Pulim 2
2
1Wɛ déem dɛ chwoŋa kanto mo o naane wɛyuu de tega baŋa dedaane kolo maama na wo te wone to o ba o ti maama.
2Da yarepɛ dɛ dem na yi to, dedaane Wɛ maŋe o ti totoŋa yalo maama o déem na jege se o ke to. Da yarepɛ dɛ dem ne, o laam ma jeini o sii o totoŋa yam maama wone. 3Wɛ ma ke zaane o yage da yarepɛ dɛ dem baŋa ne, ye o pɔɔre-de pa de ye de yera da yayam yam wone, ko na ye dento dɛ dem ne mo o sii de o totoŋa yam o na toŋe o ti to ŋwaane.#Nwoŋim 20:11
Baaro de o kaane taane
4Taane dento mo bere Wɛ na naane wɛyuu de tega baŋa ye ko ke tetei to.
Yuu-tu Baŋa Wɛ déem na ke wɛyuu de tega baŋa o ti to, 5gaaro de teeni ta tera tega kam baŋa ne se te taa pae wodiiru. Kolokolo ya ta wo puli, kolo ŋwaane Wɛ daa ta wo pɛ se doa ne tega baŋa ne. Nabiinu de ya daa ta tera se o va tega kam. 6De ko de, na mo déem nwoŋi tega kam kuri ne ba bura, ye banto mo yeini ba bugi tega kam baŋa maama.
7Yuu-tu Baŋa Wɛ déem ma fɔ tega kam teero o ma o mɔ nabiinu.#2:7 nabiinu de teero beeri nye daane mo de Hiburu taane dem. O ma daare o fuli o siu kom na pae ŋwea to, o yage baaro wom momwa ne, pa se o laam jege ŋwea.#1 Korinti 15:45 8Baŋa Wɛ déem ma ke teeni kara Eden ne, wɛ-puli jei sem seeni. O ma daare o kwei o na mɔɔne baaro wolo to o ja vo o yage dáane. 9O ma pa se teeni dwi dwi nwoŋi teeni kara kam ne, de na tiini de lamma yi ne ye de leiri bia na maŋe de dim to. Kara kam tetare ne mo Wɛ déem pɛ se teeni delei nwoŋi de zege da. De dedoa déem ye tio kolo na pae nɔɔna ŋwea to. Kodwoŋi kom maa ye tio kolo na pae nɔɔna lɔre lane de lwarem ba pɔɔre daane to.
10Buga kadwoŋi déem maa zege Eden ne ka duri ka tole ka maa kɛa. Buga kanto mo pae se teeni kara kam nae na. Ka ma nwoŋi Eden jei sem ne ka daare ka pɔɔre kuni bena. 11Bu-tole sena sem yiga tu yere mo Pison. Kanto mo gugwoli ka kaare Havila laŋa kam maama. Dáane mo sabu-seŋa wora, 12ye ka ye chekke. Talwoŋ-ywoŋa kalo na ye Bedelia to, dedaane kandwa-nyenno ba na bwoi-ya we Onika to de maa wo dáane. 13Bu-tola kalo na saŋe to yere maa ye Gihon. Kanto de ma gugwoli ka kaare Kusi laŋa kam maama. 14Batɔ tu wom yere mo ye Tigirisi. Kanto duri ka tole Asiria laŋa kam wɛ-puli jei sem seeni mo. Bu-tola kalo na ke sena to maa ye Yuferata buga kam.
15Yuu-tu Baŋa Wɛ déem ma ja baaro wom o vo o yage Eden teeni kara kam ne se o taa toŋe da ye o nii ka baŋa ne. 16Baŋa Wɛ ma pa baaro wom ni we, “Nmo jege chwoŋa se n di teeni bia balo maama na leiri kara kam ne to. 17Se ko daare tio kolo na pae se nɔɔna lɔre lane de lwarem ba pɔɔre daane to, n dae se n di ko bia bam. Ta‑n yei we, dɛ delo nmo na wó di ko bia to, dento dɛ dem ne mo n lage n te.”
18Yuu-tu Baŋa Wɛ laam ma ta o we, “Baaro wom na wora o yerane konto to, ko ba lamma. Konto ŋwaane amo wó ke zeinnu wolo na wó maŋe ded‑o to mo a pa‑o.”
19 Baŋa Wɛ déem ya fɔge tega kam teero o kwei-te o ma mɔ vara bam dwi maama dedaane wɛyuu zuna bam dwi maama. O laam ma ja-ba o ja o ba baaro wom yiga ne se o nii baaro wom wó bwoŋi ba yera tetɛ mo. Woŋo kolo maama maa na ŋwe, ye baaro wom pa-ko yere delo to, ko seene ko ye konto mo. 20Baaro wom déem ma pa vara bam dwi maama ba yera, sɔŋɔ-vara de kago-vara maama, ye o ta pa wɛyuu zuna bam dwi maama ba de yera. De konto maama wone to, zeinnu déem tera se o maŋe ded‑o.
21Konto ŋwaane, Yuu-tu Baŋa Wɛ déem ma pa se baaro wom tiini o dɔ dɔɔm o beiri. O na tigi o dɔa konto to, mo Wɛ le o saŋa kwi sem kua dedoa ye o jwoori o suuri jei sem de ya-nɔna. 22O ma kwei baaro wom saŋa kua kam o ma o mɔ kaane. O ma daare o ja‑o o ja ba baaro wom tei. 23Baaro wom laam ma ta o we,
“Nii mo! Amo tete dwi dem mo tento!
Nmo mɛ amo kua mo
n ma‑n ke wonto kwi sem,
ye n daare n ma a ya-nɔna yam
n ma‑n ke wonto yera yam.
Ba wó taa bwoi‑o we ‘kaane’ mo,
ba na le‑o baaro yera yam ne to ŋwaane.”#2:23 baaro de kaane beeri nye daane mo de Hiburu taane dem.
24Mo kokuri pa se baaro ná di kaane, o boboŋa daa ba tɔge o kwo de o nu boboŋa. O laam yeini o me de o kaane wom mo se banto balei ji yera dedoa.#Matiyu 19:4-6
25Baaro wom de o kaane wom maama déem maa kare ba beeri kalambwolo mo, ye chaveera ba jege-ba.
المحددات الحالية:
Pulim 2: KBG
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2020, Ghana Institute of Linguistics, Literacy and Bible Translation (GILLBT)
