मत्ती 17
17
येशूकी कुसो ग्युरक्यो
(मर्क ९:२-१३; लूक ९:२८-३६)
1ङ्यिहमा ट़ूह तिङले येशूगी पत्रुस, याकूब दाङ खोगी नो़ह यूहन्नाला राहङ ङ्याम्बुराङ नोम फेप्ती काहङ थोम्बु च्यी़ला फेप नाङसीन। 2ओ़हला लेप फान्ज्यो स्याहप्च्यीया़गी ताताबा काहङला येशूकी कुसो ग्युर्सीन। येशूगी स्याहल्दोङ ङ्यिहमा ल़ेहमुराङ येहसेर क्याहप्सीन ओहले येशूकी नाहम्सादी येहपा छ्या़दी कार्पु काहल्सीन। 3ओहले याहङमे-याहङ मोशा दाङ एलिया येशू ङ्याम्बु स्याहल सुङदी ज़्य़ूक्यो थोङसीन। 4दि थोङदी पत्रुसगी येशूला मासीन, “चो़वो, ङ्यिहॱआङ देला ओहङग्योदी काहजे या़हबु काहल्सीन दुबा। राहङगी थुला येहसीमानानी ङाहगी देला ज़्य़ूसा ग्या़ सुम ज़ोएँ, च्यी़ राहङला, च्यी़ मोशाला ओहले च्यी़दी एलियाला!”
5पत्रुसगी दि ल़ेहमु पेहती ताम म़ेदी तेहकेमु येहपा छ्या़क्योगी मुक्पा ओहङसीन ओहले मुक्पा थेन ओहङदी खुङ थो़ला टिहप्सा क्याहप्सीन, ओहले मुक्पा नाहङलेगी दि ल़ेहमु सुङ-क़े च्यी़ थ़ेसीन, “दि ङाहगी च्याहम्बु पेहक्योगी स़ेबु यिहन, खो ङ्याम्बु ङाह ज्यिबुराङ काहसो येह। खोगी माक्यो ख्याया़गी ङ्यिहन्दोङ।” #वउत २२:२; भज २:७; यशै ४२:१; मत्ती ३:१७; १२:१८; मर्क १:११; लूक ३:२२; व्य १८:१५; २ पत्र १:१७,१८ 6दि सुङ-क़े थे़दी स्याहप्च्यीया़ ज्यी़दी साला खेप्चु क्याहप्सीन। 7यिहॱनाङ येशू फेप्ती खुङया़ला दे़दी सुङ नाङसीन, “लाहङदोङ, मा़हन्ज्यी!” 8ओहले खुङया़गी लाहङदी ताएँमुनी येशू च्यी़ला मिहम्बा, लेहमेन सुॱलाङ माहथोङ।
9लाहलेगी थुर्चु फाप नाङगेमु येशूगी खुङया़ला सुङ नाङसीन, “त़ेदोङ, मिहगी स़ेबु स्यिक्योलेगी सोम्बो मा़हलोह थु ख्याया़गी थोङग्योकी दि ज्याल्गाकी केच्या सुॱलाङ माहस्ये म़ेदी का नाङसीन।”
10स्याहप्च्यीया़गी येशूला दि ल़ेहमु म़ेदी टी़हसीन, “छ्य़े-ठिमकी लोबेनया़गी च्यिबे एलियाॱराङ तोहङले ओहङ कोहकें म़ेदी माएँ?”#मला ४:५ 11येशूगी खुङया़ला सुङ नाङसीन, “यिहम्बा, तेहम्बाराङ थाम्ज्यीराङ तामया़ च्येच्येला एलिया ओहङॱराङ कोहकें। 12त़ेदोङ, ङाह ख्याया़ला माएँ, एलियानी ओहङ सिहन्दी येह। यिहॱनाङ मिहया़गी खोला ङोह मा़हस्ये ओहले खुङया़गी खोला सेमला ने़जेबा पेहसीन ओहले मिहगी स़ेबुॱलाङ खुङया़गी ओ़ह ल़ेहमुराङ पेहती सेच्ये येह।”#मत्ती ११:१४ 13ओहले येशूगी बप्तिस्मा तेर्केन यूहन्नाकी तेहन्दाला स्याहल सुङ नाङग्यो दुबा म़ेदी स्याहप्च्यीया़गी ह्अ कोहसीन।
येशूगी ल्हेन्डी स्य़ूहक्यो स्यारा च्यी़ला टा़ह च्य़ू नाङग्यो
(मर्क ९:१४-२९; लूक ९:३७-४३)
14ओहले खुङ फ़ेबेॱया मिह मिह-माहङ येहकें ग्या़ला लो़हदी फेप्नाङगेमु मिह च्यी़गी येशूकी स्याहपला खेप्चु क्याहप्ती मासीन, 15“ओ़ चो़वो, ङाहगी पुहला निङज्यी जे नाङदोङ! ज़ा नाहजा क्याहप्क्यो सोङबे खोगी ज्यिबुराङ तुहक्पु ङ्युहङदी येहबा। ओहले खो याहम्बी याहम्बीलाॱराङ नाहम मेहला छ्यिकें नाहम छ्युला छ्यिकें 16ङाहगी खोला राहङगी स्याहप्च्यीया़साला ख्योङसीन, यिहॱनाङ खुङया़गीनी टा़ह च्य़ू मा़हखु।” 17येशूगी सुङ नाङसीन, “काहन्डुमु यिह-छ्य़े म़ेहबा दाङ नोहङग्योगी क्यिहपाया़, काहजे ङ्यिहमा थु ङाह ख्याया़ ङ्याम्बु तेहच्ये? नाहम थु ङाहगी ख्याया़ला ना़ज्ये? केरे खोला ङाहसाला ख्येर-स्यो ले!” 18ओहले येशूगी ओ़ह ल्हेन्डीला काप्क्येन नाङदी ङ्ये नाङसीन ओहले ओ़ह स्यारा लाहम्साङराङ टा़हसीन।
19तिङले स्याहप्च्यीया़गी येशूला ग्या़ यिङबुला ओहङदी टी़हसीन, “ङ्यिहगीदी ओ़ह ल्हेन्डीला च्यिबे तेन मा़हखुबा यिहम्बा ले?” 20ओहले येशूगी सुङ नाङसीन, “ख्याया़गी तेहपा ङ्युहङा येहकें सोङबे यिहम्बा। तेहम्बाराङ ङाह ख्याया़ला माएँ, ख्याया़ ङ्याम्बु राइ-सेनगी बुदी जेबा तेहपा येहसीमाना ओ़ह काहङदोला देलेगी फार सोङ म़ेदी माॱनाङ ओ़ह डोज्ये येह ओहले ख्याया़गी च्यि माॱनाङ पेह ख़ूज्ये येह।”#मत्ती २१:२१; मर्क ११:२३; १ कोर १३:२ 21[“यिहॱनाङ ओ़ह ल़ेहमु ल्हेन्डीदी सोल्वाङ दाङ ङ्युङने तेहती च्यी़राङ तेन ख़ूएँ।”]#१७:२१ काहजे ग्रीक बाइबलला दि आङ-टा़हङ म़ेह।
राहङ टोहङ कोहकेन्गी तेहन्दाला येशूगी लुहङदेन ङ्यिपा
(मर्क ९:३०-३२; लूक ९:४३-४५)
22स्याहप्च्यीया़ ङ्याम्बुराङ गालील साने़ला ज़्य़ू नाङगेमु येशूगी खुङया़ला सुङ नाङसीन, “ता़ह मिहगी स़ेबुला ज़ुङदी मिह ङ्येहम्बाया़गी लाहक्पाला चि क्याहप्च्ये येह। 23खुङया़गी खोला सेच्ये येह। यिहॱनाङ ङ्यिहमा सुमला खो येहपाराङ स्यिक्योलेगी सोम्बो लो़हज्ये येह।” दि स्याहल थे़दी स्याहप्च्यीया़ तुहङाल पेहसीन।
येशूगी छ्योखाङकी ठाल च्याल नाङग्यो
24येशू दाङ येशूगी स्याहप्च्यीया़ कफर्नहुमला लेप फान्ज्यो छ्योखाङकी ठाल तुहएँया़गी ओहङदी पत्रुसला टी़हसीन, “च्यि ख्याया़गी लोबेनगी छ्योखाङकी ठाल च्याल नाङगे ले?”#प्रस ३०:१३; ३८:२६ 25“च्याल नाङगेन, च्यिबे मेहच्याल्ज्ये ले?” म़ेदी पत्रुसगी मासीन। पत्रुस खाङबा नाहङला स्य़ूह फान्ज्यो येशूगी तोहङले सुङ नाङसीन, “ए सिमोन, ख्येती च्यि नोम्साङ येहबा? दि जाम्बुलीङकी क्याहल्बुया़गी सु ङो़ले ठाल तुहएँ? राहङदीराङ पुहया़ ङो़ले तुहएँनी लेहमेनया़ ङो़ले?”
26“लेहमेनया़ ङो़लेराङ तुहएँ” म़ेदी पत्रुसगी स्युहसीन। येशूगी सुङ नाङसीन, “ओ़ह ल़ेहमु यिहन्सीमानानी राहङगी पुहया़गी ठाल च्याल मेहकोएँ 27यिहॱनाङ ओहराङ लाहमले मिहया़ला क्येन माहयोहङज्यु। ख्ये छो-क्याहम्जोला काहल्दी ङ्याहटा क्याहप्तोङ। थाम्ज्यी म़ेदी तोहङले ङ्याहटाला च्य़ेह सिहन्ग्योगी ङ्याह तेन्दी ओ़ह ङ्याहगी खा खा-फे़दोङ। ओ़ह ङ्याहगी खाला ख्येगी ङुल-टाङ डापाल च्यी़ च्य़ेह सिहन्ज्ये येह। ओ़हदी छ्योखाङगी ठाल तुहएँया़ साला ख्येर्ती ओहराङ ङ्यी़गी ठाल च्याल्दोङ।”
المحددات الحالية:
मत्ती 17: HYLM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2023 (Active), Wycliffe Bible Translators, Inc. All rights reserved.
