APOEM AYANG: 34
34
Dina Rue" zi Shau" Khyoo:
1Danyid" da" bidnyid moo Yaku yo' Lea tang: da" nya: zoo: myiyi: nu" Dina gi Khanan myiyi: yi jhang khyoo: lam" yhe:. 2Hau: uri hau: moug: ri vhoeb da" Hivi byu Hamora da" nya: zoo: Shekhem gi Dina ri myang wigi lhoem: rue" pyam. 3Nghoid loug myiyi: nu" gi gye" yung" yoomo nyang: hau: myiyi: nu" ri jha" yu" jheddab wigi jhed kang: dang: jha" sang: bye:. 4Nyang: nya: phoo ri «Dina ri nga" yhoem: seing: myhi' khyo" nga" phoo nang mho' byid: we'» ga: wigi tid.
5Yaku gi nya: zoo: Dina hougsu" sho' phu" khyoo: ri shau" gyo: nghoid loug- nya: zoo: yigi dain" khyoo: gougnyhoug joem yo' nyid nyid yoomo nya: zooshang: tang: yi doem tau" ju" loo sho' sam: zoo: nyid nyid. 6Shekhem da" nya: phoo Hamora gi Yaku yo' byen phyoo" sham: goo" wa shid re" re" lo. 7Hau: uri Yaku da" zooshang: tang: yigi dain" mo ju" lo nyid boem. Nyangnu" hau: khyoo: shoug" gyoo: lang" Shekhem gi houg: yhang: ti" koid lho: Dina ri shu" yhoeb pyam byid: khyo" wigi Israela damyu" goin" ri rue" bye: ga: nain" sho' nyang: nheig khoo" yo: boem bye:. 8Hamora gi «Nga" zoo: Shekhem gi re" zoo: Dina yo' jhed kang: go" nyid bye:. Jeju" mo lo, xo' yu nhang: goo" la. 9Re" byumyu" yo' nga" byumyu" gyoo: moo myiyu myibyid: khyoo: koid wa da" myid veing" khyoo: koid too" boem shang. 10Houg: lang" nanu" gi ngoonu" yo' dage" he: ngoonu" moug: moo yo" nyid boem wa. Nyid nau jang" moo nyid phaga: ga: lho: seing: yu boem ge'» ga: wigi Yaku ri re" tid.
11Hau: thang: Shekhem gi Dina da" nya: phoo yo' nya: nhung" yiri «Ngoo ri gyoo: byid: goo" la- houg: lho: nanu" vho: ziri ngoo byid: wa. 12Nanu" vho: da" jhungshug sang: ge'. Phoug" we' nanu" khamyhoo' vho: ri khamyhoo' byid: wa. Nanu" Dina ngoo ri byid: nghoid rigi nanu" mho' zi dangain" ri ngoo byid: wa» ga: tid.
13Shekhem gi nyangnu" da" nhammoo" Dina ri sho' phu" nhang: too" bye: yoomo Yaku da" nya: zoo: yigi Shekhem yo' Hamora phatang: ri phajhi" khyau" lho: dang: phyed byid: kaid boem. 14Nya: tang: yi nyang: ri «Shooyid thang: ayham" da" yuggi hang" yo' nghoid loug- ngoonu" nhammoo" ri ayo" byid. Shooyid thang: ayham" khyoo: gi ngoonu" shid re" ngi: yoem" khyoo: nghoid. 15Nanu" da" yuggi yi dangain" bang: shooyid thang: yham" khyo" ngoonu" yhang: ti" koid boem nghoid ri kyeing" za: ngoonu" yo" myid byid: wa nghoid. 16Houg: lang" ngoonu" myibyid: myiyu koid wa. Ngoonu" gi nanu" da" gyoo: moo nyid lho: nanu" yo' byu damyu" za: khyo" nyid nyid wa. 17Nghoid loug- dang: we' agyoo:- shooyid thang: we' ayham" boem rigi ngoonu" gi Dina ri shu" yu lho: loo" wa bye:» ga: tid boem.
18He: dang: gi Hamora yo' nya: zoo: Shekhem shid re" gyoo: noug tung" nghoid 19wigi zooyam phoo gi tid ziyo' dakhyoo" ti" myab myab koid noug bye:. Khasu" wim ga: ri Yaku da" nya: zoo: ri gye" vhoo: bye: yoomo nghoid. Nyang: gi nyangnu" yhoem: byu yi da" yhouggyen: thang su: nghoid.
20Hamora yo' nya: zoo: Shekhem gi voomoo" khoem" duang: mo zoebphung: loeb do, khyoo: yhe: lho: nyangnu" voobyu yiri 21«Hid: bang: gi nyhang" yo' bain bain si' goo" bye:. Nyangnu" ri he: moug: moo nyhang" yo' dage" nyid nhang: lho: nau khyo" so" yhi: so" loo koid nhang: shang. Nyangnu" shid re" mougmyid gi jo, ashi". Nyhang" we' nyangnu" jang" mo myiyi: yu shang- nyangnu" ri we' myiyi: byid: shang. 22Nghoid loug hid: bang: gi nyangnu" shooyid thang: yham" ti" yuggi yi nyhang" dangain" shooyid thang: yham" nghoid ri khyeing" za: nyha" agyoo: moo nyid lho: nyhang" yo' damyu" za: khyo" nyid noug boem wa nghoid. 23Nyangnu" da" gougnyhoug dangain" yo' yoo" mooyoo" dangain" nyha" zi nghoid wa anghoid rhe". Houg: yoomo nyangnu" nyha" jhang yo" nyid sho' nyhang" myid veing" byid: boem shang» ga: tid. 24Meing: byu yi dangain" gi Hamora yo' Shekhem sham: lo ziri bo myid veing" boem lho: yuggi dangain" bang: shooyid thang: yham" boem bye:.
25Soem" nyid" lid lo thang: ri yuggi yi dangain" shooyid thang: yham" wigi dam no nyid uri Dina da" nya: mang:- Yaku da" zooshang: tang: Simun yo' Levi gi sham: yu ci: lho: voomoo" khoug: khyoo: zheig za: yhe: lho: yuggi yi dangain" ri yhe: said pyam. 26Hamora yo' nya: zoo: Shekhem phatang: ri we' bo said pyam bye:. Hau: thang: nya: nhammoo" Dina ri Shekhem da" yhoem: mo shu" yu lho: loo bye:. 27Byu said moo" bain zei: thang: ri Yaku da" zooshang: yi goo" bang: gi nya: tang: yi da" nhammoo" ri sho' phu" nhang: yoomo voo khoug: khyoo: vang yhe: lho: jonu" lhoid wigi latoo: yhe: phug boem ago". 28Nyangnu" gi coid kyung- yang kyung- nu: kyung- myang: kyung yo' voomoo" khoug: moo yo' dain" pa: cang mo jo, moojo,- nyid moonyid dangain" ri lhoid yu pyam boem. 29Nyangnu" gi phoug" dab ja: ri we' myiyi: yi yo' zooshang: yiri we' pyoung" lo lho: yhoem: khoug: mo jo, moojo, ri we' phyo' yu pyam byid: boem ago".
30Yaku gi Simun yo' Levi tang: ri «Re" tang: gi nga" jang" moo yau: khe" khyoo: ci: lo boem ago". Akhid" gi Khanan byumyu" yi Perizi byumyu" yi yo' he: moug: moo nyid mo, dangain" bang: ngoo ri ngheing" boem wam bye:. Ngoo gi byu myoo" sho' we' ayoo". Nyangnu" dangain" yoem: shoin" lho: ngoo ri thougtheung gyi zain: lo nghoid rigi nyha" yhoem: byu dangain" said pyam zi shoug" wa bye:» ga: tid. 31Nghoid loug nyangnu" gi «Ngoonu" nhammoo" ri shava myhi' ri ti" koid byid: ziri ngoonu" ayo" kham» ga: doem tid boem.
المحددات الحالية:
APOEM AYANG: 34: LCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lacid Bible © Bible Society of Myanmar, 2009.
