once nawu ede awẽ ade Jaboc ukiri atu pukebadi. 23Naskata ma ukiri pukekata atũ awarawuya. 24Nadu ares wisti netedi naa yabe chai dukuwedewe beenashiyaiwudu pedadi. 25Kupiyabatiruxakĩ chipaki Jacob kushadu awẽ chipa xau xuxatadi. Naa kushadu paedi Jacobpa edenu. 26Ángelpa iskawadi: “Ea edewe ma pedaki”, wadi. Naskaweke: “Mia tsai shara inayabaitu ẽ bia edeiba”, Jacobpa wadi.
27Ángelpa Jacob awẽ ade ñukadi: “Mewẽ ade awame”, wadi. Jacobpa yuidi: “Ewẽ ade Jacob”, wadi.
28Naskata ángelpa yuidi: “Ana mewẽ ade Jacob ikiba. Mewẽ ade Israel iki. Dioswe mi beena. Dukuwedewuwe mi beena. Mi kupitibawaa. Naskake mi Israel iki”, ángelpa wadi.
29Jacobpa awẽ ade ñukadi: “Mewẽ aderi ea yuiwe”, Jacobpa wadi. Ángelpa Jacob kebadi: “Aweskakĩ ewẽ ade mi ñukakabeime”. Naskata ángelpa tsai shara yuidi. 30Naskake Jacobpa nadu adedi awẽ ade Penuel, wadi. “Duduax ma ẽ Dioswe uĩnana ẽ dayuaba”, Jacob idi.
31Ma wari uwaidu Penuel aduax Jacob kadi awẽ kateki paeyana. 32Naskake israeliwawe chipa pudu dabi pipaudiwuba. Iskaratiãri pitiruwuba Jacobpa awẽ chipa adu ángelpa kushadike.
المحددات الحالية:
Génesis 32: mtsB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
