Ipakilya 8
8
1N’ayônginy’Anyambyè Nôa, n’inyam̃a sôdu ni vugiṉa yôdu y’avegagi na yèg’ôwatanga, n’avang’Anyambyè ômpunga gô pyagaṉa gô ntye, n’apweṉi aṉingô. 2N’aṉunjyô imbeṉe s’ôronga n’asangala m’ôrôṽa, ni ningô y’ôrôṽa y’azimbyô. 3N’aṉingô m’agamiṉagi avila gô ntye; nkèndaga ni nkèndaga, na gô nkam̃a y’intyugu n’agôm̃i m’intyugu ataṉè aṉingô m’apweṉi. 4G’ôgwèli w’ôrwageṉô, gô ntyugu y’igôm̃i n’ôrwageṉô y’ôgwèli, ôwatanga w’azigi gw’inômba s’Ararat. 5Ndô aṉingô m’ayam̃agi apwagaga kwanga g’ôgwèli w’igôm̃i; ndô g’ôgwèli w’igôm̃i, gô ntyugu nônga y’ôgwèli, intyay s’inômba s’awôm̃unyi.
6N’arweṉi gw’isula s’agôm̃i m’intyugu anay, Nôa aṉunguṉ’asangala m’avangyô yè g’ôwatanga. 7N’agogunyi yè ôñgwañondo, n’agogwi yè agèndagènda kwanga gw’agam̃iṉi aṉingô gô ntye. 8N’agogunyi yè kè menga gô jeṉa twa pa aṉingô m’apweṉi avila g’ôzô wi ntye. 9Ndô yi pa dèng’ijowa gw’agandô m’akôsô mè, n’awinyi yô gôre yè g’ôwatanga, konde aṉingô m’avegagi g’ôzô wi ntye yôdu. N’alaviṉi yè ôgo wè, agôta yô, ayinginya yô gôre yè g’ôwatanga. 10Ayèngèryi yè intyugu sinyèṉè ôrwageṉô, arô tôm̃i yè menga nyèṉè avila g’ôwatanga. 11Ni menga y’aṽyeṉi gôre yè nkôlô, ndô vôna, y’ avegagi n’ôyavi w’erere nôma pa gw’inumbu yè; n’amyeṉi Nôa inè, aṉingô m’apweṉi avila gô ntye. 12N’ayèngèryi yè intyugu sinyèṉè ôrwageṉô, n’arô tôm̃i yè menga nyèṉè. Ndô yi pa tô fwinya nyèṉè gôre yè. 13G’ômpum̃a wi nkam̃a ôrôṽa n’ôm̃ori, g’ôgwèli ôlônga, gô ntyugu nônga y’ôgwèli, aṉingô m’agam̃iṉi gô ntye; n’arômbi Nôa epônga z’ôwatanga ayeṉa, na vôna, ôzô wi ntye w’aliwô w’akam̃iṉi. 14G’ôgwèli wi mbaṉi, gô ntyugu y’agôm̃i ambaṉi n’ôrwageṉô y’ôgwèli, ntye y’ayômi.
15N’awulinyi Anyambyè Nôa inè: 16Gogwa avila g’ôwatanga, awè n’ômwantu wo, n’awaṉi wo aṉôm̃e, n’antô w’awaṉi wo na wè. 17Gogwa n’inyam̃a sôdu s’izôṉe yôdu si re na wè, inyoṉi, vugiṉa ni ya yôdu yi dandalanda gô ntye, ko yô buṉa gô ntye, ko yô jaṉa awuṉa gô ntye. 18N’agogwi Nôa n’ômwantô wè, n’awaṉi wè aṉom̃e, n’antô w’awaṉi wè na yè. 19Inyam̃a sôdu, ni ya yôdu yi dandalanda, n’inyoṉi sôdu, n’ezom̃’edu zi dandalanda gô ntye, gw’iṉongo nya yô, y’agogwi avila g’ôwatanga.
20N’aṉôgi Nôa mbôra yi jirô intyagô gôre Yeôva, n’awongi yè nyam̃y’edu yi nkèrè, ni nyony’edu yi nkèrè, n’ayiri yè sô gw’intyagô si pezô gô mbôra yi jirô intyagô. 21N’aṉuṉi Yeôva nkangô mbya y’am̃ènjè, n’awulyi Yeôva g’ôrèm̃i wè inè: My’azave ntye nyèṉè g’ômwanja w’aṉaga; konde ipikilya s’irèm̃a y’aṉaga si re sibe avila gô rumbe yaô; my’arô bôle kè nyèṉè ezom̃’edu zi re bo, ga nta re myè denda pa. 22Ôlingô wi be dwaṉe ntye, ibèṉa n’iteṉa, ifwe ni mpyô, ntyanja n’eṉôm̃ô, ôm̃anda n’ôgwera y’am̃aṉe du.
المحددات الحالية:
Ipakilya 8: MYE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Published by the British and Foreign Bible Society in 1927.
