San Mateo 17
17
1Kududujk xu̶u̶ je̱'e̱ Jesús mu̶dtzoñ je̱'e̱ Pedro, mu̶u̶d je̱'e̱ Santiago y mu̶u̶d je̱'e̱ Juan, je̱'e̱ Santiago pyuya'ay, y chi ñu̶kxy mu̶u̶d je̱' ajku̶xy ma tu'ug kopt janch kú̶xpu̶ju̶ñ. 2Y jim je̱'e̱ Jesús ñi'kx yajtu̶gajch ma je̱' wyinduuy ajku̶xyu̶ñ. Du'un je̱'e̱ wyiiñjyu̶jp najty y'añ neby je̱'e̱ xu̶u̶ y'añu̶ñ, y je̱'e̱ wyit janch poob je̱'e̱ oy jyaty neby je̱'e̱ jaju̶ñ. 3Chi je̱'e̱ Moisés ijxku̶xy mu̶u̶d je̱'e̱ Elías mu̶dkapx mu̶dmu̶dyaakku̶xy najty je̱'e̱ Jesús. 4Chi je̱'e̱ Pedro je̱'e̱ Jesús nu̶maay:
—Windzú̶n, ¡oy du'un ko u̶u̶ch nyaaju̶ch ajku̶xy! Pu̶nu̶ mdzojkypy, n'okkojyu̶ch tu̶jkkémy tu̶gu̶u̶g: tu'ug miich mje̱'e̱'ádu̶ch, tu'ug je̱'e̱ Moisés je̱'e̱'ádu̶ch y ja'adu'ug je̱'e̱ Elías je̱'e̱'ádu̶ch.
5Cham najty je̱'e̱ Pedro kyapxy myu̶dya'agyñu̶ ko je̱'e̱ jok ye̱e̱g ñaaxku̶daaky janch ajajp mu̶dyiibu̶ yajni'idu̶gooydyaayu̶ju̶ñ ajku̶xy, y mu̶'it je̱'e̱ ayuuk tu'ug jokjooty yajmu̶dooy, myu̶naañ: “U̶u̶ch adaa n'ung mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, mu̶dyiibu̶ u̶u̶ch tu̶ nwin'ixyu̶ñ:#17.5 Nije̱' wiingpu̶ versión myu̶na'añ: janch jootkujku̶ch nayjyu̶wu̶'u̶yii mu̶u̶d miich. amdo'ijtu̶ ajku̶xy je̱' y'ayuuk.”
6Ko je̱'e̱ discípulotu̶jk du'un mu̶dooy ajku̶xy, chi ñayñajtzkojxtu̶na'awu̶u̶yu̶ ajku̶xy naaxkú̶xy, y mu̶k jyanchtzu̶gu̶u̶ygyu̶xy. 7Chi je̱'e̱ Jesús ñimiinu̶ ajku̶xy, chi ñi'idoonu̶ ajku̶xy y ñu̶maayu̶gu̶xy:
—Pu̶du̶'kku̶x, ka'p mdzu̶gu̶u̶ygyu̶xy.
8Y ko y'ijxu̶'kku̶xy, ka'p ni pu̶n ijxku̶xy, je'eyu̶ je̱'e̱ Jesús naydyu'umbajk ijxku̶xy.
9Mu̶najkku̶xnu̶py najty koptku̶xp, chi je̱'e̱ Jesús yajni'ipu̶jku̶ ajku̶xy:
—Ka'p du'un ni pu̶n mnu̶maaygyu̶xu̶ch neby tu̶ m'ijxku̶xyu̶ñ, u̶xtu̶ koonu̶ u̶u̶ch je̱' je̱'e̱ ja'ay mu̶dyiibu̶ tzon tzajpjooty naty tu̶ njuugypyú̶kyu̶ch.
10Mu̶'it je̱'e̱ discípulotu̶jk je̱'e̱ Jesús yajtu̶u̶gu̶xy:
—¿Ti je̱'e̱ Dios y'ane̱'e̱mu̶ñ windzu̶ndu̶jk ko du'un myu̶naangu̶xy ko je̱'e̱ Elías jayu̶jp minaamb je̱'e̱ mu̶dyiibu̶ jékyu̶p tzu̶naayu̶ñ y ka'p jye̱'e̱ju̶ch je̱'e̱ Cristo?
11Y chi je̱'e̱ Jesús y'adzooy:
—Tu̶y'ajtu̶ñ je̱'e̱ du'un ko je̱'e̱ Elías jayu̶jp myínu̶ch, y ka'p jye̱'e̱ju̶ch je̱'e̱ Cristo, y ko je̱' ku̶xyu̶ yaj'oyu̶ydya'awu̶p. 12Peru̶ u̶u̶ch miich nnu̶maaygyu̶xypy ko je̱'e̱ Elías tu̶ je̱'e̱ ya y'oy, y je̱' ka'p je̱' u̶xkajpy ajku̶xy, y tyuungu̶x je̱' neby je̱'e̱ y'aa jyoot najty ku̶xyu̶ timychojkku̶xyu̶ñ. Y nandu'unu̶tz u̶u̶ch je̱' je̱'e̱ ja'ay mu̶dyiibu̶ tzon tzajpjooty n'ayówu̶chu̶ch ma yu̶'u̶ kyu̶'u̶'aam ajku̶xyu̶ñ.
13Mu̶'it je̱'e̱ discípulotu̶jk oy winju̶wu̶u̶ygyu̶xy ko je̱'e̱ Jesús najty du'un je̱' yajmu̶dmu̶dyaaku̶gu̶xp je̱'e̱ Juan Bautista.
Jesús ye̱e̱g'ana'k tu'ug yajtzo'ogy mu̶dyiibu̶ najty ka'a'oybyu̶mu̶u̶d
(Mc 9.14-29; Lc 9.37-43)
14Ko oy jya'tku̶xy ma je̱'e̱ mayjya'ay najtyu̶ñ, chi je̱'e̱ Jesús je̱'e̱ ja'ay tu'ug ñimiinu̶, y chi ñayñajtzkojxtu̶na'awu̶u̶yu̶ ma je̱' wyinduuyu̶ñ y ñu̶maayu̶:
15—Windzú̶n, u̶u̶ch adaa n'ung pa'a''ayoowu̶k, mo'tp adaa y mu̶k jyanch'ayoy, janch ka'anaag'ook yu̶'u̶ tu̶ jyu̶u̶ndu̶gu̶'u̶y y tu̶ ñu̶u̶du̶gu̶'u̶y. 16Chaa u̶u̶ch je̱'e̱ mdiscípulotu̶jk tu̶ nja'ayajnimiingu̶xy, peru̶ ka'p je̱'e̱ tu̶ mu̶madaakku̶xy neby yajtzookku̶xu̶chu̶ñ.
17Chi je̱'e̱ Jesús y'adzooy:
—¡Miich ja'ay ajku̶xy mu̶dyiibu̶ ka'amu̶bu̶jkku̶xpu̶ñ y ka'amu̶jpu̶daakku̶xpu̶ñ je̱'e̱ Dios y'ayuuk tyu̶y'ajt! ¿Naag xu̶u̶ naag po'o da'a n'okjakmu̶d'ijtku̶xu̶ch? ¿Naag xu̶u̶ naag po'o da'a n'okjakmu̶me̱kxtujkku̶xu̶ch? Mu̶miingu̶x yu̶'u̶ ye̱e̱g'ana'k yaa.
18Mu̶'it je̱'e̱ Jesús je̱'e̱ ka'a'óybyu̶ u̶x'ojy y yajni'iwaach yajku'uwaach je̱'e̱ ye̱e̱g'ana'k y yajtzooky mu̶'ityu̶.
19Kujeky je̱'e̱ discípulotu̶jk je̱'e̱ Jesús oy abu̶ky mu̶dmu̶dyaakku̶xy, y chi yajtu̶u̶gu̶xy:
—¿Ti u̶u̶ch ko u̶u̶ch ka'p tu̶ nmu̶madaakku̶xy neby u̶u̶ch je̱'e̱ ka'a'óybyu̶ nyajpu̶dzu̶u̶mgu̶xu̶chu̶ñ?
20Chi je̱'e̱ Jesús ñu̶maayu̶ ajku̶xy:
—Je̱' ko je̱'e̱ mu̶bu̶jku̶ñ miich we̱e̱nu̶ mmu̶u̶du̶ch ajku̶xy. Janch tu̶y'ajtu̶ñ du'un nnu̶maaygyu̶xy ko u̶xyu̶py je̱'e̱ mu̶bu̶jku̶ñ miich m'okmu̶dajtku̶xy oy u̶xyu̶py timydyu'uñdyu̶'ajty neby tu'ug pi'kmostázu̶ pajku̶ñ, mnu̶maaby u̶xyu̶py adayaaba kopt ajku̶xy: ‘Ju̶gue̱'e̱g yaa y nu̶kx wiingtuum’, y ju̶gue̱e̱kp u̶xyu̶py je̱'e̱ kopt. Ka'p u̶xyu̶py ni tii chípu̶ch mu̶u̶d miich ajku̶xy. 21[Peru̶ adaa du'umbu̶ ka'a'óybyu̶ ajku̶xy ka'p yu̶'u̶ du'uñyu̶ pyu̶dzu̶my ajku̶xy, je̱' yu̶'u̶ chojkypy ko je̱'e̱ Dios nmu̶bu̶jktzoowu̶mu̶ch y n'ayuu'ajtu̶mu̶ch ajku̶xy].#17.21 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.
Jesús mu̶me̱jtz'ook nigapxy ko y'o'oga'añ
(Mc 9.30-32; Lc 9.43-45)
22Cham najty kipxy wyu̶dijtku̶xy jim Galilea naaxjooty, chi je̱'e̱ Jesús ñu̶maayu̶ ajku̶xy:
—U̶u̶ch je̱' je̱'e̱ ja'ay mu̶dyiibu̶ tzon tzajpjooty yajku̶'u̶yé̱gu̶bu̶ch ma u̶u̶ch je̱'e̱ nmu̶dziptu̶jk kyu̶'u̶'aam ajku̶xyu̶ñ, 23y je̱' u̶u̶ch xyaj'o'ogu̶p ajku̶xy; peru̶ kudu̶gu̶u̶g xu̶u̶ u̶u̶ch ja'adu'ook njuugypyú̶ku̶ch.
Ko adaa ayuuk du'un mu̶dooy ajku̶xy, chi tyajtu̶gu̶u̶y myaaydyu̶gu̶u̶ygyu̶xy.
Ko je̱'e̱ mu̶jtzajptu̶jk yajni'igube̱jttu'udy
24Ko je̱'e̱ Jesús y mu̶u̶d je̱'e̱ dyiscípulotu̶jk oy jya'tku̶xy jim Capernaum, chi je̱'e̱ yajkugube̱jtpu̶du̶jk mu̶dyiibu̶ je̱'e̱ mu̶jtzajptu̶jk yajni'igube̱jttuutku̶xpu̶ñ je̱'e̱ Pedro oy ijxku̶xy y chi yajtu̶u̶gu̶xy:
—¿Nej ka'p je̱'e̱ mWindzú̶n je̱'e̱ mu̶jtzajptu̶jk ni'igube̱jttu'udyu̶?
25Chi je̱'e̱ Pedro y'adzooy:
—Du'un, ñi'igube̱jttuutypy je̱'.
Y ko je̱'e̱ Pedro tyu̶jktu̶gu̶u̶y, chi je̱'e̱ Pedro je̱'e̱ Jesús jayu̶jp myu̶gapxu̶, ñu̶maayu̶:
—¿Y miich Simón neby m'okmu̶naambu̶? ¿Pu̶n je̱'e̱ mu̶j'ane̱'e̱mbu̶ ajku̶xy, mu̶dyiibu̶ ya yajpaatku̶xpu̶ñ ma adayaaba naaxwiiñu̶ñ ku̶xyu̶ tii yajni'igube̱jttuutku̶xypy y yaj'ajuuyu̶u̶ygyu̶xypy: je̱'e̱ kyu̶'u̶mja'ay ajku̶xy o je̱'e̱ wiingja'ay ajku̶xy?
26Chi je̱'e̱ Pedro y'adzooy:
—Je̱'e̱ wiingja'ay ajku̶xy.
Chi je̱'e̱ Jesús jyakmu̶naañ:
—Y du'unu̶tz, ka'p je̱'e̱ kyu̶'u̶mja'ay mu̶baad nidu'uñdyu̶ ni'igube̱jttuutku̶xy je̱'e̱ tzajptu̶jk. 27Peru̶ ka'pu̶ u̶u̶ch ni pu̶n nyajjootma'adu̶ch, nu̶kx ma je̱'e̱ mejyu̶ñ, pu̶da'ag je̱'e̱ mxu'uñdy mejyjyooty y wompu̶dzu̶m je̱'e̱ akx mu̶dyiibu̶ naty jayu̶jp tu̶ myachu̶ñ, y ma je̱'e̱ akx awaku̶ñ jiiby je̱'e̱ meeñ tu'ug mbaadu̶ch; y mu̶du̶y'ádu̶p je̱' xyñi'igube̱jttu'udu̶chu̶ch y mnayñi'igube̱jttu'udu̶u̶ju̶ch miich; mu̶nu̶kx je̱'e̱ meeñ y ni'igube̱jttu'ud.
المحددات الحالية:
San Mateo 17: MIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
