Marcos 2
2
Jesús aptaqmelkeskaiam lhema enenlhet metka aptapno'ok
1Mo'ok aknem na ntemak ma'a, apvektamo mokhom Jesús natemma Capernaum. Apkellengai'o lhnak na enenlhet'avok ma'a apnema lhema pa'at. 2Kolhvavek ankek nak apkanveiakmok apentalhnema enenlhet, mammopvana lhnak antelhek atong ma'a. Ka apketlhekmoskamo lhnak na ania'a aktaqmanma m'a. 3Mpelapkeskankek nak na apkelvai'a 4 enenlhet ma'a, apketsoiakmo lhnak metka aptapno'ok akieplomo nema aktankeskama. 4Mang nak na nkonmopvanka'ak elentalhnengvomok elteteskamok na Jesús ma'a, aplhaniek na songkek enenlhet'avok ma'a. Ka apkelkanetkeskamo lhnak takhalhet pa'at. Apkel·hatsosaiangko lhnak lhema iamet akpaihema m'a, apkelvaivesentamo lhnak enenlhet ieplomo nema aktankeskama m'a. 5Ka apvetai'o lhnak Jesús metka apkeliaskeiam ma'a, lhna aptemak apkanemo enenlhet metka aptapno'ok:
—¡Eietka, nnek aktemeskesangka nkek meliehekho apkaskamakha Eniapom Neten lheiap! —lhna aptemak ma'a.
6Apkakhaiangkek nak na moklhem'a escribas ma'a, nkelpaqmeiasmek nak apvalho'ok, lhna ntaiangkok ma'a:
7—¡Mangkolatsema aptakha nak apaivoma, aptevaske nak Eniapom Neten apvesai'a. Vanlha koka niekhe Eniapom Neten apmopvana etneskesama apankek meliehekho nak enenlhet apkaskamakha m'a! —lhna antaiangkok alietnaikama apaqto'ok ma'a.
8Kolhvavek ankek nak apiekpelkemak Jesús alietnaikama apaqto'ok ma'a, lhna aptemak:
—¿Se lha ntak alietnangka nak apaqto'ok ngkollatsekama ketlhengkap ke, he? 9¿Alhievai'a nke nlho atnek angvanak metka aptapno'ok anak nnek aktemeskesangka nkek meliehekho apkaskamakha Eniapom Neten lheiap, nlho ka la nhan atnek angvanak etnemekha neten, ema nema aktankeskama, elheng ma'a. Se lha alhievai'a nkek ke, he? 10Alvetaskesek hata kolhvave nak ketlhengkap Enenlhet Apketka nak apmopvana etneskesama apankek meliehekho apkaskamakha Eniapom Neten enenlhet'avok —lhna aptemak Jesús ma'a.
Netamen nak ma'a aptemo lhnak apkanemo Jesús enenlhet metka aptapno'ok:
11—¡Etnemekha neten lheiap, ema nema aktankeskama nak, etaqhekha ta apnemakha! —lhna aptemak Jesús apkanemo metka aptapno'ok.
12Kolhvavek ankek nak apkenmekhak neten, apmamo lhnak na nema aktankeskama, ka aplhengamo lhnak ma'a. Nkelpelapkeskangkek nak apkelvetai'a enenlhet'avok ma'a, nieplomavek nak na apkeliavenkaskesaikama apvesai'a Eniapom Neten ma'a, lhna aptaiangkok:
—¡Mangelvetai'ak ennengko'o ngkotnek akto nak ham! —lhnak aptaiangkok apkelpaqmeteiangka m'a.
Jesús aplannekama Levi
13Netamen apmeiekho lhnak mokhom Jesús nekha alvata, apkelvekhek nak enenlhet'avok apnakha m'a. Ka apketlhekmoskamo lhnak mokhom ania'a aktaqmanma m'a. 14Neksa aplhengama lhnak, apvetai'o lhnak Levi m'a, Alfeo apketka. Apnengkek nak apmakmeiangkelha apkenmama takha patakkom impuesto apveske ko Roma apankok, lhna aptemak apkanemo:
—Nok, heieplakha —lhna aptemak ma'a.
Ka apkenmekho lhnak neten Levi m'a, apieplekho lhnak Jesús. 15Aptavekho lhnak na Jesús apnemakha Levi m'a, apkakhaiangkek nak na m'a apkenmamo lhemek patakkom impuesto Roma ankok, kakpota nhan enenlhet apketlhenammap amota ngkollatsekama apkellanekamok, kakpota nhan apkeltamesaikamok Jesús. Aplhaniek nak na enenlhet apkelieplekha m'a. 16Apkelvetai'ak nak na escribas ma'a kakpota nhan fariseos#2:16 Fariseos: Avanhek ankek na aptaikamok apkeliangveiakmo henganemakha Moises, mang nak na elpalhaqvaiakmok metnangko nak judios, mang noka eliaskeiakmok ma'a nennaklhatekhangveiam hata kakpota nhan ángeles., ka apkelpaqmetkeskaiakmo lhnak apkeltamesaikamok ma'a, lhna aptaiangkok apkellanemo m'a:
—Mangkolatsema aptakha nak apketlhekmoskama apankok ketlhengkap, aptavokhe nak lhemek apkenmaikamok anak patakkom impuesto ankok kakpota nhan enenlhet apketlhenammap amota apkellanekamok ngkollatsekama —lhna aptaiangkok.
17Aplengai'avek nak Jesús ma'a, lhna aptemak:
—Metka nak anmaska apiempeiok enenlhet meniaimekpok ponha niapom, vanlha koka anmaska apiempeiok anak koka apkaimekpok ponha niapom ma'a. Asvai'ak ko'o have asmahai'a allavama malha apkelpeivomo nak, vanlha koka asmahai'a allavama m'a enenlhet'avok anak apkellanekamo mota ngkollatsekama —lhna aptemak Jesús ma'a.
Apketlhekmoskama Jesús aktemakha nengaqhaskesammalhko mek
18Apkellaqhaskesammakpo lhna mota mek apkeltamesaikamok Juan apkellavkeskama iemmen aniapom, ka nhan apkeltamesaikamok fariseos. Moklhem'a lhnak na enenlhet apkelioiakmok apnakha Jesús, lhna aptaiangkok apkellanemo m'a:
—Apkeltamesaikamok anak Juan kanhan Fariseos apkellaqhaskesammakpek mota mek, ¿se lha ntemak metnaiangko nak na apkeltamesaikamok anak lheiap ke, he? —lhna aptaiangkok.
19Ka apkatemmoiangka lhnak Jesús ma'a, lhna aptemak:
—Mankaimelhkak ellaqhaskesakpok mek ma'a apkellelto apkellanemmap elpasengvomok aliemhapma apno la mokhom apokkenammap apieseksek ma'a. 20Ngkovomok hato ka aknem nema akiantemekhelha apokkenammap anak, hato ka ellaqhaskesakpok mek ma'a.
21Melatsema angelapama nentalhnema aphapak ietamopai'a napokha apketkok aphalhnankok la'a. Ngkanek eiaqsekhak hata m'a aniem'o aphalhnankok, nkoiangvomok hata apkelietepaikamok ma'a nentalhnema aphapak lhek.
22Mangkolatsema nhan aniatmok vino alhnankok iempehek lhennenga akietnemakha la'a, ngkanek nkopaklhek hata aniem'o aliaklheiam vino alhnankok ma'a. Nentevaskek na vino kakpota nhan iempehek. Koka ntasek aniatmok vino alhnankok iempehek alhnankok nahan —lhna aptemak apketlhekmoskama Jesús apietkeskama.
Apkeltamesaikamok Jesús apkelaptema trigo apoktengok aknem nennekhelha
23Aknem sabado nennekhelha lhna ntemak ma'a, Jesús kakpota nhan apkeltamesaikamok apkeliekangveiakmo lhnak aniep. Ka apnaklheiangko lhnak trigo apaktek apkeltamesaikamok ma'a. 24Apkelvetaiangkek nak fariseos ma'a, lhna aptaiangkok apkellanemo Jesús:
—¡Mangkoltemok ley aptangkolha nak apkeltamesaikamok lheiap aknem sabado nennekhelha! —lhna aptaiangkok.
25Ka apkellatemmoiangka lhnak Jesús ma'a, lhna aptemak:
—Apkelietsateiangkek niekhe ketlhengkap vakkahak aptemo lhnak na nek David, mek nak nanek ngkaqhemak ma'a kakpota nhan apketlhelhma'ak. 26Abiatar nak apiav'akha sacerdote m'a, aptalhnengvaiakmo lhnak David Eniapom Neten apnemakha m'a, ka aptaseiakmo lhnak pan Eniapom Neten nema akpekkenkasekama. Ka apkellaiangko lhnak na apketlhelhma'ak ma'a, niekhe lhnak nanek na mangkoltemo ley, vanlha lhnak niekhe aptekamok sacerdote m'a —lhna aptemak.
27Koka lhna aptemak mokhom Jesús apkellanemo:
—Eniapom Neten apekkanma apanke aknem sabado nennekhelha nak kakpota ngkoltaqmelkeskesek apkellaniemhaikama enenlhet'avok. Aknem nennekhelha nak have akmahai'a ngkoliasangko lhma enenlhet'avok.
28Ka ngkanek Enenlhet Apketka nak nietnek apmopvana kakpota etnek apmak'akha la elanak aknem sabado nennekhelha nak —lhna aptemak Jesús ma'a.
المحددات الحالية:
Marcos 2: TMF
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2023 LETRA Paraguay