San Mateo 6
6
Jesús yaj'u̶xpú̶ky ko je̱'e̱ oyjya'ay'ajtu̶ñ nduunu̶mu̶ch
1“Ka'p je̱'e̱ oyjya'ay'ajtu̶ñ mduungu̶xy ma je̱'e̱ ja'ay winduuy ajku̶xyu̶ñ, neby je̱'e̱ wiingpu̶ xy'ijxku̶x xytyú̶kxku̶xu̶chu̶ñ. Pu̶nu̶ mduungu̶xypy du'un, ka'p je̱'e̱ mDios Teedy ni tii oy'ajtu̶ñ xymyooygyu̶xu̶ch je̱'e̱ mu̶dyiibu̶ jiiby tzajpjooty yajpaatpu̶ñ.
2“Paady ko naty je̱'e̱ ayoobu̶du̶jk mbube̱jtku̶xy je̱'e̱ mu̶dyiibu̶ ku̶xyu̶ tijaty yajmayjyajtku̶xpu̶ñ, ka'p du'un xii yaa mmu̶dyaagwa'kxku̶xu̶ch neby je̱'e̱ ja'ay tzo'oydyu'untúk y'adu̶u̶tzku̶xyu̶ñ ma je̱'e̱ naymyujktaaktu̶ñ y nu̶u̶'aa tu'u'aa, wan je̱'e̱ ja'ay du'un kyu'umaayu̶gu̶xu̶ch. Janch tu̶y'ajtu̶ñ du'un nnu̶maaygyu̶xy, tu̶ y'oy'ajtu̶ñ je̱'e̱ ya naaxwiiñ paatku̶xy. 3Miich ajku̶xy ko naty je̱'e̱ ayoobu̶du̶jk mbube̱jtku̶xy je̱'e̱ mu̶dyiibu̶ ku̶xyu̶ tijaty yajmayjyajtku̶xpu̶ñ, ka'p du'un ni pu̶n mnu̶maaygyu̶xu̶ch, ni je̱'e̱ mu̶dyiibu̶ oy mmu̶dnaymyu̶gu'ug'ajtu̶byu̶ñ ajku̶xy, 4amechu̶ mye̱jku̶xu̶ch. Y je̱'e̱ mDios Teedy mu̶dyiibu̶ ijxp ko amechu̶ mye̱jkku̶xy, je̱' je̱'e̱ oy'ajtu̶ñ xymyooygyu̶xu̶p.#6.4 Nije̱' jaaybyu̶du̶jk myu̶naangu̶xy: mayjya'ayjyooty.
Jesús yaj'u̶xpú̶ky neby je̱'e̱ ja'ay Dios mu̶baad mu̶bu̶jktzoyu̶ñ
(Lc 11.2-4)
5“Ko naty je̱'e̱ Dios miich mmu̶bu̶jktzoogu̶xy, ka'p du'un m'adu̶u̶tzku̶xu̶ch neby je̱'e̱ ja'ay tzo'oydyu'untúkpu̶ ajku̶xyu̶ñ, mu̶dyiibu̶ du'un janch tzojkku̶xpu̶ñ mu̶bu̶jktzoogu̶xy je̱'e̱ Dios tu̶na'a mayjya'ayjyooty y majaty je̱'e̱ esquínu̶ju̶ñ, wan je̱'e̱ ja'ay du'un y'ijx tyú̶kxu̶gu̶xu̶ch. Janch tu̶y'ajtu̶ñ du'un nnu̶maaygyu̶xy tu̶ y'oy'ajtu̶ñ je̱'e̱ ya naaxwiiñ paatku̶xy. 6Peru̶ miich ajku̶xy ko naty je̱'e̱ Dios mmu̶bu̶jktzoogu̶xy, tu̶gu̶u̶ygyu̶x mdu̶gooty y m'agu̶u̶ygyu̶xu̶py je̱'e̱ mdu̶jk y mmu̶bu̶jktzoogu̶x je̱'e̱ mDios Teedy adu'uktuuy. Y je̱'e̱ mDios Teedy ajku̶xy mu̶dyiibu̶ ijxp mu̶dyiibu̶ amechu̶ mduungu̶xypyu̶ñ, je̱' je̱'e̱ oy'ajtu̶ñ xymyooygyu̶xu̶p.#6.6 Nije̱' jaaybyu̶du̶jk myu̶naangu̶xy: mayjya'ayjyooty.
7“Y ko naty je̱'e̱ Dios mmu̶bu̶jktzoogu̶xy ka'p je̱'e̱ m'ayuuk mni'igapxu̶'u̶y'o'kku̶xu̶ch ja'anaam ja'atzojk, neby je̱'e̱ ja'ay ajku̶xyu̶ñ mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ, je̱' du'un je̱'e̱ myu̶naangu̶xpu̶ ko y'u̶may kyapxmayu̶u̶ygyu̶xu̶ch mu̶'it tijy je̱'e̱ Dios da'a ni'igyu̶ y'amdo'ijtu̶xu̶ch ajku̶xy je̱'e̱ y'ayuuk ajku̶xy. 8Miich ajku̶xy ka'p du'un m'adu̶u̶tzku̶xu̶ch neby je̱' ajku̶xyu̶ñ, je̱' ko ñejwu̶u̶by je̱'e̱ mDios Teedy ajku̶xy tii miich myajmayjyajtku̶xypyu̶ñ ma naty miich ka'anu̶ m'amdoowu̶yñu̶ ajku̶xy. 9Du'un je̱'e̱ mmu̶bu̶jktzoogu̶xu̶ch:
‘Dios Teedy, miich mu̶dyiibu̶ tzajpjooty tzu̶naaybyu̶ñ,
windzu̶gu̶'u̶y je̱'e̱ mxu̶u̶ miich y'ity.
10Wan je̱'e̱ m'ane̱'e̱mu̶ñ ya miñ.
Wan je̱'e̱ mdzojku̶ñ ya naaxwiiñ yajkuydyúñ
ma je̱'e̱ ja'ay jyoot wyinma'aydyu̶ñ,
du'un neby jiiby tzajpjooty yajkuydyúñu̶ñ.
11Moogyu̶ch je̱'e̱ ngaayu̶ñ n'uuku̶ñ cham ajku̶xy mu̶dyiibu̶
u̶u̶ch nyajmayjyajtku̶xypyu̶ñ.
12Winmé̱kxu̶gyu̶ch je̱'e̱ nga'oy'ajtu̶ñ ajku̶xy mu̶dyiibu̶ u̶u̶ch
tu̶ nduungu̶xyu̶ñ,
du'un neby u̶u̶ch tu̶ nwinmé̱kxku̶xyu̶ñ
je̱'e̱ mu̶dyiibu̶ u̶u̶ch xykya'amu̶'oy'ajtpu̶ñ ajku̶xy.
13Ka'p m'a'ixu̶'u̶y ko u̶u̶ch je̱'e̱ nwinma'añ tyu̶góyu̶ch ajku̶xy,
yajni'iwaadzku̶ch ni'igyu̶ ajku̶xy ma je̱'e̱ ju̶bú̶kpu̶ju̶ñ.’
[Je̱' ko miich je̱'e̱ ane̱'e̱mu̶ñ, je̱'e̱ mu̶k'ajtu̶ñ
y je̱'e̱ ku'umaayu̶ñ wiinu̶u̶xu̶u̶ mmu̶u̶d. Jaanch adaa du'un.]#6.13 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.
14“Pu̶nu̶ mwinmé̱kxku̶xypy je̱'e̱ wiingpu̶ je̱'e̱ mu̶dyiibu̶ xykya'amu̶'oy'ajtpu̶ñ ajku̶xy, nan xywyinmé̱kxku̶xu̶p je̱'e̱ mDios Teedy nandu'un ajku̶xy je̱'e̱ mu̶dyiibu̶ jiiby tzajpjooty yajpaatpu̶ñ. 15Pu̶nu̶ ka'p je̱'e̱ wiingpu̶ mwinmé̱kxku̶xy, nan ka'p je̱'e̱ mDios Teedy je̱'e̱ mnu̶u̶ mboky miich xywyinmé̱kxu̶ch ajku̶xy.
Jesús yaj'u̶xpú̶ky neby je̱'e̱ ja'ay mu̶baad y'ayuu'átyu̶ñ
16“Ko naty miich m'ayuu'ajtku̶xy, ka'p je̱'e̱ mwiin mju̶jp taj may mbu̶daakku̶xu̶ch neby je̱'e̱ ja'ay tzo'oydyu'untúkpu̶ ajku̶xyu̶ñ, je̱'e̱ mu̶dyiibu̶ du'un naybyu̶daaku̶gu̶xp taj may, wan je̱'e̱ ja'ay du'un y'ijxu̶gu̶xu̶ch tyú̶kxu̶gu̶xu̶ch ko y'ayuu'ajtku̶xy. Janch tu̶y'ajtu̶ñ du'un nnu̶maaygyu̶xy tu̶ y'oy'ajtu̶ñ je̱'e̱ ya naaxwiiñ paatku̶xy. 17Y ko naty miich m'ayuu'ajtku̶xy, naywyinbuj nayjyu̶jppúju̶gu̶x y nay'oon naygyáxu̶gu̶x, 18ka'pu̶ je̱'e̱ ja'ay nejwu̶u̶ygyu̶xu̶ch ko m'ayuu'ajtku̶xy, je̱'e̱ mDios Teedy je̱'e̱ je'eyu̶ nejwu̶'u̶waamb ajku̶xy je̱'e̱ mu̶dyiibu̶ ijxp, mu̶dyiibu̶ adu'uktuuy mduungu̶xypyu̶ñ,#6.18 Nije̱' wiingpu̶ versión myu̶na'añ: y je̱'e̱ mDios Teedy ajku̶xy mu̶dyiibu̶ ijxp, mu̶dyiibu̶ adu'uktuuy mduungu̶xypyu̶ñ. y je̱' je̱'e̱ oy'ajtu̶ñ xymyooygyu̶xu̶p.#6.18 Nije̱' wiingpu̶ versión myu̶na'añ: mayjya'ayjyooty.
Je̱'e̱ jugy'ajtu̶ñ tzajpjootypyu̶
(Lc 12.33-34)
19“Ka'p je̱'e̱ meeñ ya naaxwiiñ nigoo myajni'ibe̱du̶u̶ygyu̶xy ma je̱'e̱ ukxytyu̶u̶ng yajwindu̶góyu̶ñ y ma ku̶xyu̶ tijaty wyindu̶goyu̶ñ, y ma je̱'e̱ me̱e̱tzpu̶du̶jk tyu̶gu̶u̶ygyu̶xyu̶ñ. 20Je̱'e̱ jugy'ajtu̶ñ tzajpjootypyu̶ miich ni'igyu̶ nijoot'ajtku̶x, ma je̱'e̱ ukxytyu̶u̶ng ka'p yajwindu̶góyu̶ñ y ma ka'p tii wyindu̶goyu̶ñ, y ma je̱'e̱ me̱e̱tzpu̶du̶jk ka'p tyu̶gu̶u̶ygyu̶xyu̶ñ. 21Pu̶nu̶ mu̶u̶d je̱'e̱ mgumeeñ'ajtu̶ñ miich ajku̶xy ya naaxwiiñ, nan yaayu̶ je̱'e̱ mjoot mwinma'añ je'eyu̶ ajku̶xy.
Je̱'e̱ tu̶y'ajt mu̶dyiibu̶ du'un neby je̱'e̱ lámpara ma je̱'e̱ njugy'ajtu̶ñ ajtu̶mu̶ñ
(Lc 11.34-36)
22“Je̱'e̱ wiin du'un je̱' neby je̱'e̱ lámpara ma je̱'e̱ ni'kxu̶ñ, y du'unu̶tz pu̶nu̶ oy je̱'e̱ mwiin miich ajku̶xy, nan ku̶xyu̶ je̱' mni'kx mu̶dajtku̶xy je̱'e̱ tu̶kxu̶ñ jaju̶ñ; 23peru̶ pu̶nu̶ ka'p je̱'e̱ mwiin y'óyu̶ch ajku̶xy, nan agootztuum je̱'e̱ mni'kx ku̶xyu̶ yajpaatku̶xy. Y pu̶nu̶ awimbijtp je̱'e̱ mdu̶y'ajt du'un ajku̶xy neby je̱'e̱ koodzpu̶ju̶ñ, ¡janch ni'igu̶ agoodztuum je̱'e̱ mni'kx du'un wyu̶'u̶mgu̶xnu̶!
Dios y je̱'e̱ meeñ
(Lc 16.13)
24“Ni pu̶n je̱'e̱ wyindzú̶n mu̶baad me̱tzk ka'amu̶dúñ; je̱' ko tu'ug je̱'e̱ u̶xtíju̶ch y tu'ug tzógu̶ch, o tu'ug kapxymyu̶dówu̶ch y tu'ug ka'akapxymyu̶dówu̶ch. Miich ajku̶xy ka'p je̱'e̱ Dios du'un mu̶baad mmu̶duungu̶xy, y cham naty je̱'e̱ kumeeñ'adu̶u̶ mjanch'adzojkku̶xy.
Dios kyweentu̶'ajtypy je̱'e̱ y'ung y'ana'k
(Lc 12.22-31)
25“Paady u̶u̶ch miich du'un nnu̶maaygyu̶xy: Ka'p mnidaj mnimaaygyu̶xy tii mgaaygyu̶xu̶py m'uukku̶xu̶byu̶ñ, je̱'e̱ mnijugy'ajtu̶u̶k ajku̶xy, ni je̱'e̱ wit tukxy tii myajtuungu̶xu̶byu̶ñ. ¿Nej ka'p je̱'e̱ jugy'ajtu̶ñ ni'igyu̶ choowu̶ch ni'igu̶ ka'p je̱'e̱ kaagy jú̶kxyxu̶ñu̶ba, y je̱'e̱ ni'kx kopt ni'igu̶ ka'p je̱'e̱ wit túkxyxu̶ñu̶ba? 26Ijxku̶x je̱'e̱ joon muuxy ajku̶xy mu̶dyiibu̶ ku̶xp ke̱e̱gwu̶dijtku̶xpu̶ñ; ka'p je̱'e̱ ñiip tyuungu̶xy y ka'p chijkku̶xy tyuungu̶xy y nan ka'p je̱'e̱ pyu̶da'agy pu̶gu̶'kku̶xy ma je̱'e̱ che̱'e̱x ajku̶xyu̶ñ; y miich mDios Teedy je̱'e̱ yajjú̶kxp yajpu̶jkku̶xp je̱'e̱ mu̶dyiibu̶ jiiby tzajpjooty yajpaatpu̶ñ. ¡Y miich ajku̶xy jaktzoowu̶ miich ni'igyu̶ ajku̶xy ka'p je̱'e̱ joon muuxy ajku̶xyñu̶ba! 27Oy pu̶n nigoo mu̶j ku̶je̱e̱ jya'ataj jya'amáyu̶ch, ka'p jii ni pu̶n ma miich ajku̶xyu̶ñ pu̶n jádu̶bu̶ñ neby je̱'e̱ jyugy'ajtu̶ñ jak'yajyónu̶chu̶ñ ja'adu'k hooru̶.#6.27 Neby je̱'e̱ jyugy'ajtu̶ñ jak'yajyónu̶chu̶ñ ja'adu'k hooru̶: nije̱' wiingpu̶ jaaybyu̶du̶jk myu̶naangu̶xy: Neby je̱'e̱ ñi'kx kyopt jak'yajyónu̶chu̶ñ tu'kku̶'u̶nuux.
28“¿Y ti je̱'e̱ wit tukxy ko miich mnidaj mnimaaygyu̶xy? Ijxku̶x yu̶'u̶ aaybyu̶jy ujtzpu̶jy neby yeegyu̶ñ tunjooty koptjooty: ka'p yu̶'u̶ tyuungu̶xy ni ka'p xyuuygyu̶xy jyú̶pku̶xy. 29Peru̶ u̶u̶ch miich nnu̶maaygyu̶xypy ko ni je̱'e̱ ane̱'e̱mbu̶ Salomón mu̶u̶d ku̶xyu̶ je̱'e̱ oyjyatypyu̶ wyit tyukxy, ka'p je̱'e̱ du'un ñayxojxu̶ neby adayaaba aaybyu̶jy ujtzpu̶jyu̶ñ. 30Pu̶nu̶ Dios je̱'e̱ du'un xojxp yu̶'u̶ aay yu̶'u̶ ujtz mu̶dyiibu̶ cham jajtu̶bu̶ñ ma yu̶'u̶ tunkoptu̶ñ, y kujaboom naty yajno'knu̶ ma je̱'e̱ hoornu̶ju̶ñ, ¡pues miich xyñi'igu̶xóxu̶p miich ja'ay ajku̶xy, je̱'e̱ ajku̶xy mu̶dyiibu̶ we̱e̱nu̶ mu̶bu̶jkku̶xpu̶ñ! 31Y paadyu̶tz ka'p mdajku̶xy mmaaygyu̶xy, mnayyajtu̶u̶wu̶gu̶xy: ‘¿Ti ngaayu̶mu̶py n'uuku̶mu̶py ajku̶xy?’ o ‘¿Ti n'uuku̶mu̶py njú̶kxu̶mu̶py ajku̶xy?’ o ‘¿Ti nwit'ajt ndukxy'ajtu̶mu̶py ajku̶xy?’ 32Adaa du'umbu̶ je̱'e̱ ja'ay ku̶xyu̶ ñidajy ñimaaygyu̶xypy je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ, peru̶ miich ajku̶xy mu̶u̶d miich je̱'e̱ mDios Teedy ajku̶xy mu̶dyiibu̶ tzajpjooty yajpaatpu̶ñ, mu̶dyiibu̶ nejwu̶u̶ybyu̶ñ ko miich ku̶xyu̶ tijaty myajmayjyajtku̶xy. 33Paadyu̶tz jayu̶jp mu̶joottu̶gooygyu̶x je̱'e̱ Dios y'ayuuk tyu̶y'ajt y mguydyuungu̶xu̶ch je̱'e̱ mu̶dyiibu̶ je̱'e̱ Dios chojkypyu̶ñ, y mu̶'ítnu̶tz ku̶xyu̶ m'ijxku̶xu̶ch mbaatku̶xu̶ch mu̶dyiibu̶ naty myajmayjyajtku̶xypyu̶ñ. 34Ka'p mdajku̶xy mmaaygyu̶xy tii jaboom miimb ku̶daakpu̶ñ, je̱' ko je̱'e̱ jaboombu̶ jii'adaamb je̱'e̱ tiempo tii mnidaj mnimáyu̶byu̶ñ ajku̶xy. Je̱' ko jaboom jaboom je̱'e̱ taju̶ñ maayu̶ñ yajpaady, y paadyu̶tz mu̶jootkujk'ajtku̶x je̱'e̱ taju̶ñ maayu̶ñ mu̶dyiibu̶ cham mmu̶najx mgu'ubu̶jkku̶xypyu̶ñ.
المحددات الحالية:
San Mateo 6: MIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
