Ioane 7
7
1Neko mere ai Galilaia eiei ai Iesu aki‐enamakei’inave: Iudea eiei ai U aki?-?a‐enanavea uku Isaraela a’a U‐avai ipia‐mimakei’inave.
2Isaraela a’a anu komo marea purai arekamu ai kei’inave.
3Ou uku eiai Una aroa a’a erau voa kurunave, Ei eiei keinamoki, Iudea eiei ai enara, Ni aivara awku inamu‐eiane‐iai iaki Ni li’ina.
4Uku a’a kapeo vaua?-?vaua ai iaki li’ina, panipani ai u umuli’ina ane a’a anu paku ai u ipawkiakeia’ane‐iai. Ei iaki Ni liane, a’a anu paku ai enara oro inamu?-?niane‐iai.
5Uku Una aroa a’a awku a‐pirimaroakoanavea.
6Iesu erau voa kuruenave, Na pani aneape: a pani pani ima keina uku noro eiai.
7Pani va’au vai’i‐naka?-?vai liapea; a u vai’i‐ikanake uku Nai ione li’ina una opara eiai, una opara namea keina.
8A ei purai navai noro inara. Nai eai a‐inanakea ei purai eiai, uku Na pani miki aneape.
9U erau voa kurunave, Galilaia ai i‐pokoinave ane.
10Una aroa a’a purai eiai inavaka’ane, neko mere ai U awku vaua‐vaua inanave.
11Purai ai Isaraela a’a voronave, erau voa veve’einave ane, U ekeiana?
12A’a aruru awkono avao ai voa momou mo’onu kei’inave uku U eiai: uku a’a varomo erau voa kurunave, U ima a’a keina: a’a mo erau voa kurunave, Ai, U a’a aruru ewaea‐ekana.
13A’a kapeo iviri kei’inave voa iki kuruai U eiai uku oro Isaraela a’a kore kei’inave.
14Purai na’a pani ai Iesu omoro marea ai inanave, omoro kurunave ane.
15Isaraela a’a varua’anave, erau voa veve’einave ane, Ei a’a revareva voa eka’ama‐ipali’i, U ipawkia?-?a‐kei’inavea?
16Iesu erau voa kuruenave, Na ipawkia voa Na voa peo, ei voa U mere anena, U ane U ikaivirinave.
17Una lai kamaialiai a’a umuliane, ei ipawkia voa eiai u ipaliakana, ei voa Eloi mere anena naea, Nai omoro kuruna uku Na nane eiai naea.
18A’a anu ipawkia voa una lai mere anena una avioia u vorona. A a’a Una avioia vorona U ane U okaivirinave, u a’a miki keina, namea eria u laru ai uakeina,
19Mose vupu nakuapeana, a nomo a’a kapeo vupu kamaiali’ina? Uku oiana i‐avai noro umuli’ina?
20A’a aruru erau voa kurunave, Ni diabolo mi’ina: uku Ni avai koama‐awkama?-?kei’i?
21Iesu erau voa kuruenave, Awku monou Nai liane euna, noro uriria varua’ana ane.
22Mai‐oro onu momoa eia opara Mose nakunave, Sabati lare ai noro a’a momoa eina.
23A’a Sabati lare ai momoa eiakeia’ane, noro ia’ia ana Nai eiai uku Sabati lare ai maia a’a Nai aukarikava’ane euna?
24Awku unu aipo e voa pa veve’eai, awku unu iki miki voa veve’ene, noro voa vevea anana miane‐iai.
25Ierusalema a’a varomo erau voa veve’einave, Ei a’a U peana U avai oro umuli’ina?
26Akoi’i, U eu ai voa iviri kurumakina, oro voa eria kuruna. Mai‐oro ama‐ipali’i U Keriso kapoi?
27Ei a’a, Una pai’iri ane, enei ipali’ina: Keriso anea’ane, mako mere U aneakana a’a kapeo ipali’ina.
28Iesu omoro marea laru ai ipekimakei’inave, U erau voa araro kurunave, Noro ipa‐ilauna, mako mere Nai anena noro ipali’ina ane: Nai verukua aneape, a U ane U ikaiviriane euna U miki keina, noro ipa‐a‐ulaunakea.
29Nai ipa‐ulauna, uku U mere Nai anenave, U ikaiviriane euna.
30Oro ei voa viriaka’ane U‐piriai oro umuli’inave: a’a kapeo eve a’akinave, uku Una pani aneakape.
31A’a aruru unu a’a aila pirimaroakoanave, erau voa veve’einave ane, Iva veia ei a’a liane euna Keriso anea’ane U iva veia mo amalimau?
32Parisea a’a virinave a’a aruru voa e kevakeva kurumakei’inave Uku U eiai; Parisea a’a, omoro amua a’a ane, U‐piriai polikimani a’a ekaivirinave.
33Iesu erau voa kuruenave, Pani mau’u e Nai noro kiripai pokoina: neko mere ai Nai U ai enavakana, U ai U ane U ikaivirinave.
34Noro ivoroakana, noro aui’iapea: Nai i‐pokoiakana noro i‐aneai liapea.
35Isaraela a’a erau voa veve’eimakei’inave, U ekei?-?menai enei auiapea? Keke’e a’a lai unuku a’a awkono avao ai U ama‐enamau, lai unuku a’a ama‐ipekimau?
36Ei voa anu miki oiana U erau voa kurunave, Noro ivoroakana, noro aui’iapea: Nai i‐pokoiakana noro i‐aneai liapea?
37Purai inu ika lare ai, purai inu ovara lare ioure, Iesu la’anave erau voa araro kurunave, A’a kamuri lavere liane, Nai ai u anenamoki, na’anamoki ane.
38Orau iaa revareva kuruane euna, U ane u ipirimaroakona, u larua mere aiara ere rokoa orekiakana.
39(U ei voa kurunave uku Avaea Una pirimaroakoa a’a miakana: uku Avaea Iaa ei pani ai a‐awkuakei’?-?inavea; Iesu awku avioia?-?keiakape.)
40A’a aruru unu a’a varomo ei voa viriaka’ane, oro erau voa kurunave, Ei a’a Laikorava a’a kapoi.
41A’a mo erau voa kurunave, Ei a’a Keriso keina. A’a mo erau voa veve’einave, Keriso Galilaia mere ama‐anemau?
42Iaa revareva kuruapeana, Keriso Davida anu kiri a’a mere aneakana, Betelehema Davida anu pai’iri mere?
43A’a aruru awkono avao ai voa kamukamu kuruakei’inave uku U eiai.
44Oro varomo eve a’akiai umuli’inave; a a’a kapeo eve a’akinave.
45Polikimani Omoro amua a’a, Parisea a’a ane, enu paku ai vairunave; oro erau voa veve’einave, Uku oiana noro arekavape?
46Polikimani a’a erau voa kuruenave, A’a verukua kuruape orau ei a’a kuruna.
47Parisea a’a erau voa veve’einave, Noro awku ewaea‐nakavakei’i?
48Mai‐oro onu a’a ana, Parisea a’a anu a’a ana, amapirimaroakoa’e?
49A ei a’a aruru oro Vupu ipapea, oro laeiakeina.
50Nikodemo, u ane u Iesu ai kipere pani ai anenave, u erau voa veve’einave,
51Ene Vupu a’a pinai voa veve’eana, neko mere ai paioka voa viriana?
52Oro erau voa veve’enave, Ni awku Galilaia a’a ana? Vorone, ni ipaliane‐iai: uku Galilaia mere laikorava a’a kapeo anena.
53A’a kavakava una marea ai enanave.
المحددات الحالية:
Ioane 7: IAR1920
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Published by the British and Foreign Bible Society in 1920.
