लुका 14

इसु पुनित माइसाका दिना मासाअ्‍धेकालाइहेङ एल्‍पाका

1पुनित माइसाका दिनाता इसु नेउता निङतेङ फरिसि दोअ्‌का धरम समुहको द्‍याङगेलाइको आगुवाको साअ्‌ता चालिको भाअ्‌सिङ हानिहि। इन्‍ता जोम्‍तेङ हिका द्‌याङगेलाइ वाको चेवा पातेङ हिघाहि। 2इङकोङ पहर इन्‍ता एमि खुर खोकोइ इम्‍का द्‌याङ इसुको आगाता योम्‍तेङ हिघाहि। 3कालाउ इसु यहुदि धरम मास्‍टर रो फरिसिगेलाइहेङ हिअ्‌हि, “बेबस्‍थामाफिक पुनित माइसाका दिना रोगाइकाहेङ एल्‍पालि मुनासिप ज्‍याङ ना माज्‍याङ?” 4कालाउ एम्‍बालाइ हाइदोङ मादोअ्‌हि। कालाउ इसु इङको रोगाइकाहेङ साइहि रो वासेहेङ एल्‍पातेङ दिङगिल्‍हि। 5इङकोन्‍हुअ्‌सो इसु एम्‍बालाइहेङ दोअ्‌हि, “नेलाइता हासुको बुङ चान चामिन्‍दि रो गाइ पिया पुनित माइसाका दिना च्‍वाता वालाअ्‌नु हाइ नेलाइ वासेहेङ इघुरिताङ बाहार माओल्‍हेपास्‍वाना कुनु?”#मत्‍ति १२:११ 6आरोङ बुङ एम्‍बालाइ हाइदोङ दोअ्‌लि मादोहि।

बान्‍सालाइको तुलना

7इन्‍ता भात्‍यार चालि लोका बान्‍सालाइ बाबारकालाइको योम्‍का थामे साल्‍तेङ योमका तिङतेङ इसु एम्‍बालाइहेङ इसिका काथा दोअ्‌हि, 8“नेलाइ हासुको बुङ बिहुता बान्‍सालाइ जेङतेङ हानेलाउ मुल थामे साल्‍तेङ मायोम्‍सु। हाइदोनु इन्‍ता नेलाइ खान्‍तेङ प्रख्‍यात द्‌याङगेलाइहेङ बुङ नेउता पिका हि वाला।#रेम्‍काआरति २५:६-७ 9कालाउ वा लोलाउ साअ् धनि लोतेङ ‘वासेहेङ मुल थामे लाअ्‌पिसु’ दोअ्‌तेङ ल्‍होपानु ते नेलाइ लेदेरस्‍वाना। इङको पहर द्‍याङगेलाइको आगाता लेता योम्‍लि गोइनु नेलाइको न्‍हापु हानावा। 10बरु नेउता निङतेङ बिहुता हानेलाउ लेताङ योम्‍सु। जेलाउ साअ्‌धनि लोतेङ नेलाइहेङ ‘र्‍हुताङ लोतेङ मुल थामेता योम्‍सु’ दोअ्‌नु इङको पहर झाराङको आगाता नेलाइको बारा मान जेनावा। 11हाइदोनु जाइ ताइमिङ बारालि भोकालाइ झाराङ म्‍हुयावा रो जाइ ताइमिहेङ म्‍हुइपाकालाइचाहिँ झाराङ खान्‍तेङ बारा जेनावा।”#मत्‍ति २३:१२; लुका १८:१४

12कालाउ इसु नेउतापिका साअ् धनिहेङ दोअ्‌हि, “ना इसिका भात्‍यार लागाइलाउ नाङको नाल्‍का सानाइतिगेलाइ, दादा ओनेगेलाइ रो ताइ द्‍याङगेलाइ कालाउ हिका चाका साअ्‌भेर्पाको द्‍याङगेलाइहेङ माकाइ। हाइदोनु एम्‍बालाइ पाला घुरिपालि भाअ्‌सिङ नासेहेङ काइतेङ चापावा। 13कालाउ भात्‍यारता द्‌याङगेलाइहेङ काइलाउ हाइदोङ मान्‍थुका, तेलिमादोका लुलानेङग्रा रो कान्‍हागेलाइहेङ काइ। 14कालाउ एन्‍सा पानु ना आसिस निनाना। हाइदोनु नासेहेङ पाला घुरिपालि ओबालाइ दोफा हाइदोङ मानथ्‍वावा। कालाउ परमेस्‍वरको हुकुम मानेका द्‌याङगेलाइ सिकासो सिन्‍हुलाउ परमेस्‍वर दोङ नासेहेङ इनाम प्‍यावा।”

बारा भात्‍यारको तुलना

(मत्‍ति २२:१-१०)

15इसुको काथा हिङतेङ वाकोदोफा चालि योम्‍का एमि दोअ्‌हि, “सादेलको सारभिता भात्‍यार चालि निङकालाइ दोङ हेथे आसिस निनावा।” 16इसु वासेहेङ दोअ्‌हि, “एमि द्‌याङ बारा भात्‍यार त्यार पातेङ हेन्‍जा द्‌याङगेलाइहेङ नेउता पिहि। 17कालाउ भात्‍यार चाका पहर जेङलाउ साअ् मालिक निम्‍तारगेलाइहेङ ‘भात्‍यार चाका पहर जेङहोइ’ दोअ्‌तेङ ताइको कामत्‍यालाइहेङ काइलि दिङगिल्‍हि। 18कालाउ नेउतारगेलाइ एलोङ एलोङ आल पातेङ लोलि माकिअ्‌हि। कालाउ एमि दोअ्‌हि, ‘का मिलिङ चोलका हिघा, इन्‍ता मान्‍हेसा माजेङका हि। कासेहेङ माफ पा, का लोलि मानिनाङका।’ 19भेनेङ दोअ्‌हि, ‘का ना हाले पिया चोलका हिघा रो नानिङ एम्‍बालाइहेङ चोइतेङ खाङलि गोइका हि। कासेहेङ माफ पा, चेर माताम्‍पा।’ 20कालाउ आरोङ भेनेङ दोअ्‌हि, ‘का नावा कान्‍या चुमाका हिघा। इदोइखातिर लोलि मानिनाङका।’ 21कालाउ कामत्‍या घुरितेङ गोताङ काथा मालिकहेङ हिम्‍पाहि। कालाउ मालिक चेरताम्‍पातेङ ताइको कामत्‍याहेङ दोअ्‌हि, ‘ना मार्फा पुरको दामा घाटे रो गल्‍लिगेलाइता हाने। इन्‍तासो मान्‍थुकालाइ, लुला नेङगारागेलाइ रो कान्‍हागेलाइहेङ काइतेङ इता चुमा।’

22“इङको कामत्‍या दोअ्‌हि, ‘गिर्‍हि, नाङको दोअ्‌का भाइपाङ झाराङ द्‌याङगेलाइहेङ काइतेङ चुमाघा, आरोङ बुङ बो हेन्‍जा योम्‍का थामेगेलाइ खालि दोङ हि।’

23“आरोङ मालिक इङको कामत्‍याहेङ दोअ्‌हि, ‘देराको दामा घाटे रो गल्‍लिगेलाइता हानेतेङ द्‌याङगेलाइहेङ जेसा पातेङलाउ बुङ काइतेङ चुमा। कालाउ काङको साअ् पोङघाको!’ 24हाइदोनु आरोङ का नेलाइहेङ दोअ्‌खा, ‘नेउता निङकालाइता हासु बुङ भात्‍यार चालि मानिनावा।’”

चात्‍या जेङलाउ भोगेलि गोइका तु:

(मत्‍ति १०:३७-३८)

25एनि इसु दोफा हेन्‍जाङ द्‌याङगेलाइ हानेदोङ घाहि। इसु एम्‍बालाइभारि घुरितेङ दोअ्‌हि, 26“कासेहेङ पिताइलि भोकालाइ ताइको आबा आमाइ, बेअ्, चान चामिन्‍दि, दादा ओने, बाइ ओने रो ताइमिहेङ माया मारेलि मादोकालाइ हेअ्‌लाउ बुङ काङको चात्‍या जेङलि माद्‍वावा।#मत्‍ति १०:३७ 27आरोङ जाइ ताइको कुरुस ताइमिङ चुमतेङ कासेहेङ मापिताइकालाइ काङको चात्‍या जेङलि माद्‌वावा।#मत्‍ति १०:३८; १६:२४; मर्कुस ८:३४; लुका ९:२३

28“नेलाइ एलोङ झाउका साअ् बान्‍हाइलि भोनु इङको साअ् बान्‍हाइलाउ लागिका खार्चा ताइमिदोफा हि ना मान्‍थु दोअ्‌तेङ लाम्‍फा दोङ हिसाब किताब मापाखे कुनु? 29यदि वा झाउका साअ्‌को जग योम्‍पातेङ पुरा पालि मादोनु ते द्‌याङगेलाइ वासेहेङ गिल्‍ला पातेङ दोअ्‌तावा, 30‘खाङसु, इदोइ द्‌याङ झाउका साअ् बान्‍हाइलि ते भोहि, कालाउ पुरा पालि दोङ मादोहि!’ 31आरोङ, तेहाजार पलटन हिका एलोङ राजा एकुरि हाजार पलटन हिका भेनेङ राजा दोफा धुम पालि हानेलाउ लाम्‍फा दोङ जितिलि द्‍वाङका बे माद्‍वाङका दोअ्‌तेङ ठहर मापावा कुनु? 32कालाउ यदि धुम पालि मादोनु लाम्‍फा दोङ वा ताइको पलटनगेलाइहेङ हाइ पातेङ मिलाप पालि द्‌वाङ दोअ्‌तेङ गेलि दिङगिलावा। 33एन्‍सा पातेङ नेलाइता जाइ काङको भाअ्‌सिङ गोताङ थोक लाअ्‌लि माद्‍वावा; वा हेअ्‌लाउ बुङ काङको चात्‍या जेङलि माद्‍वावा।

स्‍वाद मान्‍थुका देसे

(मत्‍ति ५:१३; मर्कुस ९:५०)

34“देसे रेम्‍का थोक हिलाउ बुङ, यदि वाको स्‍वाद राम्‍नु वासेहेङ आरोङ हाइहोइ ताइका बान्‍हाइलि? 35कालाउ इङको बारिको भाअ्‌सिङ मल बुङ माज्‍यावा। द्‍याङगेलाइ वासेहेङ एन्‍साङ थालगिलावा। जाइको हिङका न्‍हातोङ हि वा हिनाको।”

المحددات الحالية:

लुका 14: DHIM

تمييز النص

نسخ