Utusang pung Carita 8
8
1aSaulus jua setuju kalo orang banya tu bunu Stefanus.
Orang-orang parcaya di Yerusalem dapa siksa
8:1b-3
1bPas hari waktu Stefanus dapa bunu tu, orang-orang yang parcaya Yesus yang ada dalang kota Yerusalem jua mulai dapa siksa tarus-tarus, sampe dong lari talamburang ka samua tampa di propinsi Yudea deng Samaria. Mar Yesus pung utusang-utusang seng lari. 2Babarapa orang yang dengar-dengarang Allah pi ambe Stefanus pung mayat la kubur dia. Dong manangis marata dia. 3Mar Saulus mulai labrak orang-orang yang parcaya Yesus. Dia maso dari ruma ka ruma la hela laki-laki deng parampuang kasi kaluar par kasi maso dong ka dalang bui.#Utusang pung Carita 22:4-5, 26:9-11
Filipus kasi tau Kabar Bae par orang-orang di Samaria
8:4-8
4Basudara yang iko Yesus yang su lari talamburang tu pi ka sagala tampa, la kasi tau Kabar Bae par orang-orang kalo Yesus tu Orang yang Allah su Angka par Kasi Salamat Manusia. 5Bagitu jua deng Filipus. Dia pi ka kota satu di Samaria la kasi tau par orang-orang di situ soal Orang yang Allah su Angka par Kasi Salamat Manusia tu. 6Waktu orang banya dengar apa yang Filipus bilang deng lia dia biking tanda-tanda herang, oras itu jua, dong samua dengar bae-bae apa yang dia bilang. 7Barang, dari dong ada banya lai yang takanal, jadi Filipus parenta setang-setang kaluar dari orang-orang tu. Tarus, setang-setang tu kaluar dari dong bataria-bataria. La oras itu jua, orang-orang yang lumpu deng orang-orang yang tempang, dong samua bae. 8Jadi, samua orang yang ada di dalang kota tu pung hati paleng sanang.
Simon tukang tiop-tiop
8:9-25
9Di kota tu, ada laki-laki satu nama Simon. Dia tu dari dolo lai su jadi tukang tiop-tiop la biking orang banya di akang tampa tu taherang-herang lai. Dia jua jaga bilang par orang-orang Samaria tu kata, “Beta ni paleng jago!” 10Samua orang yang ada di akang tampa tu, dari kacil sampe basar, taru kira dia bae-bae la bilang kata, “Dia ni Allah pung tangang kanang. Dia ni jua pung kuasa basar.”
11Jadi, orang banya tinggal iko-iko dia tarus, tagal su lama dia biking dong taherang-herang deng dia pung tiop-tiop tu. 12Mar waktu Filipus datang par dong la kasi tau Kabar Bae soal Allah pegang parenta jadi Raja deng kalo Yesus tu Orang yang Allah su Angka par Kasi Salamat Manusia, dong parcaya. Tarus, dong kasi dong pung diri par Filipus baptis dong, laki-laki deng parampuang. 13Bagitu lai deng Simon. Dia jua parcaya apa yang Filipus su bilang tu la kasi dia pung diri lai par Filipus baptis dia. Abis dapa baptis, dia iko Filipus tarus. Waktu dia lia Filipus biking tanda-tanda herang yang hebat, dia herang paskali.
14Waktu Yesus pung utusang-utusang di kota Yerusalem dengar kalo orang-orang yang ada di Samaria tu su parcaya Allah pung ajarang soal Yesus, dong suru Petrus deng Yohanis pi ka tampa tu. 15Waktu dong dua sampe di tampa tu, dong dua sombayang par orang-orang Samaria biar dong tarima Allah pung Roh lai. 16Barang, Filipus memang su baptis dong par jadi tanda kalo dong su satu hati deng Tuhan Yesus, mar Allah pung Roh balong turung par satu orang dari dong lai. 17Jadi, Petrus deng Yohanis taru tangang di atas dong la dong tarima Allah pung Roh.
18Waktu Simon lia kalo Allah kasi Antua pung Roh par orang-orang Samaria tu waktu Petrus deng Yohanis taru tangang di atas dong, dia bawa kepeng par bayar dong dua 19la bilang kata, “Kasi kuasa tu par beta lai jua, biar kalo beta taru tangang di atas orang-orang, dong nanti tarima Allah pung Roh lai.”
20Mar Petrus manyao kata, “Loko ose pi mampos deng ose pung kepeng-kepeng tu! Ose kira ose bisa bali Allah pung Roh yang Antua kasi deng cuma-cuma tu ka? 21Allah seng kasi ose bagiang karja macang bagini, tagal Antua tau ose pung hati seng batul. 22Jadi, kasi tinggal ose pung kajahatang ni deng sombayang par Tuhan biar Antua kasi ampong ose pung pikirang jahat tu. 23Barang, beta jua tau kalo ose pung hati deng pikirang tu pono deng kajahatang. Akang macang deng antawali yang pait paskali. Dosa su ika ose sampe ose iko akang tarus.”
24Tarus Simon bilang, “Kamong dua tolong sombayang par beta lai jua, biar apa yang kamong su bilang par beta tu, akang seng jadi par beta.”
25Abis itu, Petrus deng Yohanis tinggal sadiki lama lai di Samaria. Dong kasi tau apa yang dong su lia deng mata kapala sandiri soal Yesus deng kasi tau ajarang soal Tuhan Yesus. Abis itu, dong bale kombali ka Yerusalem. Di tenga jalang, dong dua kasi tau Kabar Bae di banya kampong di Samaria.
Filipus baptis orang Etiopia satu
8:26-40
26Satu kali bagini, Tuhan suru malekat datang par Filipus la bilang par dia kata, “Filipus e! Ale pi ka sabala salatang iko jalang turung-turung dari kota Yerusalem ka kota Gaza tu!” Jalang tu jalang yang sunyi.
27Jadi Filipus pi. Waktu itu, di jalang tu, ada orang basar satu dari negri Etiopia. Dia jadi kapala kas kepeng par Ratu Kandake dari negri Etiopia. Dia baru abis pi sombayang par Allah di Yerusalem, 28la ada di tenga jalang par pulang dalang dia pung kareta kuda. Waktu itu, dia ada dudu baca Allah pung Juru Bicara Yesaya pung kitab. 29Tarus, Allah pung Roh bilang par Filipus kata, “Filipus e! Pi ka kareta tu la baku dapa deng orang yang ada dudu di dalang akang.”
30Waktu Filipus lari ka kareta tu, dia dengar bagini, laki-laki tu ada baca Allah pung Juru Bicara Yesaya pung kitab. Tarus Filipus tanya dia kata, “Bapa e! Bapa mangarti apa yang bapa baca tu ka seng?”
31Dia bilang, “Beta mau mangarti akang bagemana, kalo seng ada orang yang kasi balajar akang par beta?” Jadi, dia undang Filipus nai dudu deng dia di kareta la kasi balajar akang par dia.
32Nats yang dia ada baca tu bagini,
“Antua nanti dapa bawa par dapa bunu,
macang deng domba yang dapa bawa ka tampa potong binatang par dapa bunu.
Antua seng malawang,
macang deng domba ana yang tado sa di muka orang yang gunting akang pung bulu-bulu.
33Dong biking malu Antua
deng hukum Antua yang seng batul-batul.
La orang-orang tu bale bunu Antua
sampe seng ada satu orang lai yang bisa carita Antua pung turunang.
Barang, Antua seng ada turunang.”#Yesaya 53:7-8
34Tarus, orang Etiopia tu tanya Filipus kata, “Coba bilang par beta do! Allah pung Juru Bicara Yesaya ada carita sapa dalang dia pung kitab ni? Dia carita dia pung diri sandiri ka orang laeng?”
35Tarus, Filipus mulai kasi tau nats tu pung arti la pake nats tu par kasi tau Kabar Bae soal Yesus par dia. 36Di tenga jalang, dong sampe di tampa satu yang ada aer, la orang Etiopia tu bilang par Filipus kata, “Lia! Di tampa ni ada aer. Ale bisa baptis beta ka seng?”
37[Filipus bilang, “Kalo bapa pung hati batul-batul parcaya par Yesus, beta nanti baptis bapa.”
Dia bilang, “Iya! Beta parcaya kalo Yesus Kristus tu Allah pung Ana.”]
38Tarus, dia suru orang yang bawa kareta tu kasi barenti kareta. Abis itu, dong dua turung dari kareta, tarus bajalang maso ka kolang tu la Filipus baptis dia. 39Bagitu dong dua kaluar dari kolang, skrek bagini, Tuhan pung Roh bawa Filipus ka tampa laeng. La dia seng dapa lia Filipus lai. Abis itu, dia bajalang tarus deng dia pung kareta tu deng hati paleng sanang. 40Mar Filipus muncul di kota Asdot. Tarus, dia pi bajalang kasi tau Kabar Bae soal Yesus di kota-kota laeng lai sampe di kota Kaisarea.
المحددات الحالية:
Utusang pung Carita 8: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
