APOEM AYANG: 14
14
Abram gi Lod ri Yhe: Khyoid yu Khyoo:
1Babelon khokham Amraphela- Elasa khokham Arioa- Elam khokham Khedalaoma yo' Goiim khokham Thidala bang: khokham myid: yug gi 2Gootu: khokham wim: yug nghoid da" Sodom khokham Bera, Gomora khokham Birsha- Adama khokham Shinab- Zeboim khokham Shemeba- yo' (Zora ga: da") Bela khokham bang: ri meing: yhe: zain: boem ago". 3He: da" khokham wim: yug gi yoem: shoin" gyiphung: koid lho Sidim pa: dam khoug: moo yoem: zheing" boem. Hau: khyi' gi akhid" xoo" thoem" bue" jo, da" joyoo nghoid. 4Nyangnu" gi khokham Khedalaoma da" lo, khoug: moo 12 zain nyang: loung" nyid boem nghoid loug daxe: soem" zain zain moo gi nyang: ri tu: lhoin" thougtheung boem. 5Daxi: myid: zain zain moo: Khedalaoma yo' nya: yoem: shoin" gyi phung joem gi re" lho: Astherod Kernaim moo Rephim byu yiri Ham moo Zuzim byu yiri Kiriathaim dain" moo Emim byu yiri oung: pyam wigi 6Edom boem cang mo Hori byu yiri we' Elaparam yooyang" khoug: khyoo: ju" sho' nyangnu" ri cang khaid boem. 7Hau: thang: nyangnu" gi doem tau" lo lho: Kadesha (Hau: ayo, moo Enmishpat ga: myeing fu" jang:) khyo: ju" lo boem. Nyangnu" gi Amaleg meing: goin" yo' Hazazon Tama mo Amori byu yiri we' zain: oung: pyam bye:.
8Hau: thang: Sodom khokham- Gomora khokham- Adama khokham- Zabim khokham yo' Bela khokham bang: gi nyangnu" da" gyi yoem: ri Sidim pa: dam khoug: moo zheing" yu lho: 9Elam khokham- Goiim khokham- Babelon khokham yo' Elasa khokham bang: ri lhoem: zain: boem ago". khokham wim yug yo' myid: yug gi meing: zain: go" nyid boem. 10Pa: dam khoug: moo zhoonhi" thoem" koem: koem: byeung" jo, wigi Sodom khokham yo' Gomora khokham tang: gi gyi khaid meing: zain: jang: mo phang: uri zhoo" nhi" duang: moo byid gyo" boem ago". Nghoid loug we' gootu: khokham soem" yug bang: gi boem joem khyoo: phang: tang" byug boem. 11Khokham myid yug bang: gi Sodom yo' Gomora mo zoo: noem jo, moo jo, jonu" dangain" ri shoem" ci: phang: lo" boem ago". 12Abram da" zoonhung" Lod gi Sodom voo moo nyid nyid houg: yoomo nyangnu" gi nyang: ri we' shu" ci: lho: nya: da" yoo" mooyoo" dangain" ri we' pyoung" loo" byid: bye:.
13Nghoid loug we' byu dayug phang: byoin lo lho: hau: khyoo: dangain" Hebre byu Abram ri lo" tid kyo". Abram gi Amori byu Mamre seing: da" gyeung" shang: seiggam joem nam moo nyid nyid. Manre yo' nya: mang: tang: Eshkhola tang: Anera bang: gi Abram da" yoem: shoin" phung: bang: nghoid boem. 14Abram gi nya: zoonhung" myheig shu" loo" shoug" ziri shoug" gyoo: lang" nyang: gi nya: gyizoo: dangain" 318 yug ri shu" ci: lho: khokham myid: yug phung: bang: ri Dan moo ju" sho' cang khaid. 15Houg moo: nyang: gi nya: byu yiri byu phung: kho' lho: gyivoo yiri damyen goin" zain: lho: nyangnu" ri oung: pyam. Nyang: gi nyangnu" ri Damasku da" mougzhung: shoid mo Hoba voo moo ju" sho' cang khaid lho: 16soem" loo" khare" da" jonu" dangain" ri doem yo" yu bye:. Nyang: gi nya: zoonhung" Lod yo' nya: jonu" dangain" yo' dage" myiyi: joem thung: byu joem ri we' doem yhe: shu" tau" loo bye:.
Melkhizedeg gi Abram ri Mainkaid Byid: Khyoo:
17Abram gi Khedalaoma yo' gootu: khokham yiri oung: pyam lho: doem tau" lo uri Sodom mo khokham gi (khokham pa: dam khoug: we' ga da") Shave pa: dam moo Abram ri shoug" wa shid re" thu re" lo. 18#Heb 7:1-10.Houg: lho: Salem khokham we' myhang: thang Mangsoo Khainjung moo" dayug nghoid da" Melkhizedeg gi zoo: noem yo' zabyid yhid: ri Abram jhang ci: ri" byid: wigi 19Main kaid byid: lho: «Moug: khoug: yo' myidjang ri phain" so: too" su: myhang: thang Mangsoo gi Abram ri mainkaid byid: baja". 20Re" da" gyivoo joem tho' nang ri oung: doid khyoo: byid: da" myhang: thang Mangsoo gi coung" byid: shoug" baja"» ga: tid. Houg: lho: Abram gi gyivoo joem yu lo" jang" mo doem yhe: shoug" yu lo da" jonu" dangain" da" daxi: boem mo daboem Melkhizedeg ri byid: bye:.
21Sodom khokham gi Abram ri «Jonu" ziyoo joem yu too" we'. Nghoid loug nga" byu yi dangain" rigi ngoo ri doem tau" byid: we'» ga: lhoem: tid. 22Abram gi «Ngoo gi mougkhung: yo' myidjang ri phain" so: da" myhang: thang Mangsoo Aseing shidkhoin" moo dang: theing too" bye:. 23Ngoo gi re" da" zi ci: we' yu wa zi anghoid re" khyid: baid tei" yo' re" nghab gyoug: dakhaid ri lhang" yu wa zi anghoid. ‹Ngoo gi Abram ri yo" di loo nhang: su: nghoid› ga: wigi thang: ri nang khanham we' ayo" tid wa. 24Ngoo gi nga" shid re" ci: we' ayu wa. Nga" byu yi ci: yhung: pyam gu: gi nghoid wa bye:. Nghoid loug nga" yoem: shoin" bidnoem Anera- Eshkhola yo' Mamre bang: gi nyangnu" yoo" eung: da" gamboem ri yu goo" baja"» ga: tid.
المحددات الحالية:
APOEM AYANG: 14: LCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lacid Bible © Bible Society of Myanmar, 2009.
