Chenesis 12
12
1Yohmi ka̱ Chihowah ʋt Eblam a̱, Chi̱ yakni chi̱ kanomi ʋhleha micha chi̱ki in chuka achʋfa aiena ka̱ i̱ filʋmmit a kohchʋt a̱yʋt yakni chi pesʋchi la chi̱ ka̱ ish onashke:
2Mikma okla chito fehna a chikbi la he, mikmʋt chi yukpali likmʋt, anonti chi hohchifo ha̱ holitoblichi la hi oke; mikma ishit na chi yukpa yachi̱ hoke.
3Atukma kʋna hosh anumpa yukpali chi onochikma yukpali la hi oke; mikmʋt kʋna hosh anumpa kalakshichi chi onochikma, kalakshichi la hi oke: mikma chuka achʋfa puta yakni paknaka aiasha kʋt chi aiyukpa hi oke, achi tuk atok.
4Yohmi ma Chihowah yʋt im achi tuk mak o̱, Eblam ʋt ia tok, mihma Lot ʋt awant ia tok: mihma Eblam ʋt Halan a̱ kohchʋt ia mʋt, afʋmmi pokoli untuklo akucha tahlapi tok.
5Micha Eblam ʋt tekchi Salai, micha itibapishi ushi Lot, micha i̱ nanʋlhpoa ahayuchi tuk ʋt moma, micha Halan a̱ tishu okla ai ahayuchi tuk ʋt pehlichi cha, Kenan yakni ya̱ okla ona chi̱ hosh kohchʋt ia tok; atuk osh Kenan yakni ya̱ okla ona tok.
6Mihma Eblam ʋt yakni yash hlopullit a̱yʋt Moleh i̱ baiyi hieli Sikem a̱ ona tok. Yohmi ma Kenan okla hʋt yakni ya̱ aiasha hatok.
7Mihma Chihowah yʋt Eblam a̱ i̱ haiaka cha, Yakni ilʋppa chim ishtatiaka ya̱ ima la hi oke, im achi tok: mihma yʋmmak o̱ Chihowah yʋt i̱ haiaka tuk ash alta ya̱ im ikbi tok.
8Atuk osh yʋmma ʋttʋt kanʋllit ia mʋt, Behlel i̱ hʋshi akochaka imma nʋnih chaha hak o̱ ona cha, Behlel ʋt hʋshi ai okatula pilla tala̱ya ho̱, micha Hai ʋt hʋshi akochaka pilla ma, tala̱ya ho̱ im ʋlhtipo ya̱ hilechi tok: mihmʋt yʋmmakma Chihowah ya̱ alta im ikbi cha, Chihowah ya̱ hochifot i̱ pa̱ha̱ya tok.
9Mihmʋt, Eblam ʋt iʋt oka mahli pilla ho̱ ma̱ha̱ya tuk ʋt moma hosh a̱ya tok.
10Atuk o̱ yakni yash hohchʋfo hʋt a̱sha tok: mihma Eblam ʋt Echip yʋmmak o̱ anta chi̱ hosh ia tok; yakni yash hohchʋfo kʋt palʋmmi fehna hatuk oka.
11Atuk osh yakohmi tok, Echip a̱ chukowa chi̱ mak osh bili̱kasi ona mʋt, tekchi Salai ya̱, Pisa ka̱ ohoyo chi aiokli ka̱ himak a̱ ithana lishke:
12Yʋmohmi hoka yakohma chi̱ hoke, Echip okla hʋt chi pisakmʋt, Ilʋppak osh tekchi oke, acha chi̱ hoke; mikmʋt ʋno ya̱ sʋbi cha, chishno yano chi okchalincha chi̱ hoke.
13Chishno ʋt, In tek sia hoke, ish achashke, chim asilhha lishke: yʋmohmi ho̱ chishno ak atuk pulla mak o̱ nana isht ʋm achukmashke: micha chishno atuk pulla mak o̱ ʋmi shilombish ʋt okcha̱yashke, im achi tok.
14Atuk o̱ yakohmi tok, Eblam ʋt Echip a̱ ont chukowa ma, Echip okla hʋt ohoyo hʋt aiokli fehna ho̱ pisa tok.
15Falaoh i̱ holitopa ʋhleha hak kia pisa mʋt ahnichit Falaoh itikba ya̱ anohonli tok; mihma ohoyo hash ilauelit Falaoh in chuka ya̱ isht ona tok.
16Mihma yʋmmak atuk pulla mak o̱ Falaoh ʋt Eblam a̱ i̱ kana fehna tok: mihma chukfʋlhpoa, micha wak, micha issuba nashoba nakni, micha hatak tishu ʋhleha, micha ohoyo tishu ʋhleha, micha issuba nashoba tek, micha kamel puta aiena kʋt im a̱sha hatok.
17Mihma Chihowah yʋt Eblam tekchi Salai ak atuk pulla mak o̱ Faloah micha in chuka achʋfa aiena ka̱ napalʋmmi chinto ka̱ onochi tok.
18Mihma Falaoh ʋt Eblam a̱ hoyo cha, Ilʋppak osh nanta mak o̱ is sa̱ yʋmihchi tuk oh cho? nanta katiohmi ho̱ chi tekchi atuk a̱ chik sʋm anolo tuk oh cho?
19Nanta katiohmi ho̱, Ilʋppʋt an tek oke, ish achi tuk o̱? yohmi na, ishit sa tekchi ikbit itauwaya la he tuk oka; yohmi hoka chi tekchi ya̱ ish ilaueli cha, ish iashke, achi tok.
20Micha Falaoh ʋt in tʋshka ʋhleha ha̱ yʋmmak ash nana ish, i̱ miha na, yʋmmak ash micha tekchi, micha nana im asha tuk moma aiena ka̱ ik iá, okla im ahni tok.
المحددات الحالية:
Chenesis 12: CHH
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Published by the American Bible Society 1848-1886, reprinted 1913
