TĨĨGI WERE Kalge ɓil kefder seno
Kalge ɓil kefder seno
Kefder ma taŋgu ma ɓil kefder wããre Baan à ɗen ga Tĩĩgi were. Á diŋ kefder maga tĩĩ wer kefder ma ɓil kefder wããre Baa ma dwee taŋgun wo no, ga à ɗen ga Pentateg noga «Yerge mani Moyis wo no» (2 Kor. 3.15). À ɗen ga Tĩĩgi wer diŋ wer maga á bag blam wããre ne naa ti tĩĩgi wer fẽẽren wo le ti wurpo : Ti tĩĩgi wer tamsiri, tĩĩgi wer jar téebeere wo de tĩĩgi wer jar Israyel wora.
Ti ma kluuri 1—11, sen wãã wããre ne naa diŋ ti tamsir maga naa ɓil ɓe, maga naa mo laa wer ne hẽne, naa mo ko ga je táabay diŋ wosela, ngel hayle ɓe ti tamsir la ɓaŋ hunla, diŋ wer may ga holaŋ jar téebeere wo ti holaŋ ɓaara bay seege de woore wa mo la. Kefder ma tĩĩgi wer fer wããre ne naa ti wiɗgi se maga wo de el nen naa wara lay mono. Je twar wo de wãyn ti wur tĩĩgi wer joŋge fẽẽren wo no (1—2), caage holaŋ ɓaara go de Baa (3), Kayin wo de Abele (4), Nowe wo de maŋge bii ma kluu no (6—9), tiŋ ma de gẽẽre ma Babel no (11).
Ti ma kluuri 12—50, sen bag blam wããre ne naa diŋ ti maga Baa nduu de pẽẽge ne jar téebeere wo diŋ de maga á ɗe moore jar Israyel ma taŋgun wo ti peele ne hẽn mono. Á ɗe Abraham (12.1—25.18). Abraham diŋ je maga de hã ɓil ne Baa, hoo sug ti ɓe lay, ti ngel sen Abraham hãã wara diŋ je maga naa nen koge see ɓe ti wããre hãge ɓil ɓe ne Baa no. Cegaɗ de je ni ɓe Isage, de moo ɓe Jakobe (25.19—36.43). Jakob diŋ je maga à kaŋ ɗúu ne hẽn ga Israyel mono. Josef (37.1—50.26), diŋ mbarga ma Jakobe, day se diŋ je maga ɓĩĩni jar Israyel ɓog laa le go see ɓe mono. Á diŋ je maga kaŋ wer jakob de jar ni ɓe ma lan wo cegaɗge lagge wo go de tiŋ Ejipte mono.
Kefder ma tĩĩgi wer diŋ kefder maga had naa ti joŋre maga Baa joŋn mono. Á tĩĩ wer wããre ne naa tuu ga joŋ fẽẽren wo ɓuy diŋ Baa. Sen diŋ fen ma kaŋ nen naa ti kluu Baa, je taw ti fẽẽren wo ɓuy lay. Tawge ti kefder wii naa ga Baa ɗaw ge jar ɓen wo yaŋ doo ɓe tum. Ti tĩĩgi wer ɓen hãã wo go kaŋge ti tawge ti ɓe no, je maga naa daʼ go tinoo ni caw diŋ Baa : Á naa nen see ɓe go, caa kiida jare, koɗ jar ɓen wo, kay ra, day kneʼ wããre maga joŋ go see ɓaara mono.
Ma fer wããre ti de el sen, Baa de dage ga je táabay de hay hã ɓil ne se, ti wããre se maga se wãɗ ra go mono. Daga hay horge sug ti jag se, ti jag liŋgi sen wo lay.
Kefder ma Tĩĩggi wer tay ti wããre maga hay joŋ wo le go ni jar Israyel wo, ma kaŋ nen naa ti faage maga á see wo le de hãge ɓil ɓaaran nà seege la, day ma kay jar ga hãge ɓil sen mo hay hãʼ tum mo taw go wa lay.
المحددات الحالية:
TĨĨGI WERE Kalge ɓil kefder seno: TUP
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tupuri Bible © Bible Society of Cameroon, 2016. All rights reserved.