युहन्ना 15
15
अङगुरको सिङ रो दालेङगेलाइ
1जातिङको आङगुरको सिङ का दोङ हिघा, कालाउ काङको आबा खेतिपाका हि। 2काता हिका गोताङ दालेङ जाइ फल मासेपाखे वा इङकोहेङ धाइगिलावा रो फल सेपाका गोताङ दालेङहेङ आरोङ हेन्जा फल स्याको दोअ्तेङ वा तुमप्यावा। 3का नेलाइहेङ दोअ्का कथनहोइ नेलाइ लाम्फा दोङ पुनित जेङसुहोइना। 4काता हिसु रो का नेलाइता ह्याङका। जेसापा दालेङ आङगुरको सिङता माहि पानु इङको ताइमिङ फल सेपालि माद्वावा। एन्सा दोङ नेलाइ काता माहिसुन्हा पानु नेलाइ बुङ मादोस्वाना।
5“आङगुरको सिङ का दोङ एइ रो नेलाइचाहिँ दालेङगेलाइ एइ। जाइ काता हिखे, का बुङ वाता ह्याङका रो एसापा इङको हेन्जा फल सेपावा। हाइपानु कासो फारापा हितेङ नेलाइ हाइ बुङ पालि मादोस्वाना। 6हासुङ द्याङ काता माहि पानु, इङको दालेङभाइपाङ बाहार थालन्हावा रो इङको सेनावा। इसिका दालेङगेलाइ द्याङगेलाइ जोम्पातेङ मेता दुकावा। 7एदि नेलाइ काता हिसुन्हा पानु रो काङको दोअ्का कथनगेलाइ बुङ नेलाइता हिहे पानु, नेलाइ भोका काथा र्हेनु निङस्वाना। 8नेलाइ हेन्जा फल सेपातेङ काङको चात्या एइ दोअ्का साबित पासुन्हा पानु इदोङता काङको आबाको प्रताप ज्यावा।
9“आबा कासेहेङ जेसापा इन्ताना पाका हि, का बुङ नेलाइहेङ इन्ताना पाका हिघा। नेलाइ काङको इन्तानाता हिसु। 10एदि काङको हुकुमगेलाइ साअ्सुन्हा पानु नेलाइ काङको इन्तानाता हिस्वाना। जेसापा का काङको आबाको हुकुमगेलाइ साअ्का हिघा रो वाको इन्तानाता ह्याङका। 11का इदोइ काथा नेलाइहेङ इदोइखातिर दोअ्का हिघा, काङको सुकाका नेलाइता ह्याको रो नेलाइको सुकाका पोङघा ज्याको।
12“काङको हुकुम इदोइ दोङ एइ, जेसापा का नेलाइहेङ इन्ताना पाघा, नेलाइ बुङ एमि भेनेङहेङ एन्सा दोङ इन्ताना पासु।#युहन्ना १३:३४; १५:१७; १ युहन्ना ३:२३; २ युहन्ना १:५ 13सानाइतिगेलाइको भाअ्सिङ ताइको बायु पिका खान्तेङ बाराका इन्ताना बो हासुकोङ माजेङखे। 14नेलाइहेङ का जेदोङ हुकुम पाखा इङको नेलाइ मानिसुन्हा पानु नेलाइ काङको सानाइति एइ। 15एलासो का नेलाइहेङ कामत्या मादोअ्ताङका, हाइपानु इङकोको गिर्हि हाइ पाखे कामत्या मागेखे। कुलाउ का नेलाइहेङ सानाइति दोअ्का हिघा, हाइदोनु जेदोङ का काङको आबासो हिङघा, का इङको गोताङ नेलाइहेङ दोअ्पिका हिघा। 16कासेहेङ नेलाइ मासालसुन्हा, कालाउ का नेलाइहेङ साल्घा रो नेलाइहेङ भर्ना पाघा। नेलाइ हानेसु रो फल सेपासु कालाउ नेलाइको फल हितेङह्याको। एन्साङ नेलाइ आबादोफा काङको मिङता जेदोङ र्हेस्वाना, वा नेलाइहेङ इङको प्यावा। 17का नेलाइहेङ इदोइ हुकुम पिदोङखा, नेलाइ एमि भेनेङहेङ इन्ताना पासु।
चात्यागेलाइहेङ दुनियाको दिगमिग
18“दुनियाको द्याङगेलाइ नेलाइहेङ दिगमिग पाखे पानु, नेलाइहेङ दिगमिग पाका लाम्फा इङको कासेहेङ दिगमिग पाका एइ। 19एदि नेलाइ इदोइ दुनियाको हिनु ते दुनिया नेलाइहेङ ताइको दोअ्तेङ इन्ताना पाधावा। कुलाउ नेलाइहेङ इदोइ दुनियासो माको। नेलाइहेङ दुनियासो का साल्घा, इदोइखातिर दुनिया नेलाइहेङ दिगमिग पाखे। 20का नेलाइहेङ दोअ्का कथन फोम पासु, ‘कामत्या साअ्को गिर्हिखान्तेङ बाराका माजेङखे।’ एम्बालाइ कासेहेङ सान्ताइहि पानु नेलाइहेङ बुङ सान्तायावा। एम्बालाइ काङको कथन साअ्हि पानु नेलाइको कथन बुङ साअ्तावा।#मत्ति १०:२४; लुका ६:४०; युहन्ना १३:१६ 21कुलाउ एम्बालाइ इदोइ गोताङ काथा काङको मिङको भाअ्सिङ नेलाइहेङ पावा, हाइदोनु एम्बालाइ कासेहेङ दिङगिलकाहेङ मानाल्खे।
22“का मालोका हिनु रो एम्बालाइहेङ मादोअ्पिका हिनु एम्बालाइ कुकरमको दागि माजेङधावा। कुलाउ एला ते ताइको कुकरमको भाअ्सिङ एम्बालाइदोफा हाइदोङ निउ मान्थु। 23जाइ कासेहेङ दिगमिग पाखे, इङको काङको आबाहेङ बुङ दिगमिग पाखे। 24एदि बो हासुङ मापाका काम का एम्बालाइको माझाता मापाका हिनु, एम्बालाइ कुकरमको दागि माजेङधावा। कुलाउ एला एम्बालाइ कासेहेङ रो काङको आबाहेङ सुदाङ तिङका हि रो दिगमिग पाका हि। 25कुलाउ नियमता लेखेन्हाका इदोइ कथन पोङघा जेङलि, ‘एम्बालाइ कासेहेङ खातिरबेगार दिगमिग पाहि।’#ले ३५:१९; ६९:४
26“जेलाउ साल्हापिका ल्वावा जाइहेङ का आबाको पाहासो सतको हाङसा नेलाइकोता दिङगिलप्यावा। जाइ आबासो लोखे वा दोङ काङको बारेता दासि प्यावा। 27नेलाइ लाम्फासो दोङ कादोफा हिका हिनाङसिङ नेलाइ बुङ काङको दासि जेङस्वाना।”
المحددات الحالية:
युहन्ना 15: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2024 (Active), Wycliffe Bible Translators, Inc. All rights reserved.
