APOEM AYANG: 11
11
Babelon Pyuzung
1Xang: shi" ri moug: gyab goin" moo myeing" daja: za: kaid lho: dang: daja: kyeing" jo, boem. 2Nyangnu" gi bidthu shoid khyoo: nyid yhe: lo" boem ri Babelon jang: dam dakhyi' moo ju" lho: nyid nyid boem ago". 3Nyangnu" nyang: cang" tid sham: go" boem zigi «Ri" ge'- zhoothung" baid lho: thain: sho' phoid boem shang» ga: tid. Houg: yoomo nyangnu" gi yhoem: koid wa zhoothung" yo' zhoo" kyen' ri yo" too" bye:. 4Nyangnu" gi «Akhid" nyhang" moug: fu" lho: moug: gyab goin" abyo, sain" loo" wa shid re" mougkhung: moo thug sho' myang: da" pyuzung bo da" voomoo" daloem: ri zhug boem shang» ga: tid boem.
5Hau: thang: Aseing gi hau: byu yi koid nyid boem da" pyuzung yo' voomoo" ri yu" wa shid re" ju" gyoo" lo. 6Hau: lho: nyang: gi «Houg ri akhid" he: byu yi dangain" gi byu damyu" myeing" daja: za: nyangnu" kaid nyid boem. He: zigi nyangnu" zei: zo" lo" nyid da" moo" aseig dashid" lo" nyid ashi". Daso' lang" nyangnu" koid nau ziri yo" bain koid boem wa myang. 7Nyangnu" dayug yo' dayug myeing" azhung" go" sho' nyhang" gyoo" yhe: lho: nyangnu" da" myeing" ri lhu: nhung pyam byid: shang» ga: tid. 8Hougsu" wigi Aseing gi nyangnu" ri mougmyid gyab goin" khyoo: byo sain" loo" nhang: lho: nyangnu" voomoo" tam: da" khyoo: gi no: pyam boem bye:. 9Voomoo" da" myeing gi Babelon ga: zi nghoid. Khasu" wim gari hau: joyoo moo Aseing gi byu dangain" bang: da" myeing" ri lhu: nhung pyam byid: lho: hau: joyoo mo moug: gyab goin" khyoo: byo sain" loo" bye:.
Shem da" Amyed Ashen yi
(1 Km 1:24-27)
10He: zigi Shem da" amyed ashen yi nghoid. Tigyid shi' thang: eig zain nghoid ri Shem apyaid 100 zain nghoid lho: yuggi zoo: Arphaza ri yoo" bye:. 11Hau: thang: nyang: gi gootu: 500 zain doem xo' nyid lho: gootu: zooshang: yiri we' yoo" kho'.
12Arphaza gi 35 zain nghoid uri yuggi zoo: Shela ri yoo" bye:. 13Hau: thang: nyang: gi gootu: 403 zain doem xo' nyid lho: gootu: zooshang: yiri we' yoo" kho'.
14Shela 30 zain nghoid uri Ebera ga: da" yuggi zoo: dayug ri yoo" bye:. 15Hau: thang: nyang: gi gootu: 403 zain xo' nyid lho: zooshang: yi we' yoo" kho'.
16Ebera 34 zain nghoid uri Pheleg ga: da" yuggi zo: dayug ri yoo" bye:. 17Hau: thang: nyang: gi gootu: 430 zain xo' nyid lho: gootu: zooshang: yiri we' yoo" kho'.
18Pheleg 30 zain nghoid uri Reu ga: da" yuggi zoo: dayug ri yoo" bye:. 19Hau: thang: nyang: gi gootu: 209 zain xo' nyid lho: gootu: zooshang: ri we' yoo" kho'.
20Reu 32 zain nghoid uri Serug ga: da" yuggi zoo: dayug ri yoo" bye:. 21Hau: thang: nyang: gi gootu: 207 zain xo' nyid lho: gootu: zooshang: yiri we' yoo" kho'.
22Serug 30 zain nghoid uri Nahora ga: da" yuggi zoo: dayug ri yoo" bye:. 23Hau: thang: nyang: gi gootu: 200 zain xo' nyid lho: gootu: zooshang: yiri we' yoo" kho'.
24Nahora 29 zain nghoid uri Thera ga: da" yuggi zoo: dayug ri yoo" bye:. 25Hau: thang: nyang: gi 119 zain xo' nyid lho: gootu: zooshang: yiri we' yoo" kho'.
26Thera 70 zain nghoid uri nyang: gi Abram- Nahora yo' Haran bang: da" nya: phoo bue" loo bye:.
Thera da" Amyed Ashen yi
27He: zigi Abram- Nahora yo' Haran bang: da" nya: phoo Thera da" amyed ashen yi nghoid. Haran gi Lod da" nya: phoo nghoid lho: 28Nya: phoo lang" ashid: shi" ri Haran gi nya: co' phyed jang: Babelon mo Ura voo moo shid: bye:. 29Abram gi Sarai ri lo, xo' yu lho: Nahora gi Haran da" nya: zoo: myiyi: nu" Mikha ri lo, xo' yu da:. Haran gi Iskha da" nya: phoo we' nghoid. 30Sarai gi zooshang: we' ase' yoo".
31Thera gi nya: zoo: Abram yo' nya: dumoo" Sarai ri we' Haran da" nya: zoo: Lod ri we' shu" ci: lho: Babelon moug: Ura voomoo" mo Khanan mung" khyoo: thu yhe: lo" boem. Nyangnu" gi Haran mo ju" sho' yhe: wigi houg: moo yhe: nyid boem. 32Thera gi hau: joyoo moo nya: apyaid eig sho: wim: zain moo shid: byug bye:.
المحددات الحالية:
APOEM AYANG: 11: LCL
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Lacid Bible © Bible Society of Myanmar, 2009.
