Luc 7
7
Zezi osalihi odzandzi a nkumu aworo
1Zezi omana owobo mbari e nde eso na baari, oyeni Kaprenaume. 2Ntsa onguundu kia, eki na nkumu aworo ekuumi kuumi. Odzandzi a nde aki na ngaa e nkala. Nkumu aki na ndzala nde kuna. 3Nde oyuhi ma wobo o Zezi. Nde otumi akuuru ma Azife na apisa kolo kolo ma oya na avusuha odzandzi a nde. 4Bo ato tuha na Zezi, bo aselihi opisa nde kolo kolo ndi: «Nkumu aworo dzua mvuuru ove, yamaha nde. 5Nde na ndzala baari a saabe, nde mvuuru atsui ndzo ma avuonoho.» 6Zezi oyeni bla bo, bo aki aya la na ndzo kali. E nkumu aworo ma ekuumi kuumi atumi andihi a nde, na aduha Zezi ndi: «Me na okiimbi o we Nkumu, me kaa dia mbri we onyunuha ntsa ndzo e me ni. 7Kia obila o me eka aya me ankulu na amono we ni. Duha dzaa lemo, ŋa odzandzi a me owuuma. 8Me anku se na nkumu a me enyiimaha. Me na aworo o ngula me. Me oduha na omo, mbri: “Dziehe”, nde oyeni. Me oduha na okima mbri: “Dziaha”, nde oyi. Me oduha na odzandzi a me mbri: “Sa bu”, nde osi.» 9Zezi oyuha mbari e nkumu aworo, odzuusi nde. Nde okalihi, na lemvuuru leluonihi nde ndi: «Me kini mono oyalihi mva ki se o Isayele ni?» 10Antuma a nkumu aworo avurihi ndzo e bo, amoni odzandzi omi wuuma.
Zezi onyuusi muana okuuli
11Emana Zezi oyeni onguundu o Nayine. Aluoni a nde bla lemvuuru aki bla nde. 12Ntini e nde ato ntsuo e mpuhu, baari ma adze na obiimi antsuo. Okui aki muana a balaha, nde se aki muana a kia. Nguhu okui aki okuuli. Lemvuuru le ma onguundu kia lekihi bla okuuli. 13Nkumu omono nde nkerihi esi nde, na nde ndi: «nyila olila!» 14Nde otsiini, otiili okuba, abiri ma obiimi asuri. Nde na obiimi ndi: «Odzambu a balaha, me eduha na we mbri temehe!» 15Obiimi oya o ntsi, owobi. Zezi oyahi muana, ovuuri na nguhu a nde. 16Baari aso amoni vuoho, aya ma kuusa lekuma le Ndziami ndi: «Owobi a mbari e Ndziami onini omi ya o mpanihi e saabe. Ndziami omi ya na vusuha baari a nde.» 17Antsia a Zezi ayeni ntsa osi o Zide oso, na ma apaani.
Antuma a Zan Batise ayi mpili e Zezi
18Aluoni a Zan Batise aduhi maami maa aso na Zan a nkumu a bo. Ŋa nde otsuoli vuele o mpanihi e bo. 19Nde otumi bo mpili e Nkumu na apisa ndi: «We Krisi adze oya? Si kali bisi le dila okima?» 20Bo ato mpili e Zezi, bo na nde ndi: «Zan Batise atumi bisi ma opisa yuhu we Krisi adze oya si kali bisi ledila okima?» 21O ntini dzidzia Zezi osalihi a nga angaa kuna, na eleme. Nde otsuuri na edidima me ebi, nde onaani baari kuna miisi. 22Emana nde okaali na antuma a Zan ndi: «Levuruha na aduha Zan a be lemoni, na a be leyuhi: baari ma aki i mono ni, aya ma mono. Eleme eya me edzie, anga ebila ami wuuma, ma ali atsui kali aya ma yuha, akui ami nyusuha. Ami tooso anga owuha Ntsia e Mve. 23Osuere oka na mvuuru ali i suba oyalihi kalihi obila o me ni.» 24Aluoni a Zan Batise ama vuruha, Zezi okaali na lemvuuru leki ŋa ndi: «O be leyeni na amono o ntsa kayi oma, le ndziba lefubi o piebi, kali? 25Be oma leyeni na amono? Mvuuru ama laasa amfa amvunu? Baari ma laasa amfa amvunu na ma ali na ontaambu, okaha ma andzo ma ankani. 26Be na leyeni na mono? Owobi a mbari e Ndziami? Ee me eduha be, nde ovuli na Owobi a mbari e Ndziami. 27Obila Zan mvuuru ma ama teende ntsa osaangumu o Ndziami ndi: “Me elehe Ntuma levusu ma oselehe ndzila e we”.» 28Zezi oluusi ndi: «Me eduha be o yula ntsie akini okula mvuuru avuli Zan onini ni. Ma oma mvuuru okiehe ntsa Onkani o Ndziami ovuli Zan Batise onini. 29Baari aso ma ayuhi nde, na atoniŋi ma lepo aduhi ndi Ndziami oli tele. Bo ayalihi ndi Zan ompa bo ateeme. 30Ŋa Afarizi bla ayisihi ma angri a Ndziami abisi ediŋii e Ndziami o bo, bo se abisi ateeme a Zan Batise.» 31Zezi ovurihi ndi: «Be baari a lobi me oyelehe be bla na? Bo se owuana na? 32Bo owuana enkere me eli o ntsi, me etaama ma lebuhu, bo ma tsuolo abuha ndi: “Bisi leberehe be ngomo, be i kina ni, bisi lemi yima be luumu le ndoho, be leka lila ni.” 33Ma oma, Zan Batise ayi nde i dza biila ni nde i nyua mali a ba ni, be mbri: “Nde na lari.” 34Muana mvuuru oya nde adza, anyua, ŋa be mbri: “Nde na ndzala odza bla lenyua le mali, nde andihi atoniŋi ma lepo bla anga ambiini!” 35Ntsimi e Ndziami eli tele mo baari ma ama yalaha nde aso.»
Zezi ntsa ndzo e Simon Ofarizi
36Ofarizi omo otsuoli Zezi na adza bla nde. Zezi onyunihi ntsa ndzo Ofarizi oya o tanda. 37Ntsa onguundu kia, eki na okaasi obla. Nde oyuhi ndi Zezi oli ndzo Ofarizi, nde oyi na mbiina oyombo#7.37 Mbiina e mvunu ma tsuoloho mo albatre e mvunu to. 38Nde oya o ngula Zezi, alila antsia ma va Zezi o yula nyiili. Nde okuomi antsia o mfu e nde, ompi nde amfemfe o nyiili, odzirihi nde oyombo o nyiili. 39Ofarizi atsuoli Zezi omono vua, otsimihi ndi: «Mvuuru yu aki ma oka owobi a mbari e Ndziami, kaa nde adziabi ndi okaasi yu na obla.» 40Zezi na Ofarizi ndi: «Me na dzaa ma oduha we Simon.» Ofarizi ndi: «Wobo Nkumu.» 41Zezi ndi: «Mvuuru omo obihi baari vuele adoro. A ntsomi ekuumi ma enkama etaani, odzuele ekuumi etaani. 42Ŋa bo aka buuna okasa obiimi kia ni. Obihi na bo ndi i ma kasa ni. Ŋa ntsa bo vuele avuli odia nga adoro na?» 43Simon okaali ndi: «Me etsimiŋa mbri a nde asi mpolo ma obiimi enini.» Zezi okaali ndi: «We na mpieme.» 44Nde okalihi mpili okaasi, na Simon ndi: «We amono okaasi yu, me nyunihi ntsa ndzo e we, we aka dziriha me andza o nyiili ni. Ŋa nde ama vuoso me nyiili ma antsia, oma kuomo o mfu e nde. 45We aka ampa me amfemfe ni, ŋa lebihi le esi nyuniha nde, nde okini onyila ompa me amfemfe o nyiili ni. 46We aka dziriha me maari o yula otsui ni, nde omi dziriha me oyombo o yula nyiili. 47Kia obila o me eduha we mbri ambiini a nde kuna ami boloho. Ma osuumbu a nde alahi dia e nde enini. Mvuuru ma boloho ntseeri, olaha se dia e nkiehe.» 48Zezi oduhi na okaasi ndi: «Ambiini a we ami boloho.» 49Baari ma aki ma odza bla nde, aya ma tsimiha ndi: «Yu mvuuru abuuna oboloho ambiini na?» 50Zezi na okaasi ndi: «Oyalihi o we omi vusuha we. Dziehe ntsa oduusu.»
المحددات الحالية:
Luc 7: MDT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
