Mʉkpanganɨa 3
3
Ɨkɔɔ yɔ ɓombi nɔ Asɔɓɨɨ yɔɓundio
1Ati ɔ ɓ anama ɓɔ iju ngʉɓa Asɔɓɨɨ MAKWƆƁƗƗ a꞉ɓʉkɨa jɛnɛ, sɨɨ a꞉ɓio nama ɔ mʉjɛɛ nɔgbɛ, naɓɔ akɔnagaaka ta ɓaɓomu. Ga sɨɨ nɔ moi ɓɔ: «Asɔɓɨɨ a꞉sugo ndɨ ta ingono ɓɔ, nátɨdyenimʉ ipumo pɔ mɛngana yɔ matɨ maɓomu, ngʉka amati ɔ kʉbaa aka?»
2Moi ɔ꞉mutosio ɓɔ: «Lipumo lɔ matɨ ngʉka akʉbaa aka, takyɔlɨdya dyanɨ. 3Yakamɛngana, pɛpɛ akɔ ipumo yɔ ɓʉtɨ nga ɓa ati ɔ kʉbaa ɓɛ, Asɔɓɨɨ a꞉tɨsigio ga, tatɨɨdyamʉ, nɔ, tatɨɨpotomʉ kʉɓanɨ, dɔ, tɔkɨeni ɓanɨ, ambɔ ingwo nga yeso tɨa ɨyɛnɛnɨ.» 4Ga sɨɨ nɔ moi ɓɔ: «Haa, ná꞊ngɔwomʉ pɔ bele. 5Yakamɛngana, Asɔɓɨɨ anɨmbɨa iɗo ɓɔ, ɓisi ngʉɓa na꞊ɨdya-ɔɔ, mesu ngʉkeno ka꞊gananɨa gananɨanɨ, nɔ, nɔ꞊pʉnga ɓio tɨa kʉndʉ ɨyɔ, anɨmbɨa ɓuɗo nɔ ɓʉɓɨɓɨ.»
6Moi ɛ꞉na ɓɔ ipumo yanɨnɨa iɗo akɔ mesu, nɔ, ya kʉ tɨpɨ anɨdya. Nɔ, yakwanana ɓata kʉ agana mombi nɨmbɨmbɨanaka ngɨangɔ, tɨa ɨja nɔgbɛ. Kʉdɔ, ɔ꞉ɨsɨka, nɔ, ɔ꞉ɨdya. Nɔ, ɔ꞉tɔinjo tɨa kʉ nɔ swaɨ ngɨa ɓa꞉ɓio nayɔ, nɔ ɨyɔ, ɔ꞉tɔɨdya kʉ dyanɨ. 7Ta ndʉ aka nasugo-ɔɔ aka, mesu ngʉkeɓo ɓaɓomu ɓapɨnɨ, kɔ꞉gananɨa. Kʉdɔ, ɓɛ꞉mbɨa ɓɔ ɓa꞉ɓio munduu munduu. Ɓɔ꞉feyokio madada ndʉ makwɛmbɛ, nɔ manɨ kɔ ɓʉtɨ mʉngana ngʉɓa ino ɓɔ mʉtɨnɨ#3:7 mʉtɨnɨ: pɔ ɓɔ nɔ ɨbʉla.
8Ta nɛpasɨ ngɨyɛnɛnɨ, ɓɔ꞉tɔka tɨa Asɔɓɨɨ MAKWƆƁƗƗ akɔkyɛndanaka inani amati ɔ kʉbaa, ngbinga ngɨa mahuo kɔta dɨ kachana-ɔɔ. Ga mombi ɨɓɔ nɔ moi angɔ ɓɔ njʉta njʉta njʉta, ga gbʉkʉ gbʉkʉ ɛsɨ ɔ matɨ, ananɨ akʉbaa. Ɨɓɔ, akumo ɓɔ Asɔɓɨɨ MAKWƆƁƗƗ atɨɓɨnamʉ. 9Asɔɓɨɨ MAKWƆƁƗƗ e꞉soko mombi nɔ ɔ꞉muɓokuo ɓɔ: «Ha gue, wa gbanɨ?» 10Mombi ɔ꞉tosio ɓɔ: «Ndʉ nɔ꞉kɔ iso ngɨyɛsɔɔ amati ɔ kʉbaa, nɔ꞉kwa tɨa ʉɓá, dɔ, na munduu. Kʉdɔ, nɛ꞉kɔ tɨa anʉɓa.» 11Ga Asɔɓɨɨ ɓɔ: «Anɨ dɔ-sɨ akɛ ɔ꞉naɓɨɔ pɛngɛ ɓɔ wa munduu? Wɔ꞉kɔdyɔmʉ pɛngɛ dɔ ɓʉnʉ ipumo ngɨyɛ na꞉nagbɛmɨa pɔngɔ ɓɔ watɨdyamʉ?» 12Mombi ɔ꞉mutosio ɓɔ: «Sɔkɔmʉ dɔ ta moi ngɨa wa꞉nenjo akɛ, ɔ꞉nenjo ipumo ngɨyɛnɛnɨ, kʉdɔ, nɔ꞉ɨdyɔ pɛngɛ ɨmɨ tɨa kʉ nɨdya.» 13Ga Asɔɓɨɨ MAKWƆƁƗƗ nɔ moi ɓɔ: «Wɔ꞉kɨɔ pɛngɛ-sɨ ɓanɨ dɔtanɨ?» Moi ɔ꞉mutosio ɓɔ: «Sɨɨ akɛ ɔ꞉napɛtɔ, kʉdɔ, nɔ꞉ɨdyɔ ipumo ngɨyɛnɛnɨ.»
14Asɔɓɨɨ MAKWƆƁƗƗ ɔ꞉musigio sɨɨ ɓɔ:
«Dɔ ʉwɛ, wɔ꞉kɨɔ ɓanɨ, wɔmanɔ asɨka mʉgwɛ
ati ɔ ɓanama ɓaɓomu ngʉɓɔ ndei, nɔ ʉɓɔ iju.
Ʉwɛ, wa꞊ɓio aɗuɗuono tɨta nɔ ɓʉa,
nɔ, wɔ꞊dya tɨa kʉ iɓungu amati uɓei ngʉwɔsɔɔ uɓomu.
15Na꞊kumoniso ɓʉyaa ati eno nɔ moi,
nɔ ati ɔ ɨfananja ngɨyɛsɔɔ, nɔ ɨyangɔ. Nɔ lɨfananja ɗepini ngɨlɛnɛnɨ, la꞊natana aɓio tɨta ɓamʉyaa.
Ɨyɔ, a꞊napoiso sina mʉtʉ ɓɔ pɔ,
nɔ ʉwɛ, wɔ꞊tɔmʉkwaka tɨa kʉ aitindi ga kpe.»
16Ɔ꞉sigio ɓata moi ɓɔ:
«Nɔmanɔ anɨsɨnganiso ɓʉkaɨ ɓɔ ʉnɔtʉ ngʉwɔsɔɔ, nɔpɛɨ.
Akɔnɔta mwana, ya꞊ɓio ɓʉkaɓʉkaɨ.
Mʉsasa ngʉwɔsɔɔ wa꞊ɓio ta akʉʉ ɔ aɓaʉ.
Nɔ ɨyɔ aɓaʉ, a꞊ɓio nɔ ʉpanʉ akʉʉ asɔɔ.»
17Ga ɨyɔ nɔ mombi ɓɔ: «Dɔ ʉwɛ, wɔ꞉kɔ pɛngɛ yaka ngɨyɛ moi asɔɔ, nɔ, wɔ꞉dya ipumo ngɨyɛ na꞉nagbɛmɨa pɔngɔ ɓɔ wa꞊tɨɨdyamʉ ta sɨɨ sɨɨ,
ɨtaka yɔmanɔ asɨka mʉgwɛ akʉʉ asɔɔ.
Amati ɔ uɓei ngʉwɔsɔɔ uɓomu,
wa꞊ɓinɨanɨa suo nɔ idyo akɔ ɨtaka, tɨta ɨngbaa akɔ ɓʉkaɓʉkaɨ.
18Ɨtaka yɔmanɔ nɔwɛ aɓaisio maɓʉ nɔ mikpakiki,
nɔ idyo ngɨyɛsɔɔ, ya꞊ɓio suo tɨta lɨgbɛɨ ngɨlɛ laɓaa akɔ ɨtaka.
19Pɛɨ ʉwɛ anɨdya idyo, waɓichwɛiso suo ta ʉhʉ,
akɔɓɔya ta aka, wa꞊tɔwa-ɔɔ akɔ ɨtaka, kʉ aki na꞉nasɨka-ɛɛ.
Dɔ ʉwɛ ingainga, wa iɓungu, nɔ, wa꞊tɔwa kʉ inani akɔ iɓungu.»
20Mombi ngɨa a꞉ɓio ino ɓɔ Adamʉ,#3:20 Adamʉ: pɔ ɓɔ nɔ Ebelenia yanʉkanɨa tinetine ndʉ «mombi» a꞉tɔmʉsʉa moi angɔ ino tɨa ɓɔ Ɛva#3:20 Ɛva: pɔ ɓɔ nɔ Ebelenia yanʉkanɨa tinetine ndʉ «uɓei, mʉhɛyɛ», dɔ, ɨyɔ akɛ, a inye ɔ ɓombi ɓaɓomu ngʉɓɔ dɔdɔ. 21Asɔɓɨɨ MAKWƆƁƗƗ ɔ꞉tɔɓʉkɨa atɨ mombi ɨɓɔ nɔ moi angɔ lɨpʉkʉ nɔ mamba kɔ ɓanama, kʉdɔ, ɔ꞉ɓʉpeniso ɨlɔ.
22Ga Asɔɓɨɨ MAKWƆƁƗƗ ɓɔ: «Ineni mombi ɨya ɛkɔ tɨa kʉndʉ mʉngana ati eso, anɨmbɨa ɓuɗo nɔ ɓʉɓɨɓɨ. Ɨtakɨtakɨ ngɨyɛ, tɨmʉnangyeni tɨa nangyoni, iɗo ambɔ atɨkwamʉ lɨkɔndɔ akɔ ipumo yɔ ɓʉtɨ ngʉɓɔ ɓʉhɛa, nɔ ɔ꞉ɨdya. Dɔ, ɔ꞉ɨdyeni, a꞊ɓio sina auɓei tɨta mago nɔ mago.» 23Kʉdɔ, Asɔɓɨɨ MAKWƆƁƗƗ ɔ꞉mukponyo akʉbaa ɔ Ɛdɛnɨ, ɓɔ dɔ ɨsa anɨmakanaka ɓakʉbaa tɨa kʉ aɨtaka ngɨyɛ aki, Asɔɓɨɨ a꞉mʉsɨka-ɛɛ. 24Ambise ngɨa Asɔɓɨɨ a꞉kponyo-ɔɔ mombi, ɔ꞉tɔnapɨa tɨa makɛlʉbɨ#3:24 makɛlʉbɨ: pɔ ɓɔ ɓamalaika ngʉɓa ɓapɛmakɨa ɓɔngɔ, amutii wɔ kʉbaa ɔ Ɛdɛnɨ, nɔ ʉgbaa mesu aki ɨpá yachʉchwaka-ɛɛ. Makɛlʉbɨ ngʉɓɔnanɨ, ɓakɔnatananakiso mbɔtɨa ɔ magou kɔ dyaa ɓɔ pɛɨ pɛɨ, akɔɓeyoko ɨngbaa ngɨyɛ yanɨsa aki ɓʉtɨ ɓɔ ɓʉhɛa ɓa-ɛɛ.
المحددات الحالية:
Mʉkpanganɨa 3: buuN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2021, Wycliffe Bible Translators, Inc.
