Luke 2

Diburu di Sesu

1Mu dikyesi dyene, Sesar Oguste yivuunde arume batu bootsu ba mu yirini gi buloongu bu kumenge yandi muyende teendusu banduge. 2Wuteendusu wu munoongu wene bile re wu mareege. Dikyesi dyene Kirinus akumenge gu museengi wu Siri. 3Mutu mutu ayende muteendusu gu diimbu dyandi. 4Susefu ne yandi aburugu gu Nasarete gu museengi wu Galilé muyende gu Beteleme divule di David, museengi wu Sudé, avage nane mumbare abile ndaandi yi David. 5Ayende teendusu ne Mari mugyetu wu yandi abaande mu wuyonge. Mari abile ne dimi. 6Ve bile yawu guune, wisi wubure wupule. 7Re abure mwaane wu tsemi wu dibagele, ne apite yandi ne birini bi batsaande ne alatse yandi gu yitsige gikayisu biboodu mumbare gu ndagu beenyi gusebile yitsige.

Kime moosi yi Nzambi yisundigile bakyelitsi ba mandombe

8Gu tselwene gubile bakyelitsi ba mandombe gu kumu bamogenge ne wukyele mandombe ne dibati. 9Kime Fumu Nzambi yisundigile yawu, ne bunduumbe bu Nzambi bukaande yawu. Bagaangu ne wome wu mbili. 10Te kime Fumu Nzambi ayambile yawu re: «Yenu diyalabe wome, mamitse gu yambile yenu tsaangu yiyinyi yikebile yinyunge giginene gu batu bootsu. 11Bamaburile yenu muyobulitsi nemunyi gu diimbu di David, yandi re Fumu, Wusoolu ne Nzambi. 12Labanu yiliimbe gikeyabe yenu yandi: Digudagise mwaane wulatsu va yitsige gikayisu biboodu wupitu ne birini bi batsaande.» 13Vane ne vane mbili bakime bamosi ba Nzambi baputegene ne yine kime, bagitse Nzambi re: 14«Myule gu Nzambi Puungu, ne polu mu tsi yiyi gu batu babakaroondu naandi.»

Bakyelitsi ba mandombe bayende gu Beteleme

15Ve yagene bakime ba Nzambi nawu mu gabuge gu yulu, bakyelitsi ba mandombe, bayambilenge yawu ne yawu re: «Kagu wokanu gu Beteleme diyelabe ditsevyoge guune, di Nzambi atseyabise manenu.» 16Kere vane, bayende bambaangu guune, badagise Mari ne Susefu ne mwaane wu mukyeki wulatsu va yitsige gi kayisu biboodu. 17Ve labe yawu yandi, banyigule batu bootsu mootsu mayambulu yawu ne kime mu mwaane wene. 18Bootsu babayulu na yambilenge bakyelitsi ba mandombe, bagibeme. 19Te gu Mari, akyelenge, ne arangiminenge maambu mene mootsu ke gu murime wandi. 20Kere bakyelitsi ba mandombe bagabugu ne yinyunge giginene, bagitsenge Nzambi mbili mumbare balabe mootsu munoongu wumoosi nave yambile kime Nzambi.

Sesu ayakusu gu Ndagu Nzambi

21Ve pule wisi wu poombu mugyere mwaane, baluge yandi nduge re Sesu, nduge yiloonzu ngwandi ne kime Nzambi mbe asamebage dimi. 22Ve pule wisi wu Mari ne Susefu mu tsukise manyuru na rumu dyo mu mugage wu Muyise, bayende ne mwaane gu Serusalem muyakise yandi mu makake ma Fumu. 23Na rumu dyo mu mugage wu Fumu re: «Mwaane wotsu wu tsemi wu dibagele wuguyakusungu Fumu.» 24Ne baguveegenge dilagu di mabeembi mabeyi, vo di baane babeyi ba makuunde, Susefu ne Mari bavage gaandi re nane.

Simeo agitse Nzambi mu Sesu

25Dikyesi dyena, gu Serusalem, gubile dibagele ndugandi Simeo. Abile wusuungeme, ne agobisenge Nzambi, aviingilenge wuyobulu wu Israel, ne Dinyunyi Disuungeme dibile naandi. 26Simeo alubusu ne Dinyunyi Disuungeme re: «Asakenene fu gugalabe Wusoolu ne Fumu Nzambi.» 27Dinyunyi diyenze yandi gu Ndagu Nzambi, ve tayi ne nguyi Sesu baruge naandi muvage munoongu wumoosi nave rume mugage wu Fumu mu mwaane wene. 28Simeo ayake Sesu mu makake mandi, ne agabuse dinyi gu Nzambi re: 29«Fumu, ne mapape maame, sasiisi musalitsi wagu ayendingi ne polu, nave mane yambile yibene. 30Mumbare miisu mami matsemane wulabe muyobulitsi wene, 31wutsesindige yu vaganegare baane bagu. 32Mwaane wene wugubile yiveele mu tsoombuse batseengi tsyotsu, ne agubile munduumbe gu Israel yitsuku gyagu.»

Mabigu mabige Simeo

33Tayi ne nguyi Sesu bagibeme mu maambu mootsu mayambile Simeo mu mwaane. 34Simeo aveege yawu myule ne ayambile ne ngwandi Mari re: «Mwaane wuwu wuruge mulagise, ne mutelige mbili batu gu Israel, ne mubile yiliimbe gi Nzambi gikevoongulu ne mbili batu. 35Ne yu Mari, yigulabe maguge mavyogilile munoongu wumoosi ga mutu wumatubu diyenge mure mataase masweme ma mbili mirime, makeyabunu.»

Mabigu ma Ane mubigitsi

36Gubile ne mugyetu wu mubigitsi, dine dyandi Ane. Tayandi bile Fanwele gu yibaandu gi Aser. Abile amenune mbili, te ve bunuumbe bwandi atsagele ne mulumyandi ke bilime tsaambu. 37Asale mukwiili nguu ne ve dugise yandi magumi poombu ne bilime bibine. Makyesi mootsu, abilenge gu Ndagu Nzambi; ne nyangu ne dibati, agitsenge Nzambi, nusaambile, numina kugi. 38Ve yambilenge Simeo ne bakiinde ba Sesu, Ane anyingene, adagise yawu, agitse Nzambi, ne ayambilenge musamu wu Sesu gu bootsu babaviingilenge wuyobulu wu Serusalem.

Bagabuge ne Sesu gu Nasarete

39Ve mane bakiinde ba Sesu mootsu marumu yawu ne mugage wu Fumu, bagabugu gu Nasarete divule dyawu gu museengi wu Galilé. 40Gu mwaane, abangugunge ne mu bungudu, ne mu buyedi, ne gyese gi Nzambi gibile naandi.

Sesu ne bivuunde bi migage gu Ndagu Nzambi

41Batu bootsu babile ne yifu giwuvyosenge diyayi di wuyobulu gu Serusalem bilime byootsu. 42Ve bile Sesu ne digumi ne bilime bibeyi, yawu bayende naandi na vagungu ne kale mu diyayi dyene. 43Ve vu batsufu ba diyayi, Susefu ne Mari bagabugu, te baseyabe re Sesu mwaane atsesaale gu Serusalem. 44Yawu bataase re Sesu ayi mu yiloonge ne bambaatsi. Bavyose muuse wufwiimbe mu nzile, ne babaande wubene yandi. 45Ve selabe yawu yandi, bagabugu nguu ne gu Serusalem mu wubene yandi. 46Kere mu wisi wu mureru, badagise yandi gu dikaange di Ndagu Nzambi, matsagele ve ganegare bivuunde bi migage, nuyululu yawu, nudume yawu banzidu. 47Bootsu babayulungu na yambilenge yandi bagibeme mu munoongu buyedi buyagulenge yandi banzidu. 48Ve bakiinde badagise yandi, bagibeme, ngwandi amuseembe re: «Mwaane, mugi yitsevagile yetu dyotsu dine? Mane tayagu dibetsi ne kyere mumbare digonebene yu.» 49Ayagule yawu re: «Yenu digonebene me nde mugi? Yenu diseyabe re magubilenge nde gu ndagu Tata?» 50Te yawu basenyigugulu mabigu mayagulu yawu naandi. 51Kere vane, bagulumuge ne Sesu mu yende gu Nasarete. Agobisenge yawu. Maambu mene mootsu mavyoge, ngwandi akyelenge mo ke gugare murime wandi. 52Sesu, abangugunge ne mu buyedi, mu yitele ne mu gyese va wusu Nzambi ne va wusu batu.

المحددات الحالية:

Luke 2: SNQ

تمييز النص

نسخ