Utusang pung Carita 13
13
1Di tenga-tenga orang-orang parcaya di kota Antiokia ada Allah pung juru-juru bicara deng guru-guru. Dong tu Barnabas deng Simeon. Simeon ni jaga dapa panggel par Itang. Ada lai Lukius dari kota Kirene. Ada lai Saulus deng Menahem. Menahem ni dapa piara sama-sama deng Raja Herodes.
2Satu kali bagini, waktu dong ada somba Tuhan deng puasa,#13:2 Orang Yahudi deng orang parcaya jaga puasa kalo dong mau taru hormat par Allah, minta Antua tolong dong, manyasal dong pung dosa-dosa, deng alasang-alasang laeng lai. Waktu puasa, dong inga Allah tarus deng sombayang. Allah pung Roh bilang par dong kata, “Pili Barnabas deng Saulus par biking tugas yang Beta su kasi siap par dong dua biking.” 3Jadi, dong puasa deng sombayang par Barnabas deng Saulus la taru tangang di atas dong dua la utus dong dua.
Saulus deng Barnabas di Siprus
13:4-12
4Allah pung Roh suru Barnabas deng Saulus pi ka Seleukia. Dari situ, dong dua balayar ka pulo Siprus. 5Waktu dong dua sampe di kota Salamis, dong dua langsung pi kasi tau Allah pung ajarang soal Yesus di orang Yahudi pung tampa-tampa sombayang. Yohanis yang jaga dapa panggel par Markus tu ada deng dong dua lai, deng jaga bantu dong dua.
6Dong bajalang koliling samua tampa di Siprus sampe ka kota Pafos. Di kota tu, dong baku dapa deng orang Yahudi satu. Dia pung nama Baryesus. Dalang bahasa Yunani, dia pung nama Elimas. Dia ni tukang tiop-tiop deng juru bicara parlente. 7Elimas ada tarus deng gubernur Siprus. Gubernur tu nama Sergius Paulus. Dia tu orang yang pintar.
Satu kali bagini, Gubernur Sergius panggel Barnabas deng Saulus par dengar Allah pung ajarang soal Yesus dari dong dua. 8Mar Elimas, yang pung arti tukang tiop-tiop tu, cari jalang par pele-pele Barnabas deng Saulus biar gubernur tu jang parcaya Yesus. 9Mar deng Allah pung Roh pung kuasa, Saulus, yang jaga dapa panggel par Paulus tu, nganga Elimas 10la bilang par dia kata, “Hoe Setang pung Raja pung ana! Ose tu tukang parlente putar bale. Ose pake sagala macang cara biar orang-orang yang hidop iko Tuhan Yesus pung ajarang tu jadi ilang jalang. Tuhan pung rencana mau kasi salamat manusia, mar ose salalu usaha par putar bale akang. 11Sakarang ni jua, Tuhan hukum ose. Ose nanti buta la seng dapa lia apapa par sadiki tempo, sampe Antua pung waktu par hukum ose tu abis.”
Oras itu jua, macang ada awang galap tutu Elimas pung mata sampe dia seng bisa dapa lia apapa lai. Jadi, dia bajalang raba-raba cari orang par bantu dia bajalang. 12Waktu Gubernur Sergius lia kajadiang tu, dia jadi parcaya. Barang, dia taherang-herang deng ajarang soal Tuhan Yesus tu.
Paulus kasi balajar orang-orang di Antiokia di daera Pisidia
13:13-52
13Abis dari kota Pafos, Paulus dong balayar ka kota Perga di propinsi Pamfilia. Mar di kota tu, Yohanis Markus pi kasi tinggal Paulus deng Barnabas la bale ka kota Yerusalem. 14Abis dari Perga, Paulus deng Barnabas bajalang tarus sampe ka kota Antiokia di daera Pisidia. Waktu orang Yahudi pung hari Barenti Karja, dong dua pi ka orang Yahudi pung tampa sombayang la dudu di situ. 15Waktu satu orang di tampa sombayang tu abis baca nats dari Kitab Torat deng Allah pung juru-juru bicara pung tulisang, pamimping-pamimping tampa sombayang tu suru satu orang tanya dong dua kata, “Basudara e! Kalo ada pasáng yang basudara dong mau bilang par kasi nasehat deng kasi kuat jamaat ni, mari bilang akang jua!”
16Jadi, Paulus badiri la kasi kode suru samua orang tado. Tarus dia bilang kata, “Basudara orang Israel deng kamong yang bukang orang Israel mar dengar-dengarang Allah, pasang talingang la dengar bae-bae! 17Allah yang katong orang Israel somba tu su pili katong pung moyang-moyang la biking dong tamba banya deng kuat waktu dong tinggal di negri Mesir jadi orang dagang. Tarus, Antua kasi kaluar dong dari Mesir deng Antua pung kuasa yang luar biasa tu.#Kaluar dari Mesir 1:7, 12:51 18Waktu dong ada di padang gurun, Antua sabar deng dong pung kalakuang ampa pulu taong.#Carita Ulang 1:31 19Antua bantu dong par kasi binasa tuju suku yang tinggal di tana Kanaan la bage-bage tana tu par orang-orang Israel par jadi dong pung tana.#Carita Ulang 7:1 20Dari katong orang Israel pung tete-nene moyang pi ka Mesir sampe dong pung anana cucu bale kombali ka Kanaan yang su jadi dong pung tana tu, mangkali ada barang 450 taong.
Abis itu, Allah angka orang par jadi dong pung pamimping satu abis satu, sampe Antua angka Samuel par jadi Antua pung juru bicara.#Hakim-Hakim 2:16; 1 Samuel 3:20 21Abis itu, orang-orang Israel minta Samuel angka satu orang par jadi dong pung raja. Tarus, Allah pili Kis pung ana Saul par jadi raja. Dia dari suku Benjamin. Saul jadi raja par dong ampa pulu taong.#1 Samuel 10:17-21 22Tarus, abis Allah kasi barenti Saul jadi raja, Antua angka Daud par ganti Saul. Soal Daud ni, Allah su bilang kata, ‘Beta su lia kalo Isai pung ana Daud tu biking sanang Beta pung hati deng iko samua yang Beta bilang.’#1 Samuel 13:14; Lagu-Lagu 89:21
23La dari Daud pung anana cucu, Allah angka satu Orang par Kasi Salamat orang Israel, macang deng apa yang Antua su janji. Orang itu tu, Yesus. 24Waktu Yesus balong mulai Antua pung karja lai, Yohanis Tukang Baptis su bilang par samua orang Israel yang datang par dia kalo dong musti kasi tinggal dong pung dosa-dosa la kasi dong pung diri par dapa baptis.#Lukas 3:3 25Jadi, waktu Yohanis pung karja su mau abis, dia bilang ulang-ulang par orang-orang kata, ‘Kamong kira kata beta ni Orang yang Allah su Angka par Kasi Salamat Manusia yang kamong ada tunggu-tunggu tu kapa? Itu seng batul. Beta ni bukang Antua. Antua nanti datang dari balakang beta. Mau buka Antua pung sandal dari kaki sa beta seng pantas.’#Yohanis 1:20, 27
26Sio basudara samua dari Abraham pung anana cucu deng jua orang bukang Yahudi yang dengar-dengarang Allah! Allah su kasi tau par katong soal Yesus yang bisa kasi salamat katong. 27Mar orang Yahudi yang tinggal di Yerusalem deng dong pung pamimping-pamimping seng sadar kalo Yesus datang par kasi salamat dong. Biar kata dong dengar orang baca Allah pung juru-juru bicara pung kitab sabang kali katong orang Yahudi pung hari Barenti Karja, mar dong seng mangarti akang. Jadi, dong kasi jatu hukumang mati par Yesus. Deng bagitu, dong biking parsis deng apa yang Allah pung juru-juru bicara tu su bilang. 28Biar kata dong seng dapa alasang yang biking Antua pantas par dapa hukumang mati, dong pi par Pilatus la minta Pilatus bunu Antua.#Matius 27:22-23, 57-61 29La abis dong biking par Antua samua yang Allah pung juru-juru bicara su tulis soal Antua, dong kasi turung Antua pung mayat dari kayo salib la taru Antua dalang kubur. 30Mar Allah kasi hidop Antua kombali. 31La dalang babarapa waktu, Antua kasi unju diri ulang kali par orang-orang yang iko Antua dari propinsi Galilea sampe ka kota Yerusalem. La dong itu tu yang sakarang su jadi saksi par carita soal Antua par katong orang-orang Yahudi.#Utusang pung Carita 1:3
32Jadi, sakarang ni katong mau kasi tau Kabar Bae par kamong soal janji yang Allah su bilang par katong pung moyang-moyang. 33Sakarang Antua su biking akang par katong, dong pung anana cucu ni, waktu kasi hidop Yesus kombali. Ini sama deng apa yang tatulis dalang kitab Lagu-Lagu pasal dua. Di situ, Allah bilang soal Kristus kata,
‘Ale tu Beta pung Ana!
Hari ini Beta jadi Ale pung Bapa.’#13:33b Paulus ambe nats tu dari kitab Lagu-Lagu 2:7. Nats ni pung arti, “Allah su angka Yesus jadi Raja”. Barang, dolo-dolo, orang Israel pake istila ‘Allah pung Ana’ par dong pung raja.
34Allah su kasi hidop Yesus kombali dari kamatiang. Yesus seng bisa mati lai. Allah jua su bilang soal Yesus kata,
‘Dari dolo Beta su janji mau kasi berkat par Daud.
Kamong bisa parcaya kalo Beta nanti biking akang par kamong, Beta pung orang-orang.’#Yesaya 55:3
35Ada tatulis jua dalang kitab Lagu-Lagu kata,
‘Tuhan seng kasi tinggal Orang yang seng bardosa ni
pung mayat busu di dalang kubur.’#Lagu-Lagu 16:10
36Waktu Daud bilang bagitu, dia seng bicara soal dia pung diri sandiri. Barang, abis dia biking iko apa yang Allah mau dia biking, dia mati, la dapa kubur di sabala dia pung moyang-moyang, la dia pung mayat busu dalang kubur. 37Mar, Daud ada bicara soal Yesus. Antua mati, mar Allah su kasi hidop Antua kombali, jadi Antua pung mayat seng busu dalang kubur.
38Jadi basudara e, kamong musti tau kalo tagal Yesus su mati di kayo salib, kamong pung dosa-dosa bisa dapa kasi ampong. Ini ni pasáng yang katong ada bilang par kamong. 39Jadi sapa sa yang parcaya Yesus, dia pung dosa samua dapa kasi ampong la Antua bilang kalo dia tu batul di muka Antua. Mar katong seng bisa jadi batul di muka Allah tagal iko Kitab Torat yang Musa su tulis. 40Jadi ingatang bae-bae! Jang sampe apa yang Allah su bilang lewat Antua pung juru-juru bicara tu, akang jadi par kamong. Dong bilang kata,
41‘Ingatang bae-bae e!
Kamong yang suka bicara malawang Beta pung ajarang,
kamong nanti taherang-herang la mati.
Kamong nanti taherang-herang, tagal di kamong pung jamang ni,
Beta nanti hukum orang yang seng dengar Beta.
Beta nanti hukum dong barát paskali.
Mar kamong nanti seng parcaya akang,
biar kata orang laeng bilang akang par kamong lai.’ ”#Habakuk 1:5
42Waktu Paulus abis bicara la dia deng Barnabas mau kaluar dari tampa sombayang, dong dapa minta par bale kombali di hari Barenti Karja minggu muka par sambung dong pung bicara tu. 43Waktu orang-orang kaluar dari tampa sombayang tu, banya dari dong iko Paulus deng Barnabas. Dong tu, orang-orang Yahudi deng orang-orang bukang Yahudi yang somba Allah. Tarus, Paulus deng Barnabas bicara par dong kata, “Parcaya Allah tarus tagal Antua su bantu kamong deng su kasi berkat basar par kamong sampe kamong bisa salamat.”
44Pas hari Barenti Karja minggu muka, amper samua orang yang ada dalang kota tu datang par dengar ajarang soal Tuhan Yesus. 45Waktu orang Yahudi yang seng parcaya Yesus lia orang banya tu datang par dengar Paulus, dong makang hati paskali. Jadi waktu Paulus ada bicara, dong malawang par kasi jatu dia di muka orang banya tu, deng bilang kalo apa yang dia bilang tu seng batul.
46Mar Paulus deng Barnabas bale bilang par dong deng barani kata, “Allah su suru katong musti bilang Antua pung ajarang ni kamuka par kamong orang-orang Yahudi. Mar kamong seng mau parcaya akang. Jadi, kamong sandiri su kasi unju kalo kamong seng pantas par hidop tarus-tarus deng Antua. Jadi, katong mau bale balakang dari kamong la pi kasi tau Antua pung Kabar Bae tu par orang-orang yang bukang Yahudi. 47Barang, Tuhan su parenta katong kata,
‘Beta su pili ale par jadi tarang par orang-orang yang bukang Yahudi,
biar lewat ale, samua orang di dunya bisa tau soal bagemana Beta kasi salamat dong.’ ”#Yesaya 49:6
48Waktu orang-orang yang bukang Yahudi dengar Paulus bilang bagitu, dong sanang paskali la puji-puji Allah tagal ajarang soal Tuhan Yesus tu. Orang-orang yang Allah su pili par hidop tarus-tarus deng Antua, dong jadi parcaya lai.
49Tarus, ajarang soal Tuhan Yesus tu tasiar ka sagala tampa di daera tu. 50Mar orang-orang Yahudi tusu-tusu mulu par dong pung orang-orang basar deng parampuang-parampuang yang pung pangaru. Parampuang-parampuang tu bukang orang Yahudi mar dong somba Allah. Orang-orang Yahudi tusu-tusu mulu sampe Paulus deng Barnabas dapa siksa la dong user dong dua dari situ. 51Jadi, dong dua kabas abu dari dong pung kaki par jadi tanda par orang-orang di situ kalo Allah nanti seng tarima dong, la dong dua pi ka kota Ikonium.#Matius 10:14 52Orang-orang yang iko Yesus yang ada di kota Antiokia tu pung hati paleng sanang, deng Allah pung Roh ada deng dong.
المحددات الحالية:
Utusang pung Carita 13: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
