Uruti 3
3
Uruti ta-i Boonsi wɔ kiniŋ ki ra
1Jibi bɛɛ, Uruti shinŋ ɲiŋ ki i ǹʼbi nmari tɛ : « Ńʼdanmari, míŋ i ǹʼtɛ, ŋí i sɔɔmaŋ ceeli wɔri miŋ tɛ, ŋi a fɛri nwɔ̀ ru. 2Miŋ ta-i cinŋ ki ma Boonsi wɔ̀ wɔ baara matɔnŋ kiri cɛfan, niŋ myɛ-ɛ yibɛɛ tɛ. Ǹʼtɔ tu, jiŋ cii ki ru, tu ntiŋ a awɔ ɔriji bilaŋ ki bwɔ kiniŋ ki ra. 3Niŋ na, nʼwu ŋi i nʼɲinikɔri, ŋi i nʼwɔ juulinŋ kiri ru shɔɔrinŋ kiri bɛɛ ri bo nʼsun, ŋi i jɛri ta kiniŋ ki ra. Nka fa ncusun ntiŋ i ǹʼja sun kì. Ta ncusun ntiŋ i awɔ nufinŋ ki nu, ntiŋ i a mwunu. 4Niŋ kɔɔtɛ, a ntiŋ ta a bili waarinŋ wɔ̀ ru, ŋi i ta ntiŋ bilimaŋ ki rufɔɔka shɔ, ŋi i ta ntiŋ wɔ bininkanŋ ki fɛshi san ntiŋ kanŋ kiri sun, ŋi i nʼbili ntiŋ kanŋ na. A miŋ niŋ ma, miŋ kakan-i ŋi i bi wɔ̀ ma, ntiŋ a niŋ bi miŋ tɛ. »
5Uruti i Nawomi nupwulu tu : « Miŋ bi finŋ woo finŋ bi-i míŋ tɛ, míŋ a niŋ bataa ma. »
6Nmari i jɛri tiri kiniŋ ki ra, nmari i ta ǹʼma miŋ tu nmari shinŋ ɲiŋ ki ǹʼbi wuru nmari tɛ ɲaan wɔ̀ tɛ. 7Nmari i ncusun Boonsi i nufinŋ ki nu, ntiŋ i a mwunu, ntiŋ ciiru ki i di. Ntiŋ bili waari so-i, ntiŋ i ta a bili bilaŋ kuŋ ki tɔntɛ. Uruti i a da ta yɛrɛtɛtɛ, nmari i ta bininkanŋ ki fɛshi san Boonsi kanŋ kiri sun, nmari i a bili ntiŋ kanŋ na. 8Wɔkila ki ru, Boonsi i na furu, ntiŋ i ŋmɛni. Ntiŋ tu a ra a rapwulu, ntiŋ i ǹʼja tu mari bili afinŋ kanŋ na. 9Ntiŋ i nanɔri tan tu : « Nkɛnŋ? »
Mari ki i ǹʼnupwulu tu : « Míŋ Uruti yɛ, ábɔɔ jonmari ki. Á áwɔ bininkanŋ ki la áwɔ jonmari ki sun, sabu ábɛɛ kiri kakan-i á i á ɲakili tu yibɛɛ ra. »
10Niŋ na, Boonsi i ǹʼbi tu : « Ńʼdanmari, Ŋuntiŋ Kirinŋ baraka de nʼnu. Miŋ bi wɔ̀ ma-i kaa, niŋ i mɔɔn sunjɛribi ki ji-a, ŋì i fwuu a jɔnɔ ki sun sɛbɛ. Miŋ wuru-ra so nʼɲaninpo-i ɲɔrɔkɔ nafulutiŋ ni, walima ɲɔrɔkɔ gbɛwɔ ri tɛ, ŋi i bili de-ri kí cɛfan. Nka miŋ niŋ ma kì. 11Niŋ na, ńʼdanmari, fa kɛni kì. A miŋ finŋ woo finŋ ceeli míŋ gbɛ, míŋ a niŋ ma miŋ tɛ, sabu yibɔɔ konanbi ki bataa ǹʼtɔ-i tu miŋ mari kulumaan a. 12Sɛli yɛ, míŋ a so miŋ kila-i ńʼwɔ mari i, nka koŋ tɔri i nmaŋ, nwɔ̀ myɛ-ɛ miŋ kila ki tɛ míŋ wu. 13San kwumaŋ jiŋ, a si ki sari, a niŋ ji-a miŋ kila awɔ mari i walima a niŋ ji-a miŋ kila kì, niŋ a tɔ. Nka a niŋ na ǹʼbi tu afinŋ a miŋ kila awɔ mari kì, míŋ a ńʼtɔnŋ wɔri miŋ tɛ Ŋuntiŋ Kirinŋ ɲaanfɛ, ńʼtu míŋ yɛrima ki a miŋ kila, ŋi i ji ńʼwɔ mari i. Nʼbili kwumaŋ fɔ siira siri. »
14Niŋ na, Uruti i a bili san Boonsi kanŋ na. Sisarimantɔnŋ ki sun, koŋ wuru koŋ tɔ san-a amaŋ nu waarinŋ wɔ̀ ru kì, nmari i jɔrɔkɔ tiri, sabu Boonsi wuru ǹʼtɛ tu koŋ i ǹʼtɔ tu nmari na-ni kiniŋ ki ra kì. 15Boonsi i ǹʼbi nmari tɛ sɛbɛ : « Nʼwɔ jɛrɛbi sinaŋ ki ru pili po kwumaŋ, ŋi i ǹʼtɔnŋ ki paka shɔ. » Nmari i jɛrɛbi ki tɔnŋ ki paka shɔ. Boonsi i bilaŋ ki kifinŋ ki kaan taanmani bo nmari gbɛ, ntiŋ i nmari shi ǹʼfɛ. Niŋ kɔɔtɛ, ntiŋ i tiri kulu.
16Uruti a pwulu tiri-i a shinŋ ɲiŋ ki tɛ, niŋ i nmari ranɔri tu : « Ǹʼta ji dɔɔkunŋ ńʼdanmari? » Boonsi bi finŋ woo finŋ ma-i Uruti tɛ, nmari nini bataa ɲaanbi a shinŋ ɲiŋ Nawomi tɛ. 17Nmari i ǹʼbi sɛbɛ tu : « Ntiŋ ɔriji kifinŋ ki kaan taanmani ka wɔri-i míŋ tɛ, ntiŋ tu míŋ gbɛwɔ ra so na-i ábɛɛ tɛ kì. »
18Nawomi i ǹʼbi a samari ki tɛ tu : « Ńʼdanmari, sɔɔ kwumaŋ byɛyi, ŋi i ǹʼshɛɛli-li, ka bi ka ra ɲaanpo bo ɲaan wɔ̀ tɛ, miŋ a ǹʼja. Boonsi tɔnŋ a fili ka bi ka ɲaanpobali mìŋ jiŋ kì. »
المحددات الحالية:
Uruti 3: JOB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© Wycliffe Bible Translators, Inc.