मत्ती 14

बप्‍तिस्‍मा तेर्केन यूहन्‍नाला सेक्‍यो

(मर्क ६:१४-२९; लूक ९:७-९)

1ओहजे काहङला गालील साने़ला क्‍याहल्‍बु पेहकेन हेरोदगी येशूगी तेहन्‍दाला थ़ेसीन ओहले खोगी राहङगी स्‍याहप्‍तो स्‍युहएँ मिहया़ला मासीन, 2“दि खोनी स्‍यि सिहन्‍ग्‍यो बप्‍तिस्‍मा तेर्केन यूहन्‍नाराङ यिहन! खो येहपाराङ सोम्‍बो लो़हक्‍यो यिहन्‍डो। ओ़ह सोङबे खोगी दि ल़ेहमु ओङ छ्यिम्‍बुगी ल़ेहया़ पेहकें।”

3तोहङले राहङगी नो़ह फिलिपकी पी़हमी हेरोदियासगी पेहती हेरोदकी यूहन्‍नाला ताहम्‍दी चोन-खाङला लू़क्‍यो येहकें,#लूक ३:१९,२० 4च्‍यिबेमाना यूहन्‍नागी “राहङगी नो़हकी पी़हमीला दि ल़ेहमु पेहती ख्‍योङदी ज़्‍या़ज्‍ये या़हबु मेहयोहङगे” म़ेदी खोला लोप्‍ताम क्‍याहप्‍ती येहकें।#लेवी १८:१६; २०:२१ 5ओ़ह सोङबे हेरोदगी खोला सेच्‍ये छोल्‍ग्‍यो येहकें। यिहॱनाङ खो मिहया़ ङ्याम्‍बु ज्‍यी़सीन च्‍यिबेमाना खुङया़गी यूहन्‍नाला लुहङतेम्‍बा यिहन म़ेदी चा़ पेहको येहकें।

6हेरोदगी क्‍ये़कार ङ्यिहमाला हेरोदियासकी पोहमोगी मिह थाम्‍ज्‍यीगी दिनला छे-मे़हबा या़हबु पेहती छ्याम्‍दी तेन्‍सीन। दि थोङदी हेरोद ज्‍यिबुराङ क़ेहनाङ लाहङसीन 7ओहले खोगी तोहदाम ज़्‍या़दी हेरोदियासकी पोहमोला मासीन, “ख्‍येगी च्‍यि लाङ माएँदी ङाह ख्‍येला तेर्के।” 8ओहले मोहगी राहङगी आमागी लोप्‍क्‍यो ताम ङ्यिहन्‍दी मासीन, “ङाहला नाहरेराङ बप्‍तिस्‍मा तेर्केन यूहन्‍नाकी गो़ तेहर्माला ज़्‍या़दी नाङदोङ।” 9दि थे़दी क्‍याहल्‍बु सेम नाहसीन। यिहॱनाङ ओहजे डोम्‍बोया़गी दिनला तोहदाम ज़्‍या़ सिहन्‍ग्‍यो सोङबे खोगी पोहमोगी सेमला ने़जेबा पेह तेर्सीन। 10खोगी यूहन्‍नागी गो़ चोन-खाङलाराङ तुप्‍च्‍येला का तेर्सीन। 11ओहले तुप्‍केन मिहगी यूहन्‍नागी गो़ तेहर्माला ख्‍योङदी ओ़ह पोहमोला तेर्सीन ओहले पोहमोगी राहङगी आमाला ख्‍येर्ती तेर्सीन। 12ओ़ह तिङले यूहन्‍नागी स्‍याहप्‍च्‍यीया़ ओहङदी यूहन्‍नागी फुङबु ख्‍येर्ती तो़हसीन ओहले काहल्‍दी येशूला दि लेहङगु स्‍ये तेर्सीन।

येशूगी मिह तोङरा ङाहला साहज्‍ये नाङग्‍यो

(मर्क ६:३०-४४; लूक ९:१०-१७; यूह ६:१-१४)

13दि लेहङगु सेन नाङ फान्‍ज्‍यो येशू टुह-छ्युङला जा़दे ग्‍या़ यिङबु च्‍यी़ला फार फेप नाङसीन। यिहॱनाङ येशू फेप नाङज्‍ये जेक्‍यो क्‍यी़ह ज्‍योर्ते मिहया़ युहल युहललेगी थेन्‍दी काङबागीराङ येशूला ताहदा क्‍याहप्‍ती काहल्‍सीन। 14येशू टुह-छ्युङलेगी फाप नाङगेमु मिह मिह-माहङया़गी राहङला कू़हदे तेहक्‍यो ज़ी़ नाङसीन। ओ़ह मिह मिह-माहङला ज़ी़ नाङदी येशूगी थु निङज्‍यीगी काहङदी ओहङसीन ओहले येशूगी ओ़हला येहकेन्‍गी नेहपाया़ला टा़ह च्‍य़ू नाङसीन।

15नाहम स़े फान्‍ज्‍यो स्‍याहप्‍च्‍यीया़गी ओहङदी येशूला मासीन, “नाहम सोज्‍ये पेहसीन, देलानी च्‍यिॱआङ म़ेह। दि मिहया़ला युहलला सोङ म़ेदी सुङ नाङदोङ ओहले खुङया़गी ओ़हला काहल्‍दी साहज्‍ये से़हया़ ङ्ये़हदी साहज्‍यु।” 16येशूगी सुङ नाङसीन, “खुङया़ डो मेहकोएँ, ख्‍याया़गीॱराङ खुङया़ला साहज्‍ये से़हया़ तेर्तोङ।” 17स्‍याहप्‍च्‍यीया़गी मासीन, “ङ्यिह ङ्याम्‍बुनी खुरा ङा दाङ ङ्याह ङ्यी़ च्‍यी़राङ येहबा।” 18येशूगी सुङ नाङसीन, “केरे, खुरा दाङ ङ्याह ङाहसाला ख्‍येर-स्‍यो ले!”

19येशूगी मिहया़ला पाङगाला तेह च्‍य़ू नाङसीन। ओ़ह तिङले खुरा ङा दाङ ङ्याह ङ्यी़ नोम्‍दी स्‍यिहङगाम ङो़ले ज़ी़ नाङदी किन्‍ज्‍योला थुज्‍यी-छ्ये़ फुल नाङसीन। येशूगी खुरा फेमा-फेमा च्‍येती स्‍याहप्‍च्‍यीया़ला नाङसीन। स्‍याहप्‍च्‍यीया़गी ख्‍येर्ती मिहया़ला के़हदी तेर्सीन। 20मिह थाम्‍ज्‍यीगी साह ख़ूएँ थु साहसीन। स्‍याहप्‍च्‍यीया़गी ल्‍हा़लो खुराया़ तुहएँमु डा़लो च्‍यिङ्यी़ काहल्‍सीन। 21पी़हमी-पेहजा दाङ पेहजाया़ माहटाङबा पेहती क्‍येप-ख्‍योवा च्‍यी़राङ तोङरा ङाजे येहकें।

येशू छ्यु थो़ले फेप नाङग्‍यो

(मर्क ६:४५-५६; यूह ६:१५-२१)

22दि छ्या़ले जे छार-लुहङ मे़हबाराङ येशूगी स्‍याहप्‍च्‍यीया़ला “तोहङलेराङ ख्‍याया़ टुह-छ्युङला जा़दी छोगी फार्केन देपला सोङ” म़ेदी सुङ नाङसीन। येशू राहङगी मिहया़ला कोहङबा नाङज्‍येला ज़्‍य़ू नाङसीन। 23खुङया़ला कोहङबा नाङ सिहन फान्‍ज्‍यो येशू राहङ च्‍यी़राङ सोल्‍वाङ ताप्‍च्‍येला काहङला फेप नाङसीन। नाहम स़े सिहन्‍गेमु ओहजेला येशू च्‍यी़राङ काहङला ज़्‍य़ू नाङदी येहकें। 24ओ़ह ती़हजीला टुह-छ्युङदी छो सुहरलेगी ज्‍यिबुराङ था़-रिहङबु लेप सिहन्‍दी येहकें। यिहॱनाङ दिन ङो़लेगी ल्‍हा़बा ओहङदी छ्यु बलापगी टुह-छ्युङला फार छुर युङग्‍यो सोङबे स्‍याहप्‍च्‍यीया़ तोहङला डो मा़हखु। 25ङाटु क्‍या र्‍हाबा-र्‍हिबेला येशू छ्यु थो़लेगी फेप्‍ती स्‍याहप्‍च्‍यीया़साला फेप नाङसीन। 26येशूला छ्यु थो़लेगी फेप नाङग्‍यो थोङदी खुङया़ “आबी ल्‍हेन्‍डी दु!” म़ेदी ज्‍यी़सुगी क़े तेन्‍सीन। 27ओहले लाहम्‍साङराङ येशूगी सुङ नाङसीन, “मा़हन्‍ज्‍यी, ङाहराङ यिहन, लो तेहमु पेह।”

28दि थे़दी पत्रुसगी मासीन, “चो़वो छ्येवा, राहङराङ यिहन्‍सीमानानी ङाहॱलाङ छ्यु थो़लेगी डे़दी राहङसाला ओहङज्‍येला का नाङदोङ।” 29येशूगी सुङ नाङसीन, “स्‍यो!” पत्रुस टुह-छ्युङलेगी फाप्‍ती छ्यु थो़ले डे़दी येशूसाला डोज्‍ये छ़ूसीन। 30यिहॱनाङ छ्यिम्‍बु ल्‍हा़बा लुङजी ओहङग्‍यो थोङदी खो ज्‍यी़सीन। ओ़हजेलाराङ खो नुप्‍च्‍ये पेहसीन ओहले का क्‍याहल्‍दी “चो़वो लाह ङाहला थार च्‍य़ू नाङदोङ!” म़ेदी क़े तेन्‍सीन। 31येशूगी ओ़हजेलाराङ छ्या़गी ज़ुङ नाङसीन ओहले “के ख्‍येगी तेहपा, ख्‍ये च्‍यिबे सेम ङ्यी़ च्‍याङगे? म़ेदी सुङ नाङसीन। 32ओ़ह तिङले येशू पत्रुस ङ्याम्‍बुराङ टुह-छ्युङला स्‍य़ूह नाङसीन ओहले ल्‍हा़बा लुङजीॱआङ छ्येप तेहसीन। 33ओहजेला टुह-छ्युङला येहकेन्‍गी स्‍याहप्‍च्‍यी थाम्‍ज्‍यीगी येशूगी स्‍याहपला खेप्‍चु क्‍याहप्‍ती मासीन, तेहम्‍बाराङ राहङनी किन्‍ज्‍योगी स़ेबु गा यिहम्‍बा दुबा!”

34येशू स्‍याहप्‍च्‍यीया़ ङ्याम्‍बुराङ छो च्‍येती फार्केन देप गनेसरेत माएँगी ग्‍या़ला फेप नाङसीन। 35ओ़ह ग्‍या़गी मिहया़गी येशूॱराङ यिहम्‍बा दुबा म़ेदी येशूला ङोह स्‍य़ेसीन। ओ़ह सोङबे खुङया़गी साहर-सुहरगी दे-खामती रेबेॱराङ नेहपाया़ला क़े क्‍याहप्‍ती येशूसाला ख्‍योङसीन। 36ओहले येशूला दि ल़ेहमु म़ेदी स्‍युहसीन, “ओ़ह नेहपाया़ला राहङगी नाहम्‍सागी सुहर च्‍यी़ला येहॱनाङ दे़ च्‍य़ू नाङदोङ।” येशूगी नाहम्‍सा दे़गेया़ थाम्‍ज्‍यीराङ टा़हसीन।

المحددات الحالية:

मत्ती 14: HYLM

تمييز النص

نسخ