الإنجيل زي ما كتبه مَتَّى 18
18
الأعظم في ملكوت السماوات
1و في هداك الوقت، جو التلاميد ليسوع يسألوه: «منهو أعظم واحد في ملكوت السماوات؟» 2و قام عيط على طفل و وقفه في الوسَط، 3و قال ليهم: «بأمانة أقول ليكم إدا ما صرتوا زي الأطفال، ما عمركم بتدخلوا ملكوت السماوات. 4و إلا يتواضع و يصير زي هدا الطفّل، هوأعظم واحد في ملكوت السماوات. 5و إلا يرحب بإِسمي طفل زي هدا، فيكون كأنه يرحب فيي.
مسببين العَثرات
6و إلا يكون عثرة لواحد من الأطفال إلا آمنوا بي، أحسن له ينربط في رقبته حجر الرّحى (حجر كبير مستخدم لطحن القمح) و يغرق في قاع البحر. 7الويل للعالم من العَثرات! العَثرات لابد أنها تجي، و لكن الويل للي تجي العَثرات على إيده! 8و إدا كانت إيدك أو رجولك فخ إلك، أقطعها وأرميها بعيد عنك: أحسن لك تعيش هالحياة وإيدك أو رجولك مقطوعة، من أنك تنرمى في النار الأبدية. 9و إدا كانت عيونك فخ إلك، أقلعها وأرميها بعيد عنك: أحسن لك أن تجي إلى الدنيا وعيونك مقلوعة، من أنك تنرمى في نار جهنم وفيك عواينك الثنتين. 10أحدروا أنكم تحتقروا أحد من هدولا الجهال الصغار! لأني أقول ليكم: إن ملائكتهم في السما يطالعوا في وجه أبويي إلا في السماوات.
زي الخروف الضايع
11لأن إبن الإنسان جا حق ينجي الهالكين. 12وش رايكن في هالقصة؟ لو كان في واحد كان عنده مية خروف، و ضاع منهم واحد: مو بيترك التسعة و تسعين خروف في الجبال، وبروح يدوّر عن الخروف الضايع؟ 13بأمانة أقول ليكم: إنه إدا شافه، بيفرح به أكثر من فرحته بالتسعة و تسعين إلا ما ضاعوا! 14ونفس الشي - أبوكم في السماوات ما يمبى واحد من هدولا الصغار يهلكوا.
إدا غلط عليك أخوك
15إدا غلط عليك أخوك، روح عاتبه بينك وبينه بروحكم. و إدا سمع لك، بتكون ربحت أخوك. 16و إدا ما سمع لك، خد وياك أخو ثاني أو إخوه أثنين، عشان يثبت كل أمر بشهادة شاهدين أو ثلاثة. 17و إدا ما سمع ليهم، فاعرضّ الأمر على الكنيسة. و إدا ما سمع للكنيسة بعد، خل يكون عندك زي الوثني و إلا يشتغل في مكتب الضرايب. 18بأمانة أقول ليكم: إن كل شي تربطوه على الأرض بيكون أنربط فوق في السما، و كل شي تحلوه على الأرض بيكون أنحل فوق في السما. 19و بعد بأقول ليكم: إدا أتفق أثنين منكم على الأرض على أمر معيّن، بَغَض النظر وش هو الامر، فهالشي بيصير من عند أبويي إلا في السماوات. 20و إدا أجتمع أثنين أو ثلاثة بإِسمي، فأنا بكون في وسطهم».
زي العبد إلا ما أنرحم
21و بعدين جا له بطرس و سأله: «يا رب، كم مرة يغلط عليي أخويي وأغفر له؟ سبع مرّات؟» 22و رد عليه يسوع و قال: «لا مو سبع مرّات بس، و ادا قلت لك سبعين في سبع مرّات! 23عشان چدي، ملكوت السماوات أشبه ما يكون بملك يمبى يحاسب عبيده. 24و لما بدأ يحاسبهم، جابوا له واحد مديون بعشرة آلاف وزنة دهب. 25ولأنه ما كان عنده إلا يقدر يوفي به دينه، أمر سيده أن ينباع هو و مرته و أولاده و كل ما يملك حق يوفي الدين. 26لكن العبد خر قدّامه ساجد و قال له: أمهلني حق أوفي لك الدين كله. 27فإنّكسر خاطر السيّد على العبد، و خلاهم يتركوه في حاله، وسامحه على الدين.
28و لما طلع داك العبد، راح لواحد من أصحابه العبيد إلا كان مديون له بمئة دينار. و قام سحبه من ثوبه و قال له: رجّع ليي إلا عليك! 29و ركع صاحبه العبد قدّامه و قام يتوسل له: أصبر عليّ شوي و بوّفي لك دينك! 30ولا رضى، و قام رماه في السجن إلين يدفع المَبلغ إلا عليه. 31و لما شافوا أصحابه العبيد إلا صار،تضايقوا واجد، وراحوا قالوا لسيدهم بإلا صار. 32و ناداه سيده و قال له: يا العبد الشرير، أنا الحين سامحتك على كل داك الدين إلا عليك لأنك توسلت ليي. 33مو المفروض إنك ترحم صاحبك العبد زي ما أنا رحمتك له؟ 34و هو معصّب عليه، أمر الجلادين أنهم يعدبوه لغايّة ما يوفي الدين إلا عليه. 35و چدي بسوّي فيكم أبوكم السماوي، إدا كل واحد فيكم ما سامح أخوه من كل قلبه!»
المحددات الحالية:
الإنجيل زي ما كتبه مَتَّى 18: QNAV
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Qatifi New Arabic Version © 2024 Strategic Resource Group
